السبت، 22 نوفمبر، 2014

وصفة سحرية لعلاج مشكلة كل أم

معظم الأمهات تبذل مجهود مضنى فى الحفاظ على هدوءها مع اطفالها لأنها عارفة ان عصبيتها مع طفلها ح يخلق منه طفل عصبى و عنيد و اخلاقه غير طيبة 
و كثيرا ما أرى  الصراع النفسى التى تمر به الأمهات  بين قدرتهم على التحمل و غضبهم من الطفل و دائما اسمع هذه الأمهات تبكى و هى تقول" كان نفسي اكون ام حنينة قريبة من العيال"""
"
ام بتفهمهم و تسدد احتياجاتهم """
"
كان نفسي مااذيهمش كان نفسي نفسيتهم تبقي كويسة"""

و  هذه الجمل تحمل الكثير من الندم  و الألم فى نفسية الأم خاصة التى تصرخا دائما فى اطفالها او تسبهم و لا تتمكن من وقف هذا النزيف و الصراع القائم بينها وبين نفسها و بعد قليل يصبح بينها و بين صغيرها   

لازم نعرف اولا :
- ان هذه الأم التى تشعر بهذا الندم هى ام جيدة و من الامكان اصلاحها جدا
- الأم التى لا تشعر انها ترتكب اى خطأ فلا أمل فيها و سيخرج من تحت يدها جيل عنيف حاد يخلق اسر فاشلة سرعان ما ستهدم قبل ان تبنى
- لازم نعرف ان هذه الأم بداخلها طفلة اخرى تبكى لأنها الحزينة الي حاسة بالذنب و ما حدش شايفها
- لازم كل ام تعرف  انه مدام الطفلة اللى جواها مظلومة و مش مفهومة و بتحاول و ما حدش بيقدر ح تفضل الأم اللى برة تعبانة و واقعة فى الصراع ده لآخر عمرها

- لازم كل أم تعرف ان  مشاعرنا الي جوانا هي طفلتي و طفلتك الي جواك
و  دموع الام ما هى الا الطفلة  الموجودة بداخل الأم و التي  لا يلبى أحد احتياجاتها من الحب و الإهتمام و التقدير و الراحة النفسية و الجسدية
احتياجها ان حد يسمعها و يحبها و يشوفها و يساعدها مش يلومها
يمكن كتير من الي حوالينا سواء اجوازنا او اهلنا او حتي اصحابنا او نفسنا ما بيعملوش دورهم في انهم يشجعونا و يشوفوا المجهود حتي و لو كان قليل

لازم نفهم ان البنى آدمين بيتم شحنهم بالحب و التقدير و التشجيع و الرحمة ، و زى ما انتى محتاجة الأشياء دى ولادك كمان محتاجنها ، فمن فضلك اديهالهم عشان يعرفوا يدوهالك

-  اول خطوة في تغييري في عصبيتي هو التغيير ، يعنى  نجرب سكة جديدة امشى فيها و اجرب اغير طريقتي
- و اتعلم  من خبرات امهات تانيه - بس انا اللى اختار التجربة ماحدش يفرضها عليا - علشان ابقي ام احسن و اريح و مبسوطة اكتر انا و اطفالى

خطوات النجاح :

  • ""لما ام تقول لي انا بطلت ازعق علي المذاكرة و جبت لها مدرسة علشان حسيت انا باخسر بنتي""
  • ""لما تقول جبت شغالة علشان اعرف ارتاح و يكون عندي طاقة للعيال""
  • ""لما ام تقول انا حطيت عقاب واضح علشان ابطل ازعق ""
  • ""باخرج مع اصحابي مرة في الاسبوع علشان افرفش""
  • "بادور علي وقت انام فيه بين حاجة و حاجة  عشان اكتشفت ان قلة النوم بتسبب لها العصبية
  • ""روحت اشتريت حاجة لنفسي باحبها""
  • باقعد آكل على حيلى و مش متسربعة

ارجوكى يا كل ام .. ارضى الطفلة اللى جواكى .. اسعدى نفسك عشان تقدرى تسعدى بناتك ... إلعبى معاهم و انتى عارفة انك بتلعبى الطفلة اللى جواكى ... صاحبى طفلك او طفلتك على الطفلة اللى جواكى و بكدة ح تقوى علاقتك باطفالك و ح تعيشى مرتاحة حتى لو كانت امكانياتك لا تساعدك على احضارة خادمة او مدرسة او اى بديل يقوم بشغل الدادة كى تتفرغى انتى لدور الأم


- قررى ان تقضى الخميس و الجمعة فى بيت اهلك ان كان هذا يخفف عنك مجهود الأسرة قليلا 
- اخرجى تنزهى مع الأطفال مع تقسيم مسؤلية الخروج عليكم جميعا و ليس عليك فقط
- اجعلى الكل يساعد فى المنزل و دورك هو توزيع المهام عليهم
- ابحثى عن مناطق ادخال السرور و السعادة على اطفالك ، بالنزهة و التسوق و استمتى بكل شئ تعمليه فى المنزل ... نظفى و انتى ترقصى ... اغسلى المواعين و انتى تستمعى الى الاغانى الى جوارك بالمطبخ .. عندما تنامى كونى حاسمة " ماحدش يفتح عليا الباب " و لو حصل و حد صحاكى يواجه قباب شديد بان يحرم من الحاجات اللى سبقى و ادخلنا بها السرور على قلبه من نزهة و تسوق


جدول يجب رصده من آن لآخر :

- يجب ان تكون كل ام واعية طول الوقت لابعاد نفسيتها و تعرف ان احنا مش بس امهات احنا اطفال و زوجات كمان خلي بالك علي الطفلة الي جواك
- ارصدى عيوبك و محاسنك 
- اخفقاتك و  نجاحاتك
- الحلو الي جواك زي ما بتشوفي الوحش

تحية واجبة :

  1. برافو لكل ام صحيت بدري عشان تقوم بمسؤلياتها من غير توتر و سربعة و عجلة 
  2. برافو علي كل ام بتحاول تقرا علشان تتعلم  وتبقي احسن
  3. برافو علي كل ام بتسال
  4. برافو علي كل ام بتعيط من احساسها بالفشل و بتقوم تحاول تاني
  5. برافو علي كل ام بجد مش جنبها راجل فاهم و مقدر و بيساعد و بيشجع و هى لسة مكمله تعمل دورها - و فاهمة و متأكدة ان ربنا ح يعوضها فى الدنيا و فى الآخرة
و لكم تحياتى
مامى لأول مرة