السبت، 18 مايو 2013

كارثة فى امتحانات قبول الحضانة فى مدرسة ساكريه كور غمرة ecole sacre coeur



كارثة فى امتحانات قبول الحضانة فى مدرسة ساكريه كور غمرة

مش ح اقولكم ان الكارثة هى ان اللى عايز يدخل بنته مدرسة ساكريه كور يجيب شهادة من حصانة فرنساوى ان ابنه خريج الحضانة عشان يدخل الحصانة عند ساكريه كور sacre  ecole coeur غمرة
لأ طبعا

الكارثة فى النقط التالية : 
-        اولا : القايمون على اختبار الأطفال : لا يعلمون أى شئ عن سيكولوجية الطفل و لا يعرفون التعامل معاهم ... و ده ظهر لما خدوا الولاد مننا و كان عددهم تقريبا عشرة و دخلوهم فصول الـ jardin d’enfant ... و فضلوا يمتحنوا فيهم لمدة أكتر من ساعتين ، البنات دخلت تمتحن الساعة عشرة و ربع و خرجت الساعة 12 و تلت ... فى اطفال عمرهم أقل من أربع سنين تقعد تمتحن المدة دى كلها ؟؟
-->  طبعا البنات خارجة مفرهضة و متنحة و ما بتتكلمش و واحدة من بناتى التوأم بتصرخ بهستريا حرانة ، حرانة مع انها لابسة بلوزة دونتيل نص كم و شورت
بناتى كانوا داخلين مبتسمين و سعدا  و متفائلين لدرجة ان واحدة منهم باست المدرسة إللى نادت على اسمها 

و مع ذلك قدرت مدرسات المدرسة تخرجهم حزانة و مكتئبين لدرجة ان واحدة كل ما أسألها عملتى ايه تقولى مش عايزة أقول ، و التانية دخلت نامت لمدة اربع ساعات متواصل و ما قمتش غير لما صحناها



-        ثانيا : القائمون على اختبار الأطفال لا يجيدون التعامل مع الأطفال ، لأنهم لم يلعبوا مع الأطفال كما ادعوا و قالوا انهم ح يلعبوا معاهم الأول عشان البنات ما تخافش و تتجاوب ، و طبعا الكلام ده طلع كدب ، و لما سألت مديرة المدرسة قالتلى هما صحيح ما لعبوش فى الجنينة و لا على المراجيح  و لا بالكرة ، لكن لعبوا فى الفصل ... ممكن حد يفهمنى إيه الألعاب إللى ممكن تتلعب مع طفل عمره تلت سنين و عشر شهور و هو قاعد


-        ثالثا : فى مشكلة فى طريقة تقيم الامتحان و درجة القبول فى مدرسة sacre coeur ... فمن الواضح ان مدرسينهم إللى بيقوموا على التقيم جايبين طريقة امتحان الخواجات لكن بيطبقوها من غير ما يفهموا ابعادها ... و الدليل انهم لما طلبوا من بنتى تغنى و غنت و هى بترقص و بتحرك ايدها كتبوا فى التقرير elle fait des gestes انها تقوم بايماءات و حركات ... و ماحدش فسر  على ما تدل تلك الحركات ، سرعة بديهة ، ذكاء ، ضعف ذهنى ، امها رقاصة ... لكن اللى كتبتها كتبتها كدة و كأن المطلوب من إللى ح يقرا التقرير هو إللى يحط  تفسير للحركات دى و يوضح ان كان فى اتجاه سلبى أو ايجابى ... و ده فى رأيى خلل فى التقيم المدرسة ، لأن التقيم لازم يكون واضح و غير قابل للتقويل ، ده حتى ما قالش ان الحركات دى تمت وقت الاغنية و لا وقت تانى ، لأن ده ح يفرق فى التقيم ......... لكن كله عند العرب صابون

-        رابعا : و هو تأكيد على خلل فى تقيم مدرسة sacre coeur للبنات المقبولة عندهم فى الحصانة او الـ jardin d’enfant   ح تتأكدوا منه لما أقولكم  ان أنا ليا بنتين توأم  خارجين من نفس البيت و نفس الأم و نفس كل حاجة ، قال كتبلى فى التقرير ان فى واحدة فرنكوفون francofon و التانية مش فرنكفون francofon بالذمة ده كلام يعقل ، يبقى فى واحدة لبلب فى الفرنساوى و التانية لأ .... طب رفضوا اللبلب ليه ؟؟؟


African affiliation program
-        خامسا : الكذب يحكم التقارير النهائية للطلبة المتقدمين بمدرسة sacre coeur :ecole
قالولى ان فى بنت من بناتى ما عملتش كويس فى الجزء إللى فيه حساب ، و التانية ما حلتش أى حاجة خالص .... الدليل على الكذب ، ان الامتحان متنوع ، الامتحان فيه بازل ، و بناتى بتآخد فى الحضانة بازل ... و الامتحان فيه تلوين و معرفة اللوان و الاتنين عارفينها كويسه ، الامتحان فيه كتابة حروف و ارقام و الاتنين متوسطين فيهم  .... و الامتحان فيه رسم و ده إللى واحدة من بناتى شاطرة فيه و التانية لأ ... يعنى مستوى الاتنين قريب من بعض ماعدا فى الرسم ، لأنى باذكر للاتنين إللى عمرهم - تانى بافكركم – عمرهم تلت سنين و عشر شهور – يبقى استحالة واحدة كان عندها مشكلة فى حاجة واحدة و التانية عندها مشاكل فى كل حاجة ... الكارثة الاكبر التقرير مش مكتوب فيه غير عنصر واحد بس من ست عناصر شملها الامتحان ... ده غير التواصل الاجتماعى  اللى ما حطوش عليه أى درجات - ليه باقولكم عن التواصل لأن اطفال فى عمر أقل من اربع سنين سابت أهلها و دخلت مكان ما تعرفوش مع مدرسين ما تعرفهمش من غير ما تعيط و كانت مبتسمة و مرحبة

طبعا خامسا دى انا خلتها عن الكذب لأنى ح أكتبلكم عن الكذب إللى شفته منتشر فى المدرسة بشكل مرعب ، من أول مديرة المدرسة و حتى الأمن إللى بيدخلنا

و دى تجربتى فى مدرسة ساكريه كور غمرة sacre coeur – بابعت هالكم لعلها تفيدكم و يا ريت إللى عنده تجربة مماثلة عن نفس المدرسة أو مدرسة تانية يبعت لنا
و لكم تحياتى

مامى لأول مرة