الجمعة، 7 أبريل 2017

ايه الفيتامينات و المعادن الضروري اديها للطف

فيتامين كاف  (vit K)
وده اول فيتامين الطفل لازم ياخدوا في حياته ..
اول ما يتولد ،، تتأكدوا من الدكتور اللي ولده ان الطفل اخد الفيتامين ده ولو لا تفكروه ولازم ياخده
فيتامين ك ده مسؤول عن صناعة موانع النزيف الطبيعية اللي موجوده في الجسم .. الطفل بيتولد معندوش مخزون كفاية منه وللأسف مش موجود في اللبن و الجسم في العمر ده مش بيعرف يصنعه ..

الطفل لو ماخدتش فيتمين كاف  بيكون عرضه للنزيف من اي مكان .. اشهرهم و اكثرهم حدوثا هو النزيف من الحبل السري او القي او النزيف مع البراز .. و اخطرهم نزيف المخ .. و للاسف شفت اكتر من حالة بالمنظر ده .. اتأكدوا ان ابنكم اخده من فضلكم.
و بيتآخد جرعة واحدة عضل وقت الولادة ..((في منه بالفم بس انا انصح بالعضل))
فيتامين د (Vit D)
بيتآخد من الشعر الخامس
لآن فيتامين د مسؤول عن النمو السليم للعظام و الاربطة و كمان العضلات لانه بينظم امتصاص و عمل الكالسيوم جوه الجسم و كمان في دراسات بتقول انه بيحمي من البرد
 الطفل و ماخدوش بيكون عرضه للتأخر في المشي و التسنين و لين العظام و تقوسات القدمين
🖊يتاخد ٤٠٠ وحدة دولية (اربع نقط يوميا من ال v drop) قبل السنة الاولى و ٦ نقط يوميا بعد كده لحد سن المدرسة على الأقل
 الحديد: Iron
الطفل اللى بيرضع طبيعي يبتدي عند الشهر السادس و الطفل اللي بيرضع صناعي يبتدي عند سن السنة و الطفل المولود بدري ياخد من اول يوم - حسب تعليمات الطبيب 
الحديد مكون اساسي في حاجة اسمها الهيموجلوبين و المادة دي هي المسؤولة عن نقل الاكسوجين في الدم من الرئة لأعضاء الجسم المختلفة ..
 لو مأخدوش ؟ الطفل بيكون عرضه للإصابة بفقر الدم ((الانيميا)) و ده بيأثر بشكل كبير على نمو الطفل و مجهوده و شهيته .. طفلك بيبقى همدان .. ضعيف و بيتعب بسرعة من اقل مجهود و نفسه مسدوده
 الطفل بيحتاج جرعة وقائية ٢ ل ٣ مجم لكل كيلو من وزن الطفل .. تسهيلا عليكم امشوا على الجدول ده :
قطارة الهيدروفيرون:
من ٤-٦ شهور: ربع قطارة
من ٦- لسنه: نص قطارة
من سنه لسنتين : قطارة كاملة


 فيتامين أ Vit A
يعطى للاطفال من سن ال ٩ شهور
فيتامين أ مسؤول عن سلامة الجلد و القرنية و اغشية الجسم المخاطية كما انه يقوي مناعة الجسم ضد الإصابة بامراض الجهاز التنفسي ..
و لو مأخدوش  الطفل يكون عرضة للاصابة بضعف النظر - تشققات و تصبغات الجلد - ادوار البرد المتكررة

-
اول جرعة هتكون ١٠٠ الف وحده و هياخدها عند سن ٩ شهور ((المفروض انها كانت بتتاخد روتين مع التطعيم بس مش عارف لسه بيدوها ولا لا)) هي هتكون عبارة عن كبسولتين اسمهم (A-viton) وبيتاخدوا مره واحده
- هنكرر الجرعة اول كل شتاء.. بس هندي ٣ كبسولات تاني مره ((عند سن السنتين)) و السنة اللي بعديها ٤ كابسولات سنويا لحد سن ٦ سنين على الاقل
 الاوميجا ٣ Omega-3
مهم جدا لنمو الجهاز العصبي للأطفال و مساعدتهم على التركيز و تنشيط الذاكرة و كمان بيقوي المناعة
ننصح بيه من سن المدرسة بس لو الطفل  بيعاني من نقص التركيز او ضعف الذاكرة او تشتت الانتباه او فرط الحركة ممكن نبتديه من قبل كده
الجرعة يحددها الطبيب حسب السن و الحالة و ان كان عامة ٥٠٠ يوميا كفاية ان شاء الله
هما دول الخمس حاجات اللي كل الاطفال ممكن تاخدها روتينيا .. غير كده مفيش طفل طبيعي بيحتاج اي نوع تاني من الفيتامينات و بياخد كفايته من الاكل ..
مفيش حاجة اسمها هديله فيتامين عشان يفتح الشهية ولا عشان يطول ..الفيتامينات لازم يتآخد تحت اشراف الطبيب 
مع تحياتى
مامى لأول مرة