يسأل الكثيرون عن التوقيت الصحيح لتعليم الصغار الصواب من الخطأ و كيف أمدحه و اثنى عليهم
الحكاية بسيطة بس عايزة طول نفس و قوة اعصاب ، ما تتعملوش مع الصغار على انهم المعجزين فى الأرض و لازم يتعلموا من اول امر من سيادتكم ، لن ده مش ح يحصل و هما مش ح يسمعوا الكلام من أول مرة ، فاستعدوا نفسيا انكم ح تقولوا المعلومة الواحدة و تكراروها ولا ميت مرة .
لأ ما اقصدش لا سمح الله ان الاولاد طلعين اغبية لأى حد فى العيلة ولا مؤاخدة ، ولكن هما كل مرة بيعملوا نفس التصرف لكن بوجة نظر مختلفة و ما بيبقوش واخدين بالهم ان التصرف ده بيأدى لنفس النتيجة عشان كدة لازم نكرر الأمر و المعلومة عددة مرات بهدوء . . لحد ما نتأكد ان الطفل استوعبها و بينفذها لمجرد العند و بس . . ح تسألأونى هو فى حاجة تانية غير العند ، ح اقولكم طبعا ، بعض الأطفال بيكونوا مفتقدين لعبكم معاهم فبيحسوا انكم بتتفاعلوا معاهم وقت ما بيعملوا حاجة غلط ، و عشان كدة ح تلاقوهم بيهملوها و هما بيبصولكم و او ل ما تقربوا عليهم يضحكوا و يجروا و يسيبوا الحاجة الغلط إللى بيعملوها
يرجع مرجعنا للطفل إللى بيعمل حاجة بسبب العند و بس ، ده نعمل معاه إيه . . أأأأأأن أأأأأأأأأن آآآآآآآآآآن ، هنا تبدأ نتحول لأمنا الغولة ــ فى ملامحنا بس ــ مش فى السلوك ، مافيش ضرب ، مافيش حدة ، لكن فى غضب يظهر على وجوهنا ، فى نظرة مننا للطفل يبدوا فيها الغضب . . و تانى بأقول من غير ما الجيران تعرف ابنى او بنتى عمل كارثة ــ مافيش داعى للصوت العالى ، لأنها بتسبب رعب للطفل ، فيحصل حاجةمن اتنين يا يكبر و هو شخص مهزوز ، يا يقرر يقاوم الصوت إللى بيخوفه و يتمرد عليه ، فيبقى شخص متمرد و عندى ، لكن ده يما يمنعش ان نبرة صوتنا تتغير وقت الغضب ، تتغير ، لكن ما نزعقش ، ما نصرخش
أم عن التوقيت الصحيح لتعليم الصغار الخطأ و الصواب يبدأ من قبل ان يتعلم البيبى الكلام ، و تحديدا من سن 9 أشهر ، لأنه ح يكون بدأ يزحف و الرغبة فى المعرفة بدأت تكبر . . فى الحالة دى اتابع ابنى من بعيد و انا سيباه حر الحرة و التصرف و اول ما احس انه ح يعمل حاجة غلط اجرى ابعدها عنه او اعده عنها . . لكن لو هو اصر يمسك حاجة انا مش قادرة اتصرف معاها او بدأ يعكل حاجات غلط زى دلق الأكل ، خلع البامبرز ، ابدأ أقول كخ و لأ ، فى بدأ الأمر مش ح يستوعب ، لكن مع التكرار ح يفهم
ملحوظة هامة جدا جدا : ما اقولش كخ و لأ و ازعق للبيبى لمجرد ان الكسل متحكم فيا و مش قادرة أقفل دواليب المطبخ و هو دخل يلعب فيها ، و لا لأنى مش قافلة فيش الكهربا بالبلاستيك الخاص بها . . ولا لأنى مش عايزة ابعد عن إيده رموت التلفزيون ولا الموبيل . . و لا اموته من الضرب لأنه طلع على الكرسى إللى تحت الشباك و انا مكسلة اقفل الشباك ، و تبدأ الحجج البايخة ، أصل ده الشباك الوحيد اللى بيجيب هوا ، يبقى نقوم و نتحرك و نشيل الكرسى و نسيب الشباك يجيب هوا . . لأ . . ما نعملش زى الحكومة . . احنا أهل . . الأول نعمل إللى علينا و نأمن البيبى و بعدين لو هو عمل حاجة انا دليلى احتار فيها ، أقوله كخ و لأ
احذروا اعطاء الأوامر المستمرة لأبناءكم ، مش طول النهار ، كخ ولأ ، نحاول ان اليوم الواحد يكون فى معلومة واحدة حتى لو اتكررت عدة مرات ، لكن مش طول اليوم لأ لأ لأ لأ لأ لأ لأ لأ
البيبى مش قاعد فى سجن ، ما تطلعوش العيال عندهم كبت ، احنا عايزين جيل مبدع قادر على الملاحظة و التفكير و الإبداع ، ما تخوفهمش من البحث . . كفاية الدولة و إللى عاملاه فى البحث العلمى . . احنا دورنا نبعد الخطر عن اولادنا ، و نعلمهم بشكل تدريجى النظام و النظام ح يفضلوا يتعلموه لحد عمر 12 سنة ، يعنى مش كل حاجة لازم نتعلمها من اول سنة
و ان شاء الله ، نبقى نذكر الحاجات إللى لازم نتعلمها سنة فى سنة بس فى لقاء جديد
و قبل ان أتركم اريد أن أذكركم بأهم الأمور و الجسر الوحيد الذى سيبنى عبر الأيام و ينمو مع السنين ، لا تنسوا ان تهللوا و تصفقوا و تفرحوا كلما عمل ابنكم شئ صحيح حتى و ان كان معتاد بالنسبة لكم أو صغير ، فمع كل حركة سليمة يجب ان تقبلوا الصغير و تضموه و تصفقوا له و تهللوا قائلين " شاااااااطر ، برافووووو " . . و مافيش مانع نألف أغنية من كلمتين أو تلاتة و نلحنها كل ما يعمل ابننا حاجة صح
و لكم تحياتى
