لين العظام عند الأطفال

يا ترى لين العظام عند الأطفال حاجة خطيرة ؟ طيب له علاج ؟ و بيستمر مدة قد إيه ؟!! و للاجابة على السؤال ده قدرنا نجيب تسجيل للدكتور مدحت زيات طبيب الأطفال و حديثى الولادة و قال :
" لين العظام معناه نقص فى الكالسيوم ، و رغم ان الكالسيوم موجود فى لبن الأم او اللبن الصناعى . . لكن امتصاص الكالسيوم من الأمعاء يتطلب وجود فيتامين "دال" النشط . . و ده بيجى من أشعة الشمس لما بتلامس الجلد بيتكون فيتامين "دال" 3 ، و بمروره عبر ه الكبد و الأمعاء يبقى فيتامين "دال1" النشط . . و أهميته تتمثل فى انه العنصر الرئيسى لإمتصاص الكالسيوم اللى بيقضى على لين العظام . . ف لو مش موجود فيتامين "دال 3" النشط مش ح يمتص الكالسيوم . . و غالبا نقص الكالسيوم بيكون بسبب التغذية و تحديدا سببها سوء التغذية . و من المعروف علميا ان لبن الأم فيه فيتامين "دال " بشكل قليل ، عشان كدة أى حد بيرضع طبيعى لازم يأخذ فيتامين "دال" من الشهر التانى عشان نكون مطمنين ان الرضيع مش ح يجيلوه لين عظام . . و حتى لو بيرضع لبن صناعى ، برضه يآخد فيتامين دال .. و احنا بنضطر نكتبه للأمهات لأنها ما بتقدرش تعرض ابنها للشمس ، سواء عشان مش فاضية ، او ماعندهاش بلاكونة ، او ما عندهاش وقت تخرج تروج النادى أو أى جنينة تقعد فيها ابنها .


أعراض لين العظام تظهر من بعد الشهر السادس :
ــ الراس تكون مربعة
ــ تأخر فى ظهور اللأسنان
ــ رست الإيد يكون عريضة
ــ تشوهات فى القفص الصدرى و تبروزات و نتوءات به
ــ تقوس فى الرجلين
ــ ضعف عام
ــ نقص الكالسيوم ممكن يسبب تشنجات
ــ و الإيدين تكون دايما مقفولة
و يمكن لكم سماع الدكتور مدحت الزيات و كلامه عن لين العظام عند الأطفال على هذا الرابط


http://youtu.be/udQu89eL0-4


تشخيص لين العظام بيكون عن طريق تحليل الدم أو الأشعة على الإيد و العضم . . و بيعملوا تحليل اسمه "ألكلين فوسفاتيز"

-->

 أسئلة للدكتور مدحت الزيات :


ــ بنتى عندها شهرين و نصف وزن ولادتها 3200 كيلو ، و بقالها 12 يوم لا تتبرز إلا باللبوس ، ده غير انها بتمص اصابعها كتير جدا و هى نايمة ، مع العلم انها ترضع طبيعى و وزنها 5300


جزء من الإجابة : لما بنتك ح تآكل ح تبقى طبيعية ، اديها شيح بابونج سواء من الصيدالية او من عند العطار ، بنتك عندها امساك فسيولوجى ، و بعد الشهر التالت تقدرى تديها عصير تفاح . . و لو بتعضعض فى اصابعها بالليل ممكن تكون جعانة ـ و عشان تعرفى و تتأكدى من الحكاية دى شربى بنتك أعشاب لو خدتها تبقى جعانة


ــ ابنى عنده تلت شهور و نص و بيرضع طبيعى ، وزن الولادة 3 كيلو و دلوقتى 8 إلا ربع ، و بيآخد دوا عشان لين العظام ، هو بينام باللي 8 ساعات ، هو كدة بينام كتير ؟ و احنا لازم نخسسه ؟؟


جزء من الإجابة : هو مليان شوية ، بس ما تقلقش. . مدام عملت وظيفة الغدة الدرقية اول ابنك ما اتولد و طلع كويس يبقى ما تخافش ، و 8 ساعات نوم كويس جدا


ــ ابنى عنده ست شهور ، و كل ما أشيله أحس ان جسمه بيطقطق ، و دايما حاطت إيده عند ودنه و بيشد ودنه طول ما هو صاحى ده فيه خطورة ؟؟


جزء من الإجابة : الطقطقة عادية فى الأطفال مدام بيحرك إيده و رجليه بشكل عادى ، لكن الصوت ده نتيجة ان عضمة رجله بتكون قصيرة ، و كل ما يكبر فى الوزن العضمة ح تكبر ، و قبل سنة ح تكون راحت . . بالنسبة لودانه لازم نتأكد ان ما عندوش إلتهاب فى الأذن الوسطى ، لكن لو بيرضع كويس و بينام كويس يبقى مافيش إلتهاب و فى الحالة دى يكون بيشد ودنه بسبب التسنين .


ـ ابنى وزن الولادة2400 و دلوقتى 6700 و اول ما تم شهر الدكتورة كتبته على "فيتامينات مركبة" multi-vitamin ، و بعد تلت شهور كتبتله على كالسيوم ، و هو بيرضع طبيعى و ما بدلوش أعشاب ولا أى حاجة غير اللبن ، و مش عارفة حصله إيه فجأة ، ده بقاله أسبوع بيصحى كل ساعاتين عشان يرضع


جزء من الإجابة : ابنك وزنه كويس ، اديله فيتامين دال لما يبقى عمره شهرين عشان يساعد على امتصاص الكالسيوم ، ابنك مش محتاج لمجموعة الفيتامين او multi-vitamin . . و بقى بيصحى عشان ما بقاش بيشبع و محتاج يآكل وجبة مع الرضاعة عشان يعرف ينام خمس ساعات على بعض


ــ ابنى عنده سنة و سبع شهور ، و عنده لين عظام ، و ماخدش فيتامين خالص غير لما وديته للدكتور من قريب ، و هو فعلا إتأخر فى المشى ، ده غير ان مشط رجليه معوجين لجوة ، فيا ترى العوجة دى ممكن تروح ؟؟ مع العلم انه بيرضع طبيعى بس ، ما أكلتوش غير من قريب


جزء من الإجابة : ابنك حالة نموذج للين العظام ، عشان اعتمد على الرضاعة الطبيعية بعد الشهر السادس ده غير انه مابيآخدش أى فيتامين و تحديدا فيتامين "دال" . . انتى درس لكل الأمهات عشان تتعلم انها تدى فيتامين دال لإبنها من بعد الشهر التانى




 S.M.S للدكتور مدحت الزيات :
ــ بنتى عمرها تسع شهور و لم تجلس بعد
جزء من الإجابة :الأطفال بتقعد من غير ما تسند من عمر 6 لـ 8 شهور ، اعرضيها على دكتورعشان يشخص حالتها ، واضح ان عندها مشكلة فى الجهاز العصبى


ــ هل ممكن اعطاء بنتى زبادى فواكهة ، مع العلم ان عمرها تسع شهور
جزء من الإجابة : اه طبعا ، و تقدر تأكليها زبادى عادى ، و تديها فواكهة لوحدها كمان




ـ ابنى عنده 5 شهور و بيفرك دايما فى أنفه و عينه
جزء من الإجابة : حطيله محلول ملح قبل كل راضعة


ــ ابنى عنده عشرين يوم ، يوم البراز بتاعه كويس و يوم بيكون زى الماية الصفرا . . أعمل إيه ؟ و هل هذا يؤثر على وزنه ؟
جزء من الإجابة : البراز السايل ده عادى ، و يعمل من مرتين لسبع مرات فى عمر العشرين يوم ده طبيعى جدا و مش اسهال ، الإسهال بيكون لو عدى عدد مرات التبرز عن سبع مرات


ــ بنتى التواليت بتاعها لونه اخضر غامق و عمرها ست شهور و عشر ايام و ما بتآكلش غير زبادى
جزء من الإجابة : ست مرات تبرز فى عمر ست شهور ، ده كتير . . لازم نعرفى لو فى قئ حرارة فده له معنى . . و الفيصل هنا الوزن ، لو وزن بنتك مناسب لعمرها يبقى تبرزها عادى . . و عشان تطمنى اعملى تحللي براز
 اسئلة أخرى للدكتور مدحت :


ــ ابنى عمره ست شهور و 3 أسابيع ، و اول ما خد تطعيم الأربع شهور مش عايز يرضع طبيعى فاديته لبن خارجى ، و بعد تطعيم الست شهور رفض الأكل ، وزنه 8600 . . و جاله برد و إسهال و قئ ، و رافض كل انواع الأكل أعمله إيه ، ده غير ان الدكتور كاتبله على حديد 5 مللى فى اليوم و كالسيوم 15 مللى فى اليوم ، و فيتامين دال 21 نقطة فى اليوم


جزء من الإجابة : وزنه كويس . . مافيش علاقة بين التطعيم و رفض الرضاعة ،أكيد لبن الأم قل و عشان كدة خد اللبن الخارجى . . التطعيم بيخلى الأبن عصبى ، و ممكن يرفض الأكل لمدة أسبوع كحد أقصى . ابنك محتاج تنويع فى الأكل ، بلاش الروتين. . اما عن الفيتامين فالأرقام إللى قلتيها دى كتير اوى . . اعملى تحليل لإبنك عشان تعرفى لو عنده لين عظام ولا لأ ، و فى الحالة دى لازم يآخد علاج مش الأدوية السابقة


اسمعوا الإجابة بالتفصيل على هذا الرابط
 http://youtu.be/udQu89eL0-4


ــ بنتى عمرها تسع شهور و 10 ايام وزنها دلوقتى 11 كيلو ، بتآخد لبن صناعى مع اللبن طيبيعى ، مشكلتها ان دماغها كبيرة أوى ، و الفتحة ما قفلتش ، و الدكتور قالى انها لازم تتعرض للشمس مع انها بتآخد كالسيوم من عمر أربع شهور ، و من يوم ما اتولدت قافلة إيديها لحد ما وصلت اربع شهور ، ده غير انها ما بتقف كويس


جزء من الإجابة : فتحة الرأس تقفل ما بين عمر سنة و سنة و نص ـ يعنى ما تقفلش دلوقتى . . و لازم تعرفى اسباب كبر راس بنتك ، فمعنى انها قافلة إيديها ان عندها نقص شديد فى الكالسيوم . . ضرورى تعملى تحليل لين العظام و اسمه " ألكلين فوسفاتيز" . . الكالسيوم العادى مش كافى لبنتك ، بنتك محتاجة علاج


 ــ حفيدى عنده 3 شهور و 20 يوم ، و عنده امساك ، و بقاله عشر ايام بيعمل بزقات بعدد 8 أو 9 مرات ، وزنه دلوقتى 6250 ، و مش عارفة أعمله إيه ؟ خصوصا ان الدكتور بيشكك فى لبن الأم


جزء من الإجابة : مدام الحفيد بيكبر كويس يبقى لبن الأم مافهوش مشكلة ، بس أكيد الأم بتشرب حلبة كتير او بتآخد ملين و ده سبب الإسهال او البزقات إللى عند البيبى ، خصوصا انه بيكبر كويس اوعى توقفوا الرضاعة الطبيعية . . احتمال تكونوا بتدوه أعشاب أو بتشربوه ماية حنفية من غير ما تغلوها و ده سبب البزقات دى


ــ ابنى عنده ست شهور و اسبوعين و كان عنده فتق قربى و عملتله العملية خلاص الحمد لله ، بس بقاله تلت شهور بيجيله نبضة زى ما يكون صقعان ، و الدكتور كتبلى على حديد و كالسيوم


جزء من الإجابة : النبضات دى عادية ، و بتحصل فى الأطفال . . ما تقلقوش ، دى مش من علامات نقص الكالسيوم ، و كل ده بيروح لوحده


ــ بنتى عندها سنة و عشرين يوم وما ادنهاش كالسيوم ، و بتمشى متسندة ، ووزنها 9 كيلو إلا ميت جرام ، فمش عارفة أديلها كالسيوم ولا خلاص على كدة ؟ جزء من الإجابة : وزن بنتك مش وحش ، بنتك تعتبر مشيت ، بس هى بتخاف تمشى لوحدها عشان كدة بتتسند. . و فيتامين " دال " مهم مش عشان المشى بس ، لكن عشان الأسنان . . فادى فيتامين "دال " و كالسيوم لبنتك لحد ما يبقى عمرها سنتين و كل سنانها تطلع
و لكم تحياتى
مامى لأول مرة
 http://la3ya3nyno.blogspot.com/