بنتى "جى " اللى عمرها اربع سنين بلعت دبوس

بنتى اللى عمرها اربع سنين بلعت دبوس

كانت تلعب الى جوارى و فجأة سمعتها تحاول اخراج شئ من زورها ... تدفع الهواء و الريق من فمها بقوة ... و فجأة لقيتها بتعيط ...  فى ايه "جى " ؟؟ حصل ايه ؟؟؟

فضلت تعيط و تحضنى و هى بتعيط جدا و تقولى : " لا يا مامى ... لا يا مامى ... مش عييزاهم يفتحوا بطنى "

و احنا اكتشفت انها بلعت حاجة ، لأنى كنت مفهماها انها ما تحطش حاجة فى بقها ، عشان لو بلعتها ح يفتحوا بطنها

بنتى "جى " اللى عمرها اربع سنين بلعت دبوس - mamy1st - مامى لأول مرة

بدأت أهديها عشان افهم منها ايه اللى حصل .. و اول ما قلتلى بلعت دبوس ، مسكت اعصابى و خدتها فى حضنى ، و بدأت أعرف شكل الدبوس ... و عرفت انه دبوس سلسلة م اللى بيقف ... الحمد لله مش دبوس طرحة ... و بدأت أسألها :

-        فى حاجة وجعاكى ... تقولى لأ

-        حاسة عايزة ترجعى ؟؟ تقولى لأ

-        الدبوس شاكك و هو نازل ... تقولى لأ

خفت الدبوس يجرح امعاها فقرت اكلها لبابة عيش فينو ... و ادها لبن صاقع عشان يسهل  و يسرع من دخولها للتواليت

و فجأة ما اعرفش حصل ايه خفت و حاسيت ان الموضوع مش بالبساطة دى ... و قررت أكلم المستشفى الأطفال ، ردت عليا الدكتورة و قالتلى لازم نعمل اشعة فورا .... ايه ده الموضوع خطير و لازم اروج المستشفى

لبست بسرعة و خدت بناتى التوأم " جى " و "هوهوز" و روحنا المستشفى الساعة 11 و نص بالليل .. شاورلنا لتاكسى نزلنا قدام المستشفى

فى الاستقبال   .. قالوا اطلعى للدكتور فى الدور التانى ... ركبت اسانسير المستشفى الضخم لوحدى و معايا بناتى التوأم ... دخل الكوريدور لقيت الدكتور لسة خارج من اودة العمليات ... و لأن المستشفى مستشفى خاص و محترم ، لقيت الدكتور عنده خبر من الاستعلامات ان ف طفلة بلعت دبوس طلعاله ... قعد يسأل بنتى 15 سؤال كلهم معناهم الوجع فين ؟؟

حاسة بايه ؟؟؟

و انا أقوله مافيش حاجة ... و الدكتور ما يردش عليا و لا يبصلى ... و بعدين كتب حاجة فى الروشتة و اداها للممرضة  اللى قالتلى اتفضلى عشان نعمل اشعة ... و ركبنا الاسنسير عشان نعمل الاشعة لقيت الممرضةب بتسألنى على شكل الدبوس .. قلتلها دلوس  سلسلة

بصتلى استياء و قاتلى الدبوس الأصفر ده ؟؟

قلتها آه

قالتلى مفتوح و لا مقفول

قلتها مقفول

قالتلى و كمان مقفول ... روحى يا مدام ، اكليها لبابة عيش و خس  و جرجير  عشان يلف على الدبوس و يينزل مع الحمام من غير ما يعورها

قلتلها يعنى اروح

قالتلى روحى طبعا ... ايه يدفعك اشعة و كشف و فى الآخر مش ح يعمل حاجة و الدبوس ح ينزل ... بس خليها تعمل حمام فى قصرية او كراونة عشان تشوفى الدبوس و تتأكدى انه خرج

و رجعت البيت و انا متخيلة ان المشكلة كدة انتهت ، و كلمت الخضرى بعتلى خس و جرجير و موز و كابوتشى ... و جالى مع اننا كنا الساعة 12  و نص  بالليل و قعدت اكل بناتى الاتنين عشان يشجعوا بعض .. و خلوا الجس و عملت سندوتشات جبنة بالجرجير

و يحلو بموز

و صحيت الصبح عشان بنتى تدخل التواليت مافيش تواليت ... بس عمالة تقولى بطنى بتوجعنى

طلبت الدكتورة اللى كانت بتعالجها و هى رضيعة ... و قلتلها اعمل ايه ... قالتلى اكلها لبابة عيش و شربيها ينسون بالعسل الأبيض

و فعلا عملت كدة و بعد ساعة طلبت "جى " تدخل التواليت ، و خليتها تعمل تواليت فى البانيو عشان اعرف ادور على الدبوس ... و لبس فى ايدى اكياس نايلن و بدأت أدور... ما لقتش حاجة

خفت جدا ، الدبوس لسة فى بطن بنتى ... قررت اخدها تدريب الجمباز  يمكن المدرب يلاحظ حاجة و يقولى ... كل حاجة ماشية عادى

رحت المستشفى و دخلت على طول على قسم الأشعة ... مختص الأشعة قالى خلاص يا مدام مش محتاجة تعملى أشعة ... قلت له ليه ؟؟ ... قالى الأشعة دى بتتعمل بعد ما بنتك تكون بلعت الدبوس بساعة بساعتين بالكتير  .. لكن دلوقتى أكيد الدبوس نزل

قلتله لأ معلش اعمل اشعة عشان اتأكد
قالى حاضر ... بص فى الأشعة قالى مافيش دبوس ...   واضح انه نزل مع البراز او انها ما بلعتوش أصلا .

فرحت ان الحمد لله مافيش اثر للدبوس  ... لكن كنت محتاجة اتأكد من الدكتور مش من فنى الأشعة ... و خدت الأشعة و طلعت لطبيب الأطفال ... بص فيها و قالى لأ مافيش أى اثر للدبوس ... و بدأ يشرحلى الحالات اللى بيخافوا منها لما الطفل بيبلع دبوس من بتوع الطرحة ... مش دبوس مقفول 
- بيخافوا ان الدبوس يقف فى القصبة الهوائية و ده لازمة عملية فورية
- بيخافوا ان الدبوس يخرح الأمعاه فبيحلوا يغلفوه بنوعية معينة من المأكولات ذات الألياف ... و لو الدبوس ثابت لازم عملية لكن لو بيتحرك بيسبوا الجسم يتخلص منه لواحده
- و لاحظ الطبيب قلقى الظهر فجأة فقالى تأكدى ان الدبوس نزل ، و برضه تابعى تنفسها و لون البراز و البول لو ظهر فيهم دم هاتيها بسرعة ، و تابعى اى دم يخرج من فمها ... لو ما حصلش حاجة تبقى بنتك بخير و الحمد لله

و لكم تحياتى
مامى لأول مرة