لنمو الرضيع

المتابعون

تحذير

حقوق الملكية الفكرية محفوظة لمدونة مامى لأول مرة و محذور على اى جهة أو موقع استخدام المادة المكتوبة أو النقل منها دون اذن كتابى

الرسائل و التعليقات ُتقبل من أعضاء المدونة فقط

Translate

share

Share/Save/Bookmark

الأحد، 16 يناير، 2011

نصائح تخص طفل اكبر من سنة

حاولنا ان نجمع لكم عدد من الأسئلة الخاصة بطفل عمره سنة فيما فوق و من تلك الأسئلة :



ابنى بيعيط لو مانمتش جمبه 
س1: ابنى عمره سنة و شهر و وزنه كان عشرة كيلو مع ان وزن الولادة 3200 ، طوله 79 سنتى . . لما كان عمره خمس شهور كنت أحطه فى السرير كان ينام لوحده ، دلوقتى لو حطيته فى السرير يفضل يعيط لحد ما يرجع كل إللى فى بطنه . . و على فكرة هو بيرضع طبيعى و طلع تمن سنان ، اربعة فوق و أربعة تحت

الإجابة : بخصوص وزن الطفل إللى عمره سنة بيبقى من 8 كيلو لـ 12 فى الطفل الذكر ، فابنك وزنه معقول و طوله احسن من وزنه ، عشان هو المفروض يبقى وزنه 11 كيلو ، 11 و ربع كمان . . اما سبب عياط ابنك و بشكل عنيف لأن دروسه فى حالة بزوغ ، و ده بسبب طبيعة تكوين الدرس إللى بيخلق سنه جوة لحم اللسة ، و الدرس عنده سنتين بتغرز فى اللحم ، و هى كفيلة بنوبات الغضب و الألم عند الطفل . . و الحل انك تديله مسكن لألم الدرس وغالبا ما تكون احد مركبات الباراسيتامول بعد ما تعشيه و ترضعيه ، ح ينام فى هدوء . . ما تقلقيش ده مش منوم لكن مسكن للألم
و يمكنكم سماع الموضوع من الدكتور مدحت الزيات استشارى طب الأطفال و حديثى الولادة على الرابط التالى :
 http://www.mediafire.com/?pi0gdrninniacls

عايزة أنمى قدرات بنتى العقلية :
 سؤال2: أنا بنتى عمرها سنة و 10 شهور و بأسئل إيه اللعب إللى ممكن اجبهالها و تنمى قدرتها الذهنية و العضلية و العقلية و تساعدها على التطور ؟ سؤال كمان : هى لغاية دلوقتى ما بترضاش تقعد على البوتى ــ القصرية ــ إزاى ادربها و أخليها تقعد
الإجابة :
ألعاب الطفل فى عمر سنة هى:
ــ البازل و خاصة الخاص بالطيور أو الحيوانات
ــ أو بازل الأشكال ــ المثلث ، المربع ، الدايرة
ــ الرسم : الطفل ما بين سنة و سنتين قادر على مسكن الأوان و الرسم ــ لكن نحاول نختار ألوان من النوع الصحى و الغير ضار
ـ بالنسبة للتدريب على التواليت يفضل انك تجيبى قاعدة بى بى و تحطيها على التواليت ، الطفل بيفرح انه بيقلد الكبار و بيتشجع و بيقعد عليها ، مرة فمرة بنتك ح تدرب و ح تطلب التواليت بنفسها . . و بلاش العنف مع الأطفال فى الحالات دى . . و عشان اشجعها على الجلوس ، اقعد جمبها و انا ماسكاة قصة و افرجها الصور و احكيلها حدوتة عشان ترضى تقعد عشر دقايق او ربع ساعة . . و مش بالإجبارى و مش بالعافية ، لكن بالحب و الحنان
و يمكنكم سماع الموضوع من الدكتور مدحت الزيات استشارى طب الأطفال و حديثى الولادة على الرابط التالى :
 http://www.mediafire.com/?4eep0kkedygpvqy

ابنى ما بيكلش :
س3 : ابنى عنده سنة و عشر شهور و لغاية دلوقتى ما بيآكلش غير لبن و بسكوت أو شربة لسان عصفور ، سيريلاك ، و مابيرضاش يآكل من أكلنا إلا قليل قوى و غالبا الشوية دول بيبقوا رز و ملوخية . . فده ممكن يأثر عليه ؟؟ و على نموه ؟؟ مع العلم ان وزنه 12 كيلو و طوله 75 سنتى . . و وزن الولادة 2300
الإجابة : ابنك ماعندوش حالة مرضية ، بس هو من الأطفال إللى بتنقى الأكل ، و ده نوع معروف بين الأطفال . . وعشان أخلى ابنى يجرب أكلة جديدة لازم استفزة ، يعنى و احنا قاعدين على السفرة و بنآكل اكون سايبة ابنى جعان بقاله تلت أربع ساعات من غير أكل . . و اعمله طبق معانا ، لكن ما أكلهوش الأول ، أبدأ آكل أنا و كل إللى على السفرة و ابنك أول ما ح يلاقى الناس كلها بتآكل ، ح يتطلب يآكل ، هنا أكليه معاكم . . و ما تنسيش أن الطفل عنده حب التقليد ، و دى صفة حاولى تستغليها بشكل ايجابى . . و أوعى تسيبى أكلك و تقعدى تأكلي ابنك، لأ ، تديله معلقة أو اتنين و تكملى أكلك عشان يبقى مشتاق و عنده فضول للأكل و للتقليد . و كل يوم تعملى نفس الحكاية لحد ما تقدرى تحددى أنواع الأكل إللى ابنك بيحبها و انتى و تثبتى عليها . . و ياسلام و لو فى طفل تانى و تبدئى تأكليه ، ح تلاقى إللى رافض الأكل ده بيتخانق و يعيط عشان عايزك تديله الأكل . . فوجود الأخ الأكبر بيكون حافز و دافع للطفل إللى مش راضى يآكل . . و هو وزنه كويس ، لأن الطفل عند سنة و نص بيكون وزنه من 9 و نص لـ 13 و نص

و يمكنكم سماع الموضوع من الدكتور مدحت الزيات استشارى طب الأطفال و حديثى الولادة على الرابط التالى :
 http://www.mediafire.com/?6aobav2oiaidu32



فتحة راس ابنى قفلت بدرى :
س4 : انا ابنى عمره سنة و نص و وزنه 13 و نص كيلو و طوله 83 . . و فتحة راسه قفلت و هو عمره 9 شهور ، فيا ترى غلط انها تتقفل بدرى ؟؟ و كمان كان بقاله اسبوع بيكح و عنده حرارة و انا اديته مضاد حيوي و دواء للحساسية ، هو دلوقتى أحسن لكن فى كحة بسيطة

الإجابة : الطفل عند عمر سنة و نصف بيكون وزنه من 9 و نص لـ 13 و نص ، و الطول من 77 سنتى لـ 88 سنتى ، فأبنك وزنه و طوله كويسين . . اما عن الكحة الباقية سببها وجود بواقى بلغم و الحل انك تديله مذيب للبلغم ، مرتين فى اليوم بالنهار ، ده ح يطرد البلغم . . أما عن موضوع فتحة الراس فهى عادة بتقفل فى عمر سنة أو سنة و نص لكن عند بعض الأطفال بتقفل بدرى و بيكون عمرهم 8 شهور و ده نتيجة زيادة الكاسيوم عندهم ، و هذا امر طبيعى مدام مافيش مظاهر لزيادة الضغط فى المخ .

ما معنى زيادة الضغط فى المخ :
ــ يعانى الطفل من قئ مستمر
ــ عيون الطفل تنزل و جلدها يبقى مهدل ـ و تكون حرارة الطفل مرتفعة و لحل هذه المشكلة لازم نعمله عملية
و يمكنكم سماع الموضوع من الدكتور رفت الجابرى استشارى طب الأطفال و حديثى الولادة على الرابط التالى
 http://www.mediafire.com/?44tnygoz7fsi7x9



ابنى رافض الأكل و عايش على العيش :
س 5: ابنى عنده سنة و ست شهور داخل على السبع شهور ، رافض الأكل ، وزنه 11 كيلو و 200 و طول 82 ، و طلع سنان و طلع دروس و كله ، رغم انه بيآخد ببرونة 180 سنتى الصبح و واحدة بلليل . . و طول اليوم ممكن يآكل عيش و رافض كل انواع الأكل ، و انا جربت اكله سوتية و بيرية puree ؛ لكن برضه مش راضى يآكل . . مش عارفة السبب ، يمكن عشان أنا بدأت أأكله لما عمره وصل 8 شهور
الإجابة : ابنك وزنه هايل و أكيد هو ماشى بالببرونا طول النهار ، مش ممكن يكون مرة الصبح و مرة بالليل بس ، ده فاضله الانايب ، و دى بتطلع عند عمر سنة و سبع شهور . . و هو رافض الأكل عشان انتى ابتدى الأكل متأخر ، فابنك رافض المعلقة لأنه المفروض يتعود عليها و على شكلها و استخدامها قبل ما يكون عمره ست شهور .. الحل انك تحطى لأبنك الأكل فى الببرونا . . ده غير ان ابنك بيسنن بدرى فعجباه فكرة استخدام الببرونا كتتينة ، يرضع شوية و يعض عليها شوية عشان تخفف عنه ألم التسنين ، و الدليل ان ابنك طول النهار ماسك الببرونا ان وزنه مش وحش و طوله كويس .. فلازم تعوديه على الأكل شوية شوية عشان لما تفطميه . . و الحل بسيط انك تخدى ابنك و تخرجى من البيت ، روحوا النادى و تسبيه يلعب لحد ما يجوع و يطلب الببرونا نقوله انها فى البيت و نديله أكل كمية صيغرة ، شوية مع شوية و مرة مع مرة ينسى الببرونا و يتعود على الأكل

و بالنسبة لعصبية الأطفال :
احنا السبب فيها ، بنتعامل مع الطفل على انه ما بيفهمش .. مع انه بيفهم كل حاجة . . فمن غير زعيق أو ضرب نشرحله و نفهمه و هو ح يستجيب . . لكن بالزعيق و الضرب حيكون عصبى
و يمكنكم سماع الموضوع من الدكتور مدحت الزيات استشارى طب الأطفال و حديثى الولادة على الرابط التالى :
 http://www.mediafire.com/?tpkhh0vf849m88a

ابنى وزنه ما بيزيدش :
س6: انا ابنى عمره سنتين ،و الحمد لله بيآكل كويس ، بس مافيش أى زيادة فى وزنه ، معنى كدة انه ما بينموش . مع انه اتولد 4 كيلو و دلوقتى وزنه 11 كيلو و ربع ، و طوله 80 سنتى
الإجابة : ابنك قصير ، المفروض الطفل إللى عمره سنتين يبقى طوله ما بين 83 و حتى 92 . . فلازم تتابعى مع دكتور غدد عشان يشوف هرمون النمو الخاص بأبنك . . وزن ابنك مافهوش مشكلة لأن وزن الطفل إللى عمره سنتين بيتراوح ما بين 11 كيلو و نص و حتى 14 و نص . . المشكلة عند ابنك فى الطول
و يمكنكم سماع الموضوع من الدكتور رفعت الجابرى استشارى طب الأطفال و حديثى الولادة على الرابط التالى http://www.mediafire.com/?0dszz2h5rq5p324

ابنى عنده مغص مزمن :
س7 : عندى عبد الرحمن عمره سنة و شهر ، و على طول بيشتكى من مغص فى بطنه و عنده انتفاخ على طول ، لدرجة انه ما بيقدرش يآكل من شدة الألم إللى فى بطنه . . مع العلم ان وزنه 10 كيلو ، و بيرضع طبيعى . . و لو أكل أو ماكلش دايما عنده مغص ،و لما يجيله المغص او الإنتفاخ بيكون معاهم امساك . . و على فكرة انا دخلته الأكل لما بقى عمره ست شهور ، و مع ذلك عنده مغص من يوم ما اتولد لحد عمره ده
الإجابة : مدام ابنك ما عندوش اسهال مستمر و لا تعب فى صدره بشكل مستمر و وزنه بيزيد باستمرار ، ما تقلقيش . . . إللى عند ابنك اسمه "عدم نضج فى القناة الهضمية " و بيكون سببها عدم القابلية فى هضم القمح الموجود فى الأكل و ساعات بيكون معاها اسهال و كتير ما بيبقاش معاها ، لكن الأكيد انها مصحوبة بأنيميا ، اعرضى ابنك على استشارى طب أطفال عشان يحدد السبب و نتأكد ان القمح هو المشكلة و نمنعه من أكل طفلك

و يمكنكم سماع الموضوع من الدكتور رفعت الجابرى استشارى طب الأطفال و حديثى الولادة على الرابط التالى :
على الرابط التالى http://www.mediafire.com/?a8t5wio9pjry92x

ابنى كان عنده نزلة معاوية و رافض الأكل :
س8 : ابنى عنده سنة و نص وزنه 12 كيلو ، كان عنده نزلة معاوية و الحمد لله خف منها ، بس هو فاقد الشهية و مش راضى يآكل خالص و عايز يرضع و بس و لما بيآكل بيآخد كوباية زبادى ، و أى أكل تانى بيرجعه . . مش عارفة أعمل معاه إيه ؟؟
الإجابة : دى حالة كل الأطفال بعد المرض ، بيرفض الاكل ، و عشان نرجعه لنظامه الغذائى بتبقى مشكلة ، ده غير ان ابنك مستسهل الرضاعة مع انها مش بتشبعه . . و الحكاية دى سببها انه فى فترة المرض ما كانش بيآخد حاجة غير الرضاعة عشان ما نعرضوش للاسهال . . و عشان نرجعه للأكل محتاجة مجهود كأنك بدربيه على الأكل من أول وجديد . . الحكاية محتاجة صبر . . و الحمد لله ابنك وزنه كويس .. حاولى تأكليه كل 3 او 4 ساعات و كل ما تأكلى رضعى ، و كل ما ترضعى أكلى عشان يرجع يتعود على الأكل من تانى . . مافيش حاجة اسمها تطاوعيه و ترضعيه و بس مهما كان لبنك زايد و بيغرق فى الـ bras ، لأن لبنك دلوقتى ما يكبرش ابنك . . الصبر هو الحل ، و ماتنسيس ان ابنك ما خلصش تسنين ، و خارج من فترة مرض ، و محتاج لتغذية . . ما تطوعيهوش و حاولى تأكليه و سلاح فى الحالة دى هو الحب و الحنان و مافيش مانع شوية رضاعة عشان نفتح نفسه على الأكل

و ممكن تسمعوا الموضوع و تفاصيله من الدكتور مدحت الزيات استشارى طب الأطفال و حديثى الولادة على الرابط التالى :
على الرابط ده http://www.mediafire.com/?elb4371ebjue4h6
و لكم تحياتى
مامى لأول مرة
 http://la3ya3nyno.blogspot.com/

هناك 38 تعليقًا:

  1. بارك الله فيكم على الاجابات بس انا عندى سؤال يرجى الاجابة عليه عندى محمد سنة و10 شهور وزنه 11 كيلو وطوله مابين 79 و80سم علما بان وزنه فى اليوم السابع من ولادته كان2.15 فهل وزنه وطوله مناسب لسنه لانى بحس انه ضعيف اوى وهل فى اكلات معينة تزيد من وزنه بالله عليكم الاجابة

    ردحذف
  2. استنى على ابنك لحد ما يتم سنتين لو لقيتى طوله أقل من 83 سنتى يبقى لازم يروح لدكتور غدد .. و ده لأن الطفل إللى عمره سنتين ، المفروض يبقى طوله ما بين 83 و حتى 92 . . فلازم تتابعى مع دكتور غدد عشان يشوف هرمون النمو الخاص بأبنك . . وزن ابنك مافهوش مشكلة لأن وزن الطفل إللى عمره سنتين بيتراوح ما بين 11 كيلو و نص و حتى 14 و نص . . المشكلة عند ابنك فى الطول .

    ردحذف
  3. أما عن الأغذية من أهم الأغذية التى تساعد على النمو بشكل جيد كل البروتينات زى اللحم و البيض و اللبن و البليلة
    و يمكنكم قراءة الموضوعات التالية
    http://mamy1st.blogspot.com/2010/12/blog-post_17.html

    و كذلك هذا الموضوع و هو بيتكلم عن الفيتامينات إللى بتساو عنوانه
    http://mamy1st.blogspot.com/2011/02/blog-post_25.html

    ردحذف
  4. السلام عليكم انا ابنى عمره سنة و10 شهور ووزنه 11كيلو ونصف وطوله 81سم علما بان وزن ولادته كان 2 كيلو فهل هذا مناسب لسنه واريد اكلات تزيد من وزنه لانه ضعيف جدا ورافض الاكل باستمرار علما انه لم يرضع طبيعى سوى ثلاثة شهور فقط ثم بدا يرضع صناعى والان يرضع لبن جامسى بالبرونة واريد ياخذ بالكوب ومتى يبدا الطفل فى الجلوس وحده على التوالت

    ردحذف
  5. الطفل الذكر فى عمر سنتين بيكون وزنه ما بين 10 كيلو و نصف و 14 كيلو و نصف .. و ده معناه ان ابنك وزنه الحمد لله كويس و انتى قدرتى تحسنى وزن الولادة ..بالنسبة للطول ابنك بتهيقلى قصير شوية .. استنى لحد ما يتم سن سنتين : لو وزنه زاد و طوله لأ من فضلك تعرضيه على دكتور غدد ، لأن فى عمر نستين المفروض وزن الطفل الذكر يكون 12 كيلو و طوله 85و نص
    .. بالنسبة للأكلات انصح بمراجعة الموضوعات التالية :
    http://mamy1st.blogspot.com/2010/12/blog-post_17.html

    و الموضوع ده كمان
    أما عن الأغذية من أهم الأغذية التى تساعد على النمو بشكل جيد كل البروتينات زى اللحم و البيض و اللبن و البليلة
    و يمكنكم قراءة الموضوعات التالية
    http://mamy1st.blogspot.com/2010/12/blog-post_17.html

    و كذلك هذا الموضوع و هو بيتكلم عن الفيتامينات إللى بتساعد على النمو عنوانه

    و راجعى موضوع الأخطاء الشائعة فى التغذية على الرابط التالى
    http://mamy1st.blogspot.com/2011/04/blog-post.html

    و اقرائ فى الموضوع ده نقطة تتحدث عن مظاهر سوء التغذية عن الأطفال
    http://mamy1st.blogspot.com/2010/11/blog-post_11.html

    ردحذف
  6. بالنسبة للبن الجاموسى و قفيه فورا و بدليه بلبن بقرى لأنه اخف على معدة الطفل ، و ده سبب رفض أبنك للأكل .

    من فضلك تفطمى ابنك من البررونة و تحطيله اللبن فى كوباية مخصصة للأطفال لها بوز أو تحطيله اللبن فى أى كوباية عادية و شربيه عن طريق الشاليمو او الشفاط .. هو ح يتبسط من حكاية الشفاط و ح يتعامل معاها على انه لعبة و ح ينسى الببرونة.. لو ابنك لسة مش عارف يتعامل مع الشفاط شربيه اللبن بقطارة .. فى قطارات بتتباع فى الصيدالية ، اشترى واحدة و قطرى لإبنك اللبن فى بقه لحد ما يتعود على ترك الببرونة هنا ممكن تشربيه من الكوب المخصص للأطفال .. و إغسلى القطارة بعد ما ينتهى ابنك من شرب اللبن ، و ده عن طريق غليها جيدا عشان الميكروبات لا تتراكم بها و تسبب له مغص معوى

    أما عن الموعد المناسب لدخول الطفل الذكر للحمام و جلوسه على التواليت : فده من عمر ثلاث سنوات ، لكن ده ح يحتاج منك تدريب لبعض الأيام و شراء قاعدة تواليت خاصة ابلأطفال حتى لا يسقط ابنك بالقاعدة
    و يمكنك مراجعة الموضوع التالية لمعرفة خطوات فطم ابنك من الحفاض
    http://mamy1st.blogspot.com/2011/01/blog-post_14.html

    ردحذف
  7. بارك الله فيكم

    ردحذف
  8. أزال المؤلف هذا التعليق.

    ردحذف
  9. سؤال الى الدكتور مدحت الزيات

    استشارى طب الاطفال رجاء الرد

    ابنى عمرةسنتين واربع شهور وزنة تسعةكيلووطولة80سم وكان وزنةعندالولادة2ك و900ج غيرمحب للاكل ولاالعصائرولماياكل ياكل الاكل الغيرمغزى وياكل كميات قليلةجدا والوقت الى بين الاكلات طويل جدالكن هومطلع الاسنان والانياب وضرسين من كل جانب فوق وتحت وهوبيحب اللعب جداويفضلةعلى الاكل والنوم

    ردحذف
  10. السلام عليكم انا عندى ريتاج عندها سنه وشهر ووزنها 10كيلو الاربع ومش بتحب الاكل بتعنا هى عيشة على الجبنة والسفن اب والعصائر ومش بترضع طبيعى ومنعتها من اللبن الصناعى من شهر علشان كان بيسبب لها نزلات معويه كتير ودلوقتى بديها لبن بخيرهبس بزوده مياه مغلية فهل طبيعى قله اكلها ولبن بخيره هل هو مضر ليها ارجو الرد وشكرا

    ردحذف
  11. للام إللى بتسأل عن الدكتور مدت الزيات :
    الإجابة :

    أول ملحوظة ان ابنك وزنه صغير جدا و طوله كمان .. الطفل الولد لما يكون عمره سنتين لازم طوله يتراوح ما بين 82 سنتى و 93 و انتى بتقولى ان ابنك طوله 80 سم بس
    و بخصوص الوزن : الطفل إللى عمره سنتين لازم وزنه يبقى ما بين 10 كيلو و نص و حتى 15 كيلو إلا ربع و انتى بانك وزنه 9 كيلو بس

    ارجوكى اعرضى ابنك على دكتور ، عشان يعمله التحاليل اللازمة و يكتبلك على نظام عذائى لأبنك .
    ابنك عشان يكبر كويس و تكون صحته كويسة ، لازم ينام كويس الأول ، لو ما نمش مش ح يقدر يآكل كويس ، نيمى ابنك كويس و اكليه كويس عشان يكبر بشكل طبيعى

    ردحذف
  12. مامة ريتاج

    وزن الطفلة البنت اللى عمرها سنة بيكون ما بين 8 كيلو إلا ربع و حتى 11 كيلو و ربع ، و الطول بيكون ما بين 70 سم و 79 سم .. ف الحمد لله بنتك وزنها كويس اوى و ان كنت أفضل انك تتابعى طولها مع وزنها ، عشان فى علاقة بين الطول و الوزن خصوصا بعد ما يوص عمرها سنتين

    و آخاف ان الزيدة فى الوزن دى تكون سمنه بسبب السفن أب اللى ريتاج بتشربها ، عشان كدة تابعى طولها ... و ضرورى تمنعى الماية الغازية لعدة اسباب :
    - بتسبب هشاشة عظام للاطفال
    - فيها مواد حافظة بتتلف الكلى و الكبد
    - بتسد نفس الاطفال عن الاكل
    لو عايزة بنتك تآكل كويس وقفى المياة الغازية فورا .

    بالنسبة للبن بعد سن سنة مافيهوش مشكلة ، و اللبن البقرى او المعلب كويس و مفيد .. لكن بلاش تزوديه ماية ، الأفضل تدى بنتك كمية صغيرة من غير ماية بدل من كمية كبيرة بماية
    .. كويس انها بتشرب عصير و راعى انك ما تحطيش فيه سكر لو كنتى بتعمليه فى البيت ، و لو العصير جاهز يبقى خالى من المواد الحافظة

    ردحذف
  13. هل ممكن احفظ الادويه خارج الثلاجة

    ردحذف
  14. انا عندى لوجى عندها سنة وزنها 9ونص طلعت سنتين اللى تحت وحاليا بطلع فى السنه اللى جمب السنتين اللى تحت وبتاخد لسكاتة لحد دلوقتى ومش عارفه امنعها عنها ولسه مش بتمشى فهل ده نقص كالسيوم وازاى اقدر امنع عنها السكاته لانها تسبب لها نزلات معويه احياناوهيا شعرها خفيف جدا ارجو الرد وشكرا

    ردحذف
  15. الله يجازيكم كل خير ابني عمره سنه ووزنه 10,75 بتمنى تعطيني نظام غذائي اتبعه معاه حتى يكون الاكل صحي وكمان عايزه الاطعمه التي بتزيد قدرته الذهنيه ولكم جزيل الشكر

    ردحذف
  16. بالنسبة لحفظ الدوا برة التلاجة : من فضلك بصى على علبة الدوا و ح تلاقيه مكتوب عليه يحفظ فى درجة حرارة قد إيه ؟ و غالبا ح تلاقيها أقل من 30 درجة .. و ده معناه ان فى الشتا ممكن الدوا يبقى برة التلاجة ، لكن فى الصيف و فى الأيام الحر لازم نشيله فى التلاجة عشان نحافظ على المادة الفعالة

    ردحذف
  17. الإجابة على مامة لوجى :

    الحمد لله بنتك وزنها تمام بالنسبة لوزنها بس واضح ان فى مشكلة : لأنها متأخرة فى التسنين و المشى مع بعض ، بنتك محتاجة كالسيوم ، وديها للدكتور عشان يعملها التحليل اللازم و يوصفلك كمية الكالسيوم إللى محتاجاها ... لأن البىبى اللى بيمشى بدرى بيسنن متأخر بدرى و بالعكس .. لكن التأخير فى الإتنين يقول ان فى نقص كالسيوم ن اعملى لبنتك تحليل ألكلين فوسفاتيز و اعرضيه على الدكتور بتاعك

    لمنع التيتينة : أى حاجة عايزة تمنعيها عن بنتك ابدئى بالتدريج ، يعنى خلى بنتك تصحى الصبح ما تلاقيش السكاتة او التيتينة ، و بعد ساعتين ادهالها ، و افضلى زودى الساعتين دول لحد ما تبقى ما بتآخدهاش غير وقت النوم ... و مرة فى مرة ، ح نمنع التيتينة او السكاتة عنها وقت النوم عن طريق استبدال السكاتية بالرضاعة الطبيعية و الحمام الدافى ، فتتعود تنام من غيرها

    نظافة التيتينة : حاولى تغلى السكاتة او التيتينة ، و لو هى من النوع إللى بيبوظ من الغليان حطيها فى كوباية إزاز و ادلقى عليها ماية مغلية عشان تضمنى تعقيمها و طبعا تستنى لما تبرد خالص و تديها لبنتك ، اوعى تحطيها فى بق بنتك و هى لسة سخنة

    أما بخصوص شعر البى بى : الشعر الخفيف بيتقل بالتغذية – الأكل – و تغذية الشعر عن طريق استعمال زيت الخروع قبل الحمام بأربع ساعات ، و تحمي بنتك و تغسلى شعرها بصابون او شامبو مناسب للرضع .. ما تحطيش كمية زيت كتير عشان جلد راسها يقدر يتنفس - الوصفة دى عشان بنتك اكبر من سنة – الرضيع اقل من سنة ما نحطش على راسه حاجة ابدا عشان ما تأثر على رأسه

    ردحذف
  18. أما عن سؤال هدى :
    اطمنك ان وزن ابنك مثالى و الحمد لله
    و بالنسبة لجدول التغذية انصحك بقراءة الموضوع ده
    http://mamy1st.blogspot.com/2011/03/blog-post_29.html

    و الموضوع ده كمان
    http://mamy1st.blogspot.com/2011/04/blog-post.html

    ردحذف
  19. ابنى عنده 5 شهور و نص بدات ااكله سيريلاك بالقمح و هو عجبه بس المشكله انه مابيرضاش يقعد مسنود عاوز يفرد ظهره و هو بياكل و انا عارفه انه غلط انه ياكل و هو نايم

    ردحذف
  20. بنتي عندها سنه وخمس شهور وزنها 9كيلو الا ربع هي بتاكل الزبادي والفينو واللبن واللحم والفراخ واحيانا المكرونه المشكله انها مش بتحب الخضار حاسه ان وزنها قليل اعملها ايه

    ردحذف
  21. بالنسبة للأم اللى ابنها عمره خمس شهور و نص :


    كويس انك بدأتى تأكلى ابنك فى العمر ده ؛ لكن انتى استعجلتى فى تأكليه القمح ، فمن الأفضل تدريب الأطفال على أكل الخضار المسلوق و الفاكهة المسلوقة اولا لأنها بتقوى جهاز المناعة و و الجهاز الهضمى .. و فى بعض الأطفال بيجيلهم حساسية من القمح لما يخدوه بدى ، لكن لو ماظهرش أى اعرضا حساسية يبقى الحمد لله خير ، و كلمى زى ما انتى
    و انصحك تقعدى ابنك فى عربية البىبى و انتى بتاكليه ، و هو بكدة ح يلاقى نفسك مجبر على الجلوس ... و لو عربية النونو مش متوفرة قعديه فى حضنك على رجلك و أكليه .. و بعد الأكل افردى لحاف على الأرض و حطى عليه مجموعة مخدات و شلت و اسندى ابنك بيهم و هو جالس على الأرض و قدامه مجموعة لعب كاوتش ، و هو ح يوطى يآخدهم ، و يتعدل تانى ، مرة ح يروح شمال ، و مرة يمين لكن شوية شوية عموده الفقرى ح يبقى اقوى و يقدر يقعد بسهولة بعد كدة

    ردحذف
  22. الرد على الام اللى بنتها عمرها سنة و خمس شهور :

    الطفلة إللى عمرها سنة و نص بيبقى وزنها ما بين 8900 جرام و 13 كيلو الا ربع .. و ده معناه ان بنتك مش وحشة ، لكن ممكن تبقى احسن .. و على فكرة الخضار مهم لبناء الجسم و الانسجة ن يعنى اكل الخضار ما بيزودش الوزن .. لكن هو مهم جدا ، و مش لازم يكون الخضار مطبوخ لكن كمان ممكن تديها شرايح طماطم او عصير طماطم قطع خيار او جزر ، لو بنتك بتحب الرز اكليها محشى بدنجان او كوسة .. و لو بتحب الشوربة حطلها فى شربة لسان العصفور قطعة كوسة او حبة بطاطس او شريحة جزر .. و مع المكرونة ممكن تحطى عليها شوية بسلة و جزر مع شوية لحمة مفرومة ، الأطفال بيحبوها أوى .. مش لازم الخضار يكون بالشكل المعتاد

    ردحذف
  23. ابنتى عمرها سنة وشهرين وعندها حساسية على صدرها وعصبية بطريقة ممكن اعرف العلاج لانها متابعة مع دكتور وللاسف مافى فايدة وكمان طريقة التغزية
    ممكن الافادة ولكم منى تحياتى

    ردحذف
  24. نرجو ان تشتركى فى المدونة حتى نتمكن من الاجابة على سؤالك

    ردحذف
  25. مش عارفة افطم ابنى هو عندة سنة واربع شهور ومتعلق بصدرى جدا بيرضع تقربيا طول النهار والليل حتى مع الاكل العادىوبيطلب يرضع واحنا خارجين فى الشارع افطمة ازاى ياريت يكون فى اجابة وشكرا

    ردحذف
  26. من فضلك تشتركى فى المدونة حتى نتمكن من الرد على سؤالك ... و بعد اشتراكك و ظهور اسمك على المدونة اكتبى سؤالك مرة أخرى و لك تحياتنا ..... كنا قبل كدة بنرد على سؤال أى حد لكن اكتشفنا ان فى موقع اسمه بى بى بيسرق اجاباتنا ، عشان كدة من فضلك اشترى فى المدونة و إسألى أى سؤال تحبيه مدى الحياة

    ردحذف
  27. بنتى عمرها 15 شهر طلعت اربع سنان هل هى اتخرت فى التسنين ووزنها الطبيعى كام ونوع الغذاء

    ردحذف
  28. انا على من السعودية

    ردحذف
  29. يا استاذ على من فضلك تشترك فى المدونة حتى نتمكن من الرد على سؤالك ... و بعد اشتراكك و ظهور اسمك على المدونة اكتب سؤالك مرة أخرى و لك تحياتنا ..... كنا قبل كدة بنرد على سؤال أى حد لكن اكتشفنا ان فى موقع اسمه بى بى بيسرق اجاباتنا ، عشان كدة من فضلك تشترك فى المدونة و إسألى أى سؤال تحبه مدى الحياة

    ردحذف
  30. أم يوسف : نعتذر على التأخر فى الرد عليكى .. اجابة سؤالك تنقسم إلى جزئين :
    أولا :
    الفطام يعتمد على التدرج .. و اعتقد ان اول غلطة تقى فيها انك لا تطعمين ابنك تبعا لجدول غذائى .. من فضلك اعملى جدول لاطعام ابنك و التزمى بيه ... ابنك بيآكل تلت مرات فى اليوم بينهم وجبتين تصبيرة .. و بين الوجبة و التصبيرة تلت ساعات .. دى اول حاجة لازم تعمليها


    تانى حاجة ، لازم تبدئى فى التدرج فى عملية الفطام ... عشان كدة انصحك بالتدرج فى منع الرضاعة تبعا للجدول التالى :
    • تمنعى عن ارضاع الصغير تماما و انتوا برة البيت ، و تهاولى تلهيه ببسكوتة ، بموزة ، بلعبة .. حاولى تشغليه بالشارع و العربيات و البيوت حواليكم .. المهم انك تنجحى ، و فى مرة تخرجى تكررى نفس الموضوع لحد ما يمتنع تماما عن طلب الرضاعة
    • بعد نجاحك فى الخطوة الاولى ، تبدئى الخطوة الثانية و هى منع الرضاعة الطبيعية فى اول خمس ساعات من استيقاظ ابنك ، مهما طلب ، اديله كوباية البىبى و يكون فيهاعصير ، اعشاب درجة حرارتها فاترة ، يكون فيها ماية ، بعد ما تتأكدى انه مش عطشان و لا جعان و يطلب الرضاعة بحكم التعود ، تلهي ابنك عن الرضاعة باللعب ، ببسكوتة ، موزة ، اى حاجة .. المهم تقاومى و تنجحى ... و تستمرى على هذا الموضوع لمدة اسبوعين
    • الخطوة الثالثة ، تمنعى الرضاعة حتى أدان المغرب ، و تقوليه و هو ح يفهم ، لما الدنيا تبقى بالليل ، و تآخديه عن السما و تشاوريله .. و لما تبقول بالليل ابدئ الرضاعة
    • تستمرى على الرضاعة الليلة مهما كان عدد المرات .. ثم تتحولى لتكون مرة واحدة
    • و يوم بعد يم ، سينساها تماما ، خاصة لو بدأتى تهدهديه من غير رضاعة و نام .. المرحلة الأخيرة دى ح تحتاج اسبوع على الأكتر

    ردحذف
  31. هل تطعيم السنة ونص صعب؟ارجو الرد سريعا

    ردحذف
  32. من فضلك تشتركى فى المدونة حتى نتمكن من الرد على سؤالك ... و بعد اشتراكك و ظهور اسمك على المدونة اكتبى سؤالك مرة أخرى و لك تحياتنا ..... كنا قبل كدة بنرد على سؤال أى حد لكن اكتشفنا ان فى موقع اسمه بى بى بيسرق اجاباتنا ، عشان كدة من فضلك اشتركى فى المدونة و إسألى أى سؤال تحبيه مدى الحياة

    ردحذف
  33. السلام عليكم
    بنتي عندها سنة و3 شهور وزنها 9 كيلو وطولها تقريبا 76 طلعت سنتين تحت وبطلع اتنين فوق
    وعايزة اعرف امتي اعلمها تاكل لوحدها
    واللبن البقري افضل ولا الجاموسي انا سمعت اني المفروض ادي لبن كامل الدسم والبقري خفيف يعتبر كامل الدسم ولا لاء انا بشتري العادي مش معلب هل مضر ام لا

    ردحذف
  34. و عليكم السلام و رحمة الله و بركاته
    برجاء الاشتراك فى مدونة مامى لأول مرة حتى نتمكن من الرد على سؤالك
    و تبعتى تقولينا وزن ولادة طفلك قد ايه ؟؟؟

    كنا قبل كدة بنجاوب على سؤال اى حد اكتشفنا ان فى واقع بتسرق شغلنا
    نعتذر لك بشدة على هذا النظام الجديد
    و لك تحياتنا

    ردحذف
  35. انا بنتى عندها سنه 3 شهور ومش بتاكل ى حاجه خالص غير اللبن بس انا فطمها\

    ردحذف
  36. برجاء الاشتراك فى مدونة مامى لأول مرة حتى نتمكن من الرد على السؤال .. و بعد الاش احكيلنا عن يوم كامل فى حياة بنتك و مع التركيز على ذكر الطعام و شكرا

    ردحذف
  37. ابني عندة سنة وشهررين ولسا متكلمش خالص فهل هو متاخر مع العلم انة بيفهمني كويس وهو بيقضي طول اليوم معايا لاننابرة

    ردحذف
    الردود
    1. برجاء الاشتراك فى المدونة حتى نتمكن من الرد عليك

      حذف

please live a comment or a message
ارجو ان تترك تعليق او تجربة شخصية

ملحوظة: يمكن لأعضاء المدونة فقط إرسال تعليق.

moving sky