السلام عليكم
لقد اطلعت على مدونتكم للعناية بالأطفال
ولدي سؤال يؤرقني
لدي توأم فتاتان ععمرهما سنة وثلاثة أشهر
إحداهما تعاني من التعلق الشديد بي كلما تحركت أو ذهبت حتى تلحقني إلى الحمام
كما أنها متعلقة بمص الاصبع بشكل فظيع
علما بأن اختها التوأم لا تعاني من هذه المشاكل وعلى العكس فإنها متكيفة واجتماعية جدا كما أنها لطيفة بعكس أختها
فما هو الحل
وكيف أستطيع التخلص من عاداتها السيئة
الإجابة :
اسمحى اجيبك بعد بضعة أسئلة : بناتك كانوا بيوضة واحدة و لا 2 ??... اعتقد انهم اتنين
طيب انتى فطمتيهم و لا لسة ؟؟ لو لسة ح يبقى سهل علينا نتخلص من عادة مص الأصبع .. و ده عن طريق انك تزودى مدة الرضاع شوية للبنوتة إللى بتمص صباعها .. و لو فطمتى بناتك انصحك انك تضمى المتعلقة بيكى بشكل مستمر ، و تبوسيها و انتى راحية و انتى جاية ، البنت محتاجة جرعة حنان أكبر .. حاولى و انتى قاعدة تخديها فى حضنك دايما .. يستحسن تآخدى الإتنين ، عشان التانية ما تغرش
انا مش بأنصحك من فراغ ، انا عندى بنتين توأم و تقريبا نفس الحالة إللى بتحكى عليها ، واحدة متعلقة بيا و التانية ملخومة عنى باللعب .. و الحاجة الوحيدة إللى خلتنى أأقدر أسيطر عليهم كانت باللعب و الجرى وراهم ، و الضحك معاهم ، و تحريك العرايس من ورا الستاير ، و لعبة الإستغماية
و بعد ده كله الحضن و القبلات و الضم .. ما تبعديش بناتك عن حضنك خصوصا اول خمس سنين .. و صدقينى انتى نفسك ح تتخلصى من أى تعب بتحسى بيه اول ما تخديهم فى حضنك
العلاج هو : اللعب و الحنان
... بالنسبة لموضوع الصباع ارجوكى ما تلفتيش نظرها ، لو قلتلها شليه من بقك ح تعاند لكن الخميها باى حاجة تانية لحد ما تنسه ، اول ما تحط صباعها فى بقها ، ناديها تآخد لعبة ، قوليلها تشيل حاجة من الارض ، اديلها بسكوتة فى ايدها اللى فى بقها ... المهم تلخميها بأى حاجة
انا كان عندى بنت و هى عمرها 9 شهور ، تحط إيدها فى بقها عشان ترجع ... و كان العلاج هو اللعب و الحنان و نسيت موضوع إيدها ده تماما مع انها فضلت تعمله لحد ما بقى عمرها سنة و اربع شهور
و لك تحياتى
مامى لأول مرة
