top ad

الجمعة، 26 أغسطس 2016

كل الأمهات فى الجنة باذن الله

مع كل يوم بتحطي راسك فيه على المخدة وانتي مرهقة عشان تنامي .. وجنبك اولادك نايمين بامان عشان في حضنك وبطنهم مليانة عشان اكل انتي اشتريتي اجود حاجة فيه وفكرتي ازاي تعمليه وتعبتي وطبختيه واكلتيهم بعد ما سميتي الله عليه 

وافتكري ان ريحتهم حلوة عشان انتي حميتيهم وسرحتيلهم ولبستيهم هدوم نضيفة انتي تعبتي وغسلتيها ونشرتيها وطبقتيها ونسقتيها..
وافتكري ضحكتهم طول اليوم اللي بلعبك معاهم رسمتيها ودموعهم اللي بصبرك وحنانك مسحتيها ..
وافتكري المصايب اللي كانوا حيعملوها وبشجاعتك وانتباهك لحقتيها 😉 ..
وافتكري غيار الحفاض اللي اول ما يلبس النضيف يعمل فيها والتشطيفة تعيديها..
وافتكري كل يوم بيكبروا وبيتعلموا معلومة انتي علمتيها ..
حاجة البيت كمان ومش حقولك عليها 😪
افتكري كل ده وافتكري انك بطلة ❤ .. انك عظيمة ❤
شوفي كام حاجة انجزتيها ..
شوفي نفسك امان وسند ..
شوفي نفسك ضهر ووتد ..
شجعي نفسك واشكريها
لما تحطي راسك على مخدتك وانتي تعبانة افتكري النعمة اللي انتي فيها ❤
وافتكري حديث النبي اللهم صل وسلم وبارك عليه
"
من بات كالا ( متعبا) من عمل يده بات مغفورا له "
مبروك عليك المغفرة يا جميلة
كل ام مقفولة فى الجنة باذن الله
و لكم تحياتى

مامى لأول مرة

السبت، 20 أغسطس 2016

عايزة اغير الحضانة لبنتى

السؤال ده وصل لمدونة مامى لأول مرة 
و احنا بننشره عشان تعم الفائدة

السؤال :
السلام عليكم

ممكن استشير حضرتك ف حاجة انا بنتى  عمرها سنة وسبع شهور .. بقالها تقريبا سبع  شهور بتروح حضانه بس انا عايزة اغيرها اعمل كده ازاى من غير نا ااذيها


مدونة " مامى لأول مرة "اجابة
تروحى معاها الحضانة الجديدة و تلعبى معاها شوية هناك لمدة نص ساعة او ساعة فهى ح تحس بالآمن فى لحضانة الجديدة و ممكن تحبها أكتر لآن مامى بتعرف تقعد معايا فيها .... و انتى بتلاعبيها خليها تشوف الوشو الجديدة اللى فى الحضانة و تحفظهم و تبوسهم و يبسوها و بكدة يتولد خط عاطفى بينهم يخليها تحب الحضانة الجديدة اكتر
اشكرك على اهتمامك بالحالة النفسية لبنتك ... انتى كدة بتسهمى فى خلق جيل سوى قادر على تغير المستقبل ... اشكرك جدا
و أشكر كل أم بتعرف تحاف على ولادها
و لكم تحياتى
مامى لأول مرة


الثلاثاء، 9 أغسطس 2016

ابنك عنيف بسبب النت ؟ اقرى التجربة دى يمكن تفيدك

سؤال تانى وصل لمدونة مامى ... ننشره عليكم حتى تعمل الفائدة
السؤال هو :

سلامو عليكم مامي ...عمري ماسالتكو وخيبتوا ظني .... انا معاكو عالمدونه من ٢٠١٠اما ولدت ابني الكبير وساعدتوني كتييييير جد واستفدت كتير وبقيت اقري عندكو وعند ناس تانيه بس بحس ان  مدونة " مامي لاول مره " هي البيت. ...ايام المدونه كنت بتابع المقاله اللي بتنزل يوم بيوم. وكنت لوحدي ف الغربه. وكانت هي سندي والله ماببالغ....دلوقت انا فعلا. مش عارفه اروح فين ولا اتصرف. ولا ابدا حتي منين


ابني حبيبي ابني الكبير. انا اول حاجه عاوزه اقولها ان اي حاجه وصل لها انا السبب فيها والغلط من عندي.. هو فعلا مظلوم معايا ....وده اللي قاتلني ....هو لبق جدا ف ألفاظه وذكي الحمد لله ومتفوق ف الكي جي بشهادة مدرساته و دايما بيقولوا عنه :" انه سابق مرحلة الكي جي بكتييير"
.من كم يوم بالظبط بصيت لقيته بيتهته ف الكلام بشكل واضح و نفسه بيتقطع ويعيد الحروف بشكل مفزع
و من اول رمضان حسيتو بقي مدمن نت و مش عاوز يسيب الموبيل من ايده ..و بقى ما مفيش اي التزام بنظام ولاقوانين ف البيت ... و عشان كدة انا منعت النت  الصبح و بقينا بنستخدمه وهو نايم فقط لا غير ... وطبعا في منه ثوره رهييييبه. وضرب وعض. و  بيصرخ و بيقولى "انا بكرهك. ياريتني ماجيت ف الحياه دي " و بقى بيقولى كمان : "انا استاهل ام احسن منك " والله قالي الكلمه دي.. ده غير انه طول الوقت زعلان و مضايق و غضبان و مش بيلعب

ومفيييييييش اكل نهائي ممكن طول اليوم مياكلش اي حاجه ،و عايش على الماية و بس ... مش عارفة اعمل معاه ايه فكرت ا روح لدكتور عشان التهته اللي ظهرت دي وبعدين قلت مش عاوزه اوصله انه في مشكله ... لكن الموضوع زاد معاه و بقى بيضرب اخواته و بيضرب اي حد تاني ف النادي و فى الحضانه
هتسالو فين باباه ف كل ده وايه دوره. باباه. مسافر. و ابني مرتبط بيه بشكل. مرضي بس مش بيبين ابدا ابدا. بس كل كلامه. وتعبيراته بتدور حوالين علاقته بيا انا. .......
والله يكتبلك وانا قلبي قبل عيني. بيعيطو
احنا السبب ف اللي الولد وصل له
ابناؤنا. جواهر ولكننا حدادون
دليني....حطيني عالطريق

الاجابة على السؤال من مدونة " مامى لأول مرة "
جبيبتى ما تقلقيش ، كل مشكلة و لها حل ... بس فى مشاكل حلها بيبقى سريع و فى مشاكل تانية بتحتاج مننا شوية وقت .... تعالى نبدأ الحل من الأول و هى اننا لازم نقلل ساعات جلوس ابنك قدام النت و دى سهل التحكم فيها عن طريق فصل المودم من غير ما اقوله انى فصلت المودم و بكدة ح نقلل ساعات جلوس ابننا على النت .... طيب دلوقتى ح نعمل ايه بعد ما بقى عدوانى و عنيف لو رجعنا النت يبقى احنا ح ندعم عنده السلوك العدوانى و ح نعلمه ان أى حاجة محتاجها مش ح يخدها إلا بالعنف ... يبقى الحل فى الوقت ده انه يحس ان نفس المشكلة دى عندك ... اقعدى و اتكلمى معاه انك مضايقة ان النت مش موجودة طول الوقت و قومى كلمى الشركة و مثلى انك زعلانة من انقطاع النت و وصليها بعد ساعة من المكالمة و بعدين اقطعيها تانى و اول ما تقطعيها روحى اشتكيله ، عبرى عن كل الكلام اللى ممكن يقوله .. اول ما تحسى انه اندمج معاكى فى الكلام اعتبرى ده مدخل انكم تبقوا اصحاب و اقعدوا فكروا مع بعض ممكن تعملوا ايه لحد ما النت تيجى تانى ... تلعبوا ، تحكوا قصص تدخلوا المطبخ مع بعض ... تنزلوا تزوروا حد .... و خليكى ماشية على الطريقة دى ... و من فضلك ما تزهقيش و خلى نفسك طويل
و اوعى ابنك يكتشف انك بتضحكى عليه ... لأنه ممكن يفقد الثقة فيكى مدى الحياة ..
كونى حذرة و ما تحكيش السر ده لحد عشان ما يتعاملش مع الموضوع باستخفاف

و لك تحياتى
مامى لأول مرة


عايزة زوجى يحب ابنى

السؤال ده وصل لمدونة "مامى لأول مرة " و احنا بنشر السؤال و الاجابة عشان تعم الفائدة

السؤال هو :
لو سمحتوا مش عارف اتصرف ف المشكله دي ابني بيحب باباه جدااااااااااا وباباه مش مهتم نهااااائي هو عندو 3 سنين ونص تقريبا ومتعلق بيه جدا ايه السبيل والوسيله اللي اخليه يهتم بيه الولد الحد لله شاطر وذكي واجتماعي بس انا طول الوقت حسه انه بيشحت منه الاهتمام بكل الطرق عاوز و يلاعبه و يقرا معاه وغيره ...  دوري انا المفروض اعمل ايه ف المشكله دي ... ساعدونى من فضلكم



اجابة مدونة " مامى لأول مرة "
شوفى ايه الحاجات اللى الأب بيحبها و مناسبة لأبنك و ممكن يعملها ... يعنى الأب بيحب يقرا ، هاتى قصة لإبنك و خلى الطفل يقراها معاه .... الأب بيحب يخرج و يلعب كرة ، خلى ابنك يلعب معاه .... شوفى الحاجة اللى جوزك بيحبها و و تكون صالحه لطفلك و علميه يعملها مع باباه ... دورك انك تدورى على الحاجات المشتركة بين الأب و الأبن و اظهريها و ساعديهم انهم يمارسوها
و لك تحياتى

مامى لأول مرة

midlle ad