الاثنين، 28 نوفمبر، 2016

حافظ على حياة اطفالك و انقذهم من الترمومتر

معظمنا بيكون عنده في البيت ترمومتر زئبقى  علشان نقيس الحرارة لأي حد في البيت أثناء تعبه لا قدر الله ، و أحيانًا الترمومتر بيقع على الأرض و ينكسر، طيب أيه هي الطريقة السليمة للتخلص من الزئبق اللي وقع على الارض ؟

1- لازم نعرف أن الزئبق خطير جدًا على الصحة علشان كده لازم نتعامل بحرص شديد جدًا معاه ، كمان نخللي بالنا أن الزئبق لو جه على أي معدن بيتفاعل معاه علشان كده أول حاجة لازم تعملها إنك تخلع أي حاجة دهب إنت لابسها لإن الزئبق لو جه عليه هيبوظه.
2- بعد كده أوعى تحاول تلمسه بإيدك لأنه مادة خطرة زي ما قلنا ، ألبس في أيدك جوانتي طبي أو لو مفيش ممكن تلبس كيس في أيدك
3- بعد كده إمسك الأجزاء المكسورة من الترمومتر و حطها في كيس محكم الغلق ، كده هيتبقى الزئبق بس على الارض ، أوعى تكنسه بالمقشة أو المكنسة او تستعمل فوطة مبلولة ، كل ده غلط .. أومال هنعمل أيه ؟؟
4- هنجيب علبة بلاستيك بغطا صغيرة نكون مش محتاجينها و هنملى نصها مياه ، و بعدين هنجيب سرنجة من غير إبرة و نبتدي نقربها من حبيبات الزئبق اللي على الأرض و نسحب الحبيبات داخل السرنجة زي ما نكون بنملى السرنجة
5- بعد كده نغطس السرنجة في المياه اللي في العلبة و نبتدي نفضّي الزئبق تحت سطح المياه ، و بعدين نقفل العلبة كويس

ملحوظة : طبعًا في حبيبات بتكون صغيرة أوي مش بتتسحب بالسرنجة ، دي بقى هنستعملها بلاستر طبي ، نحطه على مكانها و نشيله فهتلزق فيه
6- بعد كده هنحط كل حاجة استعملناها سواء الجوانتي أو الكيس و السرنجة و العلبة اللي فيها مياه و البلاستر و الزجاج بتاع الترمومتر جوه كيس تاني و نقفله كويس . و لو قدرنا نوديه اقرب مستشفى أو مركز طبي علشان هم عندهم طرق صحية للتخلص من مخلفات الزئبق ، لو معرفناش نكتب على الكيس خطر و نرميه في الزبالة بعد ما نقفله كويس . ياريت كمان لو نقدر نكون لابسين ماسك اثناء ازالة آثار الزئبق