اسئلة خاصة بالتغذية و صحة الطفل يجيب عليها دكتور رفعت الجابرى
استشارى طب الأطفال و حديثى الولادة:
السؤال
ــ ابنى وزنه 9 كيلو و عمره خمس شهور مع انه اتولد 3 كيلو . . لما بيقعد ما بيمسكش نفسه و بيتقلب على وشه
جزء من الاجابة عن صحة الطفل : ابنك عنده وزن زيادة المفروص يبقى وزنه ستة كيلو و نص بالكتير سبعة كيلو . . لازم تقللى عدد الرضعات اللى ابنك بيآخدها ، و لو جاع اديله اعشاب زى التيليو و الكراوية . . ابنك متأخر فى القعاد
السؤال :
ــ عندى توأم عمرهم سبع شهور بيرضعوا صناعى ، و بأكلهم خضار مسلوق و فاكهة مسلوقة . . امتى ادخل لهم الحليب بتاعنا ؟؟؟
جزء من الاجابة عن صحة الطفل : اللبن البقرى او الجموسى مش قبل سنة ، و السبب ان في مواد جسم الرضيع ما يقدرش على هضمها و ده بيسبب لهم هشاشة عظام على عكس الناس ما فاكرة . . ده غير اننا لما بندى الرضيع اللبن البقرى قبل عمر سنةبنزول قابليته للحساسية و الخنفرة. . استمرى على اللبن الصتاعى و معاه كالسيوم فيتامين و فيتامين دال
ــ بنتى عندها عشر شهور و كل ما بتيجى تآكل تعيط و ده بيحصل كمان مع الرضاعة اتصرف معاها إزاى ؟؟؟
جزء من الاجابة عن صحة الطفلة : بنتك ممكن يكون عندها حساسية من السكر الموجود فى اللبن ، هو ده السبب إللى بيخلى الرضيع يعيط و هو بيرضع و يسيب له ألم . . لأن الطفل جعان جدا بس كل ما يرضع يتألم بشدة ، و العلاج انك تتأكدى من الطبيب و يعملك التحاليل اللازمة و يكتبلك على لبن نباتى او حليب صويا خالى من الس
ــ بنتى عمره سنين و نص و وزنها 13 كيلو ، عندها انيميا رغم انى باديها فيتامينات ، و الدكتورة عرفت ان عندها انيميا من شكلها و من تحليل البراز؟
جزء من الاجابة عن صحة الطفل : الأنيميا بتتعرف من تحليل الدم ، و مالهاش علاقة ان الطفل رفيع او طخين . . اعملى تحليل اسمه "صورة دم كاملة " . . و لو طلع عند بنتك انيميا تديها حديد لمدة شهرين تلاتة ، و لو ما اتحسنتش تعملى تحليل كهرو كيميائى عشان نحدد هى عندها ايه بالظبط
ــ انا خدت مضاد حيوى لمدة خمس ايام ، ح يأثر على بنتى اللى بارضعها
جزء من الاجابة عن صحة الطفل : ابدا و لا تشغلى بالك
ــ بنت ابنى مغلبانى فى الأكل ، اتولدت 3 كيلو , الدكتور كتبلها على حديد رغم ان عمرها سنة و عشر شهور و وزنها عشرة كيلو و ما بتكلش غير بطاطس
جزء من الاجابة عن صحة الطفل : حاولى تديها الأكل بكميات صغيرة ، و حولى الأكل للعبة مش خناقة
ــ بنتى عمرها عشر شهور ، كل ما بتآكل بتتبرز ، هو ده طبيعى ؟
جزء من الاجابة عن صحة الطفل : بنتك طبيعية ، بس هى عندها معدة نشطة ، و دى حالة مش مرضية و ح تختفى بالوقت . . اعمليلها تحليل براز للاطمئنان الزائد ــ كأنى بانفخ فى الزبادى
أسئلة عامة :
السؤال :
ــ ابنى عنده خمس شهور ، و خد مضادات حيوية كتير بسبب البرد المستمر عنده ، و رغم انه خف من البرد إلا انه عنده حكة ناشفة ، ده غير ان رجليه مش صالبة نفسها ، كل ما أقعده يميل لأدام . . هوو كدة حالته خطيرة ؟؟
جزء من الاجابة عن صحة الطفل : لو ابنك بيتابعك و بيلاغيكى يبقى نموه الذهنى كويس . . هو صحيح متأخر شوية ، و لازم يتفحص عند الطبيب عشان يشوف بيقعد إزاى و يوزنه و يكشف على اعصابه ، عشان نعمله تقيم للنمو الذهنى . . و اوعى حد يقولك ان ابنك عنده حساسية صدر ولا يوصفله بخاخة ، هو صدره ح يفضل يزيأ لمدة سنة فمتقلقيش
ــ بنتى بتنزل افرازات صفرا من عنيها أعمل إيه ؟
جزء من الاجابة عن صحة الطفل : ده بسبب ضيق القناة الدمعية ، و الالتهابات فى العين . . . و الحكاية دى بتستمر ما بين ست شهور و سنة من عمر الرضيع . . الحل انك تنضفى العين بقطرة و ماية دافية ، كل عين قطنة مختلفة عشان ما ننقلش الميكروب من العين دى للعين دى ، و نسنعمل قطرة مضاد حيوى تلت مرات فى اليوم لمدة خمس أيام . . و ندلك القناة الدمعية بالضغط الخفيف عند زاوية العين عند كل راضعة ؛ فده يوسع القناة الدمعية و يقلل الالتهابات
ــ ابنى اتولد بالصفرا و بقاله شهر بيتعالج منها و مع ذلك هى لسة عالية ، و و صلت لعشرة و الدكتور كتبلى على دوا بس قالى انه بينيم ، و انا خفت أدهوله ، فمش عارفه اديهوله ولا لأ ؟
جزء من الإجابة عن صحة الطفل: اعملي لإبنك تحليل الغدة الدرقية ، فلو طلع طبيعى مع ابنك إللى عمره شهر و الصفرا عنده عشرة ، يبقى ابنك طبيعى ، و ما تديش الدوا و رضعيه كويس
ــ بنتى اتولدت و عندها حول فى عنيها . . يا ترى ده ممكن يروح بعد كدة ؟
جزء من الإجابة عن صحة الطفل : فى فحص روتينى بيتعمل للأطفال بعد الولادة و منها فحص قاع العين . . و لازم كل أم تروح للدكتور تطلب منه يفحص قاع العين ، لن الفحص ده يؤكد لنا ان مافيش عتامة على قاع العين أو على القرنية ، فلو قاع العين سليم ما نقلقش من الحول ؛ ح يروح فى اول 9 شهور
ـ بنتى عمرها سنتين و نص بتحب تبربش بعنيها . . ده خطر ؟؟
جزء من الإجابة عن صحة الطفل : بنتك بتحاول تكتشف بيحصل ايه لما بتبربش ، ما تقلقيش هى بتلعب و ده نوع من الاكتشاف عند الأطفال و عشان نتأكد نفحص قاع العين
و لكم تحياتى
مامى لأول مرة
