بالعافية طبعا لما عرفتى تشترى هدوم البيبى ، لا لا أبدا ما ابتكلمش عن موضوع الفلوس ، انا أقصد انك قدرتى تنزلى و تلفى و تشترى و تستحملى اقتراحات و نصايح ده و فتاوى دول ، و هاتى كذا و بلاش كذا مذا . . و بعد طلوع و نزول و لف و دوران الحمد لله اشترينا أحلى هدوم للبيبى . . و مش فاضل غير انه يلبسها
طيب ح يلبسها إزاى و هو جوة بطنك ، طبعا حماتك اول واحدة ح تتريق عليكى و تقولك ساخرة ، ابلع الهدوم و هو ح يتصرف ، هو متعلم يلبسها جوة ، هئ هئ هئ . . ياله من هزار حمواتى
سيبك من حماتك و كملى موضوع الشنطة إللى ح تجهزيها و تخديها معاكى المستشفى للولادة . . أول حاجة لازم تعمليها انك تغسلى هدوم البيبى قبل ما نخديها و يلبسها لأنها بتكون مردومة تراب سواء من تخزينها فى المحلات إللى اشتريتى منها او من تخزينها فى بيتكم ، ده غير كم الإيدين إللى مسكتها و هى مش نضيفة و جلد البيبى حساس ما يستحملش
يرجع مرجوعنا لموضوع شنطة مامى و هى رايحة المستشفى عشان تولد :
لو الولادة طبيعية :
آخد معايا نفس الشنطة لو الولادة قيصرية . . ح تقولولى ليه ؟؟؟ دى إللى بتولد طبيعى بتخرج فى نفس اليوم ، يعنى مش محتاجة هدوم مابيت لها ولا للبيبى . . ح أقولكم كتير من الستات بتدخل على انها ح تولد طبيعى و يحصل حاجة تخلى الولادة تقبى قيصرى ، و طبعا تضطر تبعت أى غريب يجبلها حاجات ليها و للبيبى . . ح تقولولى و غريب ليه ، ح أقولكم لأنها محتاجة كل قريب يبقى جمبها ساعة الولادة ، و مش ح تقدر تفرط فيه عشان شوية هدوم ، و خصوصا لو كانت مامى لأول مرة .
و فى الحالة دى الغريب يدخل بيت و يلعب فى حاجاتها و فى الآخر مش ح يجبلها إللى هى محتاجاها بالظبط . . يبقى مافيش داعى من الأول ، لا نتعب حد معانا ولا نتعب نفسنا .
شنطة الولادة القيصرية :
ــ شامبو للبيبى
ــ فوطة للاستحمام
ــ فوطة للتنشيف
ــ كيس حفاضات صغير لحديثى الولادة
ــ كريم او ببى أويل يتسخدم بعد الحمام
ــ اربع سالوبيتات للغيار
ــ اللفة او الشاية أو الكوفرتة ــ شوفى بتسميها إيه ــ
ــ و لو كنا فى الشتا ما تنسيش الزعابيط و اللكاليك و البطانية ــ و الفانيلات الداخلية و التى شيرات إللى بكم تحت السالوبات ــ و ده على حسب درجة الحرارة وقتها
ــ فى الصيف لبسى السالوبيت على الحفاضة و خلاص
ــ و لو فى الخاريف لبس فنيلة داخلية تحت السالوبت و مع الحفاضة
ــ كيس مناديل معطرة لتنظيف البيبى ــ يستعمل فى المستشفى بس ــ لكن لما ترجعى البيت تنضفى البيبى على الحوض باستخدام ماء فاتر . . و اوعى تستعملى المناديل المعطرة لأنها بتسبب التهابات للبيبى ، لكن فى المستشفى ممكن تستعمليها لأن إللى ح ينضفوا البيبى ح يكون كل الناس إلا انتى لأنك مش ح تقدرى بسبب القيصرية ، فعشان تضمنى ان الممرضات نضفت البيبى كويس جبلهم المناديل المعطرة
ــ فى المستشفى ح يدوا البيبى جلوكوز ، لحد ما لبن صدرك ينشط ، و اول ما تفوقى من القيصرية خلى حد يناولك البيبى و حطيه على صدرك عشان اللبن يتحرك و يملاه و عشان كدة ح تكونى محتاجة سوايل كتير فلازم تخدم معاكى زجاجتين ميه معدنيه و عصير ، حتى لو المستشفى فيها كافتيريا و بيصرفولك أكل ، ح تكونى محتاجة سوايل كتير
ــ زجاجة كحول لتطهير سرة البيبى
ــ شايلة البيبى
و طبعا ما تنسيش هدومك انتى و بعد الولادة ترجعى تعيطى
الحاجات إللى تخصك الوالدة :
ــ هدوم داخلية
ــ قميصين نوم و روب
ــ طقم خروج
ــ حفضات ليكى عشان دم النفاس [و ممكن تلاقيها فى المستشفى بس خدى معاكى احتياطى]
ــ فرشة أسنانك و معجون
ــ فوطة وش
ــ سجادة صلاة
ــ شبشب
ــ بلاش برفا و بادى سبراى و سجاير و بخور و اى حاجة لها ريحة عشان رئة البيبى
ــ كاميرا للتصوير
ــ علبة شيكولاتة ــ لو حد ح يج يباركلك فى المستشفى
واوعى حد يقولك المستشفيات بيكون فيها كل حاجة ، مش صحيح ، مش كل المستشفيات فيها صيدالية و لا كافيتريا ، و بما اننا ماتضمنش أى حاجة ، يبقى مافيش داعى للحوسه
عندما يأتى البيبى بالسلامة :
توصى الأب او اى حد تثقى فى سلوكه ينزل للحضانة و يكبر فى ودن البيبى اليمنى فور ولادته يعنى يقول الآدان فى ودنه اليمين ، والإقامة في ودنه الشمال ــ و بعد كدة تراجعى النقط إللى جاية دى عشان لو الممرضات قصرت او كانت مش عارفة أو على أحسن الظروف مكسلة نفهمها و نوجها
اولا السرة : لابد من الاهتمام والنظافة التامة بسرة البيبى لانها مكان حساس وممكن يشيل اى تلوث فعليكى الاهتمام بها جيدا بمحلول الكحول الابيض
ثانيا : اول ما تحسي ان البيبى عايز يغير تطلبى حد من الممرضات عشان يغيرله
ثالثا : البيبى بيآخد كلوكوز كل ساعتين ، فلو التمريض إتأخر ابعتيلهم
رابعا ً: البيبى لازم يستحم كل يوم فى المستشفى و يغير كل هدومه و تخليهم يوروكى و يعلموكى إزاى تحمى البيبى
خامساً: الإهتمام بعيون البيبى و استخدام القطرة الخاصة به
سادسا ً: دوا الغازات يعطى للبيبى ثلاث مرات فى اليوم عشان يتخلص من الغازات و ينام بعمق
سابعا : ان لم يستيقظ البيبى للاكل لابد من ايقاظه كلساعتين او كل 3 ساعات
كل دى حاجات تطلبى من مشرفة التمريض تنفيذها فى حالة عدم إلتزام الممرضات بتنفيذها . . ده غير نضافة اودتك و تغير الحفاضة الخاصة بيكى نتيجة لدم النفاس
و الف مبروك
