علاج عدوانية الطفل فى عمر اقل من سنتين

السلام عليكم رمضان كريم وكل عام وانتم بخير .... انا عندي مشكله فظيعه ارجوكم ساعدوني انا بنتي عندها سنه ونص بس عدوانيه جدا بتضرب وتخربش وتعض وتهبش وده بيخلي الناس متحبهاش والاطفال بيبعدوا عنها ومش بيحبوا يلعبوا معها وعندهم حق ومعندهاش فرق بين كبير وصغير كله بتضربوا وانا حزينه جدا ع اللي بتعملوا ومش عارفه اعمل ايه ؟؟؟

علاج عدوانية الطفل فى عمر اقل من سنتين - mamy1st

انا لما بنتى بتغلط بضربها ع ايدها قوي بس مفيش فايده مش عارفه اعلمها ازاي الصح من الغلط انا حالتي النفسيه ف الارض كمان مبتكلش كويس ووشها اصفر وتحت غنيها ازرق وشعرها مملولو ومش ناعم ورجلها فيها شخونه ارجوكم ساعدوني وشكرا جزيلا الموقع الرائع انا اتعلمت منه حاجات حلوة

-->

اجابة : مدونة " مامى لأول مرة "

بنتك محتاجة حب و حنان واضح جدا ان ما حدش بيعاملها بحب و لا بيلعب معاها ... يا مدام ريرى حبى بنتك خديها فى حضنك من فضلك عامليها بكرامة ، عامليها بحب و ما تصرخيش فى وشها ما تضربهاش ... خلى كل اللى فى البيت يتعاملوا معاها باحترام .... بعد ما تحس بحبكم لما تغلط دخليها اودتها تقعد عشر دقايق و بعدين ناديها و فهميها غلطها

African affiliation program باقى اجابة : مدونة " مامى لأول مرة "

لما تقعدوا تآكلوا قدميلها الاكل بالحب ... لو ما كلتش اكليها و هى بتلعب ، خليها تجرى على باب الشقة تصقف عنده و ترجع تاجد لقمة .... لحد ما معدتها تفتح و تطلب الاكل ، و بخصوص الخشونة ، بعد الحمام حطلها كريم فى رجلها ... الشعر ده وراثى - ارجوكى حبى بنتك حبى شعرها و لعبها و عامليها كويس ح تلاقيها بقت انسانة تانية ... ولادنا دول زى الحصالة اللى بنحطه فيها بنلاقيه

سؤال تانى :

أنا بنتى  لسه صغيره و ما بتفهمش الكلام اللي بقولهولها ... افهمها ازاي انها عملت غلط ولو عملته اعرفها ازاي وهي لسه صغيره و مابتفهمش ودى مشكلتي الحقيقة اني مدلعها علي الاخر

اجابة : مدونة " مامى لأول مرة "

الطفل من عمر يوم بيفهم ، مافيش طفل ما بيفهمش حتى المتأخرين ذهنيا بيفهم بس لغتهم بتحتاج لكم عاطفة اكبر .... لازم تبقى طول الوقت بتضحكى مع بنتك و تهزرى عشان ما تعمل حاجة غلط تكشرى و تقوليله ادخلى اودتك ، هنا ح تحس انها ملت حاجة غلط ، لكن لو حضرتك بتزعقى طول اليوم و مكشرة طول الوقت ، طبيعى جدا ان بنتك ما تحسش بانها عملت اى حاجة غلطت ... مش عيب اننا ندلوع ولادنا لكن عيب اننا نعاملهم طول الوقت بنفس الأسلوب ، يعنى حضرتك بتشجعى بنتك و بتبوسيها و تحضنيها لما تعمل حاجة كويسة ؟؟؟ الحاجة الكويسة دى ممكن تكون بسية يعنى مثلا ناولتك حاجة ، لبست اى حاجة لواحدها ، قالتلك حاضر ، عملت اللعبة صح ، غنت اغنية ، حفظ آية ، نطقت كلمة صح ..... عشان بنتك تقبل توجيهك لازم تكونى بالنسبة لها المشجع ... لو انتى طول الوقت بتعنفى بس ح ترفضك و مش ح تقبل منك أى توجيه مهما كانت بتحبك

و لكم تحياتى

مامى لأول مرة