علاقة الأب بالأم تفسد علاقة الطفل بالأهل

 مشكلة وصلة لمدونة " مامى لأول مرة "

عندى مشكله مع ابنى ومش عارفه اعمل ايه وحاسه بالذنب كل يوم ياريت اجابه ابنى عمره 3 سنين وممتاز جدا لبق منذ عامه الاول ويتحدث ويقلد جده واهله ودمه خفيف جدا واجتماعى من الدرجه الاولى عنده اولاد اعمامه كلهم اكبر منه ولكنه ليدر بينهم ومحبوب ويستطيع ان يلعب معهم وياخذ انتباههم اسئلته كتيره وانا برد عليه كتير حافظ كلمات انجليزى كتير وبيلقط اى حاجه بقولها بحكيله حواديت كتير عن قصص الانبياء كلهم وحافظهم واحد واحد بيحب اللعب وشقى جدا عنده طاقه مهوله لايستطيع ان يخرجها بحاول اخرجها معاه بس بتعب اصبح عنده اخت من قبل ماتيجى وانا بمهد ليه وعلى طول بديله شكولاه واللى بيحبه والعباب واقوله ده من اختك بس للاسف بقى عنيد جدا صعب جدا دايما بيحاول يعمل اللى عارف انه غلط وانه بيضايقنى بيعمله وانا بطبيعه الحال انشغلت عنه فى القصص اللى قبل النوم واللعب معاه وغير كده بقى رغاى اوى بقيت اقوله بطل رغى صدعتنى مشكلتى انى بضرب بغباء ومش عارفه اعمل ايه بحاول ماضربش بس هو بيستفزنى وبفضل ماسكه نفسى وبفهمه طول اليوم ويجى على بليل يعمل حاجه قاتله ماينفعش مااضربهوش وكانه اتعود انه لازم يضرب ولو يوم عدى من غير ما يضرب لازم يعمل حاجه من اللى هو عارفها انها مصيبه بحاول اشوف عقاب تانى ادخله الاوضه بتعته بس للاسف لايستجيب للعقاب ده ولا بيفرق معاه النور طبعا بيكون شغال ولعبه موجوده وبسيبه 3 دقايق وبعرفه قبل مايدخل الاوضه ليه وبعد مابيخرج ليه انا كنت حابساه ويوعدنى انه مش هيعمل كده وعارف هو عمل غلط وكان كذت وكذا ابتدا يكدب عليا خاصه انه بقى عارف انه لو قال الحقيقه هيضرب برضه بحاول اغير اسلوبى ده بس والله هو عنيد اوى انا عارفه ان العيب فيا وفى باباه لان باباه بقى ليه كلام تانى ........................................ ابوه دايما يضربه على وشه من غير سبب وعلى طول يشتمه من غير سبب وعلى طول هزاره رخم جدا يعتبر مش هزار ومابيعرفش يلعب معاه اصلا وفى ازمه ثقه بينه وبين ابوه خاصه انه شايف حاجات كتيره بقوله عليها غلط ابوه بيعملها وبيشوفنى بزعق لابوه عليها ودلوقتى وصل ان لما ابوه يطلب منه حاجه يبص ليا ويسالنى اعملها ولا لا وطبعا ابوه يشوف كده يتجنن ويقوم يضربه فى حاجات كتير من تصرفات ابوه معاه غلط وانا كمان بس الفرق ااننا عمالين نضرب فيه عمال على بطال اه بنحبه وبنجبله كل حاجه بس ده مش كفايه الحب واننا نحسسه بالامان اهم من كل ده انا بضرب لسبب وابوه بيضرب من غير سبب والنتيجه عناد وافعال غلط دايما واحساسى انا بالذنب من ناحيته بالذات بعد ماخته جت وغصب عنى اهتميت بيها ... مش عارفه اعمل ايييه انا عارفه ان الحل فيا انا وابوه بس انا تعبت من الكلام نفسيتى تعبت من ابوه والله مفيش فايده اقوله اتغير معاه عامله احسن احترمه مفيش فايده دلوقتى بقى اى حد يضربه من الاطفال يسكت وده بيضايقنى اوى اتعود على الضرب وان اى حد يضربه ؟؟؟؟؟؟؟؟؟ اعمل ايه؟؟؟؟؟ ياريت الرد

علاقة الأب بالأم تفسد علاقة الطفل بالأهل - مامى لأول مرة - mamy1st

انا بحاول معاه والله هو بيستجيب للقصه كويس وبيفهم كويس اوى وعنده ذاكره ممتازه عارف كل قصص الانبياء وحافظ كل الحيوانات بالانجليزى واصواتهم وشاطر والله انا حاسه انى معاملتى معاه اللى غلط العيب مش فيه هو

ابوه بيحملنى انا مسؤليه عناده معانا مع ان ابوه اسلوبه غلط معاه وانا كمان اسلوبى غلط بس بحاول احتويه وده بيخليه برضه يكون معايا انا بس اللى بسيطر عليه او بيسسمع كلامى بس وباباه علشان بيعمل حاجات بفضل اقوله عليها دا غلط ادام ابنك انت قدوتهه فالولد باباه مفيش ثقه بينه وبين ابوه قوليلى اعمل ايه مع ابوه واعمل ايه مع الولد

لو تعرفوا ابوه بيجبه ازاى بس هو فاكر انه طالما جابله حاجه حلوه او لعبه يبقى كده قايم بواجبه ناحيته يعنى دايما يجى من بره الولد يقولو هيه بابا جه يقوم هو يقوله بطل يله انا تعبان ابعد عنى انا اعلق اقوله بدل ماتاخده فى حضنك وتقوله وحشتنى ...... انا بحاول اقوم بالدور ده خاصه انى اكتر وقت بقضيه مع ابنى اكتر من باباه بس انا عليا ضغوووووط كتير وبقيت اتنرفز بسرعه يعنى لو لعبت معاه ساعه مقدرش اكمل واتنرفز واسالته كتير انا عارفه انها علامه كويسه انه زكى واسأله ماشاء الله تحفه بس بزهق من كتر الكلام خاصه انى عندى التزامات تانيه حاولت اوديه حضانه قعد يعيط ويترعش ويعمل حمام على نفسه وهو رايح


حاولت ابعته فى مدرسه باباه هى مدرسه لغات بقى يمسك فى باباه ويفضل قاعد معاه ومش عاوز يتعامل مع اى حد مع انه اجتماعى بيحب يرغى مع الناس كلها عندنا اطفال كتير فى بيتنا بس كلهم تصرفاتهم بالنسبه لى زى الزفت وامهاتهم مش عارفه تربيهم تماما بحاول اصلح فيه وافهمه ان تصرفاتهم غلط ساعات يطلع بيقلد كل اللى شافه منهم .... هو بيحب الرسم جبتله الوان كتير وكل رسمه بعلق عليها واشكر قيها

نصيحة : مدونة " مامى لأول مرة "

-->

نصيحتنا :

يا صديقتى مشكلتك الأولى سببها علاقتك بابيه .... اولا لا يجب تنبيه الأب لأخطاءه امام الطفل لأن الأب ح يعند و الطفل لن يحترم ابيه ... و لأن الأب بقى عنيد سقلده الطفل و يبقى عنيد هو كمان لأنه شاف ان الأب ما سمعش كلامك .... المشكلة التانية انك مضغوطة و سايبة نفسك مضغوطة و بكدة ح تفضلى تطلعى غضبك فى ابنك و بعد شوية فى بنتك و بكدة انتى بتخسرى النهاردة و بكرة اللى جاى ... نظمى وقتك و دورى على الحاجات اللى بتسعدك و اعمليها ...لازم ما يمرش يوم من غير و فى حاجة فرحتك فى اليوم ده .... انتى بتضربى ابنك فى آخر اليوم عشان انتى حاسة ان فى يوم ضاع من عمرك زودك طاقة سلبية مش عشان ابنك عمل حاجة خطيرة .... فكرى كدة ايه اخطر حاجة عملها ابنك و نفرزتك ... دلق الأكل على الأرض اللى لسة ممسوحة مثلا ... برضه مش مشكلة ... المشكلة فيك انتى مش فى ابنك اتخلصى من الحاجة اللى ضاغطة عليكى و اعرفى ان ولادك دول زى الحصالة اللى بتعمليه معاهم النهاردة ح يعملوه معاكى بكرة

African affiliation program باقى نصائح : مدونة " مامى لأول مرة "

مشكلتك أكبر من أى أم لأن طفلك ذكى ... ارجوكى توقفى عن ضرب ابنك و اشغلى وقته باللعب اللى تنمى الذكاء ، بالبازل ، بالألوان و علقى رسوماته فى كل مكان فى البيت و خصوا فى أودته و فى المطبخ ، جبيله شيخ يحفظه قرآن ، اشركيله فى لعبة رياضية يلعبها بانتظام ... ابنك محتاج مجتمع و المجتمع الوحيد اللى حواليه هو حاسس انك رفضاه و دايما بتقوليه الاطفال دول مش كويسيين ... ابنك اجتماعى لكن ضربك فيه كتير بدأ يخوفه من الناس ... و شوية شوية لازم ح يهدا و توديه حضانة كويسة تكونى متأكدة ان مافيهاش ضرب عشان ما يخافش منها و ينعكس الموضوع على المدرسة

و لكم تحياتى

مامى لأول مرة