الاثنين، 11 يناير، 2016

ولادنا ابرء مما نتخيل - لكن دايما المشكلة فينا

ده سؤال جه لمدونة مامى لأول مرة
السؤال هو :
عندى سؤال من فضلك...ابني عمره تلات سنين و٨شهور ...بحس انه بيستهبل عليا ف موضوع التركيز يعني ممكن يحكيلى موقف حصل من سنه او يكلمنى عن  شخص ضايقه ويحكيلي تفاصيل مش ممكن افتكرها ... هو دلوقت ف كي جي مجننى فى المذاكرة مش بيفتكر اى حاجة  باقولهاله  ...  مش عارفة اعمل معاه ايه ؟ ده ممكن يقولي معني كلمه قولتها من زماااااان  لكن لو قلته كلمه حالا  يقولي نسيت انتي قولتي ايه ؟؟.....عموما هل في تمارين لزياده التركيز وتجيب نتيجه


الاجابة من مدونة مامى لأول مرة:
الأطفال ابرئ مما نتخيل ، احنا بس من كتر ما قابلنا اشرار فى الحياة نعتقد ان الطفل يمارس علينا نفس الدور ... ابنك ما بيستهبلش ولا حاجة ، ابنك بيبقى مركز جدا مع موضوع معين ، و شدة تركيزه مع الموضوع ده بيخليه يفتكر حاجات قديمة ، و برضه شدة تركيزه مع الموضوع نفسه بيخليه مش مركز معاكى  ولا مع اللى بتقوليه  ... ابنك ذكى لكن هو بيركز فى موضوع واحد فقط مش فى عدة مواضيع مع بعض ، عشان كدة انتى متخيلة انه بيستعبط

سؤال 2 وصل لمدونة مامى لأول مرة :

س : ياريت كمان اعرف رأيكو ف نور البيان وحفظ القران ودور ده ف زيادة تركيز الطفل

الاجابة : 
لا نعرف ماذا تقصودين بنور البيان ... لكن من المؤكد ان حفظ القرآن ينمى عند الطفل حواسه السمعية و النطقية و الروحية و اللغوية و يقوى الادراك بالتالى يزيد من قدراته  العقلية ، و ده بينعكس على التركيز .... المهم ان نبعد الطفل عن التلفزيون قدر المستطاع ، و نقلل من ساعات تعرضه لشاشة الكمبيوتر او اللاب ... لأنها تؤثر على التركيز
و لكم تحياتى
مامى لأول مرة