من المشاكل الأكثر انتشارا فى تلك الأيام بين العائلات و الأمهات و الآباء هو موضوع عصبية الأطفال .. كتير من الأسر تواجه عصبية الأطفال بعصبية مقابلة ، و فاكرين ان ده هو الحل .. لكنهم يفاجئوا بأن عصبية الطفل بتزيد و بتتضخم .. فيقرروا تعنيف الطفل ، يلاقوه ما بيرتجعش ، يدخلوا معاه فى مرحلة العنف ، فيلاقوا العصبية تحولت لعناد .. و فى كل هذه الأحوال لا الأب و لا الأم حد فيهم سأل نفسه ليه ابنى عصبى ؟؟
و يا ترى عصبية الطفل دى ليها أسباب عضوية ؟؟ ليها أسباب تربوية ؟؟ ليه أسباب مجتمعية ؟؟ أى أسباب أسرية ؟؟ طيب ليها أسباب نفسية ؟؟ و الأهم من ده كله اننا نعرف أعراض هذه الأسباب عند الأطفال و اختلافها من سبب لآخر عشان نقدر نسيطر على عصبية الطفل و نعالجه بأقل مجهود
أول حاجة لازم نعرفها عن المشكلات السلوكية للأطفال ان كلها مكتسبة ، يعنى مش مخلوقة مع الطفل ، ليست فطرية و لا موروثة ، لأ ، دى اقتبسها من الواقع الخارجى .. يعنى ممكن يكون بيقلد حد فى البيت أو فى العيلة .. إلا القليل جدا من المشكلات السلوكية عند الأطفال إللى بتبقى موروثة ، لكن أغلب مشكلات الطفل مكتسبة من الجو و المحيط الذى يعيش فيه .
العصبية و العنف و العناد و ماشابه كلها رسائل يرسلها الطفل لأهله عشان يوجهم لموضوع بعينه ، و غالبا تكون اللغة لا تسعفه ، فيلجأ الطفل للعصبية للتعبير عن مشاعره و أفكاره و وجدانه .... ف الطفل عن طريق العصبية بيعبر عن آلامه ، عن آماله ، عن اعتراضه .
الواجب على كل أب و كل أم :
ان نتسلم الرسالة المرسلة من الطفل إلينا ، و نقرأها جيدا بهدوء ، نشعر بيها ، نتفهمها قبل ما نرد عليها .. و على كل اب ان يآخد القرار و هو دارسه و من غير تسرع .. و ينفذ قراره تجاه ابنه بما يناسب و رسالة الطفل لأبيه .
لك ايها الأب و ايتها الأم مش لازم نحمل الموضوع فوق طاقته ، خاصة بعد ما عرفنا ان السلوك المكتسب عند الأطفال زى العصبية و الكذب و السرقة من الممكن تغيره .. فالطفل عنده قابلية للتعديل و التغير و دى حاجة هايلة و لازم نآخد بالنا منها و نكون واعين لها
الطفل صناعة أهله :
الطفل هو مرآة أهله ، فهو صناعتنا .. احنا إللى بنعمل الطفل المبدع و احنا إللى بنصنع الطفل العصبى .. فهى بضاعتنا ردت إلينا .. ارجوكم ساعدوا اولادكم و افتكروا اننا نصنع نجاح أطفالنا ..
بنصنعه بطباعنا بشخصيتنا بسلوكنا .. أى حد عايز يعرفك كويس يشوف سلوك و شخصية ابنك
و ضرورى نعرف ان داخل كل طفل مبدع ، و هذا المبدع يتمنى ان ينجح ، يتمنى أن يكون محبوبا ، يتمنى أن يكون سعيدا .. لكن ما بيكونش لسة عارف السكة و محتاج حد يساعده انه يحقق أحلامه و يتطور و ينجح و يكون محبوب
لو قلتلى ايه سلوكك ح اقولك شخصية ابنك ح يكون شكلها إيه
للتخلص من عصبية الأطفال :
لازم نتخلص من العصبية عندنا احنا الأهل ــ أب و أم ـ اولا عشان نزيل العصبية عن أطفالنا .. ما هوو عشان نصلح الصورة لازم نصلح الأصل .. و عشان نظبط الظل يبقى علينا بالعود
و خلوا بالكم علاجنا لعصبية اطفالنا و هو فى سن صغيرة ح تختصر معانا مشاكل كتير فيما بعد لأنه لو طلع طفل عصبى ، ح يبقى مراهق عصبى ، ح يبقى شاب عصبى ، زوج عصبى ، و يبدأ يخلق جيل من العصبيين بعد ما ينقل العادة دى لولاده .. و نتحمل احنا السلسلة دى كلها من العصبيين .
سمات العصبية و اعراضها :
ــ غير التوتر و الصوت العالى المصحوب بنرفزة
ــ رمش العين يكون به رعشة
ــ هز الكتف و خاصة اليمين
ــ مص الأصابع إللى هى مشكلة عند معظم الأطفال و ما بنعرفش نعالجها إزاى عند الأطفال
ــ قرقضة الأظافر
و كلها مالهاش علاج غير تخلص الأب و الأم من العصبية ، و توضيح للصغير الخطأ الذى وقع فيه بهدوء ، و محاولات إيجاد لغة حوار مشتركة بينكم زى اللعب ، التلوين ، الأكل ، القراءة .... ده ح يساعد إلى حد كبير على فهم بعضكم البعض و ماحدش فيكم ح يحتاج للعصبية لا الطفل عشان يوصل رسالته و لا الأهل عشان يردوا على الرسالة دى
و لكم تحياتى
مامى لأول مرة
