خصية الرضيع فى خطر

انا ابنى عنده سنه وشهرين والكيس عنده ساعات بيبقى منتفخ وساعات بيبقى منكمش جدا وفى جمب من الكيس بيبقى مليان والجمب التانى فاضى ,,, وساعات بيبقى فى زرقان بسيط انا لما قريت حسيت ان ابنى عنده فتاء ...علما بانى مسافرة وح انزل مصر كمان شهرين ، وكنت حكشف عليه هناك لانى كشفت فى المكان الى انا فيه وقالولى اشتباه فى فتاء وقالوا قدام شويه ابقى اعمليله سونار ...تنصحونى مااجلش نزولى مصر وانزل حالا ولا الحاله ممكن تستنى ؟؟؟ انا خايفه على حياته الطبيعيه بعد كده ... ارجو الرد وجزاكم الله خيرا

اول حاجة لازم تعرفيها انه يجب علاج أى شئ يخص خصية الطفل قبل ان يتم عمره سنة ، عشان نضمن سلامة الخصية و انتاجها فيما بعد

و معنى انك بتقولى انك ساعات بتلاقى الخصية و ساعات لأ ، فده معناه انها بتدخل جوة البطن و هنا ممكن تتلف بسبب حرارة الجسم  

من جميل صنع الله ان الخصية يجب أن تكون خارج جسم الطفل لأن حرارة الجسم تتلف الخصية ؛ و هى المسؤلة عن استمرار النوع و التكاثر البشرى على سطح الكرة الأرضية . . فوجود الخصية داخل الجسم يعرض الحيوانات المنوية للموت ، مما يسبب العقم فيما بعد للطفل لا قدر الله . . ده غير ان وجود الخصية داخل البطن ممكن تتسبب فى وجود أمراض سرطانية ربنا يعافى كل الاطفال . . لذلك أذا فحصنا الطفل قبل الولادة مباشرة ووجدنا ان خصيته غير موجودة بالكيس الخاص بها لابد ان يعرض على جراح ليساعدنا على نزول الخصية فى أسرع وقت ممكن و قبل ان يصل عمر الطفل إلى سنة حتى لا تتلف

خصية الرضيع فى خطر
http://mamy1st.blogspot.com/

اما حكاية ان فى كيس بيكون مليان و التانى فاضى فده محتاج تحاليل و فحص من الطبيب لأن الدكتور رفعت الجابرى استشارى طب الأطفال بيقول

كثيرا ما نجد ماء او ورم عند الخصية .. و بمعنى أوضح ان الخصية تكون محاطة بكيس من الماية ، و ما بنشيلش الماية دى غير بعد ما يكون الطفل الرضيع تم ست شهور او 8 شهور ، لأن فى احتمالية كبيرة جدا ان الماية دى ترجع لجدار البطن و تختفى .. و الحكاية دى ممكن كل أم أو كل اب يلاحظها لو لقى خصية ابنه كبيرة شوية . . و كل اللى مطلوب من الاهل انهم يستنوا لحد ما يوصل عمر الرضيع تمن شهور  ، فلو الماية دى ما اختفتش هنا يجب ان نتدخل جراحيا .

ففى كل الأحوال لازم تعرضى ابنك على جراح طب اطفال حالا ، لأنك بتقولى ان ابنك اكبر من سنة ، و الخصية حساسة لا تتحمل ان يزيد عمر الطفل عن عمر سنة ..... و الدكتور هو إللى ح يأكد لك موضوع الفتأ ، خاصة أن الفتأ بيكون خاص بالسرة و النوع الثانى خاص  بالأمعاء و بيظهر مكانه ورم عند البنات

ننصحك تنزلى بابنك مصر فورا للعلاج

سؤال 2 :
خصية ابنى أخويا مشعلق
:ساعات بتكون الخصية داخل الكيس و ساعات بتكون برا الكيس و ما بتبنش  
 . . إيه حل الحالة دى ؟؟

الإجابة : فعلا الحالة دى موجودة ، و بتظهر نتيجة وجود عضلة شايلة الخصية و بتكون العضلة دى قوية شوية ، فبتشد الخصية لفوق .. لكن مدام الخصية بتنزل و توصل لغاية نهاية الكيس ما نقلقش . . و عشان تطمنى ممكن تعرضى ابن اخوكى على استشارى فى 
جراحة الأطفال

سؤال 3 :
ابنى عنده سنة و سبع شهور ، و حاولت ادور على الخصية بتاعته ما لقتهاش فى الكيس ،
 فيا ترى الوضع ده طبيعى ؟؟

الإجابة : انزلى حالا روحى للدكتور و يكون استشارى فى جراحة الأطفال ، و خلى بالك لو الخصية معلقة من الناحيتين ده بيقلل جدا احتمالية الإنجاب عند الذكور فى المستقبل . . فالخصية لازم تنزل بأسرع وقت ممكن ، عشان ما تتلف و الحيوانات المنوية بها ما تتأثرش .
و لكم تحياتى
مامى لأول مرة 
http:/la3ya3nyno.blogspot.com/
.