السؤال ده وصل لمدونة مامى لأول مرة
خاص بوزن الرضيع و التسنين و الأكل
السؤال :
بنتى دلوقتى 3شهور ونصف وزن الولاده 3500 كيلو جرام ووزنها الحالى 6كيلو جرام وطولها 63 سم وتعتمد على الرضاعه الطبيعيه فقط أنا نفسى اطمن عليها حسه ان هيه صغيره شويه فى الوزن بالنسبه لطولها حاولت مره اديها رضعه صناعى باليل بس رفضتها وانا فرحت بصراحه ن هيه رفضتها انا عايزه اطمن عليهامعلش أصل انا مامى لأول مره وأمتى أبدأ أدخل الأطعمه الصلبه وانا لحظت انا هيه بتريل كتير جدا جدا وبدأت تعضعض كير فى صبعها وبدات تزرجن باليل هل ده ممكن بدايه تسنين .شكرا جزيلا وأرجو الرد
الاجابة :
الحمد لله وزن ولادة بنتك جيد جدا و اقرب للمثالى .. و كويس جدا انها بتعتمد على الرضاعة الطبيعية ... ما تقلقيش على بنتك هى وزنها ممتاز بالنسبة لطولها و سنها ... هى محتاجة تزيد 700 جرام عشان يبقى وزنها مثالى ، لأن الرضيعة إللى وزنه 63 سنتى وزنها المثالى 6كيلو 700 جرام
فأرجوكى ما تديهاش لبن صناعى و تدخلى نفسك فى مشاكل اللبن الصناعى و الامساك و السمنة .. خليكى زى ما انتى ماشية ... و تقدرى تأكلى بنتك اول ما وزنها يبقى سبعة كيلو
بخصوص الريالة و العضعضة دى أكيد بداية تسنين و تقدرى تجبها جل اسنان الخاص بالرضع موجود بالصيدلية ... و تديها عضاضة ، بلاش تيتينة عشان ما تتعودش عليها و ندخل فى مشاكل الفطام منها
و لك تحياتى
مامى لأول مرة
