طبعا كلنا تربية سجانين فمتعودين على ان كل شئ ممنوع ممنوع ممنوع ، إلا من رحم ربى ، فده شخص مختلف بس مش كتير ، لأنه برضه بيقول ممنوع بس ممنوع واحدة ده غير انه عبقرى و بيعرف يفند الأسباب .و رغم رغبتنا الشديدة فى ان نرى اطفالنا تكبر و تنمو بشكل سليم إلا اننا نفرض عليهم كم هائل من القيود . . و طبعا قدوتنا فى الموضوع ده الحكومة أدام الله بقائها ــ تحت الأنقاض ــ فاحنا بنطلع عقدنا فى ولادنا
و من أول الأشياء التى نقيد بها حركة ابناءنا هى رغبتهم فى الطلوع على كنب الأنترية او الصعود إلى السرير و ذلك رغبة منهم على تطوير أنفسهم بعد الزحف و المشى ، لكن احنا طبعا نلاقى مليون سبب عشان نحد من هذا التطور و من تلك الأسباب :
ــ ابنى ممكن يقع من فوق الكنبة
ــ زى ما ح يحب يطلع ، ح يحب ينزل ، و ممكن ينزل على راسه و ده يضره
ــ الكنبة ح تتوسخ
ــ مش عايزة أعوده يطلع على الكنبة برجليه
و مليون سبب و حجة افرض القيود على الرضيع و كلها لها اجابات و حل . . ف حكاية الخوف على الرضيع من الصعود إلى الكنبة أو السرير خوفا من ان يقع ، حلها بسيط . . لأ ، مش بقمع الرضع ووضعه فى سجن انفراضى و لكن بوضع كم من الشلت و المخدات إلى جوار الكنبة و حوليها عشان لا قدر الله لو رجليه اتزحلقت و وقع ما يبقاش فى خطر عليه
و إللى ما عندهاش شلت و مخدات تكفى الكنب إللى ف بيتها ممكن تحط لحاف أو كوفرتة او حتة بطانية ملفوفة بملاية و تتنيه عدة تنيات عشان يؤدى الغرد
خافوا على ولادهم ، لكن لا تحبطوهم و لا تمنعوهم من تطوير أنفسهم .
قد يتعدى الأمر ، رغبة الرضيع فى الصعود إللى الكرسى الهزاز ، ده لو كان عندكم كرسى هزاز .. فى الحالة دى ممكن نسيبه يطلع بشرط اكون واقفة جامبه عشان أمنع سقوطه من فوق الكرسى ، او اضع الكرسى بشكل يمنع وصول الرضيع له . . يعنى أحط وش الكرسى فى الحيطة .
لا تنهروا اولادكم ، لكن ابحثوا عن حلول تمنعهم من الوقوع فى المشاكل و المخاطر.
خافوا على ولادهم ، لكن لا تحبطوهم و لا تمنعوهم من تطوير أنفسهم .
دلوقتى ممكن واحد مش عاجبه الكلام ده كله يقولى :" بما ان ابنى طلع على السرير و نزل و حطتله لحاف و مخدات حوالين السرير عشان ما يقعش ، و لفيت الكرسى الهزاز عشان ما يطلعش عليه ، طيب و انا رايح النادى آخد معايا برضع مخدات و شلت و لحاف و لا أعمل إيه مع ابنى إللى كل ما أروح النادى معاه عايز يطلع سلالم النادى . . الف برضه سلالم النادى و اخلى وشها فى الحيطة.
بتحيقلى حضرتك إللى لازم تحط وشك فى الحيط من الكسوف من ابنك ، لأن الحكاية برضه حلها بسيط بس احنا إللى مش عايزين نشغل عقلنا . . ف لو السلالم ارتفاعها صغير ، و ابنك قادر يشيل نفسه و يطلع امسكه من إيده عشان ما يقعش ، لكن لو السلالم عالية و مش ح يقدر يطلع امسكه من إيديه الإتنين و سيبه يرفع رجله و هو لوحده ح يكتشف انه مش قادر يرفعها أعلى من السلمة . . لكن فى الحالين لازم تكون جامبه ، مش تسيبه و تقول هو مسؤل عن نفسه و يطور نفسه بعيد عنى . . مش تحدى هو .
احنا دورنا نحمى ولادنا من الأخطار و نحللهم المشاكل إللى مرت علينا . . مش نقيد حياتهم عشان حضرتنا مكسلين و مشغولين و الحياة مزهقانا و احنا مزهقنها
تانى لو ابنك عايز يطلع سلالم النادى تكون جمبه و تسنده اوعى تسيبه لواحده تحت منطق انه عندى و دماغه ناشفة ، اسيبه يتفلق ، ولا أمنعه بمنطق انه غبى و مش مقدر العواقب . . خليك أب ديمقراطى و خليكى أم ديمقراطية . . و خدوا الجزء الإيجابى من سلوك ابنكم و اتصرفوا بيه و ساعدوه على انه يتخلص من الجزء السالبى
خافوا على ولادهم ، لكن لا تحبطوهم و لا تمنعوهم من تطوير أنفسهم .
و لكم تحياتى
مامى لأول مرة
https://www.youtube.com/user/dahshan2007
