تربية الأطفال

تبدأ تربية الأطفال بتربية الأهل و تحديدا تربية ألأب و الأم ... و ماحدش يقولى ح نعمل إيه فى الأم و الأب إللى عندهم مشاكل فى التربية ... الحل بسيط كل المطلوب منهم انهم يحسنوا سلوكهم و لحد ما يقدموا على الخطوة دى يبدؤا فورا فى التظاهر بأنهم ناس متربية ... و ده عشان يضمنوا ان ولادهم يتعلموا إللى هما ما اتعلمهوش ... و إللى ح يسألنى " "يب مش ممكن ح من الأطفال يشوف والده و يكتشف ان والده بيمثل الأدب "
 وقتها فى حل من أتين :

ـ ان الأب ده يقسى على نفسه و يقرر يتعلم الأدب بجد ، و يعتذر لإبنه لأنه غلط

ــ و الحل التانى ان الب يعترف لإبنه انه ما اتعلمش الصح من هو صغير عشان كدة بيعمل الغلط ... و عشان ألب بيحب ابنه ، فهو مش عايزه يتعلم نفس الغلط إللى الأب بيعمله

و لأن تربية الطفل تعنى أب و أم فلازم كل الكلام إللى فات ينطبق على أب و الأم

و عشان كدة أول شئ فى تربية الطفل او الطفلة يبدأ من  حسن اختيار الزوجة - اللى هى الأم - لزوجها - اللى هو الأب و ابو أولادها  ... و العكس بالعكس ف حسن اختيار الزوج لأم أولاده  هى كمان من اول خطوات تربية الأطفال. . و إليكم كلام الشيخ رمضان عبد المعز فى هذا الخصوص
http://www.youtube.com/watch?v=CzqvGpe5K3s&feature=related

شروط الزواج الصالح هو توافر النية الطيبة بين الزوج و الزوجة ، فالنية الصالحة تصلح الزواج و إليكم حديث الشيخ رمضان
http://www.youtube.com/watch?v=R3TgycpOD_o&feature=PlayList&p=C558D52E3536E7E6&playnext_from=PL&playnext=2&index=13

و بعد الزواج يجب ان يكون التعامل بين الزوجين بالحسنة لأن ده بينعكس على سلوك الأطفال ، غللى بتتعلم التربية بالتقليد .. و إليكم كلام الشيخ رمضان
http://www.youtube.com/watch?v=vz0fTfkTbCQ&feature=PlayList&p=C558D52E3536E7E6&playnext_from=PL&playnext=1&index=12


و للى يحب يتعرف على القواعد الرئيسية فى تربية الأطفال - ولاد او بنات - لازم يعرفوا اول قاعدة فى التربية هى القدوة ، فالأبناء يقلدون آباهم و أماتهم . . فصلاح الأبناء و خاصة الأطفال سواء فى الطفولة المبكرة او فى سن الطفولة أو حتى فى سن المراهقة ؛ صلاح ألبناء من صلاح الآباء و اليكم كلام الشيخ رمضان
http://www.youtube.com/watch?v=eMGOl8aFS-E&feature=related


الأبناء يشبون على ما يعوده عليه الآباء و الأهل و تحديدا الأب و الأم ، فإذا تعود الأبناء على الصلاح حققوا فى المستقبل الإصلاح ، فالأبناء هم كنز الآباء  فى الدنيا و حتى بعد الموت ، فأحسنوا تربية الأطفال  . . و إليكم كلام الشيخ رمضان
http://www.youtube.com/watch?v=qYz_BQV8q0I&feature=related

فمن يخاف على ابنه عليه بتقوى الله فيه و حسن تربيته و تعليمه . . و لا يطعم طفله و ابنه إلا من حلال ، و يدعو له بالصلاح قائلا : " الله هب لنا من ابناءنا و أزواجنا قرة أعين لنا "
أو يدعو قائلا ً :
" اللهم انبت ابنائى نبات حسنا ً . . و ليكونوا من أولياءك الصالحين "
أو يدعو كما دعت والدة السيدة مريم " اللهم انى أعوذ أبنائى بك و ذريتهم من الشيطان الرجيم ، الله اجعلهم مقيم الصلاة "

و اسمه لهذا الحديث لتتعرف على القاعدة الرئيسية فى تربية الأطفال سواء كانوا اولادك او أبناء غيرك و انت مأتمن عليهم
http://www.youtube.com/watch?v=IhVXD-UvM-c&feature=PlayList&p=C558D52E3536E7E6&playnext_from=PL&playnext=1&index=11

و لكم تحياتى
مامى لأول مرة
http://la3ya3nyno.blogspot.com/

مغامرات طفل رضيع لم يكمل شهره التاسع

رغم اننى أقرأ بشكل دائم عما يجب مراعاته و تجنبه للتعامل مع الكائن العجيب الملقب باسم الرضيع ، إلا ان بناتى دائما ما تطيح بكل ما قرأت عرض الحائط .
ففى احدى الزيارات لطبيبة الأطفال قالت لى الدكتورة انه يجب ان أجلس بناتى فى احد الأركان من الشهر الثالث و الرابع و أحيطهما جيدا بالوسادات لأنهما لا يجيدون الجلوس بعد و قد يسقطان على وجههما . . و بالفعل هذا ما كنت أعمله ، و لا اتركهما وحدهما ابدا إلا و قد وضعتهما على ظهرهما - فى وضع النوم عشان ما يقعوش على وشهم - . . و فى زيارة أخرى للطبيبة اخبرتنى ، اننى يجب ان أجلسهما فى منتصف الكنبة و اسندهما من قدام بيدى برفق حتى يقوى عمودهما الفقرى . . و نفذت الأمر بدقة . . إلى ان جاء شهرهما الخامس و كنت قد بدأت فى اطعامهما بكميات قليلة من الخضار المسلوق. . . و فى يوم قررت ان اجلس بناتى بسيارتهم ــ سيارة التوينزــ و أضعها بالبلاكونة كى يحصلوا على قسط من أشعة الشمس التى تمدهم بفيتامين " دال " و هو فيتامين يساعد الجسم على امتصاص الكالسيوم مما يقوى عظامهما و يساعدهم على الجلوس و الحبو و الوقوف و المشى و كذلك على نمو الأسنان و الدروس . . و فعلا ً جبت العربية ، و حطيت الآنسة " هوهوز" بالكرسى الأول ، و ووراها السيدة المبجلة الآنسة "جى" بالكرسى الخلفى ، و خرجنا فى البلاكونة . . و طبعا كنت ربطاهم بحزام الكرسى . . و كنت واخدة كل الإحتياطات ، و قلت أروح أجيب الخضار المسلوق بتاعهم عشان أبدأ أأكلهم . . و يا دوبك لسة بأملة الببرونا المعلقة بالخضار ، إلا و سمعت استغاثة من العالم الآخر قصدى من مكان الآخر ، و تحديدا من البلاكونة ... يا خبر ؟ فى إيه ؟؟


جريت لقيت "هوهوز" راسها تحت و رجلها فوق كأنها فى السيرك بالظبط ، مع انى كنت سيباهم هادين و منسجمين مع الشمس و الهوا و معجبين بشكل البيوت ، ما دى كانت أول مرة يخرجوا البلاكونة . . إيه بقى اللى حصل ، اتارى المادموزيل "هوهوز" ابتهجت ، فرحت زقطتت بدأت تفرك ، شمال يمين هوب هوب ، دب ، قامت مقلوبة . . و ده يرجع لعيب فى التصنيع ، تصنيع مين ؟!!!
 العربية التوينز طبعا . . فالكرسى الامامى بالعربة عبارة عن كرسى على شكل حرف " أل" (L) و ليس بها أذرع تحمى الرضيع و تمنع سقوطه ، إنما كل ما بها حزام الربط الذى يلف وسط الرضيع و قدميه ، فلولاه لسقطت " هوهوز على رأسها " و أضعات على مجهود ثلاثة أشهر فى سندها بالوسادات . . و منذ ذلك التاريخ قررj وضع المائدة المصاحبة لكرسى السيارة لتكون حامية لمن يجلس بالكرسى الأول و عشان تحمي البى بى من السقوط . . و ما عملتش الحكاية دى مع الكرسى التانى .. ليه ؟!!!
لا ليس لعدم اهمية الكرسى الثانى ، و لعدم أهمية الجالس عليه و انما لأن بالكرسى الثانى ذراعين طويلين يمنعا سقوط الجالس بهما حتى لو كنت حضرتك
و طبعا الموقف ده كان أول حاجة شيبت كام خصلة فى شعرى ، نيجى للى بعده . .

قد ورد إلى علمى اننى يجب ان أجلس "هوهوز " و " جى " على الأرض بداية من الشهر السادس حتى تعتادا على تحريك العمود الفقرى عندما يحاولا الإمساك باللعب الموجودة امامهما و يكون لديهم مساحة للحركة .. و الحكاية دى تتم بشرط ان احيط بناتى بالوسادات و الشلت حماية لرأسهما ، هو صحيح جسمهما هذه المرة أصبح أقوى لكن كل الخوف على الرأس ، لازم نحميها حتى لا ترتطم رأسهما بالأرض و عشان كدة نعمل مستطيل من الشلت حواليهما . . و مر الشهر السادس ، و بناتى بين مستطيل الشلت وكانت بالفعل تميل لتلتقط اللعب فتسقط رأسهما على الوسادات و تعجبهم النومة على المخدات و الشلت و دى طبعا الآنسة " جى " .. أما " هوهوز " فكانت تترك اللعب و تحاول الزحف خلفها ، و كتير بتحاول تزق الشلت و يمكن ده إللى شجعها على الزحف و شد الحاجات و اللعب فيها بدرى بدرى بدرى

و مش ح أقولكم عن رحلة القفز من فوق السرير و دى بدأت مع أول خطوة فى الإتجاه الرأسى يعنى اول ما اتعلموا الوقوف اول حاجة قرورا يعملوها ، يحطوا رجلهم فوق حرف السرير بتاعهم ، و لأن السرير هزاز فكنت بأخاف ان وزنهم يختل و يقعوا ... و اول حاجة عملتها وقفت مرجيحة السرير ، و تانى حاجة حطيت السرير من جهة بسرير خشب كبير و من ناحية الحيطة وس من ناحية تانية السرير التانلا ، طيب و الجهة إللى فاضلة ، و دى إللى عليها العين و النية .. جبت لحاف كبير ، طبقته اربعة و حطيته فى الجهة دى و فوق شلتة كبيرة ، عشان بعد الشر لو حد من البنات قرر يقفز يقع على الشلتة .. مش ح أخبى عليكم ، " هوهوز" قررت القفز من فوق السرير لكن مش على الشلتة لكن على السرير التانى ، و لأن الارتفاع مش كبير عدت على خير .. المشكلة فى " جى " إللى كانت بتنادى مرة عليا ــ بتعيط يعن - مش بتنادى كلام 


 و فجأة لقيتها بتصرخ .. جريت على الأودة لقيتها مش فوق الشلتة .. الرعب تملكنى ، ده انا لقتها تحت السرير ، طيب حصل إيه ؟ و إزاى ما وقعتش على الشلتة .. رح للدكتورة عشام تكشف على راسها ، قالتلى الحمل لله مافيش حاجة ، و طول ما البنت عيطتت يبقى مافيش مشكلة .. و لما روحت البيت و هديت قعت أفكر إزاى " جى " وقعت .. و قلت أكيد وقفت و توازها اختل و وقعت فوق الشلة ، بس اتزحلق من فوقها و نزلت تحت السرير و هى بتعيط من الخضة مش من الألم ... الحمد لله  

و بعد ما اطمنت المادموز " جى " على نفسها و إتأكدت انها تمام ، قررت هى و أختها البدئ فى رحلة جديدة ، و هى رحلة المعرفة إللى كان السبب فيها الشلت إللى حطتناها حواليهم .. و كانت "هوهوز " تحاول دفع الشلت للخروج من بينها و ده كمان غللى شجعها على الزحف ... لكن الزحف كان بيتوقف قدام أى قشرة لب تكون وقعت بالصدفة على الأرض .. كانوا يبصولها بانبهار شديد ، و تأمل و ساعات خوف لما يجوا يمسكوا  قشر لبة و يلاقوها ما بتتمسكش ، و كتير كانت قشرة اللب تدخل تحت السجادة يبقوا مش فاهمين هى راحت فين و اختفت إزاى ، و يا سلام لو خرجت تانى لأنها كانت ماسكة فى لشرايش تبدا رحلة الكفاح تانى و من جديد .. و سواء انتهت الرحلة بالفشل او بالنجاح ما كنتش بازعجهم عشان يكملوا تجربتهم للآخر ، و لما أتأكد انهم تمكنوا من قشرة اللب و خلاص مسكوها ، بسرعة اجرى عليهم و أبوسهم و أزغزغهم عشان آخدها من إيدهم من غير ما يآخدوا بالهم  لأن فى السن ده كل حاجة بيحطوها فى بقهم ، و أخاف تقف فى زورهم و بعد الشر عليهم .


لكن أكتر الحاجات إللى ما كنت بأقدر أمسك نفسى و هو بيعملوها لما يحاولوا يمسكوا أة خيال بيتحرك قدامهم ... عجبتنى الفكرة بتاعتهم دى .. هو الخيال مش بيتحرك ، يعنى له طول و عرض ، امال إزاى ما بتمسكش ، و افتكرت ان الخيال ده ضوء معتم ، يعنى مش جسم ، ده نور عليه عتامة او ضلمة .. لكن لأن بناتى فى سنة زيرو انسانية فكانوا بينطوا شماع و يمين و بنفس اصرار الإمساك بقشرة اللبن كانوا بيصروا يمسكوا بأى خيال يعدى قدامهم و يقف ، و يا ريت لو اتحرك و فضل يتحرك ، يخيلهم أكتر و نبدا رحلة الكفاح و الإصرار .. أه لو بناتى مسكوا الحكم فى بلدنا ، بإصرارهم ده ح يحققوا كل مطالب الثورة و ح نمحى كل أثار العصر الفاسد البائد الماضى 


و بعد عمرنا تمن شهور ، و بقينا بنزحف الخمد لله بشكل كويس ، و البركة فى الكالسيوم إللى كانوا بيآخدوه من الشهر الخامس ، و الشمس الجميلة إللى ربنا كان بيدخلها لبلاكونتنا ، و كنت بأقعدهم فى الشمس ساعتين بعد الشروق ، و كنت بأفضل أقعدهم قبل المغرب بساعتين عشان الجو بيبقى أدفى و أنا بأخاف عليهم من البرد


المهم لما احترفت بناتى الزحف و هى فى سن تمن شهور ، كنت بتدخل تحت المكتب الموجود فى الليفينج رووم living room و ده ليه ؟؟ 


لأن تحت المكتب كان فى راك مليان سيديهات ، و كانت الأخوات الحلوين بيفرحوا أوى و هما بيخرجوا السيديهات من الراك و ينكشوها حواليهم فى كل مكان ، هنا قررت اتخاذ اسلوب حاسم للحفاظ على حياة الراك و السيديهات الإبرياء ، بقيت اقف على الراك بكرسى المكتب و بكدة ما قدرتش بناتى تدخل من الفتحة إللى فيها الكرسى ، حاولت تشد الكرسى .. لكن الكرسى فارفورجيه - الحديد المجدول - ما قدروش يشدوه .
لكن ده ما منعهمش من الوصول للراك ..... حد بيسأل إزاى ؟؟؟


دخلوا من الناحية التانية ، فتحة المكتب إللى يا دوب بتظه رمنها رجلين أى حد قاعد على المكتب ، فتحة ارتفاعها 20 سنتى ، زحفوا و دخلوا منها .


و حسيت انى انهزمت ، و السيديهات ح تدمر ، قررت أجيب لوح خشب من دولاب المطبخ و قفلت بيها الفاتحة ... " هوهوز " بصت شذرا للوح ، و "جى " فضلت تشد فيه و هى بتصوت ، عشان تفهمنا انه مضايقها ... و انا ما عرفتش إزاى أفهمهم ان هما إللى مضايقنى ز مضايفين الراك و السيديهات كمان


 لكن الإصرار ، و ما أدراكم ما الإصرار .. قررت بناتى التحدى و التخلص من اللوح ... و فضلوا هما الإتنين يشدوا فى اللوح  لحد ما شيبونى ، خفت يقع على إيد حد فيهم ، على راس حد .. فضلت أراقبهم عشان ألحق الموقف .. المفاجأة و بالنسبة لى الصادمة : قدروا يشيلوه اللوح ، قسموا الشغل بنهم و اتعاونوا و قدروا هما الإتنين يشيلوا اللوح و دخلوا للراك و بدؤا يشدوا السيديهات كأن مافيش أى حاجة حصلت ، لدرجة انى قررت أشيل الراك من الليفينج خالص ، و لغاية دلوقتى هو فى أودة نومى .

كل دى مغامرات بناتى قبل المشى ... و على ذكر المشى انا بناتى مشيوا بعد ما تموا سنة من عمرهم .... "هوهوز " مشيت اول خطوة يوم عيد ميلادها بالظبط ، و "جى " مشيت بعدها بشهرين و ده لإنها بتخاف فلما شافت اختها بتمشى اتشجعت و احنا ساعدناها لما مشينها "تاتا " خطى العتبة 


و لأن مغامرات بناتى التوم لا تنتهى ، فاقولكم اول مغامرة خصلت بعد المشى .... أنا جيبه لكل واحدة من بناتى كباية ببزبوز بدأت اشربهم منها لما بقى عمرهم سنة ، قبل كدة كان بالقطارة .... و فى يموا قرروا ينتزعوا الكوب من يدى عشان يشربوا ... صحيح كنت اديهم الكوباية لكن اول ما الاقيهم ح يشربوا اجرى امسك معاهم الكوباية عشان اظبط الزاوية اللى بيشربوا منها عشان ما حدش يشرق


و فى يوم قررت "جى " تشرب بوحدها خالص ، و لما احط ايدى ع الكوباية تزقها بعنف و اصرار ... و قلت اسيبها لما اشوف ح يحصل ايه ؟؟!!!


و لقيتها بتشرب لوحدها .. الله ، ما شاء الله ، الحمد لله و فجأة شرقت  و بسرعة رمت الكوباية فى الهوا ، و الكوباية مالقتش حاجة تقع عليها غير راس " هوهوز "
هذه القصة كتبتها : السيناريست / سمر العزب
و لكم تحياتى
مامى لأول مرة
http://la3ya3nyno.blogspot.com/

التربية الصح للطفل الرضيع و طبعا لأطفال أكبر كمان -

                               

                                 تحديد الأولويات هي أولى دعائم التربية الصحيحة للطفل .. و ده معناه اننا لازم نحدد الأولويات الأول ، و عشان كدة نجيب ورقة و قلم و نكتب احتياجات الطفل الرضيع فى نص الصفحة إللى فوق والمسئوليات إللى لازم الأهل يقوموا بيها فى نص الورقة إللى تحت .

اولويات تحقيق التربية :  

1.   سلامة الطفل وراحته من اولى الحاجات الضرورية لتحقيق التربية الصحيحة.

2.   كما يلزم أن تراعي الأم و يراعى الأب أن يحقق كل منهم ذاته فى العمل و فى البيت  بجانب تربية الأطفال.

                                 

التربية الصحيحة للرضيع تتلخص فى الخطوات التالية :

1.   مشاركة تجارب الطفل تعد من أهم أساليب وأسس تربية الطفل الرضيع؛ وذلك من خلال مشاركة الأم أو الأب  الطفل جميع تجاربه كأن تستمع وتشاهد مع الطفل ما يسمعه ويشاهده، على أن تحترم ذكاء الطفل وتشاركه الأفكار والآراء في سبيل تنمية شخصية الطفل.

2.     وضع نظام ثابت للطفل : و الموضوع ده له أهمية كبيرة في ظل ازدحام الحياة بالعديد من المسئوليات

3.    بجانب تحديد نظام ثابت للطفل، لابد من مراعاة توفير عنصر المرونة لتنفيذ هذا النظام... يعنى نحط نظام ، أيوة ، لكن ما نهدش الدنيا لو حصل خلل لسبب ما .. احنا عايشين فى بيت مش فى معسكر و بنعامل أطفال مش عساكر

4.    متابعة الطفل ركيزة أساسية من ركائز التربية الصحيحة، و المتابعة تكون بذكاء .. يعنى اسيب للطفل حرية الحركة و انا بأبص عليه من غير ما أحسسه انى براقبه ، لو عمل حاجة غلط اصلحها فى هدوء و انبه مرة و اتين و تلاتة لحد ما أتأكد انه فهم و بعدها ابدأ نبرة صوتى تبقى أقوى ، و نظرة عينى أعنف ... و بكدة ح يتعلم الطفل الفرق بين الحرية و الإنفلات .

5.   لغرس قيم كالأمانة والإخلاص و الصدق : لدى الطفل لابد من متابعة الطفل و تشجيعه لما يعمل حاجة كويسة ، التركيز على إيجابيات الطفل سيحول منه طفل إيجابى مطيع واثق من نفسه ، و ده ما يمنعش

6.   تشجيع الطفل من أهم عوامل نجاح الأم و نجاح الأب في تربية الطفل تربية صحيحة، ولابد من الحرص على تشجيع الطفل لتقوية مواطن القوة لديه والتغلب على نقاط الضعف، فالتشجيع يساعد الطفل ويحفزه ويدفعه دائماً للأمام.

التواصل مع الطفل من أساليب التربية المثالية للطفل الرضيع :

·       بأن يظهر الآباء حبهم للطفل الرضيع : عن طريق الأحضان و العناق و الإبتسام لهم .. كل ده حاجات يستشعرها الطفل الرضيع و الكبير كمان

·       يجيب أن يهيأ الآباء للطفل جواً يحمل الحب والألفة والحنان، مع الاستماع إلى الطفل .. ح تقولى هو الرضيع دع بيتكلم ، ايوة بيتكلم و له طلبات و احتاجات بس حضرتك اللى مش فاهمه ، فمن فضلكم عودوا ولادكم على انكم بتسمعوهم من و هما رضع عشان لما يوصل سن المراهقة ما تواجهش معاه اى مشاكل

·       الحوار و الكلام مع الطفل و اللعب معاه من اهم وسائل التقرب منه عند اتخاذ أي قرار يخصه ... ف الحوار مع الطفل عامل ضروري للتأثير في تربية الطفل.

تعليم الطفل :

لازم كل ام و كل اب يعرفوا  ان الأبوين هم الملقن والمعلم الأول للطفل ، فمن خلال تواصل الأبوين مع الطفل ستكتشف الأخلاقيات الحميدة عند الطفل ويمكن ترسيخها في نفسه ، وذلك عن طريق القدوة الحسنة التي يقتدي بها وينجذب إليها... فارجوكم راجعوا سلوككم قدام اطفالكم لأنه بيتعرف على الحياة من خلالكم هو ما يعرفش يتعامل مع الحياة إلا من خلال الطريقة اللى بيشوفوكوا بتتعاملوا بيها سواء معاهم او مع غيرهم ... اعتبروا نفسكم تحت المراقبة طول ما فى طفل فى البيت و كل واحد يخلى باله على تصرفاته

•                              تدريب الطفل منذ الصغر على أن يكتشف مواهبه بجانب المساعدته على تنميتها، وذلك في ظل التدريب على ثقة الطفل بنفسه ليصبح أكثر كفاءة وقدرة على مواجهة تحديات الحياة.

و لكم تحياتى

مامى لأول مرة

 http://la3ya3nyno.blogspot.com/

عايز اطمن على وزن طفلى - جزء2

ابني أتم ال5 اشهر وزنه عند الولادة 3.5 والآن 8ك رضاعة خالصة مع وجبة سيريلاك خلال شهر رمضان. 

هل وزنه طبيعي ؟ وهلا ابدأ باطعامه اطعمة صلبة؟

الاجابة :

وزن الرضيع إللى انهى الشهر السادس يتراوح ما بين 6 كيلو و 9 كيلو .. و ده معناه ان وزن ابنك الحمد لله كويس جدا .. فوزن ابنك طبيعى و اتمنى انك بعد كدة تتابعى وزن ابنك مع طوله ، عشان يبقى تقيمنا مظبوط

اما عن موضع أكل الرضيع : ممكن تأكليه رغم انه لسة ما دخلش الشهر السادس لأن وزنه أكبر من سبعة كيلو .. دوقيه البطاطس المسلوقة و بعد ما تعملى اختبار الحساسية ، حاوليها لوجبة ، و بعدها أكليه كوسة المسلوقة ، و بعدها شربة الخضار – ماية و كوسة و بطاطس من غير ملح خالص –

لكن استمرى على وجبة واحدة لحد ما يوصل ابنك للشهر التامن و ما اول التامن خليهم وجبتين

سؤال2 :

انا ابني عنده شهرين ونصف وزنه6 كيلو وطوله 61.5 والدكتور كتب له على فيتامين سيترون2.5 مل مرتين يوميا لانه شاف ان عنده انيميا عن طريق ان وشه باهت وشفايفه مش حمرا وكتب برده ديكال ب12 2.5مل مرتين يوميا علشان شاف ان فتحة دماغه كبيره, هل ده كتير على طفل في عمره والا عادي وكمان ينفع من غير اي تحاليل كده ادي الفيتامينات دي -برجاء الافادة-

الاجابة :

وزن الطفل إللى خلص الشهر الثالث يتراوح ما بين 4 كيلو و نص و سبعة كيلو ، و طوله يتراوح ما بين 56 سنتى و 65 سنتى .. و ده معناه ان ابنك الحمد لله كويس جدا ، هو ممكن يكون شكله رفيع لأن ابنك ما شاء الله طويل ، فممكن أى حد يتهيقله انه ضعيف أو  وزنه مش كويس ، عشان كدة أنصحك تودى ابنك لدكتور تانى

و بالنسبة للكالسيوم ففى دكاترة بتكتبه من الشهر التانى عشان بيفترضوا ان الأم ما بتخرج الطفل فى البلاكونة أو فى النادى من بعد الشروق بساعتين و قبل المغرب بساعتين عشان يآخد فيتامياته الطبيعية عشان كدة بيدوا الكالسيوم بدرى ... و فى دكاترة بتفضل تدى الكالسيوم من الشهر الخامس عشان بيخافوا على كبد الرضيع

لكن عشان تطمنى اعملى لإبنك تحليل اسمه ألكالين فوسفاتيز و ح تعرفى ان كان ابنك محتاج كالسيوم و لا لأ

أما بخصوص الأنيميا : أنا أول مرة أسمع ان فى رضيع عنده أنيميا ، لأن الأنيميا معناها نقص فيتامين الحديد فى الجسم ، و الحديد بيكون متخزن فى جسم الرضيع من أيام ما كان جنين ... ف الحديد بيخزنه الجنين فى جسمه من الأكل إللى كانت بتآكله الأم ايام الحمل ، يعنى انتى يجيلك أنيميا وقت الحمل و جنينك لأ .. و الحديد إللى خزنه الجنين ده يفضل فى جسمه لمدة ست شهور من الولادة .. عشان كدة أنصحك تعرضى طفلك على دكتور تانى

و لكم تحياتى

مامى لأول مرة

http://la3ya3nyno.blogspot.com/

الجزء2 من حدوتة الذئب البرئ من دم سيدنا يوسف

1st collector for الجزء2 من حدوتة الذئب البرئ من دم سيدنا يوسف
Follow my videos on vodpod

عايزين تحكوا حواديت لولادكم
و ما بتعرفوش
كويس جبنالكم حواديت من قصص القرآن للاطفال
شوفوها مع ولادكم و دردشوا معاهم فى الحدوتة و الهدف منها و اسألوهم اتعلموا ايه ؟؟
و لكم تحياتى
مامى لأول مرة
http://la3ya3nyno.blogspot.com/

حدوتة الذئب البرئ من دم سيدنا يوسف

1st collector for حدوتة الذئب البرئ من دم سيدنا يوسف
Follow my videos on vodpod

عايزين تحكوا حواديت لولادكم
و ما بتعرفوش
كويس جبنالكم حواديت من قصص القرآن للاطفال
شوفوها مع ولادكم و دردشوا معاهم فى الحدوتة و الهدف منها و اسألوهم اتعلموا ايه ؟؟
و لكم تحياتى
مامى لأول مرة
http://la3ya3nyno.blogspot.com/

روحنا نطعم البنات

النهاردة روحنا نطعم البنات الجرعة التانية من تطعيم الكبدى " A " .. و خدت معايا زبادى أأكله للبنات عشان كانوا اتغدوا بدرى و خفت يجوعوا فى السكة ... و خير اللهم ما أجعله خير لقيت المشوار إللى بيتآخد فى ساعتين خدناه فى نص ساعة ، ههههههههههههههههه
وبيتهيقلى ان ده واحد من أهم مكتسباب ثورة 25 يناير


وصلنا بالسلامة لمقر المصل و اللقاح بالدقى  ، و جوزى كالعادة متنشى و قور عايز ماحدش يضحك و لا يهزر عشان الناس حوالينا مكشرين فلما يشوفونا بنهزر فممكن يحصلهم تلبك معوى ... و أنا كالعادة اعتبرت ان النكد العام المنتشر بالمكان هو سبب التلبك و بدأت أهزر مع بناتى و اصورهم .. و بدأت " هوهوز " تجرى ورا أى بىبى تشوفه عايزة تبوسه و إللى ما يرضاش يتباس يآخدله علم سريع ... نسيت أقولكم ان بناتى إللى عمرهم سنتين فاتحنها مبوسة و أى بى بى يشفوه لازم يحيوه ببوسة و يا سلام لو النونو ده أصغر منهم ، يعيشوا معاه معنى الأمومة .. ملحوظة هامة : حتى لو البيبى على شاشة التلفزيون لازم يتشالوا لحد ما يبوسوا البىبى إللى هو الشاشة فى حالتنا 


المهم جه علينا الدور و دخلنا حجرة تطعيم الأطفال فى المصل و اللقاح إللى فى الدقى عشان لو حد عايز يآخد تطعيمات خارجية ... و بدات رحلة الشكشكة العالمية ، بناتى يا عينى عليهم اتشكشوا النهاردة كأنهم منخل ، ابرة فى الإيدي اليمين و ابرة فى الإيد الشمال و ابرة فى الفخدة الشمال .. كل ده ليه ؟؟
عشان النهاردة خدوا الجرعة الأولى من الحمى الشوكية و الجرعة التانية من الكبدى الوبائى " A " ... و فجأة جوزى افتكر ان البنات ما خدتش  الجرعة التنشيطية من تطعيم الهيموفلس

إللى فات ده الموجز و إليكم الأنباء بالتفصيل :
راح زوجى دفع قيمة المصل و دخل علينا ماسك العلب فى إيديه ، اداهم للتمارجى .. بدأ التمرجى يشمر عن ساعده و بناتى تبرق له : " يا ترى هو قاصدنا احنا تانى ولا حد غيرنا "
طبعا الكلام ده ماكنش مع اول ابرة ، لكن مع تالت إبرة ، بعد ما اكتشفوا ان الراجل ده شغلته يوجعهم ... و فعلا جلست و حملت " هوهوز " و بعدها حملت " جى " و بدأت عملية الشكشكة الآخيرة و الحمد لله تمت العملية بنجاح ، و كانت بناتى ملخومة فى صراخ الأطفال فى الحجرة و محاولة ابعاد يد التمارجى و كان هو فى الوقت ده اداهم الأبرة .... فالحمد لله ما عيطوش .. و واضح ان الراجل اتبسط منهم فدخل جاب لكل واحدة منهم عربية لعبة صغنونة مش عشان هما شاطرين لأ ، بيتهيقلى عشان رفعوا من روحه المعنوية .. لأن كل الأطفال فى الأودة تبص فى وش الراجل و تصرخ .


أنا فرحت أوى بالعربية ، جوزى بصلى و قالى بغيظ : " عربيتين لعبة بلاستيك فى حجم كف الأيد بستوميت جنية - 600 جنية - ، هاهاهاها "
.... و ما شفتش تعارض بين دفع المبلغ و الفرحة بالعربيات ، لأننا كنا ح ندفع ح ندفع ، لكن العربيات خدناها من ذوق التمرجى إللى ما فكرناش نديله بقشيش ، بس أنا و الحمد لله مع كل ابرة يشك بيها بنت من البنات كنت اقوله ،  مرسى ، مرسى ، مرسى ، مرسى "


و و نزلنا من المصل و اللقاح و قررنا نكافئ البنات عشان هما شاطرين و نجيب لكل واحدة منهم علبة عصير ، عشان خدوا التطعيم و الحمد لله من غير ما يعيطوا .. و بدأنا نرصد حالات الفزع المرسومة على وجه الأطفال من الإبرة - ابرة التطعيم - و الفزع كان مسيطر بشكل أكبر على الذكور - و تأكدنا ان أهلهم بيعاملوهم بشكل سئ ، لدرجة ان الولد و هو مرعوب كان باباه بيزعقله و بيعنفه ، منتهى القسوة و انعدام الأبوة و الضمير... يا ريت الأب ده ما يرجعش يشتكى لما يكبر و يعجز و يلاقى ابنه بيعامله بنفس القسوة .

المهم و احنا فى رحلة العودة إلى المنزل تذكرت أول يوم بعد ولادتى و كانت عملية قيصرة .. أول مرة نزلت فيها من بيتى بعد رجوعى من المستشفى و انا معايا الضيوف الجداد : " بناتى " جى " و " هوهوز " .. اول مرة نزلت من بيتى كنت رايحة  اقيس لهم الصفرا ، و كنت تعبانة أوى و مش قادرة امشى و الجرح شادد عليا و لازم اشيل بنت من البنات عشان جوزى ما يقدرش يشيل الإتنين و هما لسة حتة لحمة طرية ... و لإنى بأقيس الصفرا بتاعة البنات فى المستشفى إللى ولدت فيها ، فهناك قابلتنى الممرضات إللى كانت معايا فى التلت تيام إللى قضتهم فى المستشفى و قابلوا البنات بحب غريب .. و نبهونى انى لازم ارضعهم كتير و اشربهم اعشاب عشان الصفرا تنزل ، و نبهونى كمان انى لازم اروح بيهم بكرة الصبح مكتب الصحة عشان تطعيم الدرن اللى لازم يكون فى اول اسبوع من الولادة


 و نزلت لتانى مرة  من البيت و كان عشان أطعم " جى " و " هوهوز "  ... الحمد لله المرة دى ما كنتش شايلة حد من البنات ، كان معانا واحدة قريبة جوزى و هى شالت ، انا كنت تعبان  و دايخة و حاسة بمشاعر غريبة اهمها الوحدة و الحزن و عايزة اعيط ، بس اول ما كنت ابص فى وش واحدة من بناتى كان كل التعب  يروح و نفسيتى تستريح ، سبحانك يا رب


 بس ده مش معناه انى فضلت مستموتة كدة كتير ، لأ الحمد لله فوقت و بقيت زى الجن ، و نزلنا طعمنا البنات تانى و تالت و رابع ... بس  تقريبا فى كل مرة تحصل مغامرة عريبة .. مرة منهم كان بقالى يومين ما نمتش ، عشان كنت يا دوبك أنيم " هوهوز " ألاقى " جى " تصحى ، أنيم "جى" ألاقى " هوهوز"  تصحى ، فكنت مش قادرة امشى أو تقريبا ماشية و انا نايمة ، و ركبت العربية و انا بأقول الواحد ما لحقش يا نام ... و هنا فتح جوزى باب العربية بقوة و عنفوان ، قعد قدام عجلة القيادة و فجأة العربة ما رضيتش تتحرك ... و نظر لى زوجى شذرا
- عاجبك كدة ، العربية ما بتقومش
" الله و انا مالى هو انا إللى قلت للعربية تعطل "
- مش انتى عايزة تنامى
- طيب انا عايزة أنام ، العربية تنام ليه بقى


و اتقمس جوزى و قالى خلاص مش رايحين ... غالبا فى الحالات إللى زى دى بأقاوح و أناضل عشان اخليه يغير رأيه ، لكن المرة دى سكت ، واضح انى عايزة أنام بشدة .. و الظاهر جوزى كان معاه حق و انا إللى بوزت العربية ، ضميرى ما كانش خالص

و فى اليوم التانى نزلنا عشان نطعم البنات و ركبنا تاكسى وصلنا لحد مكان التطعيم و احنا راجعين عملنا نفس الحكاية و لا حاسينا بفقد للعربية و لا اى حاجة .. لكن اختلفت انا و جزوى على اعطاء مخف للحرارة لبنات ، هو شايف اننا لازم نديهم مخفض و انا شايفة ان المخفض يخدوه لما الحرارة ترتفع - كنت خايفة احسن المخفض يعمل هبوط فى الدورة الدموية 
و فعلا قررنا ما نديش المخفض و نقيس حرارتهم كل ساعة ... و بعد ست ساعات لقيت "هوهوز " بتصرخ بشكل مرعب و ماعرفتش أعمل ايه ، اقيس حرارتها الاقيها كويسة ، أرضعها مش عايزة ترضع و بتصرخ .. و بعد ساعة من المعانة قررنا نديها مخفض للحرارة بعد ما قرينا عليه انه مسكن للألم .. و اكتشفنا ان الاطفال لازم تآخد مخفض للحرارة بعد اى تطعيم لأنه كمان مسكن للألم اللى بيحس بيه الرضع بسبب التطعيم 


مش ح اقولكم على كل المغامرات لكن ح اختصرهالكم ، مرة نزلنا نطعم البنات وش العربية وقع على الأرض و احنا ماشين و دسنا عليه احنا و كل العربيات اللى ورانا .. و مرة الدركسيون فلت و البو بتاع الدركسيوف باظ و زيت كله و قع على الارض و بقينا مش قادرين ندخل شمال او يمين بالعربية عشان باور الدركسيون باظ و لازم نمشى فى خط مستقيم


و آخر حاجة حصتلنا امبارح - لأنى بقالى يومين باكتب فى البوست ده - و احنا راجعين من تطعيم البنات فى المصل و اللقاح "جى ط كانت قاعدة على الكرسى اللى قدام و فجأة بصتلى و قالتلى " مامى " 
- تعالى يا جى
و جت قعدت فى حضنى و نامت لمدة دقيقة ، فجأة قامت صرخت ، حاولت اطبطب عليها و هنا قامت مرجعة كل إللى فى بطنها : على كل هدومى .. كنت حاطت صد و حميت الكنبة من الترجيع
بس الحمد لله "جى" كانت شاربة عصير تفاح ، فرحتى كانت تفاح و ده إللى خلانى أستحم حالتى لحد ما رجعت البيت و بدأت رحلة غسيل و تطهير و تعقيم هدومى و هدوم " جى " عقبال ما يحصل للبلد و يتم تطهيرها و تعقيمها من النظام الفاسد


و لكم تحياتى
مامى لأول مرة
http://la3ya3nyno.blogspot.com/

بنتى عندها نقص كالسيوم

السؤال :

انا عندى لوجى عندها سنة وزنها 9ونص طلعت سنتين اللى تحت وحاليا بطلع فى السنه اللى جمب السنتين اللى تحت وبتاخد لسكاتة لحد دلوقتى ومش عارفه امنعها عنها ولسه مش بتمشى فهل ده نقص كالسيوم وازاى اقدر امنع عنها السكاته لانها تسبب لها نزلات معويه احياناوهيا شعرها خفيف جدا ارجو الرد وشكرا

الإجابة :

الحمد لله بنتك وزنها تمام بالنسبة لوزنها بس واضح ان فى مشكلة : لأنها متأخرة فى التسنين و المشى مع بعض ، بنتك محتاجة كالسيوم ، وديها للدكتور عشان يعملها التحليل اللازم و يوصفلك كمية الكالسيوم إللى محتاجاها ... لأن البىبى اللى بيمشى بدرى  بيسنن متأخر بدرى و بالعكس .. لكن التأخير فى الإتنين يقول ان فى نقص كالسيوم ن اعملى لبنتك تحليل ألكلين فوسفاتيز و اعرضيه على الدكتور بتاعك

لمنع التيتينة : أى حاجة عايزة تمنعيها عن بنتك ابدئى بالتدريج ، يعنى خلى بنتك تصحى الصبح ما تلاقيش السكاتة او التيتينة ، و بعد ساعتين ادهالها ، و افضلى زودى الساعتين دول لحد ما تبقى ما بتآخدهاش غير وقت النوم ... و مرة فى مرة ، ح نمنع التيتينة او السكاتة عنها وقت النوم عن طريق استبدال السكاتية بالرضاعة الطبيعية و الحمام الدافى ، فتتعود تنام من غيرها

نظافة التيتينة : حاولى تغلى السكاتة او التيتينة ، و لو هى من النوع إللى بيبوظ من الغليان حطيها فى كوباية إزاز و ادلقى عليها ماية مغلية عشان تضمنى تعقيمها و طبعا تستنى لما تبرد خالص و تديها لبنتك ، اوعى تحطيها فى بق بنتك و هى لسة سخنة

أما بخصوص شعر البى بى : الشعر الخفيف بيتقل بالتغذية – الأكل – و تغذية الشعر عن طريق استعمال زيت الخروع قبل الحمام بأربع ساعات ، و تحمي بنتك و تغسلى شعرها بصابون او شامبو مناسب للرضع .. ما تحطيش كمية زيت كتير عشان جلد راسها يقدر يتنفس - الوصفة دى عشان بنتك اكبر من سنة – الرضيع اقل من سنة ما نحطش على راسه حاجة ابدا عشان ما تأثر على رأسه

ربوا ولادكم بشكل ايجابى

لتربية الأطفال قاعدة سهلة لو نفذناها ح نقدر نربى ولادنا بسهولة و من غير أى معاناة :

1.       لازم نعرف ان ولادنا مش مخلوقين عارفين و فاهمين ، لازم نقتنع ان احنا إللى لازم نعلمهم و نوعيهم و نفهمهم – لو اقتنعنا بالفكرة دى مش ح نزعق لهم و لا نعنفهم لأنهم مش عارفين و إلا نبقى احنا فى الحالة دى ظلمة و معقدين و بنطلع عقدنا فى ولادنا

2.      الطفل عشان مخلوق ما عندوش معلومات عن أى حاجة و لأنه ما بيعرفش فبيقلدنا فى كل صغيرة و كبيرة أو بيقلد إللى حواليه – عشان كدة لازم تصرفاتنا و ألفاظنا قدام الأطفال تبقى بالشكل إللى احنا نحب انهم يتكلموا بيه او يتصرفوا بيه – و ده معناه اننا لازم نحط ولادنا مع ناس مهذبة و سلوكها كويس ...لأن الأطفال وظيفتهم الوحيدة هى التقليد ... و الطريقة الأولى لتعليم الطفل هى التقليد و بالشكل ده الطفل بيتعلم الكلام و الأكل و الشرب و ..... إلخ

3.      تالت نقطة و هى أهم نقطة إن الأطفال يتصرفون حسب توقعك لتصرفاتهم وقدراتهم وخصوصاً في السبع سنين الأولى من اعمارهم ... فاحنا فى اول سبع سنين بنعمل برمجة  عصبية لولادنا
فالأطفال اقلل من سبع سنين بيصدقوا كل صفة بنلزقها فيهم ، الأطفال مش بيفهموا اننا بنعايرهم و لا بيستوعبوا انهم لازم يتخلصوا من الصفة الردئية إللى بنلصقها بيهم .. لأ ، الأطفال بيفتكروا ان دى صفاتهم و بيبدؤا يتصرفوا على انهم موصومين

عشان كدة مش لازم نذكر للطفل غير صفاته الحميدة ، عشان تفضل عالقة فى ذهنه و ثابتة فى ذاكرته و يتصرف على أساسها و يطلع انسان واثق من نفسه ... و فى الحالة دى نكون عملنا برمجة ايجابية لولادنا

طريقة البرمجة الإيجابية للأطفال :

• لازم نخلى بالنا ان كل ما نخبر به اطفالنا بطريقة مباشرة أو غير مباشرة هى نوع من انواع البرمجة اللى بنعملها لأطفالنا
• لازم نآخد بالنا كويس من كل حرف و كلمة و حركة بتصدر منا ، سواء كانت بالحديث عن الطفل مع الآخرين أو مع الطفل شخصيا ... فمثلا لو قلنا عن ابننا أنه عنيد فسوف يكون كذلك و أذا أخبرته بأنه خجول فسوف يكون كذلك.
• نبحث عن الصفات الحميدة فى أولادنا و نعظمها و نكبرها عشان نقويها جواهم
•  يجب على كل أب و كل أم الحذر من نوعية الرسائل التي تصل لأطفالهم لأنها ستشكل معتقداتهم الداخلية عن أنفسهم وقدراتهم في الوقت الحاضر وفي المستقبل.

نآخد بالنا من الجمل إللى بنقولها للطفل و خصوصاً اللي بتبدأ بكلمة "أنت" ... سواء كانت الجملة هي "أنت شقي جداً" أو "أنت طفل جميل" .. لازم نعرف ان الجمل دى ح تترجم عند الأطفال لأفعال ... لأن الطفل بيكتبر الكبار و خصوصا الأب و الأم أو الأم و الأب هم " القدوة والمثال الأعلى" و عشان كدة بتتحول مفرادتهم إلى قواعد راسخة تنفذ إلى أعماق الطفل و تؤثر في عقله الباطن ، لهذا فالوالدين إما يبرمجون أطفالهم لنجاح أو للفشل في الحياة.

• مفردات لازم نبعد عنها :
• "أنتى غبية"
•  "أنت فعلاً كسلان".
• كل مفردات السب و الشتم الموجهة للطفل
• كل مفردات البذية الموجة لإى شئ يتعامل الطفل معه لأنها تعوده على النظر إلى نصف الكوب الفارغ و تعلمه التشائم و البحث عما هو سلبى
  
   الاستراتجيات لبناء طفل إيجابي – يثق فى نفسه و فى قدراته :
   
• تشجيع السلوكيات الإيجابية عند الطفل والثناء عليه
• التركيز على ايجابيات الطفل في شخصيته وسلوكه ولو صغيرة وإبرازها والتعبير عنها وهذا كفيل بإزالة السلبيات.
• اربط الصفة الجيدة بسلوك صدر من الطفل فعلاً وذلك حتى يصدقها الطفل مثل: "أنت فعلاً ذكي عندما عملت كذا و كذا " وكرر ذلك ثلاث مرات منفصلة ، وهذا يضمن بإذن الله إن أطفالنا سوف تنطلق بالحياة وهي تؤمن بأنها تملك هذه الصفة و غيرها من الصفات التى سنمدحها و سنقويها فى نفوس أطفالنا

و لكم تحياتى

مامى لأول مرة

http://la3ya3nyno.blogspot.com/