روحنا نطعم البنات

النهاردة روحنا نطعم البنات الجرعة التانية من تطعيم الكبدى " A " .. و خدت معايا زبادى أأكله للبنات عشان كانوا اتغدوا بدرى و خفت يجوعوا فى السكة ... و خير اللهم ما أجعله خير لقيت المشوار إللى بيتآخد فى ساعتين خدناه فى نص ساعة ، ههههههههههههههههه
وبيتهيقلى ان ده واحد من أهم مكتسباب ثورة 25 يناير


وصلنا بالسلامة لمقر المصل و اللقاح بالدقى  ، و جوزى كالعادة متنشى و قور عايز ماحدش يضحك و لا يهزر عشان الناس حوالينا مكشرين فلما يشوفونا بنهزر فممكن يحصلهم تلبك معوى ... و أنا كالعادة اعتبرت ان النكد العام المنتشر بالمكان هو سبب التلبك و بدأت أهزر مع بناتى و اصورهم .. و بدأت " هوهوز " تجرى ورا أى بىبى تشوفه عايزة تبوسه و إللى ما يرضاش يتباس يآخدله علم سريع ... نسيت أقولكم ان بناتى إللى عمرهم سنتين فاتحنها مبوسة و أى بى بى يشفوه لازم يحيوه ببوسة و يا سلام لو النونو ده أصغر منهم ، يعيشوا معاه معنى الأمومة .. ملحوظة هامة : حتى لو البيبى على شاشة التلفزيون لازم يتشالوا لحد ما يبوسوا البىبى إللى هو الشاشة فى حالتنا 


المهم جه علينا الدور و دخلنا حجرة تطعيم الأطفال فى المصل و اللقاح إللى فى الدقى عشان لو حد عايز يآخد تطعيمات خارجية ... و بدات رحلة الشكشكة العالمية ، بناتى يا عينى عليهم اتشكشوا النهاردة كأنهم منخل ، ابرة فى الإيدي اليمين و ابرة فى الإيد الشمال و ابرة فى الفخدة الشمال .. كل ده ليه ؟؟
عشان النهاردة خدوا الجرعة الأولى من الحمى الشوكية و الجرعة التانية من الكبدى الوبائى " A " ... و فجأة جوزى افتكر ان البنات ما خدتش  الجرعة التنشيطية من تطعيم الهيموفلس

إللى فات ده الموجز و إليكم الأنباء بالتفصيل :
راح زوجى دفع قيمة المصل و دخل علينا ماسك العلب فى إيديه ، اداهم للتمارجى .. بدأ التمرجى يشمر عن ساعده و بناتى تبرق له : " يا ترى هو قاصدنا احنا تانى ولا حد غيرنا "
طبعا الكلام ده ماكنش مع اول ابرة ، لكن مع تالت إبرة ، بعد ما اكتشفوا ان الراجل ده شغلته يوجعهم ... و فعلا جلست و حملت " هوهوز " و بعدها حملت " جى " و بدأت عملية الشكشكة الآخيرة و الحمد لله تمت العملية بنجاح ، و كانت بناتى ملخومة فى صراخ الأطفال فى الحجرة و محاولة ابعاد يد التمارجى و كان هو فى الوقت ده اداهم الأبرة .... فالحمد لله ما عيطوش .. و واضح ان الراجل اتبسط منهم فدخل جاب لكل واحدة منهم عربية لعبة صغنونة مش عشان هما شاطرين لأ ، بيتهيقلى عشان رفعوا من روحه المعنوية .. لأن كل الأطفال فى الأودة تبص فى وش الراجل و تصرخ .


أنا فرحت أوى بالعربية ، جوزى بصلى و قالى بغيظ : " عربيتين لعبة بلاستيك فى حجم كف الأيد بستوميت جنية - 600 جنية - ، هاهاهاها "
.... و ما شفتش تعارض بين دفع المبلغ و الفرحة بالعربيات ، لأننا كنا ح ندفع ح ندفع ، لكن العربيات خدناها من ذوق التمرجى إللى ما فكرناش نديله بقشيش ، بس أنا و الحمد لله مع كل ابرة يشك بيها بنت من البنات كنت اقوله ،  مرسى ، مرسى ، مرسى ، مرسى "


و و نزلنا من المصل و اللقاح و قررنا نكافئ البنات عشان هما شاطرين و نجيب لكل واحدة منهم علبة عصير ، عشان خدوا التطعيم و الحمد لله من غير ما يعيطوا .. و بدأنا نرصد حالات الفزع المرسومة على وجه الأطفال من الإبرة - ابرة التطعيم - و الفزع كان مسيطر بشكل أكبر على الذكور - و تأكدنا ان أهلهم بيعاملوهم بشكل سئ ، لدرجة ان الولد و هو مرعوب كان باباه بيزعقله و بيعنفه ، منتهى القسوة و انعدام الأبوة و الضمير... يا ريت الأب ده ما يرجعش يشتكى لما يكبر و يعجز و يلاقى ابنه بيعامله بنفس القسوة .

المهم و احنا فى رحلة العودة إلى المنزل تذكرت أول يوم بعد ولادتى و كانت عملية قيصرة .. أول مرة نزلت فيها من بيتى بعد رجوعى من المستشفى و انا معايا الضيوف الجداد : " بناتى " جى " و " هوهوز " .. اول مرة نزلت من بيتى كنت رايحة  اقيس لهم الصفرا ، و كنت تعبانة أوى و مش قادرة امشى و الجرح شادد عليا و لازم اشيل بنت من البنات عشان جوزى ما يقدرش يشيل الإتنين و هما لسة حتة لحمة طرية ... و لإنى بأقيس الصفرا بتاعة البنات فى المستشفى إللى ولدت فيها ، فهناك قابلتنى الممرضات إللى كانت معايا فى التلت تيام إللى قضتهم فى المستشفى و قابلوا البنات بحب غريب .. و نبهونى انى لازم ارضعهم كتير و اشربهم اعشاب عشان الصفرا تنزل ، و نبهونى كمان انى لازم اروح بيهم بكرة الصبح مكتب الصحة عشان تطعيم الدرن اللى لازم يكون فى اول اسبوع من الولادة


 و نزلت لتانى مرة  من البيت و كان عشان أطعم " جى " و " هوهوز "  ... الحمد لله المرة دى ما كنتش شايلة حد من البنات ، كان معانا واحدة قريبة جوزى و هى شالت ، انا كنت تعبان  و دايخة و حاسة بمشاعر غريبة اهمها الوحدة و الحزن و عايزة اعيط ، بس اول ما كنت ابص فى وش واحدة من بناتى كان كل التعب  يروح و نفسيتى تستريح ، سبحانك يا رب


 بس ده مش معناه انى فضلت مستموتة كدة كتير ، لأ الحمد لله فوقت و بقيت زى الجن ، و نزلنا طعمنا البنات تانى و تالت و رابع ... بس  تقريبا فى كل مرة تحصل مغامرة عريبة .. مرة منهم كان بقالى يومين ما نمتش ، عشان كنت يا دوبك أنيم " هوهوز " ألاقى " جى " تصحى ، أنيم "جى" ألاقى " هوهوز"  تصحى ، فكنت مش قادرة امشى أو تقريبا ماشية و انا نايمة ، و ركبت العربية و انا بأقول الواحد ما لحقش يا نام ... و هنا فتح جوزى باب العربية بقوة و عنفوان ، قعد قدام عجلة القيادة و فجأة العربة ما رضيتش تتحرك ... و نظر لى زوجى شذرا
- عاجبك كدة ، العربية ما بتقومش
" الله و انا مالى هو انا إللى قلت للعربية تعطل "
- مش انتى عايزة تنامى
- طيب انا عايزة أنام ، العربية تنام ليه بقى


و اتقمس جوزى و قالى خلاص مش رايحين ... غالبا فى الحالات إللى زى دى بأقاوح و أناضل عشان اخليه يغير رأيه ، لكن المرة دى سكت ، واضح انى عايزة أنام بشدة .. و الظاهر جوزى كان معاه حق و انا إللى بوزت العربية ، ضميرى ما كانش خالص

و فى اليوم التانى نزلنا عشان نطعم البنات و ركبنا تاكسى وصلنا لحد مكان التطعيم و احنا راجعين عملنا نفس الحكاية و لا حاسينا بفقد للعربية و لا اى حاجة .. لكن اختلفت انا و جزوى على اعطاء مخف للحرارة لبنات ، هو شايف اننا لازم نديهم مخفض و انا شايفة ان المخفض يخدوه لما الحرارة ترتفع - كنت خايفة احسن المخفض يعمل هبوط فى الدورة الدموية 
و فعلا قررنا ما نديش المخفض و نقيس حرارتهم كل ساعة ... و بعد ست ساعات لقيت "هوهوز " بتصرخ بشكل مرعب و ماعرفتش أعمل ايه ، اقيس حرارتها الاقيها كويسة ، أرضعها مش عايزة ترضع و بتصرخ .. و بعد ساعة من المعانة قررنا نديها مخفض للحرارة بعد ما قرينا عليه انه مسكن للألم .. و اكتشفنا ان الاطفال لازم تآخد مخفض للحرارة بعد اى تطعيم لأنه كمان مسكن للألم اللى بيحس بيه الرضع بسبب التطعيم 


مش ح اقولكم على كل المغامرات لكن ح اختصرهالكم ، مرة نزلنا نطعم البنات وش العربية وقع على الأرض و احنا ماشين و دسنا عليه احنا و كل العربيات اللى ورانا .. و مرة الدركسيون فلت و البو بتاع الدركسيوف باظ و زيت كله و قع على الارض و بقينا مش قادرين ندخل شمال او يمين بالعربية عشان باور الدركسيون باظ و لازم نمشى فى خط مستقيم


و آخر حاجة حصتلنا امبارح - لأنى بقالى يومين باكتب فى البوست ده - و احنا راجعين من تطعيم البنات فى المصل و اللقاح "جى ط كانت قاعدة على الكرسى اللى قدام و فجأة بصتلى و قالتلى " مامى " 
- تعالى يا جى
و جت قعدت فى حضنى و نامت لمدة دقيقة ، فجأة قامت صرخت ، حاولت اطبطب عليها و هنا قامت مرجعة كل إللى فى بطنها : على كل هدومى .. كنت حاطت صد و حميت الكنبة من الترجيع
بس الحمد لله "جى" كانت شاربة عصير تفاح ، فرحتى كانت تفاح و ده إللى خلانى أستحم حالتى لحد ما رجعت البيت و بدأت رحلة غسيل و تطهير و تعقيم هدومى و هدوم " جى " عقبال ما يحصل للبلد و يتم تطهيرها و تعقيمها من النظام الفاسد


و لكم تحياتى
مامى لأول مرة
http://la3ya3nyno.blogspot.com/

بنتى عندها نقص كالسيوم

السؤال :

انا عندى لوجى عندها سنة وزنها 9ونص طلعت سنتين اللى تحت وحاليا بطلع فى السنه اللى جمب السنتين اللى تحت وبتاخد لسكاتة لحد دلوقتى ومش عارفه امنعها عنها ولسه مش بتمشى فهل ده نقص كالسيوم وازاى اقدر امنع عنها السكاته لانها تسبب لها نزلات معويه احياناوهيا شعرها خفيف جدا ارجو الرد وشكرا

الإجابة :

الحمد لله بنتك وزنها تمام بالنسبة لوزنها بس واضح ان فى مشكلة : لأنها متأخرة فى التسنين و المشى مع بعض ، بنتك محتاجة كالسيوم ، وديها للدكتور عشان يعملها التحليل اللازم و يوصفلك كمية الكالسيوم إللى محتاجاها ... لأن البىبى اللى بيمشى بدرى  بيسنن متأخر بدرى و بالعكس .. لكن التأخير فى الإتنين يقول ان فى نقص كالسيوم ن اعملى لبنتك تحليل ألكلين فوسفاتيز و اعرضيه على الدكتور بتاعك

لمنع التيتينة : أى حاجة عايزة تمنعيها عن بنتك ابدئى بالتدريج ، يعنى خلى بنتك تصحى الصبح ما تلاقيش السكاتة او التيتينة ، و بعد ساعتين ادهالها ، و افضلى زودى الساعتين دول لحد ما تبقى ما بتآخدهاش غير وقت النوم ... و مرة فى مرة ، ح نمنع التيتينة او السكاتة عنها وقت النوم عن طريق استبدال السكاتية بالرضاعة الطبيعية و الحمام الدافى ، فتتعود تنام من غيرها

نظافة التيتينة : حاولى تغلى السكاتة او التيتينة ، و لو هى من النوع إللى بيبوظ من الغليان حطيها فى كوباية إزاز و ادلقى عليها ماية مغلية عشان تضمنى تعقيمها و طبعا تستنى لما تبرد خالص و تديها لبنتك ، اوعى تحطيها فى بق بنتك و هى لسة سخنة

أما بخصوص شعر البى بى : الشعر الخفيف بيتقل بالتغذية – الأكل – و تغذية الشعر عن طريق استعمال زيت الخروع قبل الحمام بأربع ساعات ، و تحمي بنتك و تغسلى شعرها بصابون او شامبو مناسب للرضع .. ما تحطيش كمية زيت كتير عشان جلد راسها يقدر يتنفس - الوصفة دى عشان بنتك اكبر من سنة – الرضيع اقل من سنة ما نحطش على راسه حاجة ابدا عشان ما تأثر على رأسه

ربوا ولادكم بشكل ايجابى

لتربية الأطفال قاعدة سهلة لو نفذناها ح نقدر نربى ولادنا بسهولة و من غير أى معاناة :

1.       لازم نعرف ان ولادنا مش مخلوقين عارفين و فاهمين ، لازم نقتنع ان احنا إللى لازم نعلمهم و نوعيهم و نفهمهم – لو اقتنعنا بالفكرة دى مش ح نزعق لهم و لا نعنفهم لأنهم مش عارفين و إلا نبقى احنا فى الحالة دى ظلمة و معقدين و بنطلع عقدنا فى ولادنا

2.      الطفل عشان مخلوق ما عندوش معلومات عن أى حاجة و لأنه ما بيعرفش فبيقلدنا فى كل صغيرة و كبيرة أو بيقلد إللى حواليه – عشان كدة لازم تصرفاتنا و ألفاظنا قدام الأطفال تبقى بالشكل إللى احنا نحب انهم يتكلموا بيه او يتصرفوا بيه – و ده معناه اننا لازم نحط ولادنا مع ناس مهذبة و سلوكها كويس ...لأن الأطفال وظيفتهم الوحيدة هى التقليد ... و الطريقة الأولى لتعليم الطفل هى التقليد و بالشكل ده الطفل بيتعلم الكلام و الأكل و الشرب و ..... إلخ

3.      تالت نقطة و هى أهم نقطة إن الأطفال يتصرفون حسب توقعك لتصرفاتهم وقدراتهم وخصوصاً في السبع سنين الأولى من اعمارهم ... فاحنا فى اول سبع سنين بنعمل برمجة  عصبية لولادنا
فالأطفال اقلل من سبع سنين بيصدقوا كل صفة بنلزقها فيهم ، الأطفال مش بيفهموا اننا بنعايرهم و لا بيستوعبوا انهم لازم يتخلصوا من الصفة الردئية إللى بنلصقها بيهم .. لأ ، الأطفال بيفتكروا ان دى صفاتهم و بيبدؤا يتصرفوا على انهم موصومين

عشان كدة مش لازم نذكر للطفل غير صفاته الحميدة ، عشان تفضل عالقة فى ذهنه و ثابتة فى ذاكرته و يتصرف على أساسها و يطلع انسان واثق من نفسه ... و فى الحالة دى نكون عملنا برمجة ايجابية لولادنا

طريقة البرمجة الإيجابية للأطفال :

• لازم نخلى بالنا ان كل ما نخبر به اطفالنا بطريقة مباشرة أو غير مباشرة هى نوع من انواع البرمجة اللى بنعملها لأطفالنا
• لازم نآخد بالنا كويس من كل حرف و كلمة و حركة بتصدر منا ، سواء كانت بالحديث عن الطفل مع الآخرين أو مع الطفل شخصيا ... فمثلا لو قلنا عن ابننا أنه عنيد فسوف يكون كذلك و أذا أخبرته بأنه خجول فسوف يكون كذلك.
• نبحث عن الصفات الحميدة فى أولادنا و نعظمها و نكبرها عشان نقويها جواهم
•  يجب على كل أب و كل أم الحذر من نوعية الرسائل التي تصل لأطفالهم لأنها ستشكل معتقداتهم الداخلية عن أنفسهم وقدراتهم في الوقت الحاضر وفي المستقبل.

نآخد بالنا من الجمل إللى بنقولها للطفل و خصوصاً اللي بتبدأ بكلمة "أنت" ... سواء كانت الجملة هي "أنت شقي جداً" أو "أنت طفل جميل" .. لازم نعرف ان الجمل دى ح تترجم عند الأطفال لأفعال ... لأن الطفل بيكتبر الكبار و خصوصا الأب و الأم أو الأم و الأب هم " القدوة والمثال الأعلى" و عشان كدة بتتحول مفرادتهم إلى قواعد راسخة تنفذ إلى أعماق الطفل و تؤثر في عقله الباطن ، لهذا فالوالدين إما يبرمجون أطفالهم لنجاح أو للفشل في الحياة.

• مفردات لازم نبعد عنها :
• "أنتى غبية"
•  "أنت فعلاً كسلان".
• كل مفردات السب و الشتم الموجهة للطفل
• كل مفردات البذية الموجة لإى شئ يتعامل الطفل معه لأنها تعوده على النظر إلى نصف الكوب الفارغ و تعلمه التشائم و البحث عما هو سلبى
  
   الاستراتجيات لبناء طفل إيجابي – يثق فى نفسه و فى قدراته :
   
• تشجيع السلوكيات الإيجابية عند الطفل والثناء عليه
• التركيز على ايجابيات الطفل في شخصيته وسلوكه ولو صغيرة وإبرازها والتعبير عنها وهذا كفيل بإزالة السلبيات.
• اربط الصفة الجيدة بسلوك صدر من الطفل فعلاً وذلك حتى يصدقها الطفل مثل: "أنت فعلاً ذكي عندما عملت كذا و كذا " وكرر ذلك ثلاث مرات منفصلة ، وهذا يضمن بإذن الله إن أطفالنا سوف تنطلق بالحياة وهي تؤمن بأنها تملك هذه الصفة و غيرها من الصفات التى سنمدحها و سنقويها فى نفوس أطفالنا

و لكم تحياتى

مامى لأول مرة

http://la3ya3nyno.blogspot.com/

جزء2 من حدوتة طير ابرهيم - من قصص الحيوان فى القرآن

1st collector for - مدونة مامى لأول مرة جزء2 من حدوتة طير ابرهي...
Follow my videos on vodpod

عايزين تحكوا حواديت لولادكم
و ما بتعرفوش
كويس جبنالكم حواديت من قصص القرآن للاطفال
شوفوها مع ولادكم و دردشوا معاهم فى الحدوتة و الهدف منها و اسألوهم اتعلموا ايه ؟؟
و لكم تحياتى
مامى لأول مرة
http://la3ya3nyno.blogspot.com/

حدوتة طير سيدنا ابراهيم - جزء1 - من قصص الحيوان فى القرآن

عايزين تحكوا حواديت لولادكم
و ما بتعرفوش
كويس جبنالكم حواديت من قصص القرآن للاطفال
شوفوها مع ولادكم و دردشوا معاهم فى الحدوتة و الهدف منها و اسألوهم اتعلموا ايه ؟؟
و لكم تحياتى
مامى لأول مرة
http://la3ya3nyno.blogspot.com/





حدوتة طير سيدنا ابراهيم - من قصص الحيوان فى الق..., posted with vodpod

التخويف و الضرب ما ينفعوش مع قاموس تربية الطفل

سمعتوا عن أهل ما تنفعش و لا يصح ان  تبقى أهل و لا تستاهل الأطفال إللى بيربوهم .. أكيد سمعتوا .. و هما مش قليلين ، هما كتير ، مش بس الأهل إللى ما يصلحوش لهذه المهمة هما إللى بيرموا ولادهم للدادة ولا للجد و الجدة عشان يربوهما ، لأ كمان الأهل إللى بتسئ التعامل مع اولادهم ، دول كمان ما يستحقوش نعمة الأمومة و لا الأبوة إللى ربنا وهبهالنا و جعلهالنا صدقة جارية عن طريق الأطفال دول ، فهم ثواب و خير يتحرك على الأرض

تبدأ المشكلة باننا عايزين ولادنا تسمع كلامنا ، مع اننا ما بنسمعش كلامهم فى أى حاجة .. عمرك قلت لإبنك حاضر .. ما هووو حضرتك لما تقوله حاضر هو ح يتعرف على الكلمة و ح يقولهالك ... و لأن الأهل ما عندهمش فكرة عن الموضوع و فاكرين ان الأبوة او الأمومة مصدرها انك تبقى عضو فى حزب معارض و ما يقولوش لولادهم إلا  لأ لأ لأ لأ لأ لأ

فطبيعى ان الطفل يكرر الكلمة الأكثر شيوعا فى البيت و هو كمان يقول لأ  لأ لأ لأ ، سواء بالكلام أو بالفعل ... لما الأب ما يلاقيش ابنه بيسمع كلامه يقرر يعاقبه و لأن الأهل ما يعرفوش كتير عن التربية ، فهنا يقرر الأب ضرب الإبن .. و مع تكرار الضرب يتعود الطفل عليه و يقرر الثأر لكرامته و يبدأ يغيظ الشخص الذى لا يهتم بطلباته فيزداد فى عناده والإستمرار فى عدم الطاعة

طبعا هنا موضوع الضرب ده بيطور و يتحول إلى تخويف الطفل  بالحرق بالكبريت أو بالشمعة لو كان الطفل لا يرتدع بالعصا

و ربنا يستر و ما نوصلش بالحرق الحقيقى فى لحظة غضب ، لأننا بكدة نكون بنقطع كل خيوط المحبة بنا و بين ولادنا و بعدين نرجع نقول هما ليه ولاد الزمان ده أبناء عاق .. مش هما إللى اطفال و ابناء عاقل ده احنا إللى أهل عاق

 و هنا يجى معاد السؤال المتكرر : " هل يجوز ضرب الأطفال عشان نحفظهم القرآن؟ "
الاجابة فى جملتين ،  تفتكروا رسول الله إللى جه رحمة للعالمين ممكن يعلمنا القسوة على الأطفال ؟؟ أكيد الاجابة واضحة

على العموم نرجع للهدى النبوى الشريف ح نلاقى من أحاديث رسول الله صلى الله عليه وسلم قوله "يا غلام سمِّ الله وكُل بيمينك، وكُل مما يليك"، هكذا قال المربي الأول، نبينا محمد –صلى الله عليه وسلم- حينما كانت يد عمر بن أم سلمة تطيش في الصحفة. صحيح البخاري (5376)، صحيح مسلم (2022).... فلم يستخدم معه الضرب أو التأنيب، ولكن وجَّهَه إلى الآداب الصحيحة عند الأكل. علينا أن ندرك أن هناك حقيقة مرتبطة بطبيعة البشر وهي أننا جميعاً خطاؤون، فالكل مفطور على صدور الخطأ منه صغيراً كان أو كبيراً، ومن الخطأ يتعلم الرجال  فما بالنا بالأطفال .

وحينما يكون تعاملنا مع أبنائنا قائماً على المحاسبة فقط دون التوجيه، فإننا نرتكب خطأً تربوياً فظيعا ، سيكون له تأثير سلبي على الأبناء سواءً كانت المحاسبة لفظية : (.. أنت لا تفهم، أنت غبي..)، أو كان بدنياً كالضرب باليد أو بأي أداة أخرى..

فإننا نكون جعلنا من الخطأ سبباً ودافعاً لتحطيم معنويات أطفالنا ده غير اننا بنكون دمرنا  قدراتهم  وسلب الثقة منهم، و التلت نقط دول يقدروا يوقوعنا في مشاكل نفسية كثيرة كالخوف والانطواء، والتبوّل اللا إرادي، واضطرابات النطق، إلخ

فالطفل سينشأ وفي ذهنه تلك الصور العقابية المحبطة، كارهاً من كان يمارس معه تلك السلوكيات الخاطئة، وقد يكبر ويتقمص تلك السلوكيات مع الآخرين.

عشان كدة يا كل أب و يا كل أم لازم  يا ريت نسأل نفسنا و نحاسب نفسنا قبل ما نحاسب أبناءنا عن أخطائهم.

أسئلة لازم يسألها ضمير كل أب و كل أم :

·       هل علّمنا أطفالنا الطريقة الصحيحة للسلوك الصحيح؟

* هل الضرب واستخدام الألفاظ المحبطة هو الحل الناجح للقضاء على السلوكيات الخطائة وتعلمهم سلوكيات مرغوبة؟

و ازاى جاوبت على السؤالين اللى فاتوا بضمير يبقى من حقك تعرف اجابة السؤال اللى جاى
إزاى نحول أخطاء أطفالنا وسيلة للتعلم والإبداع ؟؟

 علينا بالخطوات دى ::
(1) أعد الثقة للطفل بعد الخطأ؛ فالثقة دائماً هي العلاج الذي يبني حاجزاً متيناً بينه وبين تكرار الخطأ.
(2) علّمه الطريقة الصحيحة للتعامل مع الموقف.
(3) علّمه تحمُّل مسؤوليته عن أخطائه ليكتسب مهارة التحكم في ذاته، فالطفل الذي يحدث منه كسر كوب الماء لا تنفعل عليه، بل كن هادئاً واطلب منه أن يقوم بتنظيف المكان وكافئه لفظياً، ومن ثم وجهه للطريقة الصحيحة لحمل الأكواب.
(4) ابتسم وأنت تقنعه بخطئه وتشعره به.
(5) افصل الخطأ عن شخصية الطفل.
(6) كوّن عند الطفل المعايير السليمة التي من خلالها يتعرّف على الخطأ.
(7) أنصت إليه بتمعّن واهتمام؛ لتفهم أصل الخطأ.
(8) لا تجعله يقع فريسة للخوف من الفشل.
(9) لا تيأس من طفلك مهما تكرر خطؤه.

وتأكدوا – ايها الاهل الطيبين- أن الحب والتسامح مع الأطفال أقوى وأنفع من الغضب والانفعال، ولنكن قدوةً لأطفالنا بكل أمور الحياة.
فحاول بقدر ما تستطيع أن تنشئ علاقة ود وصداقة مع أطفالك؛ كي يتعلموا منك الصواب ويساعدهم على تكراره.
.

و لكم تحياتى

مامى لأول مرة 

http://la3ya3nyno.blogspot.com/

     

      

عايزة اسأل عن طول ابنى و وزنه

السلام عليكم ورحمه الله وبركاته ربنا رزقنى بحمزه وعنده شهرين ووزن الولاده

 3750 وطوله 50 سم وهو دلوقتى عنده شهرين ووزنه 6500 وطوله 58 سم هو كده كويس ولا ايه؟ وبيعمل براز كتير يعنى حوالى 4 مرات فى اليوم وساعات بيكون مخضر بش مش اسهال يعنى فى شويه كتل بسيطه

الإجابة :

ابنك وزنه كويس اوى ، فالرضيع فى عمر شهر يتراوح وزنه ما بين 3 كيلو و خمسة كيلو و نص ، و فى عمر 3 شهور بيكون وزنه ما بين 4 كيلو و نص و لحد 7730 جرام

فانتى حسنتى وزن الولادة و ابنك و أصبح  كأنه مولود و وزنه 4 كيلو و ربع .. لأننا لما نبص على جدول الأوزان ح نلاقى وزن ابنك الـ 6500 جرام هو وزن طفل عمره تلت شهور.. فابنك الحمد لله كويس

لكن خدى بالك الزيادة فى وزن الرضيع كويسة فى اول 6 شهور لكن بعد كدة بتاثر على تسنين البىبى و لما يمشى بتسببله تقوس قى الرجلين .. عشان كدة ارجوكى نظمى أكل ابنك ، مش طول اليوم تديله صدرك او تحطيله الببرونا .. لا ، يآكل كل تلت ساعات عشر دقايق من كل صدر او ربع ساعة البكتير

بخصوص التواليت :

اانتى بتأكلي ابنك زيادة شوية و ده سبب تكرار التبرز مش لسبب مرضى ، الاسهال يعد اسهال لو التبرز زاد عن خمس مرات فى اليوم .. اما عن البراز الأخضر لو ابنك عنده برد فده من البرد ، و لو بينام فى تكيف حاولى تخلى الحرارة زيادة شوية ما تقلش عن 26 درجة ، لنها ممكن تسببله برد فى المعدة و تسبب اخضرار البراز ، لكن لو ما عندوش برد و بترضعى طبيعى و بتآخدى أعشاب فبيكون اللون الأخضر بسب الأعشاب

السؤال2 :

نا ابني حمزه عنده سنه واربع شهور اتولد 3 ونص كيلو تقريبا ودلوقتي 11 كيلو وطولع 83 سم مشكلته انه عنده دايما نقط بيضا بضوافره مش عارفه دا نقص ايه في جسمه وانا بقطع دايما الديكال بالشهر مش عارفه دا غلط عليه ولا ايه وكمان هو مبياكلش غير اندومي نزدلز او شيبسي او لسان عصفور مبيحبش غير هم ومش عارفه اذا كانو ضارين بيه ولا ايه وكمان برضعه طبيعي ووعاوزه اعرف موعد الفطام امتى 

وشكرا جدا 

الاجابة :

يؤسفنى انى أقولك انك بدمرى  ابنك ،  انا آسفة بس دى الحقيقة ، أندومى فيه مواد مسطرنة ، ربنا يحفظ ابنك ، حالا توقفى كل إللى ابنك بيآكله ده و بدليه بالفاكهة و الخضار و الرز و اللحمة و البيض و السمك ، ملوخية ، لسان العصفور كويس

كلى قدام ابنك عشان يحب الأكل بتاعك و يآكل منه ، و امنى الأتدومى و الشيبسى فورا

بلاش الشيبسى لأنه بيتقلى فى زيوت غير مشبعة و هى ضارة بالاطفال .. اكلى ابنك عصير و فاكهة و خضار و استمرى على الفيتامين بانتظام لحد ما كل اسنان ابنك تظهر ، و خلى الدكتور بتاعه يكتبله على حديد مناسب ليه .. و خلى الرضاعة تبقى بالليل بس عشان يستفيد بيها لأن الرضاعة نشاط ليلى .. بالنسبة لحالتك افطمى ابنك بعد ما تعوديه على التغذية الصح ، يعنى كملى لحد ما يبقى عمره سنين لو قدرتى تعودييه قبل سنتين وقفى الرضاعة بالتدريج

اللون الابيض فى اضافر ابنك دليل انيميا

سؤال3 :

السلام عليكم ورحمة الله وبركاته
انا بنتى عندها 4 سنين و8 اشهر وطولها حوالى 100 سم ووزنها 13 كيلو طبعا موش محتاجة اقولك قد ايه مغلبانى فى الاكل واكلها ضعييييف خاااالص وتقريبا موش بتاكل غير صنفين ثلاثة وجميع انواع الفواكه موش بتاكلها والا العصاير بانواعها وجربت معاها كتير فواتح الشهية والفيتامينات ولما لقيت مفيش فايدة بطلتها ياريت تقوليلى اعمل ايه وايه الحل معاها ارجوكى تردى عليا وهيا على فكرة عملنالها تحليل دم طلعت النسبة 10.8 

الإجابة :

واضح ان بنتك مغلباكى لأن طول البنت اللى عمرها اربع سنين ما بين 95 سنتى و لحد 108 و ربع و انتى بنتك داخلة على خمس نين و طولها 100 سنتى

و وزن الطفلة إللى عمرها اربع سنين ما بين 13 كيلو و 20 كيلو تقريبا

و فى مشكلة ان عمر بنتك مش ماشى مع طولها و لا مع وزنها

فلو فرضنا ان سنها 4 سنين فلازم يبقى طول 101 سنتى و وقتها الوزن لازم يكون 16 كيلو

و لو بنتك عمرها خمس سنين و طولها 101 سنتى لازم وزنها يكون 14 كيلو و نص

فواضح جدا ان عندها مشكلة أكل و نخاف انها تأثر عليها بعد كدة .. عشان كدة فى حلين ممكن تجربيهم و لو فشلوا ودى بنتك لدكتور غدد

ــ  الأول اننا نجوعها ، ما نديهاش أى حاجة تآكلها خالص و نقعد نآكل قدامها ، وقتها ح تتشجع انها تجرب الأكل إللى مش مستلطفاه .. يعنى نفطر كلنا مع بعض و سبيها تآكل او ما تكلش ، و ما حدش يأكلها أى حاجة لحد معاد الغدا ، و نقعد نآكل و هى معانا .. نآكل احنا الأول و نسيبها لحد ما تمد إيدها

ــ الحل التانى اكلى بنتك فى وسط اطفال ، ولاد العيلة ، حضانة ، ولاد الجيران ، ان شا الله فى النادى و هى بتلعب على المرجيحة

السؤال 4 :

السلام عيكم ابنى عمره 6شهور ويومين كان بياخذ لبن صناعى مع اطبيعى لان الطبيعى فليل وعلشان دخل الحضانه بصفراء اول الولاده ووزنه عند الولاده 3كيلو ونصف حاليا حوالى 8 كيلو عاوزا وحاليا بياخد فىدروب وهاى كال فيتامين كده صح وكمان عاوزا اغير اللبن الصناعى لانى كنت بدى بيوميل 1 هل اابد اديله لبن عادى زى جهيته او المراعى واخففه ولا اكمل صناعى مع الاكل برجاء الافادة

الاجابة :

ابنك وزنه مش وحش ، لكن المفروض يكون أحسن لأنه اتولد 3 كيلو و نص فكان المفروض يبقى وزنه 9 كيلو او 9 كيلو و نص كمان .. فانتى مقصرة شوية فى تغذيته .. فيتامين الكالسيوم كويس للاسنان و المشى استمرى عليه حتى عمر سنتين ... تغير اللبن الصناعى يكون بمعرفة و بوصف من طبيبك عشان يوصفلك اللبن المناس لإبنك .. و اوعى تديله لبن بقرى دلوقتى خالص ، ممنوع جهينة او المرعى او اى لبن معلب .. كملى البن الصناعى فهو معالج بشكل خاص غير ضار بالاطفال ، كملى لبن صناعى و الأكل مع عمل جدول منظم للاكل و الرضاعة و النوم عشان نضمن نمو للطفل بشكل جيد

و لكم تحياتى

مامى لأول مرة

http://la3ya3nyno.blogspot.com/

 

من قصص القرآن الكريم - حدوتة ناقة صالح عليه السلام جزء2

عايزين تحكوا حواديت لولادكم
و ما بتعرفوش
كويس جبالكم حواديت من قصص القرآن للاطفال
شوفوها مع ولادكم و دردشوا معاهم فى الحدوتة و الهدف منها و اتعلموا ايه ؟؟
و لكم تحياتى
مامى لأول مرة

مدونة مامى لأول مرة - حدونة ناقصة صالح الجزء2 -..., posted with vodpod

حدوتة من قصص القرآن الكريم - ناقة صالح عليه السلام

عايزين تحكوا حواديت لولادكم
و ما بتعرفوش
كويس جبالكم حواديت من قصص القرآن للاطفال
شوفوها مع ولادكم و دردشوا معاهم فى الحدوتة و الهدف منها و اتعلموا ايه ؟؟

و لكم تحياتى
مامى لأول مرة
http://la3ya3nyno.blogspot.com/

- مدونة مامى لأول مرة - عايز تحكى لولادك حوادي..., posted with vodpod

تطور الطفل فى عمر سنيتن

 سامعة صوت كل أم بتصوت و كل أب بيصرخ و لا حياة لمن تنادى ... لأ الكلام و الصريخ مش موجه للحكومة المرة دى ، لكن موجه لإبنهم إللى لسة محتفلين بعيد ميلاده التانى ... و المشكلة سببها الأهل إللى مش عارفين ان طفلهم فى السن ده شخصيته بتتكون و بيحصل تطوير فى عقل الطفل فى عمر سنيتن و بتزداد تطوراً ويصبح التطور ده معقّداً كل يوم عن التانى .
فالطفل فى عمر سنتين يقدر :

1.  يشكّل الصور في ذهنه
2. ويصنّف الأشياء إلى فئات ويرتبها.
3.  و ذاكرته بتقوى و بتتحسّن  باستمرار
4. ويتعلّم التعرّف على الألوان الأساسية والعدّ من الرقم واحد إلى عشرة.

عشان كدة لازم نشجع طفالنا فى عمر سنيتن على العدد و التعلم الأوان الساسية .. و نقدر نلعب معه ألعاب تدريب الذاكرة... و الحكاية مش محتاجة مصاريف و لا شرا أى حاجة – يكفيك سلّة غسيل مليانة بالشرابات .. و اطلبوا من الطفل  أنه يلاقى فرة الشراب أو الجورب (فردة الكلسات) الثاني
و أول ما يلقيها نملا الدنيا تصقيف و تهليل و قبولات

بناء اللغة عند الطفل فى عمر 24 شهر :

 فى الفترة دى يقدر الطفل  يركب جملة من كلمتين أو ثلاث وهو بيتكلم معاكو ... و دى فرصة كويسة عشان تقدروا تعرفوا ابنكم حاسس بإيه دلوقتى و نفسه فى إيه ، و اوعى تستهون بيه كائن له إحساس و مشاعر ، لإن شعوره بنفسه وذاته كشخص مستقل ومميز يكبر وينمو، بيديله الدافع انه يتكلم عن نفسه و عن إللى بيحبه أو يكرهه، عن إللى عايز يعمله او نفسه يتعمله . 

اكتشاف مواهب الطفل فى عمر سنتين : 

في العام الثاني من العمر، يمكن للطفل أن

• يرسم صوراً 
• ويرتب الأشياء حسب النوع
• يضع الأغراض في أماكنها. 

ليه؟ ليه ؟ ليه ؟؟ : 

بشعر الطفل فى العمر ده بفضول شديد .. و رغم ان مفرداته لا تساعده على طرح الأسئلة لكن ده مش معناه انه ما بيسألش ، فى ابن هذه المرحلة يسأل و يقول "لماذا" لأسباب عديدة و اشكال عديدة منها :

1.  انه كتير بيدور على شرح واستفسارات
2.  وفي أوقات يعبر بكل اسئلته بانه بيقلد الكبار عشان يوصل للاجابة بنفسه و يرضى  فضوله بشأن أمر ما
3.  لكن في أحيان أخرى،تقدر هذه المفردة القليلة تحقلله هدفه و تلبى اهتمامه ورغبته في الحصول على إجابة مطوّلة.

 عشان كدة بننصح كل أب و كل أم ، أجيبوا على أسئلة الطفل وتحلّوا بالصبر.و لو عايز تعلم ابنكالتفكير بعمق جاوب على سؤاله بسؤال ، يعنى لما يقولك ليه القطة هربت ؟؟ يكون ردك تفتكر انت هى ليه هربت ؟؟
 بهذه الطريقة، قد تصلون إلى الجواب الذي يبحث عنه الطفل هو في الأساس و مش الاجابة الحقيفة للسؤال. 

المؤنث و المذكر فى لغة طفل عمره سنتين : 

إن الأطفال فى هذا السن بيبقى عندهم ادراك أكبر بالفوارق ما بين الجنسين ويمكنك منحه الفرصة لاستكشاف كل أوجه الكائن البشري... و عشان كدة ممكن تأملوا سلوك البنت فى هذه المرحلة و سلوك الولد فى نفس هذه المرحلة ، ح نلاقى البنت تبدأ في تقليد سلوكيات النساء بينما يفعل طفلك ما يفعله الرجال ... لكن ده مش معناه انكم لو لاقيتوا ابنكم ما بيقلّدش نفس جنسه تقلقوا ، لأ ، لأن  هذا طبيعي، وتعتبر  هذه اختبارات من الطفل  لتطوره ولنموه الذهنى و العقلى . 

الألعاب إللى ممكن نلعبها مع طفل عمره سنتين : 

• لعبة البحر الكبير : 

هذه اللعبة وسيلة رائعة لتنمية خيال الطفل.. يمكنك التظاهر بأن غرفة المعيشة مثلاً أصبحت بحراً وأن عليه الوصول إلى الجانب الآخر من الغرفة من دون أن يبلل قدميه! 
المهارات التي يتمّ تنميتها من هذه اللعبة : التوازن، والوعي بالفضاء (المكان والمساحة)، والخيال 
كل إللى ح نحتاجه عشان اللعبة دى: وسائد أو مخدة كبيرة. 

بعثروا بعض الوسائد على الأرضية عشاز يمشي عليها الصغير.. لازم ننط و نقفزمن فوق المخدات إللى المفروض انها الأرض إللى مافيهاش ماية .. ابدؤا و الطفل ح يقلد
. و ما تنسوش تشاوروا. على السفن والحيتان وحوريات البحر (الخيالية طبعاً!) أثناء اللعب... و نقول مثلا " خد بالك! احذر أسماك القرش هناك!"..  

• نصنع عقد او قلادة بمساعدة الطفل : مش ح تلاقوا حاجة  يجذب انتباه الطفل و تخليه منهمك فيه مثل اللعب الإبداعي، فالطفل مع صغر سنه يمكنه أن يصنع قلادة من المعكرونة وشفاطات العصير.. وهي لعبة رائعة لوقت المطر حين لا يتسنى لكما الخروج، وسوف يستمتع الصغير بالمعنى الحقيقي للإنجاز من خلال صنعه لشيء ما من ألفه إلى يائه. كما أنها وسيلة جيدة لتشجيع الطفل على التركيز. 

المهارات التي يتمّ تنميتها:  الفرز والتنظيم، المهرات الحركية 
واللعب بالألوان، والقدرة على التركيز 
سوف تحتاجون إلى: خيط، معكرونة على شكل أسطوانة، و/أو شفاطة عصير ألوان للأطفال، وعاءين فارغين من البلاستيك أو ثلاثة، ملعقة، ورق تغليف الطعام، ورق كبير نظيف، ومقص. 

ضع بعض الورق الكبير النظيف على الطاولة ثم ضعي فوقه مناديل من ورق المطبخ. خلّي كل لون من ألوان الأطفال التي اخترتها في كوب مختلف من البلاستيك. ضعي بعض المعكرونة في كل كوب وقلّبيها ثم أخرجيها بملعقة وضعيها على ورق المطبخ لتجف. لو استخدمت شفاطات الشرب، اقطعي اثنتين أو ثلاثاً منها إلى قطع قصيرة. بعد أن تجف المعكرونة، قصّي خيطاً طويلاً بما يكفي لعمل عقد .. ما تنسوش تمسكوا أحد طرفي الخيط حتى لا تسقط المعكرونة منه، بينما يقوم طفلك بنظم "الحبات". (اقتراح: لفّي قطعة من الشريط اللاصق عند نهاية الخيط لمنعه من الانفراط وتسهيل نظمه). اربطوا طرفي الخيط لتصبح لديكم قلادة ملوّنة جميلة.


 و لكم تحياتى


مامى لأول مرة
http://la3ya3nyno.blogspot.com/

ابنى مدوخنى فى الأكل

ابنى عمرة سنتين واربع شهور وزنة تسعة كيلووطولة80سم وكان وزنةعندالولادة2ك و900ج غيرمحب للاكل ولاالعصائرولماياكل ياكل الاكل الغيرمغزى وياكل كميات قليلةجدا والوقت الى بين الاكلات طويل جدالكن هومطلع الاسنان والانياب وضرسين من كل جانب فوق وتحت وهوبيحب اللعب جداويفضلةعلى الاكل والنوم

الاجابة : 

أول ملحوظة ان ابنك وزنه صغير جدا و طوله كمان .. الطفل الولد لما يكون عمره سنتين لازم طوله يتراوح ما بين 82 سنتى و 93 و انتى بتقولى ان ابنك طوله 80 سم بس

و بخصوص الوزن :  الطفل إللى عمره سنتين لازم وزنه يبقى ما بين 10 كيلو و نص و حتى 15 كيلو إلا ربع و انتى بانك وزنه 9 كيلو بس

ارجوكى اعرضى ابنك على دكتور ، عشان يعمله التحاليل اللازمة و يكتبلك على نظام عذائى لأبنك .

ابنك عشان يكبر كويس و تكون صحته كويسة ، لازم ينام كويس الأول ، لو ما نمش مش ح يقدر يآكل كويس ، نيمى ابنك كويس و اكليه كويس عشان يكبر بشكل طبيعى

السؤال2 :

السلام عليكم انا عندى ريتاج عندها سنه وشهر ووزنها 10كيلو الاربع ومش بتحب الاكل بتعنا هى عيشة على الجبنة والسفن اب والعصائر ومش بترضع طبيعى ومنعتها من اللبن الصناعى من شهر علشان كان بيسبب لها نزلات معويه كتير ودلوقتى بديها لبن بخيرهبس بزوده مياه مغلية فهل طبيعى قله اكلها ولبن بخيره هل هو مضر ليها ارجو الرد وشكرا

الاجابة :

وزن الطفلة البنت اللى عمرها سنة بيكون ما بين 8 كيلو إلا ربع و حتى  11 كيلو و ربع ، و الطول بيكون ما بين 70 سم و 79 سم .. ف الحمد لله بنتك وزنها كويس اوى و ان كنت أفضل انك تتابعى طولها مع وزنها ، عشان فى علاقة بين الطول و الوزن خصوصا بعد ما يوص عمرها سنتين

و آخاف ان الزيدة فى الوزن دى تكون سمنه بسبب السفن أب اللى ريتاج بتشربها ، عشان كدة تابعى طولها ... و ضرورى تمنعى الماية الغازية لعدة اسباب :

- بتسبب هشاشة عظام للاطفال

- فيها مواد حافظة بتتلف الكلى و الكبد

- بتسد نفس الاطفال عن الاكل

لو عايزة بنتك تآكل كويس وقفى المياة الغازية فورا .

بالنسبة للبن بعد سن سنة مافيهوش مشكلة ، و اللبن البقرى او المعلب كويس و مفيد .. لكن بلاش تزوديه ماية ، الأفضل تدى بنتك كمية صغيرة من غير ماية بدل من كمية كبيرة بماية

.. كويس انها بتشرب عصير و راعى انك ما تحطيش فيه سكر لو كنتى بتعمليه فى البيت ، و لو العصير جاهز يبقى خالى من المواد الحافظة

و لكم تحياتى

مامى لأول مرة 

http://la3ya3nyno.blogspot.com/

الجزء2 من حدوتة الغراب البرئ - من قصص القرآن الكريم

لو عايز تحكى لإبنك حدوتة و ما بتعرفش ، تقدر تقعد تشوف معها الحواديت دى و بعد ما تخلص تقعدوا تتناقشوا فيها ... فى كل خاجة ، لكن المهم انك
فى النهاية تسأل الطفل إيه إللى ستفادة من الحدوتة

و لو عايز تشوف الجزء الأول من الحدوتة
اضغط على اللينك ده
http://mamy1st.blogspot.com/2011/08/blog-post_17.html
مامى لأول مرة
http://la3ya3nyno.blogspot.com/




الجزء 2 من حدوتة الغراب البرئ - من قصص القرآن ا..., posted with vodpod

حدوتة الغراب البرئ - من قصص القرآن الكريم

لو عايز تحكى لإبنك حدوتة و ما بتعرفش ، تقدر تقعد تشوف معها الحواديت دى و بعد ما تخلص تقعدوا تتناقشوا فيها ... فى كل خاجة ، لكن المهم انك فى النهاية تسأل الطفل إيه إللى ستفادة من الحدوتة
و لك تحياتى
مامى لأول مرة
http://la3ya3nyno.blogspot.com/






قصص الحيوان في القرأن - الغراب البرئ , posted with vodpod