لكل أم تسأل - هذه اجابتنا الجزء3

السؤال1:

بنتى عندها 23 يوم ومن 3ايام كل لما ترضع ترجع هى وزنها 3ك و300 جرام افيدونى ما العلاج

الإجابة :

اول شئ لازم تعرفيها و تقوليه لأى دكتور هو وزن بنتك  ساعة الولادة لأن وزن الولادة هو إللى بيعرفنا ان كنا ماشيين غلط و لا صح .

أما بالنسبة لموضوع الترجيع ففى حاجات كتير بتسبب الترجيع ، منها ان صمام المرئى عند بنتك يكون ضعيف و يسمح بأن كمية اللبن ترتد تانى من معدة بنتك للمرئ و تخرج عن طريق بقها .. أو ممكن تكونى ما بتنظمميش ساعات رضاعة بنتك و بتأكليها زيادة عن اللزوم و ده بيسبب انها بتطرد اللبن الزيادة ، عشان كدة أنصحك انك تنظمى وقت رضاعة ابنتك و ترضعيها كل تلت ساعات ، من كل صدر ربع ساعة .

أو ممكن يكون لبنك زيادة و بنتك بتاخد زيادة عن حاجتها ، فى الحالة رضعيها عشر دقايق بس من كل صدر ..

و لو بنتك كان عندها صمام المرئى ضعيف أنصحك تشترى مخدة رضع من الصيدالية ، المخدة دى بترفع راس البى بى بشكل طبى ما يأثرس على رقبته و فقرتها و يمنع خروج اللبن من معدته إلى المرئ

خطورة الترجيع مش بس فى انها ممكن تضر البىبى و تعرضه للعطش و الجفاف و قلة الوزن لكن كمان ممكن تعرضه انه يشرق و هو نايم .. عشان كدة انصحك بالمخدة الطبية الخاصة بمنع قئ الرضيع فى كل الأحوال

لكن فى الحالتين لازم نكون متأكدين ان بنتك بتكبر و وزنها بيزيد ، يعنى اعرفى وزن الولادة كام و زودى عليها 800 جرام أو كيلو ، لو بنتك بتزيد جربى الطريقتين إللى قلتلك عليهم ، لكن لو ما بتزدش تعرضى بنتك على دكتور لأنه بعد الشر احتمال تكون محتاجة علاج طبى و الدواء لا يوصف إلا بطبيب يعاين الحالة و يفحصها

سؤال2 :

السلام عليكم انا ابنتي اتولدت في السابع هي دلوقتي عنها تقريبا تلات شهور ونص ونخصم شهرين يبقي هي عندها بالتقريب شهر ونص .. و سؤالى هو : 
 هي علي طول مناخيرها مسدوده والدكتور قال هي عندها حساسيه بالانف بس اللى  قالقني ان ساعات بطنها وهي بتتنفس بتقعد تطلع وتنزل ، سألت الدكتور قال ده من مناخيرها ... و بعد كشف بالسماعه قالى انها  كويسه بس انا بيقلقني المنظر و عايزة أتكد لو فعلا الحركه دي من مناخيرها و لا هى عندها مشكلة تانية .. وسؤال تاني معلش هو ينفع اسافر بيها بالعربيه خمس ساعات بس المكان اللى  هنقعد فيه عباره عن قريه سياحيه لمده اربع ايام فهل خطر عليها السفر واخر سؤال معلش بينزل منها من تحت افراز ابيض ده إيه سببه ؟
 وشكرا ارجو الرد وجزاكم الله

الإجابة :

بخصوص السؤال الأول انصحك تقرى الموضوع ده ان شاء الله ح يفيدك جدا و ح تعرفى الاجابة إللى بتدورى عليها

http://mamy1st.blogspot.com/2010/11/blog-post_03.html

السفر بالعربية له شروط عشان ما يضرش الرضيع :

1. اولا تراعى انه يكون معاكى حاجة تحجب اشعة الشمس عن البى بى طول و لمدة السفر
2.  لو العربية مكيفة ح يكون الوضع هايل لكن لو غير مكيفة لازم تراعى درجة اندفاع دخول الهواء من شباك العربية عشان ما تسببش برد فى معدة البىبى او عدم قدرة النونو على التنفس بسبب شدة اندفاع الهواء .. و لو العربية مكيفة تراعى ان ريش التكيف تكون بعيدة عن البىبى و غير موجهه إليه
3. و انتى بترضعى البىبى تراعى ان راسه تبقى مرتفعة و انفه غير ملتصقة بجسمك عشان بعد الشر ما يحصلوش اختناق ــ يعنى ترضعيه و هو شبه جالس ـــ
4. و كل ما يكون جسم البىبى مرفوع أثناء الرضاعة  نضمن انه ما يشرقش
5. لو لقيتى الجو حار جدا ، يا ريت توقفوا العربية فى مكان فيه هوا
6. ضرورى تغيرى للرضيع  البامبرز أثناء السفر عشان الحر مع البراز ح يسبب التهاب للبىبى
7. تختارى ملابس مناسبة لدرجة حرارة العربية ــ لا تسبب له الحر و لا البرد

اما عن تغير الجو فى القرية السياحية فانتى ح تقدرى شدة الهوا هناك ، لو لقيتى الجو صاقعة ح تتصرفى كأنك فى الخريف ، ح تزودى اللبس و تلبسى زعبوط و لكلول و تغطى النونو بالليل ، لو الجو حلوح تلاقى البىبى بيضحك او بيبتسم او على الأقل ما بيعيطش 
 كونى حريصة ان الرضيع ما يتعرضش للشمس ما بين الساعة 12 و الساعة 4 ظهرا لأنها فى الفترة دى بتكون ضارة ــ يعنى تقعدى فى مكان ضا مش يعنى تتحبسى ــ .. و باقى يومك عيشيه عادى جدا ، لو الجو حار ممكن تعملى بين الرضعات اعشاب تديها للبىبى عشان يرتوى بشرط ان الأعشاب ما تأثرش على رضاعة البىبى .. يعنى لو لاقيتى الأعشاب بتسد نفسه عن الرضاعة وقفيها فورا

و بخصوص الإفراز إللى بينزل لو بينزل من قدام فما تقلقيش ، دى هرمونات زيادة و خلال اسبوعين المفروض تروح ، لكن لو الافرازات طولت اعرضى بنتك على دكتور

لكن لو الإفراز من الخلف قد يكون بسبب البرد .. و لو بنتك ما عندهاش برد يبقى تعرضيها على دكتور و هو ح يقولك التحاليل المناسبة

سؤال3 :

إبني الحين في شهره السادس ، وزنه 8 كيلو و 700 جرام و طوله 64 سنتيمتر ،، كان طبيعي أول شهرين لكن بعد الختان عضوه تحرك للداخل ، الدكتور يقول وزنه زايد لما يصير يمشي يضعف و عضوه يرجع طبيعي ، و ما قال انه لازم يشده !!!! أفيدوني

الإجابة :

االعضو الذى يشد هو العضو المدفون داخل الجهاز التناسلى و ليس داخل البطن ، و فى بعض الأحيان لا يظهر أى  جزء منه لدرجة الأن الأم قد تشك  ان كان ابنها ذكر ام انثى .. فابنك مش محتاج  شد عضوه  .. تانى حاجة لازم نعرفها  ان الطفل الذكر فى الشهر السادس يجب ان يكون طوله يتراوح ما بين 63 سنتمتر و 70 سنتمر بشرط ان الطفل إللى طوله 63 سنتمتر يكون وزنه6 كيلو و 200 جرام ... و الطفل إللى طوله 70 سنتمتر يكون وزنه 8 كيلو و نص .. و هنا يظهر ان ابنك عنده تقريبا 2 كيلو زيادة و ده إللى مسبب تراكم الدهون حول عضو الطفل عشان كدة يبدو العضو و كأنه مدفونا بالداخل ، لكن الحقيقة ان  دهون البطن هى إللى متراكمة عليه  فلا تقلقى و نظمى ساعات رضاعة ابنك و لا تطعميه طول الوقت ، لكن كل تلت ساعات .. و خلى بالك ان زيادة الوزن  ممكن تأثر على رجلين ابنك لما يجى يمشى و تسببله تقوص فى الرجلين 

و لكم تحياتى

مامى لأول مرة

http://la3ya3nyno.blogspot.com/

لتعليم الأطفال الأرقام عن طريق الرسم و الألوان

الللعب و الرسم هى أهم أدوات أى أب و كل أم لتعليم اطفالهم .. عشان كدة حطينا صور الأرقام عشان تطبعوها و تبدؤا تلونوها مع أولادكم

اضغط هنا عشان تحمل كتاب تعليم الأطفال للأرقام الخواجاتى

أسهل طريقة لتعليم الأطفال ــ أطفال ما قبل المدرسة - يكونعن طريق القصص و الحكايات ...  عشان كدة 

اضغط هنا لو عايز تعلم اولادك الأرقام بشكل مختلف

ده غير انك ممكن ترسم الأرقام بشكل مفرغ و تعلم الطفل يلونها ، و تأكد ان مع التكرار الطفل ح يتعلم الأرقام
و الأشكال  أهيه أمانة بين إيديكم

اضغط هنا لتحميل كتاب الأرقام الشقية
و لكم تحياتى

مامى لأول مرة
http://la3ya3nyno.blogspot.com/


.

لكل أم تسأل - هذه اجابتنا جزء2

السؤال1 :


السلام عليكم ورحمة الله وبركاته
اشكركم جزيل الشكر على مجهودكم الرائع
انا عندى سوال بخصوص ابنى هو عمره حاليا سنتين و18يوم وزنه حاليا 11.950كيلو وطوله87علما بان وزن ولاته كان 2.15 فهل هذا الوزن والطول مناسب لسنه.
ده غير انه  كثييييييييييير الحركة وعندى وعصبى جدا جدا ؛ فهل هناك وسيلة لتهدئته ؟؟؟ لانه عندما يعصب يرمى اى شئ امامه..... كما انه صعب فى الاكل يرفض الاكل ويفضل شرب العصاير ويشرب ماء بكميات كثيرة جدا... فهل هذا له سبب ؟؟ و ايه العلاج ؟
ارجو الاجابة وجزاكم الله خيرا
الإحابة :

ابنك وزنه مثالى ، ما تقلقيش عليه من ناحية الأكل .. و بالنسبة للماية و العصاير إللى بيشربها فدى احتياجات جسمه بسبب الحر و حرارة الجو

و لو قلقانة انه ما يكونش بيآخد كل احتياجاته من المواد الغذائية المفيدة .. أنصحك تجربى حاجة من تلاتة :

ــ تستنى لما يجوع جدا و هنا هو إللى ح يطلب الأكل لوحده ، و طبعا ما تدهوش أى أكل أو شرب ، عشان نتأكد انه ح يجوع

ــ تخليه يدخل معاكى المطبخ و تعرفيه على الطماطم ، البصل ، الخضار .. و توريه انتى بتطبخى إزاى ، و ده ممكن يحمسه و يحببه فى الأكل

ــ تأكليه الكل إللى بيحبه و تكونى حريصة انه يكون غني بالفيتامينات و العناصر الغذائية الهامة له

أمال بخصوص العصبية انصحك تشوفى الموضع ده

ح يفيدك فى موضوع عصبية ابنك

http://mamy1st.blogspot.com/2011/04/blog-post_26.html


السؤال 2 : تخفيف اللبن


ابنى ما بيرضاش يشرب ماية ، ممكن أشفط اللبن بتاعى و احط عليه ماية عشان أعوض ابنى كمية الماية إللى مش راضى يآخدها




الإجابة :
لا و ألف لاااااااااااااااا ، اوعى تعملى كدة ، انتى كدة بقتلى ابنك
و عن تخفيف اللبن بالماية فى رأى طبى بيقول : انه من الوصفات الضارة جدا  تخفيف حليب  بالماء و اعطاءه  للرضيع .. لازم نعرف ان حليب الطفل يتكون من 85% ماء، لذا فلا حاجة لماء اضافي. الطفل لا يحتاج للماء إلا بعد ادخال الطعام الصلب وخاصة البروتين، أما قبل كدة، فلا تخفيف الحليب بالماء ، لأنه ضار جدا جدا جدا ، و قد يؤدى إلى اختلال في توازن الصوديوم، مما قد يؤدي إلى التشنجات التي ربما أدت إلى الاغماء،و التلف الدماغي  بعد الشر أو الوفاة ــ ربنا يسلم اطفالنا ـ .

سؤال3 :

انا إبني عنده سنة وشهر ، وزنه 11.150 وطولة ثابت بقله ثلاثه شهور علي 80 سم ، هل هذا طبيعي وما هو متوسط طوله في السنة الأولي من عمره وعايزة أعرف إزاي أنمي ذكاء طفلي ؟؟؟؟

الاجابة :

  أما عن تنمية الذكاء فأنا أرشحلك الموضيع دى

طبعا هو غريب و حكاية ان وزن ابنك ثابت دى محتاجة متابعة منك .. لأن متوسط طول الأطفال الذكور فى السنة الأول بتراوح بين 71 سنتى و 81 ، عشان كدة ارجوكى تتابعى وزن  و طول ابنك بشكل مستمر .

و لو وصل سنتين و وزنه ما وصلش ما بين 13 و 15 كيلو و كان الطول المقابل لكل وزن يتراوح ما بين 87 سنتمتر و 94 سنتيمتر 

ف لو وزنه ما زدش من فضلك تعرضيه على دكتور غدد

بس ده لسة بدرى و مش دلوقتى خالص ، استنى لما ابنك يتم سنتين  .. لكن دلوقتى ما تقلقيش

أما بخصوص تنمية ذكاء الأطفال أرشحلك الموضوع ده

http://mamy1st.blogspot.com/2011/02/blog-post_25.html

و ده لتنمية الجسم و الذكاء

http://mamy1st.blogspot.com/2010/10/blog-post_28.html

و ده عشان تعرفى ان كان ابنك موهوب

http://mamy1st.blogspot.com/2010/10/blog-post_2253.html

و لك تحياتى

مامى لأول مرة

http://la3ya3nyno.blogspot.com/

و لكم تحياتى

مامى لأول مرة

http://la3ya3nyno.blogspot.com/

التعامل مع الطفل المتمرد

اعتقد ان كل أم و كل أب هدفه الرئيسى فى الحياة ان ابنهم يكون له شخصية قوية ما تتأثر بالمتغيرات إللى ح يشوفها فى الحياة بعد كدة .. عشان يفضل ثابت على دينه ، منتمى لوطنه ، بار بأهله إللى علموه الصفات دى .. و شخصية الطفل عامل هام جدا في التأثير على نجاح أو فشل مستقبله.

و من أول الحاجات إللى ممكن لأى أب أو أم يلاحطوها على اطفالهم هو التمردد .. و التمرد من أكتر الصفات القادرة على تشوه شكل العلاقة بين الابوين والابناء .

عشان كدة لازم نعرف أسباب هذا التمرد ده عشان ما نقعش فيه :

اول أسباب تمرد الأطفال  هو عدم توفر حاجات الابناء الاساسية. . و هى الطعام ويليها الشعور بالامان .. و اول حاجة ممكن تضيع احساس الطفل بالأمان هى الصراخ أو التهديد والضرب.

لذا فلينتبه الوالدين الى ان الطفل قد يكون:

(1) جائعاً أو يشعر بالعطش.

(2) يحتاج الى تغيير ملابسه.

(3) يشعر بالبرد او الحر.

(4) يشعر بالتعب ويحتاج الى الراحة او النوم .. أو يكون فى شيء يزعج الطفل أو يؤلمه أو يقلقه ويخيفه .. مثلاً: ألم في اذنه.. غازات فى بطنه ... إلخ

(5) انشغال الأبوين عن الطفل يشعره بالضياع لعدم انتباههما اليه وانشغالهما عنه مع الاخرين أو انشغالهما بالعمل.

(6) من الحاجات إللى ممكن تسبب تمرد الطفل هى احساسه بالقلق أو شعوره بانه مش عارف إيه إللى ح يحصله

(7) و من مصادر القلق عند الأطفال هى وجوده فى جو جديد غير مألوف بالنسبة له.. و يكون جو مشبع بالنشاط الزائد .. أو جو ممكن يتسبب فى تعبه أو ارهاقه بدنيا أو عصبيا  أو حتى ذهنيا .

و النصحة اللى لازم كلنا نلتزم بيها اول ما نقابل طفل متمرد  يرفض تنفيذ طلباتنا :

·       نفترض اولاً بان الطفل لا يملك ما يجعله يتعاون معنا بدل من ان نفترض انه يرفض التعاون معناً أو بيتمرد على أوامرنا ؛ فهذا الاسلوب في التفكير يجعلنا نبحث عما ينقص الطفل بدل من اتهامه بانه ولد سيء ونبدأ ننهره ونزجره. .. باختصار نتعامل مع الطفل تماماُ زى العربية اللى بنكون سيقينها و فجأة تقف مننا، بتعمل إيه ؟؟ يكون من البديهي ان تتحقق اولاً من وجود الوقود فيها قبل ان تشك بصلاحية المحرك ونبدأ فى فكه لفحصه.

·       و تانى حاجة لازم نعرفها ان الرفض والمعارضة والتمرد عوارض ظاهرية مثلها مثل الألم الذي يصيب المريض لينبه الطبيب إلى أن هناك خللا ما في جسده .. بنفس المنطق هى وظيفة التمرد : و هى لفت انتباه الوالدين إلى أن للطفل حاجة أو أمنية يريد أن يحققها.

أسباب التمرد عند الأطفال :

-        شعور الطفل بالاضطهاد والظلم وسوء المعاملة .

-         - عدم توفير هدف محدد في ذهن الأولاد، وفقدان الثقة الأمان.

-        عدم تناسب قدرات الأبوين  مع مهارات الطفل و احتياجاته و هى  وتختلف حسب كل طفل، حيث يحتاج بعض الأطفال إلى كثير من التفاهم والاستماع، بينما البعض الآخر قد يكون التنظيم هو أكثر ما يحتاجونه.

أهمية ترك مساحة لرفض الطفل لمطالبنا :

 لازم نعرف إن رفض الاطفال مطالب الأهل يقوي شخصيته واستقلاليته .. الكارثة مش فى أن ناس كتير ما تعرفش الموضوع ده .. لأ ، الكارثة فى ان العديد من الأهل يدركون هذه الحقيقة، ولكنهم لا يعترفون بها إلا عندما يكون الطفل رضيعا أو صغيرا جدا و بيعتبروها مادة للترفيهة لأنهم يضحكون منها ، ويتفكهون بها مؤكدين أن هذا الرضيع يتمرد على أهله ويرفض طلباتهم، بل ويتفاخرون قائلين: إنه قوي الشخصية، أو لها شخصية مميزة، أنه سيكون قياديا ناجحا فإنه يتحكم بنا منذ الآن، وغيرهذا من التعليقات الإيجابية، ثم لا تمر بضعة سنين إلا وإذ بهذه التعليقات تتغير وتصبح: ولد عاق أو عنيد، أو ابنة متمردة و تمردها ده ممكن يوصلها للفجور.

خطوات علاج التمرد عند الأطفال :

1.   السماح للأولاد بحق الرفض ومناقشة طلباتهم، وهذا طبعا يستلزم استماع الأب أو الأم لهم بانتباه، مما يذكرنا بأهم قاعدة وهي: أن يشعر الأولاد بأن الأهل  تستمع لهم فعلا كما تحب أن يستمعوا لك.

2.   تدريب الأهل على أهم المهارات التي يحتاجهوها كي يحدوا من مقاومة الأولاد أو يسيطروا عليها:

(1) الاستماع للأولاد بصبر وتفهم.

(2) التحفيز.

(3) التوجيه.

(4) التنظيم.

فإذا اعتقد الأولاد أن أهلهم يتفهمونهم ويهتمون بهم ؟؟ .. و انتقلت للأطفال ثقة الأهل فى انفسهم و قدرتهم على التخطيط والتوجيه والتنظيم الى الأطفال ، فإنهم عندئذ سيشعرون بالأمان والطمأنينة مما يخفف من تمردهم على أهلهم

3.-  يفتقد الطفل المتمرد إلى الإستماع والتفهم ، و دائما ما يخشى لوم أو مهاجمة أو اتهام  والديه له .. و لو وجد من يسمعه بشكل ودي وإيجابي.. الحال ح يتغير تماما ــ و ح يكون أول سؤال يطرح نفسه " ليه  التمرد على شخص يتعاطف معك ويساندك ".

4. قبل ان نعنف الطفل على تمرده لازم كل أب و كل أم تسأل نفسها عدة أسئلة هامة وضرورية مثل: ماذا يحتاج طفلي؟ ماذا ينقصه؟ ماذا يتمنى؟ ما هو رغباته الحقيقية؟ بدل القيام بنهره وبمعاقبته.

وغالبا ما يكون إبداء تفهم الأبوين موقف الاطفال المعارض، وإظهار ذلك لهم  بوضوح، خطوة هامة ولها قدرة فائقه على تخفيف معارضة الأطفال و تمردهم .

احتياجات الطفل المتمرد :

·       الاستماع والتفهم.

·       يحتاج الطفل الصغير إلى الشعور بأنه فعلا تابع لأهله وأن أبويه مسؤولان عنه

·       أهم رغبة عند الطفل هي أن يفوز بإعجاب والديه، ويسمع كلمات الثناء التي تسعده بشكل عميق.. لذا يحاول أن يطيعهما ليفوز برضائهما. وهذه الرغبة الغريزية، مثلها مثل أية موهبة أو طاقة كامنة تحتاج إلى رعاية وعناية لتنمو وتقوى، وإلا خمدت وتلاشت دون الاستفادة منها،

و لكم تحياتى

مامى لأول مرة

http://la3ya3nyno.blogspot.com/

لكل أم مش قادرة على الرضاعة الطبيعية

ارسلت لنا أم تقول :
" انا كنت عاوزة أسأل عن موضوع لبن الام  .. ف انا والده من اربع شهور و ولادتى كانت قيصرية .. وولدت قبل ميعادي ب 10 ايام بسبب الميه حول الجنين ؛ إللى قلت  .... المشكلة الحقيقة ظهرت بعد ما ولد ، لأنى ماكنش عندي لبن و اضطريت استعمل اللبن الصناعي .. خاصة ابنى كان بيعيط و مكنش متقبل اي اعشاب .. و بعد فترة اللبن نزل  .. بس قليل .. و مش بيكفيه ..لدرجه وصلت اني بقيت معتمده على اللبن الصناعي بشكل كبير ... وصدري يمكن بياخده مره في اليوم ..
و سألت إللى حواليا ووصفولى حبوب  لتزويد اللبن .. بس مزودتتهوش للدرجه  .. و بصراحه انا بيصعب عليا ان ابنى ما يخدش حقه ف الرضاعه الطبيعي

محتاجه نصحيتكم  ،  اعمل ايه ؟؟ و  فى طريقة ازود بيها اللبن ... وهل ممكن ادى رضيعى إللى عمره أربع شهور وجبة ( هيرو بيبي ) في السن دا .. زي ما نصحوني اللي حوالايه ؟؟؟؟ا

الإجابة :

الولادة القصيرية مرتبطة بحجم الجنين ، يعنى لو انتى ولدتى فى الأسبوع السبعة و ثلاثين (37)، يبقى جنينك أو مولودك مكتمل و بصحة جيدة .. الولادة المبكرة بتقى مشكلة لو كانت  قبل الأسبوع الـ 37 من الحمل ، فلو قصدك انك ولدتى قبل ما تتمى التسع شهور بعشر تيام ، فانتى ما تبقيش ولدتى قبل معادك ، لأن الشهر التاسع بيتم فى الأسبوع الأربعين .. فاطمنى من النقطة دى

بخصوص العشاب : الحمد لله ان ابنك مارضيش يآخد أعشاب ، لأن الأعشاب ما بتكبرش دى بتبقى عاملة زى الماية ، تروى العطش و تدى احساس بالشبع و بس ، و لو ابنك كان خدها كنتى اطمنتى و ارتحتى ؛ و كان وقتها ابنك ما كبرش و كانت ح تبقى مشكلة حقيقية ..  بس الحمد لله ربنا ستر و  ابن من نفسه رفض الأعشاب .

بخصوص اللبن الصناعى : اللبن الطبيعى أفضل من الصناعى لمميزات كتير ، لكن ده مش معناه ان الصناعى ضار ، لكن هو مافيهوش كل الفايدة إللى ربنا سبحانه و تعالى حاطها فى  اللبن الطبيعى .. فأرجوكى ما تنزعجيش عشان ابنك بيآخد صناعى  .. و تعالى نزود اللبن الطبيعى

أول حاجة عشان اللبن يزيد عندك انك تنامى كويس ؛ على الأقل ست ساعات و ساعة  قيلولة ، أو تمن ساعات من غير قيلولة .. و تشربى تلاتة لتر ماية و عصاير ، و يفضل عصير البرتقال أو المون لأنها بتساعد على زيادة اللبن بكثرة .. الحلبة هايلة لإدرار اللبن و ما تقلقيش لو لقيتى تواليت ابنك بقى سائل شوية لما تشربى الحلبة ، بس تأكدى انك مع الحلبة ح تشبعى ابنك كويس اوى ان شاء الله  .. فى أعشاب فى الصيدلاية لإدرار اللبن مفيدة و مافيهاش ضرر على البىبى انصحك تجربيها لأنى ما بأفضلش الأدوية مهما كان مالهاش أثار جانبية .. و أنصحك تكلى سمك مشوى على قد ما تقدرى ، لأنه بيزود اللبن كويس .. و لو ابنك ما بيعانيش من غازات يعنى ما بيعيطش بسبب غازات فى المعدة انصحك تآكلى سلطة زبادى و تحطى فيها توم ، التوم بيزود اللبن جدا جدا ، لكن لو ابنك عنده غازات او ما بيتكرعش كويس بلاش أى أكل فيه توم خالص .

بالنسبة لتأكيل ابنك فى الشهر الرابع : فلو هو تم الشهر الرابع خلاص اوزنيه و  لو وزنه طلع سبعة كيلو أكليه " نسلة ريز ــ  أرز نسلة " موجود فى السوبر ماركت و فى الصيدالية و اختارى النوع إللى مكتوب عليه عمر ابنك ، خلى بالك كل حاجة خاصة بأكل البى بى و أدويته مرتبطة بوزنه أو بسنه (عمره)  

و لو ابنك وزنه سبعة كيلو ممكن كمان يآكل بطاطس مسلوقة و مضروبة فى الخلاط و متخففة بالماية و بدون ملح ، و ممكن تعملى معاها كوسة .. بس بعد ما تعملى اختبار الحساسية .. إللى هو تدوقى البىبى  نص معلقة شاى من البطاطس لمدة تلت تيام ، لو كلها و ما رجعش و لا جاله اسهال و لا قئ و لا طلعله بقع حمرا فى جسمه خلى النص معلقة معلقة فى اليوم الرابع ، و فى خامس يوم المعلقة تبقى 2 .. و تفضلى تزودى المقدار و تضاعفيه لحد ما تبقى وجبة كاملة .

لكن لو ابنك وزنه أقل من سبعة كيلو ، اوعى تأكليه إلا لما يبقى عمره ست شهور عشان ما نجهدش الكلى و المعدة و باقى جهازه الهضمى

و لكم تحياتى

مامى لأول مرة

http://la3ya3nyno.blogspot.com/

لكل أم تسأل - هذه اجاباتنا

السؤال 1 :

السلام عليكم انا مامي لاول مرة ابنتي تعاني السعال مع البلغم اخدتها لعدة دكاترة اعطوني تقريبا نفس الدواء والان اصبح صدرها عامل مثل الصفارة ، ما فيش دواء عشبي يساعدني في حالتها ؟
وجزاكم الله كل خير

الإجابة :

لازم أعرف بنتك عمرها قد إيه بالظبط عشان أقدر أقولك  .. و لحد ما تردى عليا انصحك تقرى الموضوع ده احتمال تلاقى شرح وافى ليكى

http://mamy1st.blogspot.com/2010/11/blog-post_03.html

 و على العموم لو  بنتك  اكبر من ست شهور اديها تيليو ، التليو طارد جيد للبلغم .. و فى باكتات جهازة منه موجودة فى الصيدليات ممكن تستخدميها

سؤال 2 : اللبن البقرى

السلام عليكم... كنت عايزه أسأل احنا ممكن ندخل اللبن البقرى او الجاموسى قبل سنه ؟؟ أصل فى امهات مش بترضع وفى امهات لبنها قليل وميشبعش واللبن الصناعى غالى جدا مفيش قدمنا حل غير اللبن الجاموسى او البقرى .انا عندى ولد وبنت توأم وعندهم 8 شهور وبفكر اديهم لبن عادى لان الصناعى خرب بيتى لانه غالى .. و ممكن اللبن نخففه بميه هل كده هيكون فيه ضرر ؟؟؟ وعايزه اعرف نسب الميه واللبن يعنى احط اد ايه ميه واد ايه لبن .ارجو الرد

الإجابة :

يفضل الإمتناع عن اللبن الجاموسى على الأقل لحد ما يتم الطفل عمره تلت سنين عشان يكون جهازه الهضمى قادر على هضمه  .. اما اللبن البقرى فهو لا يستخدم للطفل قبل ان يتم اول سنة من عمره .. أما عن الحليب البقرى فلازم نعرف ان لبن

 الأبقار يحتوي على كمية من الكالسيوم أكثر ثلاث مرات من الحليب البشري، لكن الكالسيوم الموجود في الحليب قد يكون عديم الفائدة؛ لأن كمية الماغنسيوم الموجودة بالحليب غير كافية غير لامتصاص حوالي 11% فقط من الكالسيوم. ومن المعروف علميا أن وجود الماغنسيوم ضروري لامتصاص واستعمال الكالسيوم بشرط أن يكونا متساويين في المقدار.


- يمكن اعتبار الحليب "لحمًا سائلاً" نتيجة لاحتوائه على كميات عالية من البروتين، ويشكل بروتين اللبن casein نسبة 80% من إجمالي البروتين في الحليب. . فقد يؤدي هذا البروتين لظهور حالات من الحساسية الشديدة.


لكن لو فى ظرف قهرى زى ما بتقولى ، يعنى لو الام ما عندهاش لبن و مش قادرة على تمن اللبن الصناعى و مضطرة تستخدم اللبن البقرى مخفف بالماء يبقى فى الحالة دى

 ممكن تعطى اللبن البقرى بدل الصناعى و لو الطفل اقل من 6 شهور يبقى التلت لبن والتلتين ميه ولو اكثر من 6 شهور يبقى نصف لبن ونصف ميه وبعد سنه يشرب الطفل اللبن بدون تخفيف .. . وبالنسبة للرضاعة الطبيعية يفضل ان تكون ليلا  

السؤال3 :

صباح الخير حبيت اشكرك عالمواضيع المفيدة جدا اتعلمت منها حاجات كتير اوي...واذا ممكن عندي كم سؤال ومحتاجة تجاوبيني عليهم ..انا برضع ابني رضاعة طبيعية فحماتي بتقولي انه اللبن اللي بينزل في الاول يبقى خفيف ومش بيفيده لازم استنى ينزل اللبن الخفيف ده وبعدها يجي اللي فيه الفايده ارضع ابني منه هل ده صحيح؟؟ يبقى لو ده صحيح معناه اني لحد دلوقتي مش رضعت ابني حاجة تفيده ..السؤال الثاني انه ابني اول مااتولد كانت نسبة الصفرا عنده عالية فالدكتور قاللي تديله مياه مع رضاعة كتير وبعدين راحت منه الصفرا فقالي لازم افضل اديله مياه مينفعش اقطعها عنه هل ده صحيح؟ انا بسمع انه الطفل لحد عمر 6 شهور مش يدوله مياه وابني دلوقتي عمره شهرين بس..السؤال الثالث دلوقتي ابني عنده التهاب مجاري بولية والدكتور قال انه اديله برده مياه كتير وعصاير طبيعية وهو عمره شهرين!! هل ده ينفع ولو ينفع تقترحي اديله ايه؟؟
هتعبك معايا بالرد اعذريني بس انا قلقانة وعايزة اتطمن

الإجابة :

لأ و ألف لأ ، و كلام حماتك غلط جدا .. اللبن الخفيف إللى فى الأول اسمه  لبن السرسوب و هو محمل بكم كبير من الفيتامينات المفيدة للرضيع .. ده اولا ، ثانيا : لبن الأم ما بيزدش إلا بالرضاعة .. يعنى لو قعدتى و استنيتى لبنك المغذى يجى تأكدى ان لبنك ح ينشف .. الرضاعة هى إللى بتزود اللبن .. و سبحان الله  لبن الأم يتحور بحسب إحتياج النونو ، ده موضوع بين الرضيع و ربه ، لأن لبن الأم هو رزق الرضيع .. لكن انتى لازم ترضعى ابنك من اول لحظة من الولادة ، و لو كنتى والدة قيصرية يبقى بعد ما تفوقى من البنج حطى ابنك على صدرك ، معلش ح يكون اللبن متأخر شوية و لسة ما نزلش ، لكن بالرضاعة المجارى اللبنية ح تفتح و اللبن ح يجرى

بالنسبة لموضوع الصفرا : فهى بتكون نتيجة ان كبد الرضيع لسة ما اشتغلتش ، فكل ما الأم ترضع ابنها كتير ، الجهاز الهضمى ح يشتغل أسرع و الكبد ح يشتغل .. الماية ما لهاش دخل بالصفرا .. و وقفيها زى ما انتى عايزة .. الماية مهمة أول ما الرضيع يبدأ يآكل ، لكن الرضاعة بتغنى البى بى عن الماية عشان تلت تربع لبن الأم عبارة عن ماية ، بس ماية نقية مش ملوثة

و اوعى تدى ابنك ماية الحنفية ، اديله ماية مغلية و برديها أو اديله ماية معدنية ...

بالنسبة للعصير اديله أحسن حاجة عصير تفاح

بالنسبة لإلتهاب مجرى البول :

ده بيكون نتيجة تكوين خلقى أو نتيجة شكل عضو ابنك .. او نتيجة استعداد وراثى ..  او عدم الإهتمام بنظافة الحفاض أول بأول ، و ده بيسبب نشاط الميكروب  .. أو بيكون نتيجة عدم ختان الرضيع .. أو ان الرضيع بيعانى من حالة امساك مستمرة

و مدام الدكتور ما كتبش على علاج و ما طلبش أشعة او تحاليل ، معنى كدة ان الحالة آمنة .. و لو مش واثقة فى الدكتور تأكدى من دكتور تانى .

لكن لو الدكتور كويس ، يبقى ادى ابنك أعشاب ، و عصير تفاح و ماية بين الرضعات .. يعنى لو بترضعى كل تلت ساعات ، يبقى ابنك يشرب ماية على قد ما يقدر ، مش مقدار محدد و تكون قبل الرضاعة بساعة  .. و بعد الرضاعة بساعة تديله مرة أعشاب أو مرة عصير. .  و اهتمى بالرضاعة .. مع الإهتمام بنظافة ابنك الشخصية ، حاولى تحميه فى الصيف كل يوم و فى الشتاء يوم فى و يوم مافيش

و لو ابنك بيعانى من امساك مستمر شربيه شيح أو بابونج

ملاحظة : الرضاعة و العصير هى إللى ح تكبر ابنك .. الماية و الأعشاب ما بتكبرش ، دى مجرد علاج عشان الإلتهاب إللى عند البىبى.. يعنى اوعى تهتمى بالماية و الأعشاب و تهملى الرضاعة .

و فى انتظار أى سؤال منك فى أى وقت


و لكم تحياتى
مامى لأول مرة
http://la3ya3nyno.blogspot.com/