وصل لمدونة " مامى لأول مرة " السؤال ده
و موضوعه عن فطام الطفل Weaning the child
السؤال :
مش عارفة افطم ابنى هو عندة سنة واربع شهور ومتعلق بصدرى جدا بيرضع تقربيا طول النهار والليل حتى مع الاكل العادىوبيطلب يرضع واحنا خارجين فى الشارع افطمة ازاى ياريت يكون فى اجابة وشكرا
الفطام يعتمد على التدرج .. و اعتقد ان اول غلطة تقعى فيها انك لا تطعمين ابنك تبعا لجدول غذائى مرتبط بالوقت.. من فضلك اعملى جدول لاطعام ابنك و إلتزمى بيه ... ابنك بيآكل تلت مرات فى اليوم بينهم وجبتين تصبيرة .. و بين الوجبة و التصبيرة تلت ساعات .. دى اول حاجة لازم تعمليها
كيفية التعامل مع الأطفال
تانى حاجة ، لازم تبدئى فى التدرج فى عملية الفطام ... عشان كدة انصحك بالتدرج فى منع الرضاعة تبعا للجدول التالى :
· تمتنعى عن ارضاع الصغير تماما و انتوا برة البيت ، و تحاولى تلهيه ببسكوتة ، بموزة ، بلعبة .. حاولى تشغليه بالشارع و العربيات و البيوت حواليكم .. المهم انك تنجحى ، و فى كل مرة تخرجى تكررى نفس الموضوع لحد ما يمتنع طفلك تماما عن طلب الرضاعة برة البيت
· بعد نجاحك فى الخطوة الاولى من الفطام weaning the child، تبدئى الخطوة الثانية و هى منع الرضاعة الطبيعية فى اول خمس ساعات من استيقاظ ابنك ، مهما طلب ، اديله كوباية البىبى و يكون فيهاعصير ، اعشاب درجة حرارته فاترة ، يكون فيها ماية .. و بعد ما تتأكدى ان طفلك مش عطشان و لا جعان و يطلب الرضاعة بحكم التعود ، تلهي ابنك عن الرضاعة باللعب ، ببسكوتة ، بموزة ، اى حاجة .. المهم تقاومى و تنجحى ... و تستمرى على هذا الموضوع لمدة اسبوعين
· الخطوة الثالثة من الفطام the weaning ، تمنعى الرضاعة حتى أذآن المغرب ، و تقولي طفلك و هو ح يفهم ، لما الدنيا تبقى بالليل ، و تآخديه عند السما و تشاوريله .. و لما تبقوا بالليل ابدئ الرضاعة
· تستمرى على الرضاعة الليلية مهما كان عدد المرات .. ثم تتحولى لتكون مرة واحدة
· و يوم بعد يوم ، سينسى ابنك طلب الرضاعة تماما ، خاصة لو بدأتى تهدهديه من غير رضاعة و نام .. المرحلة الأخيرة من فطام الطفل ح تحتاج اسبوع على الأكتر
آخر نصيحة لازم نعرفها :
مش لازم نسمع كلام اطفالنا ، و مش لازم نقصوا عليهم .. دى المعادلة السحرية فى الفطام .. ما تسمعيش كلامه لما يطلب الرضاعة ، لكن بالحب و الحنان و اللعب
و لكم تحياتى
مامى لأول مرة
