top ad

الأحد، 27 نوفمبر 2011

الدرس الأول لتعليم البيانو للأطفال من عمر سنتين و نص



يترك الأهل ابناءهم يلهون و يلعبون حتى سن دخول المدرسة ثم يبدوا فى دوامة الدروس و الواجبات و التحضير للامتحانات ثم التحضير للمصيف ثم التحضير للمدارس من جديد ... و يترتب على هذه الحياة الروتينة اهمال مواهب الطفل .


و المقدمة دى ليه اضطرينا نقولها ؟؟ عشان نقول لكل اب و لكل أم ارجوكم دوروا على موهبة ابنكم ، و ما تجبروش أولادكم على مواهبكم و لا تفرضوا عليه موهبة هم ما بيحبهاش ، لأنكم بكدة بتضيعوا عليهم عمرهم و بتطمسوا معالم موهبتهم ، و بتضيعوا وقتكم و فلوسكم فى حاجة أولادكم و أطفالك مش ح يستفيدوا منها


و عشان كدة أحب أقول لكل أب و لكل أم قبل ما تعلموا ولادكم الموسيقى تأكدوا ان ابنكو بيحب الموسيقى ، بيحب يسمعها ، بيتجاوب معاها ، بيرقص ، بيهز راسه ؟


السؤال الأول :
إيه هو السن المناسب لتعليم الطفل البيانو ؟؟؟
الإجابة :
السن إللى يقدر يفهم بيه و يستوعب لغة الأب أو الأم أو المدرس .. يعنى لو الطفل بيفهم الكلام من عمر سنة و ح يستوعب التعليمات و التدريبات يبقى من عمر سنة .. أنا عن نفسى بدأت تعليم البيانو لبناتى من عمر سنيتن و نص





الدرس الأول لتعليم البيانو لطفل عمره سنيتن و نص :

  1. افتح آلة البيانو للطفل و اعزف امامه 
  2. اترك البيانو للطفل فان عزف عليه فلديه استعداد مبدئى للتعامل مع الآلة ، ان خاف منها فيمكن تكرار المحاولة بعد عدة ايام ، لو استمر الخوف لا ندرب الطفل على البيانو و لا نفرضه عليه ابدا
  3. نفتح البيانو و نترك الطفل يلعب كما يحلوا له مدة خمس دقائق ، ثم ارفع يدى لأعلى و أنا أقوله هششششششششششششششششششش ... هو كمان ح يرفع إيه و ح يقول هششششششششششششششش
  4. مع الصمت نعلمه الفرق بين اللون الأبيض فى أصابع البيانو و اللون الأسود ، ثم اتركه يعزف بشكل عشوائى و  احنا بنقول على الأبيض ابيض و على الأسود أسود فى مفاتيح البيانو
  5. لما نتأكد انه عرف الأبيض و الأسود ، أشاورله على مفتاح الدو DO
  6. و نعزف على مفتاح الدو  حتى آخر الدرس و تنتهى الحصة و الطفل يعرف ان هناك حاجة اسمها دو ، لكن لسة ما عرفش مكانها بشكل تلقائى 
و لكم تحياتى
مامى لأول مرة
http://la3ya3nyno.blogspot.com/

الخميس، 17 نوفمبر 2011

عايز تعلم ابنك الموسيقى - الدرس الأول فى آلة البيانو

لو حد عايز يعلم ابنه الموسيقى و مش عارف يعمل إيه خصوصا و ان تعليم أى آلة موسيقية يبدا من عمر ست سنوات ، عشان كدة احنا بنقترح عليك تعليم الطفل من عمر سنيتن آلة البيانو .. و طبعا مش ح تقعد الطفل على البيانو لكن ممكن تجبه اورج صغير او لو فى اورج محترفين فى البيت ممكن يستخدمه


الدرس الأول لتعليم البيانو


انت مش محتاج دلوقتى غير انك تعرف ان النوت الموسيقية ممكن تمثيلها بالحروف الأبجدية و ترتبها على لوحة المفاتيح زى ما هو واضح فى الرسمة دى 





النغمة دو                                                           ف  =C
النغمة ري                           رف =D
النغمة مي                               ف =E
النغمة فا                                          ف =F
النغمة صول                                         رف =G
النغمة لا                                            رف =A
النغمة سي         ف =B


و لكم تحياتى
مامى لأول مرة
http://la3ya3nyno.blogspot.com/

الاثنين، 14 نوفمبر 2011

حدوتة عصا سيدنا موسى - عليه السلام

عايزين تحكوا حواديت لولادكم
و ما بتعرفوش
ولا يهمكوا
جبنالكم حواديت من حواديت الأطفال
شوفوها مع ولادكم و دردشوا معاهم فى الحدوتة و الهدف منها و اسألوهم اتعلموا ايه ؟؟ 
و لكم تحياتى 
مامى لأول مرة .
http://la3ya3nyno.blogspot.com/




حدوتة عصا سيدنا موسى - عليه السلام, posted with vodpod

حدوتة عصا سيدنا موسى عليه السلام - الجزء 2

عايزين تحكوا حواديت لولادكم
و ما بتعرفوش


ولا يهمكوا
جبنالكم حواديت من حواديت الأطفال
شوفوها مع ولادكم و دردشوا معاهم فى الحدوتة و الهدف منها و اسألوهم اتعلموا ايه ؟؟ 
و لكم تحياتى
 مامى لأول مرة .
http://la3ya3nyno.blogspot.com/




حدوتة عصا سيدنا موسى عليه السلام - الجزء 2, posted with vodpod

الجمعة، 11 نوفمبر 2011

أصول الكشف الصحيح عند طبيب الاطفال



قد يهمل الكثير من الأهل معرفة الاصول الصحيحة لخطوات الكشف على الطفل ، معتمدين على ان الطبيب أدرى منهم بمهنته ... و ده كلام ظاهره الصحة و باطنة الكسل ... لأن الأهل عندما يعلمون بالخطوات الصحيحة التى يجب ان يتبعها طبيب الأطفال أثناء الكشف على الطفل الرضيع يتمكنون من التعرف على مدى قدرة الطبيب على علاج هذا الطفل ،  ففايدة التعرف على  الخطوات الصحيحة للكشف على الرضيع  نقدر مدى مهارة هذا الطبيب و نقدر نحدد ان كان طبيب كويس ولا ل  .. طبيب أمين على الطفل و لا لأ .

النقاط التى يجب ان نراعيها عند زيارة طبيب الأطفال :
و يجب ان يتابعها الأهل سواء كانت الأم أو كان الأب ليذكروا الطبيب بها ان نسى شيئا منها .. و هى كالاتى :
ــ يقوم الطبيب بمتابعة نمو الطفل من خلال : قياس طول الطفل الرضيع و وزنه و محيط رأسه
ــ يقارن الطبيب بين قياسات الطفل الرضيع و وضع القياسات على مخطط النمو growth chart
ثم يبدأ يخبرنا ان كان الطفل الرضيع  أو الطفلة الرضيعة تنمو بشكل جيد أو ضعيف . . كما سيخبركم ان كان وزن الرضيع زائد عن الحد أم ضعيف .. وب هذه المناسبة يجب ان نذكركم  ان زيادة وزن الأطفال بشكل كبير له سلبياته ... ف زيادة وزن الطفل الرضيع تؤخر لديه التسنين او المشى ، و فى الكبر تجعله عرضه للاصابة بالسمنة بشكل أكبر
ــ كما يجب ان يتضمن كشف الطبيب : فحص للعين، الأذن و القلب، و الرئة، البطن، الذراع، و الأرجل.
ـ فحص الجزء العلوي الأمامي من رأس الطفل The anterior fontanel.
ــ فحص فم الطفل و الأسنان الجديدة و رؤية علامات بدء ظهور باقى الأسنان أو الدروس أو الأنيب - و هذا تبعا لعمر الطفل 
ــ يجب على الطبيب ان يعطينى تقييم التطوير الطبيعي للطفل : هى يجلس الطفل بمفرده و دون مساعدة أحد ؟ الرضيه متأخر فى الحبو ؟ الطفل الرضيع يعرف اسمه ؟ يعرف أسماء عائلته.؟ - و هذا ايضا تبعا لسن الطفل 
ــ يكتب لكم طبيب الاطفال الفيتامينات التى يحتاجها الطفل الرضيع فى كل مرحلة ، و الكميات الكمناسبة له فى تلك المرحلة
ــ يناقش طبيب الأطفال مع الأم  نوعية طعام الطفل ، و كمياته و فائدته و يخبرها بالأطعمة الممنوعة قبل سن سنة مثل اللبن البقري، و الفواكه الحمضية ، و بياض البيض و عسل النحلــ يجب ان يخبركم طبيب الأطفال عن الجديد الذي سيقوم به الطفل في الفترة القادمة حتى يلاحظه الأهل ... و ان لم يخبركم الطبيب عن مظاهر التطور العقلى و العاطفى و النفسى التي يجب أن يقوم بها الطفل الرضيع في الفترة القادمة و تحديدا الثلاثة اشهر القادمة ارجوكم إسألوه

متى أتصل بالطبيب تليفونيا و بشكل عاجل :ــ يجب الاتصال بالطبيب فورا في حالة إصابة الطفل بالإسهال و الترجيع -  لذلك يجب ان يكون رقم موبيل الطبيب معك بشكل دائم
ــ يجب الإتصال الفورى بالطبيب فى حالة ارتفاع درجة حرارة الطفل الرضيع  أكثر من 38.3 درجة سيليزية.ـ  لذلك يجب ان يكون رقم موبيل الطبيب معك دائما
ـ يجب الإتصال بالطبيب إذا رفض الطفل للطعام أو الشراب و خاصة فى أول سنة من عمره .. . لذلك يجب ان يكون رقم موبيل الطبيب معك فى كل مكان

ــ إذا لاحظت الأم تأخر في التطور الطبيعي للطفل الرضيع ، يجب ان يكون رقم موبيل الطبيب معك ... فعند سن سنة يجب أن تتأكدى أن طفلك يقول على الأقل :يقول كلمة واحدة ( ماما، بابا ).. بشرط ان تكون الأم أو الأب او أى حد من الكبار فى الأسرة  بيردد الكلمات دى على الطفل الرضيع من أول ما أتولد

ــ فى حالة ظهور اى التهابات أو بقع من أى شكل و لون على جلد الرضيع و خاصة البقع الحمراء أو البقع البنية إسألوا عنها الطبيب اولا عبر التليفون لكى تمنعوا سبب ظهورها بشكل فورى ثم تسألوه عنها فى زيارتكم
و لكم تحياتى
مامى لأول مرة
http://la3ya3nyno.blogspot.com/

سبب زيارة الطبيب و مواعيد زيارة دكتور الأطفال



كل أم و كل أب يهتم بابنه ، سنجده يتابع الآتى : 





و عشان كدة نصيحة لكل أم تخاف على أطفالها سواء كانوا رضع أو أكبر .. يجب ان تذهب للطبيب فى زيارات دورية و لا تربط بين زيارة الطبيب و أمراض الطفل الرضيع . . و عند الدخول للكشف لا تقف لتتلقى التعليمات من الطبيب فقط ، و انما عليها متابعة كل صغيرة و كبيرة يقوم بها الطبيب لتتأكد ان كان طبيبا متميزا ً فى عمله و يؤديه بضمير ام انه هو الآخر يتبع مبدأ " بما ان الطفل ليس مريضا فليكن الكشف سريعا و لا دقة فيه "

و عشان كدة لازم نختار طبيب أطفال جيد و شاطر و امين

و معرفة طبيب الأطفال الجيد تبدأ بمعرفة المواعيد الصحيحة لزيارة الطبيب :ــ اولا : يجب ان تكون زيارة الطبيب بعد الولادة مباشرة ف لا يمر الأسبوع الأول من ولادة الرضيع دون زيارة الطبيب للأسباب التالية :
ــ نتأكد ان الصفراء لدى الطفل الرضيع قد انخفضت أو انضبطت
ــ يراجع الطبيب معكم طريقة تنظيف سرة الرضيع حتى سقوط الحبل السرى
ــ فحص المنطقة الحساسة و مدى نظافتها لدى البنات ، ووضعية الجهاز الذكرى عندى الذكور
ــ يخبرك الطبيب بالتطعيمات الخارجية و الواجب اخذها
ــ يشرح لك مواعيد الرضاعة ، و مواعيد اعطاء دواء الغازات و ماء الغريب و الأعشاب ان كانت الحالة تتطلب أعشابا ً ، و ينصحك بالإبتعاد عن الرضاعة الصناعية قدر المستطاع

ــ يضع الطبيب للأم ــ  شخصيا ــ نظاما غذائيا يقويها على الرضاعة الطبيعية ، فيجب ان تشربى ما يعادل ثلاثة لتر من الماء و السوائل . . كما سيكتب للأم ــ و ليس للطفل ــ على فيتامينات وعصائر  تتمكنها من الإستمرار فى الرضاعة الطبيعية ــ التى سأكلمك غن أهميتها في رسالة جديدة
ــ و علي كل أم ان تسأل طبيب الأطفال عن الأكلات التى يجب ان تمتنع عنها و التى ستسبب للطفل الرضيع غازات و مغص و على رأسها الملوخية و الفتة


ثانيا : يجب ان تكون زيارة طبيب الأطفال مرة كل شهر فى اول ثلاثة شهور
ثالثا ً : لابد ان تكون زيارة طبيب الأطفال من عمر الثلاثة أشهر و حتى سنتين كل 90 يوما ، اى فى الشهر السادس و التاسع و فى عمر سنة و سنة و ربع ( اختيارى ) ، و سنة و نصف ، و سنة و 9 أشهر ( اختيارى) ، و سنتين

و لكم تحياتى
مامى لأول مرة
http://la3ya3nyno.blogspot.com/

الاثنين، 7 نوفمبر 2011

مذكرات عائلية - بناتى عمرهم سنتين و قفلوا على نفسهم بالمفتاح



من اول ما تمت بناتى سنتين و قررت اتعامل معاهم بشكل مختلف ، خصوصا و ان كل واحدة فيهم بدأت تحس بشخصيتها و تفرض رأيها علينا .. و بدأت ما أسمعش غير كلمة " لأ " - " لأ " - " لأ " .. كنت الأول بتنرفز ، و صوتى بيعلى و بعدين اكتشفت انهم بدؤا يقلدونى و صوتهم هما كمان بيعلى .. قلت لأ ، الموضوع مش ح ينفع بالشكل ده .. و هنا قررت ان أى حد فيهم يغلط ، و يكون غلطه كبير ، و يكون عارف ان إللى عمله غلط لأننا شرحنا أكتر من مرة ان كدة عيب و مايصحش و مش لازم نعمل كدة .. و بعد فشل كل محاولات الإصلاح ، نلجأ للمحاكمات العسكرية و قرار فورى و حاسم و سريع ، بحبس المخطئ - مع ترك الباب مفتوح -
و بدات بتفعيل التجربة ، ان أول ما بنت من بناتى تعمل حاجة غلط - تبعا للمواصفات السابق ذكرها - امسكها من ايدها و بكل هدوء أقولها اتفضلى ادخلى  اودة النوم .. اول مرة مشيوا معايا عادى و من غير أى مقاومة .. تانى مرة بدؤا يفهموا انه عقاب .. تالت مرة بدأت المقاومة ، و رفضوا دخولوا الأودة ، و طبعا كان رد فعلى ان شلتهم و دخلوا الأودة محمولين على كفوف الراحة .. ده ما منعهمش  المقاومة فى تنفيذ قرار دخول الأودة ، لكن  اصرارى على العقاب خلاهم اول ما اقولهم اودة ؛ يجروا بسرعة على الأودة من نفسهم ، و لو كنا بالليل يقولولى " عالى مامى - عالى مامى " يقصدوا تعالى معانا يا ماما .. و لما أروح معاهم يقولولى " نوه - نوه " يقصدوا النور .. عايزنى انور لهم نور الأودة .. يا حبايبى فاكرين ان العقاب زاد و ح أقعدهم فى الضلمة - لأ مش للدرجة دى ، ده كدة ابقى أم الخلول ، مش أم حنون .. و عشان كدة اول ما يقولولى - عالى مامى - نوه " امشى معاهم كأنى انا إللى متعاقبة و داخلة الأودة تنفيذا لأوامرهم و كلى طاعة و أدب و سكينة .


وبقى موضوع الأودة ده تقريبا بيتكرر كل يوم و ما بقاش بيضايق بناتى قد ما بيفهمهم انهم غلطوا .. و كنت باسمح بالزيارة .. يعنى لو " جى " هى إللى صدر ضدها قرار "أودة " ، كنت بأسمح لأختها " هوهوز " بالزيارة ... طبعا ممكن أى حد يقولى : " و فقدت الاودة الاطار العام للعقاب " ح اقوله بالعكس .. لأن إللى بيتعاقب مش مسموحله يخرج من الاودة و لو اتحددله مكان معين فى الأودة زى السرير أو الكرسى - ما بيتحركش منه ، على عكس التانى اللى ما صدرش ضده اى حكم بدخول الاودة


و امبارح رفضت "جى" أخد دوا البرد اللى المفروض تآخده ، و بالتالى عاقبتها و دخلتها الأودة .. و كالعادة جريت " هوهوز " و دخلت وراها الأودة .. و بدئوا يلعبوا مع بعض ، و تطور اللعب إلى اللعبة البايخة بتاعت مين يرزع باب الأودة أكتر 


و سر اعجاب بناتى باللعبة دى ، انهم لما بيرزعوا باب الأودة بيلاقوا الشباب بيتفتح لواحده بسبب خلخلة الهوا ، طبعا لأن عمره سنتين و تلت شهور بالظبط ؛ فالفزياء و علومها لسة ما اقتحمتش برائتهم لكن بناتى عملوا زى نيوتن لما وقع على راسه التفاحة ، بس نيوتن اكتشف الجاذبية لكن بناتى  اكتفوا بالمشاهدة و أكلوا التفاحة


و لسؤء الحظ ان امبارح التفاحة مارضيتش تقع لتحت ، قصدى الشباك مرضاش يفتح ، ففضلوا يرزعوا الباب تلت مرات ، و فى المرة الرابعة صوتهم بعد و سمعتهم بيعيطوا و ينادوا .. جريت على باب الأودة ، لقيته مقفول ، حاولت أفتحه لكن الباب ما بيفتحش


أدفع الباب بقوة ، بعنف ، الباب كأنه مقفول بالمفتاح .. بس اتقفل إزاى ؟؟ قلت لنفسى مش وقته و جريت جبت مفتاح الودة التانية قلت يمكن يفتح .. لكن مافتحش .. البنات بتعيط جوة .. جوزى جه بسرعة و بدأ يدفع الباب بكتفه زى افلام رشدى أباظة لكن الباب برضه ما فاتحش .. قرر يجيب مفك و يحاول يستخدم بأى شكله يمكن الطبلة تفتح .. مافيش فايدة ، واضح ان جوزى محتاج لدورة تدريبية عند واحد حرامى شقق .. و بدأ  يفك طبلة الباب .. و خفت الأوكرة تقع على راس البنات ؛ فقلتلهم و انا متظاهرة بانى هادية و مافيش حاجة ، لأنهم كانوا مرعوبين ، قلتلهم بصوت هادى : " روحوااقعدوا على السرير .. ما تخافوش " .




و مش عارفة بناتى سمعوا كلامى و لا لأ ، لكن فجاة لقيتهم بينادوا عليا و بيعيطوا و هما جوة .. خصوصا لما كان باباهم بيخبط الباب جامد كانوا بتخضوا .. ما انا نسيت اقولكم ان بعد ما فكينا وش الأكرة الباب برضه ما رضاش يفتح ... و الرعب بدا يتمكن منى لأن جوزى قرر يضرب الباب برجله و خفت الباب يقع على واحدة من البنات ، ولا الباب يتقسم اتنين لأنه ابلاكش مجوف و لحد ما نجيب باب  جديد و أو نجار يخلع الباب القديم تكون بناتى اتعورت من الخشب إللى ح يكون عامل زى الغابات الإستوائية .. و قلت لجوزى ما تكسرش الباب . و قالى مش ح أكسره و فجاة لقيته بيخبط الباب من ناحية الطابلة برجله و بعدة عدة ضربات الباب اتفتح بعد ما كسر الخشب إللى ماسك فى لسان الباب و جريت على بناتى إللى لاقيتهم قاعدين على السرير زى ما قلتلهم .. و "هوهوز " ماسكة مفتاح الأودة فى إيدها 


و رغم ان بناتى  لسة ما بيتكلموش كويس لكن قدرت احل الشفرة و فهمت إللى حصل أول ما قربت منهم و حضنتهم . هما متعودين لما يقفلوا الباب و الشباك يتفتح ، الباب كمان يفتح تانى لواحده عشان لسان الأكرة ما بتكونش دخل مكانه ، لكن المرة دى الباب اتقفل و مرضيش يتفتح هو كمان زى الشباك 


و قبل كدة لما الباب كان بيقفل كانوا بيقدروا يشدوا أى حاجة متعلقة على الأكرة ، حزام ، لعبة ، حبل ، فوطة ، لكن المرة دى مافيش حاجة متعلقة على الأكرة ، عشان كدة بدأت بنات رحلة الخطط التآمرية .. و وقفوا على عربيتهم - عربية البىبى - .. و وصلوا لحد أكرة الباب ، لكن استخدموا مفتاح الأودة بدل من الأكرة ، و بدأوا يلفوا المفتاح فى اتجاه القفل .. و قفلوا الباب بالمفتاح 


و تم اقتحام الباب و لغاية دلوقتى الباب مكسور و بقى ما بيقفلش .. بس أكيد ح يتصلح فى أقرب وقت عشان البرد و الصقيع ، بس الوقت ده قبل الإنتخابات و لا بعدها ، ده متوقف على معاد الإنتخابات 


و لكم تحياتى
مامى لأول مرة
http://la3ya3nyno.blogspot.com/



الخصية المعلقة لازم تتعالج قبل عمر سنة



وصلنا سؤال بيقول :
ابنى عمره ثمانيه اشهر ، عنده الخصيتين مرفعين ، وسوعى بينزلوا لتحت ، فهل هذا طبيعى  ... من فضلك ارجو الاجابة 


و قبل ما نجاوب لازم تعرفوا:







قبل ما نجاوب لازم تعرفى :
ما هى الخصية المعلقة :
اثناء الشهور الأولى من الحمل تكون خصية الطفل إلى جوار الكلية ، يعنى جوة بطنه و تنزل بالتدريج مع أشهر الحمل إلى ان تستقر داخل الكيس الخاص ، و ده بيحصل قبل الولادة ، ليولد الطفل و خصيتيه داخل كيسهما .. لكن فى بعض الأحيان الخصية دى تتوقف اثناء رحتلها و ما تنزلش فى الكيس و هى دى إللى بنسميها خصية معلقة .

و للاجابة على السؤال :

لازم  كل أم تكشف بشكل خاص على خصية رضيع  من أول يوم للولادة عشان لو اكتشفنا حاجة نقدر نعالجها .. و موضوع ان الخصية معلقة يعنى انها موجودة جوة بطن الرضيع ..  و وجود الخصية داخل بطن الطفل يعرضها للتلف و يفقدها وظيفتها عندما يصل الطفل الرضيع لسن الشباب . . ف العلاج يكون من أول يوم و ما استناش لحد ما الطفل يوصل عمره سنة أو سنتين ، لأننا بالشكل ده بندمر الخصية و بنقضى على وظيفتها .

مكان وجود الخصية :
من جميل صنع الله ان الخصية يجب أن تكون خارج جسم الطفل لأن حرارة الجسم تتلف الخصية ؛ و هى المسؤلة عن استمرار النوع و التكاثر البشرى على سطح الكرة الأرضية . . فوجود الخصية داخل الجسم يعرض الحيوانات المنوية للموت ، مما يسبب العقم فيما بعد للطفل لا قدر الله . . ده غير انها ممكن تتسبب فى وجود أمراض سرطانية . . لذلك أذا فحصنا الطفل قبل الولادة مباشرة ووجدنا ان خصيته غير موجودة بالكيس الخاص بها لابد ان يعرض على جراح ليساعدنا على نزو ل الخصية فى أسرع وقت ممكن و قبل ان يصل عمر الطفل إلى سنة حتى لا تتلف

و لكم تحياتى
مامى لأول مرة



السبت، 5 نوفمبر 2011

فرحوا ولادكم بالعيد

فرحوا ولادكم بالعيد و غنوا معاهم ده النشيد 
و انفخوا معاهم البالونات .. و طبلوا و صقفوا و اضحكوا و زمروا و علموا ولادكم معنى الفرحة .. الطفل لما يتعلم يفرح و هو صغير يقدر يهزم كل الصعاب لما يكبر .. لأن الحزن مش ح يكون معشش فى قلبه .. فمن عشش الحزن فى قلبه ح يكون من السهل هزيمته 

و ده سر من اسرار الروح المصرية المنتصرة على طول الخط


و  لكم تحياتى
مامى لأول مرة



الأربعاء، 2 نوفمبر 2011

الرياضة للأطفال هى الحل يا كل أب و يا كل أم



كل أم و كل أب بتدور على طريقة تخلصها من الطاقة الزائدة عند اولادها .. انصحكم بالرياضة .. طيب لو الطاقة زادت لدرجة اصبحت فيها غير مهذبة ؟؟ العلاج  برضه ح نلاقيه مع الرياضة


 و ده إللى الأهل الأذكياء بيعملوه .. انهم يلحقوا ولادهم بأى نشاط رياضى .. لكن يختاروا إزاى ؟؟ هو ده السؤال .. ف ألأنشطة الرياضية كتير و منها  كرة القدم ، كرة السلة  ، السباحة ، ركوب الخيل ، كرة اليد ... و الحكاية دى حلها بسيط ، اننا نلاعب الطفل بشكل مبسط اللعب دى ، و اللعبة إللى ح نلاقيه بيستمتع بيها أكتير تبقى هى دى الرياضة إللى ح يحبها و يحقق نتائج فيها .


المشكلة الحقيقية فى الأهل إللى ما بيعرفوش  أهمية الرياضة :
 مشكلة الأهل دول انهم  بيعتبروا الريلضة نوع من أنواع الترفيه و الرفاهية .. عشان كدة كان لازم ننقل لكم راى الأطباء في أهمية الرياضة فى نمو الطفل الجسدى والذهنى... و هى تتمثل فى النقاط دى :
  1. يجب ان يمارس الطفل الرياضة و على الأهل مراعاة هذه الرياضة و يدولها أهميتها زى حال أهمية الغذاء والنوم والراحة والنشاطات المدرسية
  2. ممارسة الرياضة مهم لألأطفال لأنها تضبط له ايقاع نشاطه الجسدى  إللى هو جزء من إيقاع حياته
  3. الطفل اللى ما بيتحركش  بيبقى خمول، وعضلات جسمه  ضعيفة ، وقلة النشاط يعرض القلب للتعب السريع.
  4. مفاصل الطفل فى حاجة إلى الحركة بشكل كبير وإلا أصاب بالألم بمجرد قيامه بأى بحركة صغيرة.
  5. الرياضة ضرورية للأطفال لأنها تقوى العظام و تعمل على تجنب الأمراض فى المستقبل مثل ترقق العظام والسمنة المفرطة وارتفاع الضغط وانسداد الشرايين... وغيرها من الأمراض التى تسببها قلة الحركة.

و لو اقتنعتوا باهمية الرياضة ، لازم نعرف الطريقة و ا
لمعايير اللى على اساسها  يتم ختيار الرياضة المناسبة للطفل :



  • يجب على الكل تأمل طريقة لعب ابنهم و تقريب هذه الطريقة للعبة الرياضية اللى تشبهها .. يعنى لو الطفل بيحب يستحمى كتير يبقى السباحة ح تكون كويسة ليه ، و لو بيحب ألعاب الماية  يبقى ممكن يحب كرة الماية .. و لو بيحب الكرة بصفة عامة يبقى كرة القدم أو كرة السلة ح تستهويه
  •  يجب على الأهل تحفيز الطفل على الإشتراك بالنشاط الرياضى المناسب له لكن ابدا ما نجبروش لأن النتيجة ح تكون عكسية .. فدور الأهل ينحصر فى تشجيع الصغير لكن لا يجوز لهم لأن يجبروه على ممارسة الرياضة.
  • و من المعايير المهمة لاختيار نوع الرياضة : هى درجة ملاءمتها لبنية الطفل الجسدية. ..فالطفل غالباً ما يختار الرياضة تبعاً لما يختاره أصدقاؤه، فهو سيجرب أنواعاً عدة ويتردد كثيراً قبل أن يجد الرياضة الجيدة بالنسبة إليه... و الأهل مش لازم يقلقوا لو ابنهم فى سن المراهقة غير نوع االرياضة إللى بيمارسها و ما يعتبروش ان ده نوع من أنواع عدم الإستقرار النفسى... وينصح المختصون الأهل بأن يقترحوا رياضة تلائم مزاج طفلهم.





من الأسئلة المتكررة :

- إيه الرياضة المثالية للطفل الخجول ؟؟
الطفل الخجول يجب أن يوجه إلى الرياضة الجماعية ، عشان تكون الرياضة علاج عضلى و نفسى و يتعلم الطفل من خلال الرياضة الأسلوب الصحيح للتعامل وسط مجموعة .. و من أفضل تلك الألعاب كرة السلة، كرة القدم ، كرة اليد .. و بالشكل ده الطفل الخجول مش ح يكون لوحده فى الملعب ولا ح يواجه جمهور المشجعين



ـ إيه الرياضة المثالية المناسبة للطفل العدوانى ؟؟؟
اولا لازم نعرف ان الطفل العدوانى ده موجود فى خيال الأهل .. فمافيش حاجة اسم عدوانى ، لكن فى طفل عنده طاقة زيادة و احنا لازم نعرف نفرغها فى حاجة مهمة .. تانى حاجة مافيش طفل عدونى لكن فى طفل بيقلد الأهل بالظبط و ده معناه ان الأهل هما إللى عدوانيين لكن مافيش طفل عدونى


و للرد على السؤال ننصح بلعبة الجودو للطفل طابح الطاقة الزائدة او للطفل
 اللى أهله عدوانيين .. و اخيترا الجودو يرجع إلى أن الرياضة القتاالية تساعد فى توظيف طاقة الطفل بشكل جيد .

فى أى سن يمكن تحديد الرياضة المناسبة للطفل؟
السن يتوقف على اللعبة إللى ح نختارها .. فلو ح اختار السباحة نبدأ  من السنة الثانية من عمر الرضيع ... و لكن السن العام لأى لعبة يبدأ من سن اربع سنوات ده لو عايز طفلى  يبقى بطل رياضى .. لكن لو عايزه يبقى ممارس للرياضة بس للحفاظ على قوة البنيان بس يبقى ممكن نستنى لما الطفل يبقى عمره سبع سنين و ده لحد ما يكتمل نمو جسد الطفل ، ويصبح الطفل قادراً على آدراك صورة جسده وبالتالى على التحكم فى حركته، فيعر+9

ف التوازن والسيطرة على جانب من جسمه، والتناسق فى حركته والتمركز والتوقع والتحرك.

فى رياضة محددة تناسب مع كل مرحلة من سن الطفل؟
لا... . كل الرياضة كويسة بغض النظر عن سن الطفل، ومنذ اللحظة التى يبدأ فيها الطفل بالحركة،ما عدا رياضة حمل الأوزان، فهى نشاط خطر على الطفل لأنها تتلف غضروف النمو الموجود فى أعلى العضلات.

- وعموماً الرياضة الفردية كالتزحلق  والرقص والسباحة والجمباز أسهل على الطفل ما بين الست والثمانى سنوات.

ما فائدة الرياضة الجماعية ؟؟


  1.  تعلم الطفل احترام الآخر
  2. مشاركته الآخرين فى بذل الجهد
  3.   تعلمه التعاون والتوقع وسرعة البداهة.
  4. التفكير الجماعى
و لكم تحياتى
مامى لأول مرة

midlle ad