السبت، 25 مايو، 2013

خطورة وجود شركة أمن خاصة فى مدرسة ساكريه كور غمره ecole sacre Coeur – Ghamra

مش قادرة استوعب ازاى الأهالى ممكن تكون مطمنة على أطفالها فى مدرسة ساكريه غمرة ecole sacre Coeur – Ghamra – خاصة و ان المدرسة تتعامل مع شركة خاصة للأمن ... يعنى موظف الأمن بيتغير كل عدة ايام و كل عدد من ساعات العمل ، و يا دوب اول ما  يتعرف على أهالى الطلبة ده لو قدر يعرفهم فى الكام يوم إللى ح يقعدهم ح يكون اتغير و الشركة ح تبعت موظف غيره

انا باقول كدة و انا شاكة ان موظف الأمن ممكن يكونلحق يحفظ الطلبة و اهاليهم – لأن المدرسة فيها كل مراحل التعليمية من أول Jardin d’enfant اربع فصول و فى كل فصل 37 طالبة – زى ما قالت لنا Soeur Miro – و  12 فصل ابتدائى – 6 فصول اعدادى – 6 ثانوى - يبقى ح يحفظهم ازاى
ده و احنا داخلين المدرسة و بنقوله اننا رايحين لمدام لوسى ، قالنا مافيش حد هنا اسمه لوسى ، مع انها سكرتيرة مديرة المدرسة 
ده مش عارف الإدارة ؟؟؟ ممكن يعرف الطلبات ؟؟ 

-->
ممكن موظف أمن جاى يقعد لمدة شهر و لمدة تمن ساعات فى اليوم – ممكن يحفظ الطلبة – ده حتى لو قعد تمن ساعات فى اليوم ح تكون الكارثة اكبر – لأن الموظف إللى ح يدخل الطالبات غير الموظف إللى ح يخرجهم من المدرسة

ازاى مدرسة عريقة زى دى ما يكونش المسؤل عن بوابتها حد هى تعرفه شخصيا ... يعنى دلوقتى لو حصل مشكلة و انا مالقتش بنتى لاقدر الله ... مين المسؤل المدرسة ولا  شركة الأمن ... طيب لو حصل مشكلة على البوابة مين ح يآخد قرار ف حلها ؟؟ ادارة المدرسة و لا شركة الأمن – ولا مديرة المدرسة ح تكلم المدير فى شركة الأمن عشان يكمل الموظف اللى واقف على بوابة المدرسة
 المدرسة ... ده يكون الحمار مات و رحته طلعت كمان

طيب افرض ان اى حد راح خد بنتى من المدرسة ، موظف الأمن ح يسلمهاله عادى ... و لا ح طلب منه إيه ؟؟ و لا ح يديله البنت مقابل انه يآخد بيانات بطاقته ... طب هو موظف الأمن عارف بنتى طالبة فى المدرسة أساسا لأ
طب هو موظف الأمن فى مدرسة ساكريه كور غمرة ecole sacre Coeur – Ghamra يعرف أهل البنت ، باباها مامتها ... طبعا انا باتكلم عن الأطفال إللى عمرهم أقل من عشر سنين

فى حاجة مش واضحة فى المدرسة و ف هيكلها الادارى
لكن إللى متأكدة منه ان وجود شركة أمن خاصة جوة مدرسة بنات  دى كارثة – لو ماكنتش كارثة ادارية – فهى أكيد كارثة تربوية – لأن المدرسة ما تعرفش أخلاق موظفين الأمن دول



African affiliation program

ده غير اننا لمسنا كذب موظفين الأمن و رعبهم مع أقل صوت يهب فيهم ... يعنى انا ممكن افترض انى دخلت بنتى المدرسة و لما جيت آخدها كدبوا و قالوا ما شفناهاش ، اصلها ما جتش النهاردة ... و على الأهل انهم يثبوا انهم دخلوا بنتهم المدرسة
- ح اقولكم ليه كل الرعب ده من ecole sacre Coeur – Ghamra - لأنى تأكدت من أنهم بيكذبوا و بجدارة و قريب اوى ح أكتب لكم عن الكذب فى مدرسه ساكريه كور غمرة

و اللى مش مصدق ان ساكريه كور غمره ecole sacre Coeur – Ghamra  
فيها شركة أمن خاصة .. يآخد معاد من الإدارة 
و يقول للأمن انه داخل الإدارة – ح يسألك موظف الأمن حضرتك جاى القلب المقدس – قوله ايوه – ح يطلب البطاقة و يديك رقم اقلبه ح تلاقى عليه بيانات شركة الأمن الخاصة

الكارثة الأكبر لو كمان اتوبيسات المدرسة تابعة لشركة سياحة مش تابعة للمدرسة ، يبقى لا السواق عارف البنات و لا الأمن عارف البنات .. و ادارة المدرسة ما تعرفش اخلاق السواقين إللى بيتعاملوا مع البنات و لا اخلاق موظفين الأمن

حد لازم يفهم ادارة مدرسة ساكريه كور غمره ecole sacre Coeur – Ghamra ان إللى بتعمله ده كارثة ، و قبل ما تعمل اختبارات عشان تختار البنات اللى ح تدخلها المدرسة و اختبارات لأولياء الأمور ؛ اولى بيها تعمل اختبارات للأمن و السواقين و البوابين إللى ح تقعدهم على باب المدرسة ... و بدل  ما تجيب شركات تدير شئون الأمن تدير هى شئون الأمن بنفسها و تخلى الشركة الخاصة للحماية لو فى خطر بيهدد المدرسة

ربنا يستر
و لكم تحياتى
مامى لأول مرة