top ad

الأربعاء، 31 ديسمبر 2014

فن ايقاظ الاطفال :

فن ايقاظ الاطفال :
قد يعتقد الكثيرون ان ايقاظ الاطفال مهمة سهلة ... و هى ان اقوم ببعض الضوضاء او ركل الطفل حتى يستيقظ ... و البعض يعتقد ان الصراخ و التهديد هو الحل المثالى لأيقاظ الطفل .... لكن غالبيتنا لا يعرف ان الاستيقاظ العنيف يؤثر على الجهاز العصبى و خلايا المخ بشكل مباشر لذلك يجب ان نوقظ الاطفال برفق و لين و حنان .... و لذلك ايضا يجب ان ندخلهم الى سرائر فى موعد مبكر حتى يحصلوا على كفايتهم من النوم و  لا يتوتروا عند الاستيقاظ مما يؤثر على خلايا مخهم و صحتهم النفسية فى المستقبل القريب و البعيد

-        يجب ان نتذكر ان النوم هو الموتة الصغرى ... و الاستيقاظ هو نوم من انواع العودة الى الحياة مرة اخرى ... فيجب ان نقوم بهذه المهمة بفن و لين دول حدوث اى اصابات تخدس النفس او الروح
 
فن ايقاظ الاطفال - مامى لأول مرة 
خطوات ضرورية لإيقاظ الطفل :

  1. اجلسوا بجوار  اطفالكم لثلاث دقائق
  2.  اقرأوا بصوت منخفض آية الكرسي، والمعوذات
  3. ثم أيقظوهم بهدوء و انتم تربطون على ظهورهم و اكتافهم و تقبلوهم بحنان
  4. أكثروا من التسبيح بدل الصراخ
  5. و فور فتح الطفل عينيه لاقوه بابتسامة رضا لتعلموه التفائل و الأمل
  6. ضموا الطفل و قبلوه قبل ان يقوم نهائيا من السرير 
  7. ذكروه بما عليه - لبس الشبشب - عسل الوجه و الأسنان - التنشيف الجيد - و لو نسى أى حاجة ذكروه بلطف لأنه لم يستيقظ بشكل كامل بعد
  8. لا تسمحوا لأطفالكم بمشاهدة التلفاز او الايباد أو الكمبيوتر مباشرة عند الاستيقاظ.. حيث تكون بؤرة العين في اتساع بعد الاستيقاظ، وقد تضرها تلك الأشعة

فن مساعدة الطفل على الدخول الى النوم :


- اجلسي بجوار طفلك قبل النوم لدقائق لتخبريه أنك تحبيه
- ضمى طفلك قبل النوم و احضنيه
- فكري معه في فكرة مشجعة للغد حتى ينام متأملا ويستيقظوا نشيطا



فوائد التدليل قبل النوم او عند الاستيقاظ :

  1. تدليك طفلك يمكن أن يساعد على تهدئته
  2. ويساعد على الهضم
  3. ويحسن من عادات نومه
  4. التدليك  ينمى الصلة العاطفية بينك و بين الطفل ، فلا تحرميه من تلك اللمسات
و لكم تحياتى
مامى لأول مرة

الثلاثاء، 30 ديسمبر 2014

ابداعات الرضع فى عبور الحدود

النهاردة بناتى عندهم عشر شهور إلا عشر أيام
و بعد تحطيمهما لمعظم اللعب  بنجاح منقطع النظير ، قررت بناتى صنع ألعابهم بأنفسهم ، 
ابداعات الرضع فى عبور الحدود - مامى لأول مرة

و هنا قررت المادموزيل "جى " أقتحام منطقة أسفل المكتب بعد ان أغلقتها من الجهة الماقبلة لجلوسهم ، إلا ان جى قررت الدخول من ناحية الكرسى ، و عبور الكرسى و الدخول أسفل المكتب ، و هنا وجدت راك السيديهات ، و هوب هوب هوب ، بدأت فى إخراج السيديهات التى يصل عددها إلى 50 سى دى ، و بالطبع شاركتها " هوهوز" . . و كلما جمعت السى ديهات ، عادوا لممارسة نفس الأمر بهمة و نشاط
و ناهيك عن كم النطح لذى تم منهم للمكتب و من المكتب اليهما و لم ينقذنى من هذا الأمر غير انهما ملوا من الدخول أسفل المكتب

و هنا قررت "جى" برضه فهى العقل المدبر لأى جديد فى البيت ، بدات "جى" فى فتح مخزن قطع غيار الكمبيوتر و اخراج كل الجاكز و الأسلاك و الوصلات و كلما أخذتها منها عادت و فتحت الباب و أخرجت الأسلاك و طبعا شاركتها صديقتها الوفية و أختها التوأم "هوهوز" و عملنا فرح بالأسلاك و الجاكات إلى ان قررت "جى " اغلاق باب المخزن الذى يصل طوله 40 سنتى و عرضه 15 سنتى ، و أغلق الباب على أصابعها . . فأقلعت عن فتح الباب ثانية . . و قررت الوقوف امام الكتبة و النظر إلى لمبات الرسيفر و انا حريصة انها ما تلمسش أى حاجة حرصا على ...... ، تفتكروا حرصا على مين ؟؟؟ الرسيفر و لا "جى "؟؟؟

قبل ما تنقض على الرسيفر قرروا المرة دى يشدوا ستاير الليفنج و يحاولوا يتسندوا عليها و هنا اكتشفت ان بناتى  بقوا زى طرازان لما بيتعلق فى فرع اشلجرة ، طيب طرزان ممكن ينط فى أى وقت لكن "جى " و "هوهوز" لسة ما عندهمش الخاصية دى .

فده خلاهم يسيبوا ستارة الليفنج و يتوجهوا لستارة البلاكونة يمكن يقدروا يغزوها  و بدؤا يستخبوا وراها من بعض لحد ما مرة الستارة لفتى حولين "جى " و ماعرفتش تخرج و طبعا انا شيفاها فخرجتها على طول . . البيت مش فوضى . . و فضلت خايفة شوية 
من الستارة لحد ما لقت الهوا بيطيرها فعرفت انها ممكن تلعب معاها من تانى

و تطور ألعاب  "هوهوز " انها قررت تقفز خارج البلاكونة . . لأ الحمد لله مش فى الشارع ، أوضح أكتر . . عندنا باب البلاكونة مصنوع من الأليوميتال و هذا الآخير له شفة   عريضة فوق الأرض ، و الشفة دى كانت مطمنانى ان "جى" و هوهوز مش ممكن يطلعوا للبلاكونة ، لكن هوهوز المبدع عبر ، عبرت ولا عبور ستة أكتوبر . . سجل يا تاريخ ، و على الفنانيين كتابة أوبريتات و اغانى للملحمة دى


و لكم تحياتى


مامى لأول مرة

السبت، 27 ديسمبر 2014

البرد قبل التكيف أحيانا 2


ولدت بناتى فى شهر أغسطس أى فى عز الحر ، و كانوا فى المستشفى بيشغلوا التكيف طوال اليوم و ما يوقفهوش إلا فى حالة تغير الحفاضات . . و كنت قلقة جدا ان تصاب بناتى بالبرد ، خاصة و انا اسمعهما تعطسان كلما تم تشغيل التكيف ، لكن الممرضات بمختلف أعمارهم و أطوالهم و خبراتهم و عناوينهم و ساعات نباتشياتهم اكدوا لى ان أول عطسة معناها ان جسمهم بيظبط حرارته . . و تعاملت مع هذا المعتقد طوال فصل الشتاء و خاصة عندما كنت أخرج بناتى من حجرتهما لليفنج رووم .
و قبل ان تتم "جى" و هوهوز" شهرها الرابع اصابهم ابى بالبرد عندما كان يلعب معهما . . و السبب الذى اضطر زوجى لعدم توجيه أى لوم لى و لا لأبى ان البرد غلطته . . ايوة ، لأنى كنت نايمة لما بابى جه من اسكندرية و زوجى العبقرى لم يمده بغطاء كاف رغم ان الشتاء فى بيتنا قارص قارص قارص ، يعنى اللى مسافر الإسكيمو ممكن يجلنا ح يحس بمتعة السفر لبلاد الثلج بالظبط . . الكلام ده فى بيتنا بس لكن البرد فى القاهرة عامة معقول و محتمل . . و لعلمى بالصقيع الذى أعيش فيه اتصلت بطبيبة بناتى و وصفت لها الحالة قالتلى يخدوا " تراى أمينك " تلت نقط فى تلت مرات و سيفيلين و محلول ملح عشان الخنفرة . . و طلبت مننا نأجل تطعيمهم يومين لحد ما يخفوا عشان ما يجهدوش . . و الحمد لله قاموا بالسلامة . . و امعانا فى تقوية جهازهم المناعى الدكتورة قالتلنا ممكن تدوهم كل يوم 3 نقط فيتامين سى فى فترة الشتاء بس ، و فعلا فضلنا على الحالة دى لحد دخول الربيع .

و فى ليلة ليلاء ، أن ان ان [دى موسيقة تصويرية ] البنات نامت الساعة حداشر و فجأة صحيت على الساعة واحدة . . و كان بابى عندنا ، و لاحظ ان البنات بتتلوى فى السرير ، مرة شمال و مرة يمين ، الراس تتحرك الأول لليمين در ، و بعدين الجسم وراها ، و بعدين نأخد الشمال در و الباقى وراها . . و قالى دول حرانين ، قلتله : مش معقول الجو صحيح مكتوم بس مش كتمة الفول المدمس ، أمال لما نوصل للمدمس ح يحملوا إيه " قالى طيب هاتى حاجة أهويلهم
و ده لأنه عارف ان المروحة ممكن تبردهم ، فمطلبش المروحة . . و بدأ يهوى على "جى " لحد ما استرخت و نامت . . فقرر يعيد التجربة مع "هوهوز" لكن على مين ؟ "هوهوز" خدت عبرتها من  اختها و مش ممكن تستسلم بسهولة . . و فضل بابى يهوى كأنه بياع درة اترقى و بقى بيشوى كباب ، كان سعيد جدا رغم المجهود إللى استنفذته منه "هوهوز" فعلا أعز الولد . . و هنا بدأت اتخوف من هجوم الصيف فجأة علينا فماذا سنفعل و بناتى لا تستطيع النوم فى الحر ، و انا لسة مش محترفة شوى درة ، انا يدوب هاوى أكل درة .
و طبعا زى أى زوجة مصرية بينشف ريقها مع جوزها عشان ينفذ لها طلبها ، و بعد إلحاح شديد استمر لعدة ايام عشان تركيب تكيف 
فى أودة البنات انجز زوجى العبقرى و قالى :" يالة يا ستى

ــ هاه عملتلى مفاجأة و ركبت التكيف و انا فى المطبخ
ــ لأ ، جبتلك عرض عشان تنقى
ــ مش عايزة انقى عايزة أتهوى
ــ ان شاء الله ح تتهوى
ــ تقصد إيه
ــ هاها ( انها ضحكته التى تحمل علامات الخبث و الدهاء ــ انها ضحكة التعلب المكار التى قال بعدها
" ح نركب الكيف"

و الحمد لله زوجى وجد العرض اللى اتحمس له  و اتصل بشركة كان اتصل بيها من سنتين و طلب منهم يجوا بكرة يركبلنا الجهاز . . و قعدنا نستنا ماحدش جه اتفق مع ناس يجوا يركبوا ، بقاله اسبوع متفق معاهم ، و لا حس و لا خبر . . هما كانوا مستنينا نطلبهم عشان يجيلهم عقد عمل فى الخارج .



عندما كانت تمر بالبلاد موجة حر ، أهب واقفة و اقول و لازم أجيب تكيف ، مش عشانى لأ انا أستحمل أروح خط الإستواء ، لكن عشان بناتى . . و أقنعت زوجى بأهمية التكيف للبنات ، و لكنه كان ما يشغله فاتورة الكهربا ام زبالة ، أقصد التى ندفع عليها رسوم جمع القمامة التى لا تجمع 
 طب هو احنا بندفع الزبالة ليه ؟
 ما احنا لو ما دفعناش مش ح يشيلوا الزبالة 
. طيب و لما بتدفعوا بيشلوها ؟
 لأ
 طيب بتدفعوا ليه ؟!! 
عشان نحافظ على النظام إللى حطاه الحكومة الزبالة
قصدى اللى بتلم الزبالة

ده كان حوارى مع نفسى لما افتكرت فاتورة الزبالة ام كهربا او الكهربا ام زبالة

. . عشان ما أطولش عليكم المهم بالعافية جوزى طلب شركة تانية و جم فى نفس اليوم . . و بكدة ركبنا التكيف بتاريخ خمسة ، خمسة ، ألفين و كام ، لأ ، مش و خمسة ، ألفين و عشرة ،كان المفروض تبقى و خمسة عشان الحسد . اتصلنا بشركة تانية و ركبنا التكيف فى نفس اليوم . . و طبعا انا تخيلت انى ح أعيش الربيع فى هذه 
الليلة .. إلا اننى عشت تحت الردم
________________
مش حد يقولى ان تركيب التكيف بيملا الجو غبار و عفار بسبب الحفر و النقر عشان تركيبه ، المشكلة ان التركيب بدأ الساعة سابعة و انتهى الساعة تسعة ، و البنات عايزة تانم الساعة عشرة ، و التراب ده ، مش ممكن يناموا فى أودة فيها غبار ، نفسهم ، يجيلهم حساسية . . و بدأت رحلة الكفاح لإعادة الحجرة سيرتها الأولى و لبست ملابس موظفى الحى الذين يتسرب إليهم علم بأن المحافظ ح يمر ليبدأ الرش و المسح و الزرع و الزينة و تلوين الفترينة .
ياهه الحمد لله ، رجعت الأودة جميلة ، و جلست تلت دقائق آخد نسى و أحمد ربنا على التكيف ، و فجأة بدات "جى" و "هوهوز" تصرخ . . إيه ؟!!! فى إيه ؟!!!!




لأ ، ده هوهوز ساندة على عربيتها و رافعة رجلها التانية على ضهر اختها . . طب هى بتعيط ليه ؟ ده المهم ؟ . . ما هى مش عارفة تقف عشان اختها بتتهز تحتها ، عايزة حد يثبتها بمسمارين
جرينا على البنات و خدناهم و دخلناهم يناموا ، و قبل ما نشغل التكيف سمعنا هتشى ، هتشى ، هتشىىىىىىىىىىىىىىى . . مين ده ؟!!! . . دى الأنسة "جى " واضح انها خدت برد . . برد ؟!!
ده احنا جبنا التكيف عشان ما تخدش برد . . اشرحلكو . . "جى " بقالها يومين تقوم من النوم عرقانة ، و طبعا مع أى نسمة ممكن العرق ده يبردها . . لكن لما تكون درجة الحرارة معتدلة ما تسمحش بأى عرق يبقى ان شاء الله مافيش برد . . المهم خدناها و خرجنا برة الأودة و فضلنا من الساعة حداشر لحد الساعة اتنين نحاول ننيمها ، تنام و فجأة مناخيرها تتسد تصحى مخضوضة . . لازم أحطلها محلول ملح ، طيب المحلول إللى عندى رميته ، لأن مدة صلاحيته بتخلص بعد ما يتفتح شهر واحد . . و نزل زوجى الساعة اتنين بالليلة اشترى محلول ملح من الصيدلية ، و قطرنالها ، لكن الموضوع قلب بعطس و كحكحة ، و قررنا نبدأ رحلة الثلاثة أيام مع تراأمينك و فيتامنين سى و نقط محلول الملح كل ما مناخيرها تتسد . . و الحمد لله "جى " بدأت تتحسن ، لكن طمع الإنسان و عدم اكتفاءه بما رزقه الله بيعمل مشاكل كتير . . فقد كانت المادموزيل "هوهوز" تقترب من "جى " ببطئ ببطئ ببطئ و فجأة و على حين غرة تنتش منها التيتنية لتقذف بها فى فمها . . و طبعا ده أصاب المدموزيل المذكورة بالبرد ، و اضطريت أكرر نفس العلاج لمدة تلت أيام تانيين . . . مع انى جبت التكيف عشان ما يجيلهمش برد ، لكن البرد سبق التكيف و انتصر عليهم و عليا . . و عشان كدة بدأت أحطلهم كام نقطة من الليمون فى شوربة الخضار كنوع من المقاومة الشعبية  فى لخبطة الجو المؤذية دية


و لكم تحياتى
مامى لأول مرة

الجمعة، 26 ديسمبر 2014

نشاط الرضيع من عمر يوم و حتى 3 سنين

بعد ان تنظم الأم يومها مع رضيعها و تعرف ساعات الرضاعة و النوم و الصحيان و تغير الحفاط و الملاغاة و الخروج به او الجلوس بالشمس تبدأ فى مراقبة ابنها و سؤال عن مراحل تطوره بقلق . . فكل أم و خاصة الأم لأول مرة لا تعرف ان كان ابنها يسير على النهج السليم و التطور الحركى و الذهنى الصحيح ولا متأخر . . و عشان كدة قدرت أجبلكم الرد على أى سؤال لكل أم لأول مرة

إذا كان عمر الرضيع ما بين شهر إلى شهرين:



  1. - تحريك الرأس ناحية الوجنة التي يتم لمسها. -
  2.  الاستجابة والتنبه لصوت الضوضاء العالية.
  3. - تحريك الرأس إلى الجانبين مع الاستلقاء على ظهره.
  4.  - زيادة في الوزن ونمو في الطول.
  5.  - القدرة على الرضاعة والبلع بسهولة.

اذا كان عمر رضيعك ما بين 3 شهور و اربع شهور :

 -- نمو المهارات الحركية لديه من النوم على البطن إلى الظهر.
- إصدار أصوات بخلاف البكاء.
- القدرة على الابتسامة وإصدار صوت الضحكة.
- زيادة في الوزن ونمو في الطول.
- تحريك الرأس في اتجاه الصوت والألوان.

اذا كان عمر رضيعك ما بين 4-6 أشهر:

- نمو المهارات الحركية لديه من النوم على البطن ثم إلى الظهر، ومن الظهر إلى البطن.
- محاولة الوصول للأشياء ومسكها.
- تحريك اللعب من يد لأخرى.
- القدرة على حفظ التوازن عند الجلوس لثوانٍ.
- القدرة على الابتسامة استجابة لمداعبة الآخرين.

اذا كان عمر رضيعك ما بين 6-9 أشهر:

- يزحف على البطن مع تحريك الذراع والأرجل.
- القدرة على اللعب.
- الجلوس بمفرده.
- نمو في الطول وزيادة في الوزن. تحريك الرأس لتحديد مكان الأصوات.
- إصدار الضحكات بصوت عالٍ.

اذا كان عمر رضيعك ما بين 9-12 شهراً:

- دفع الجسم محاولاً الوقوف.- التقاط الأشياء الصغيرة.
- المشي بمساعدة الآخرين (بمسك اليدين).
- التحكم في حركات الأيدي و الإشارة.
- تقليد الأصوات البسيطة.- اللعب مع الآباء والأخوات.
- القدرة على الجلوس بمفرده.
- الزحف على الركبتين والأيدي.

اذا كان عمر رضيعك ما بين 12-15 شهراً:

- النطق بكلمات أخرى بخلاف: "بابا… ماما".
- القدرة على إمساك الكوب ولكن بمساعدة الآخرين.
- التقاط الأشياء الصغيرة.
- المقدرة على التحكم في حركات الجسم  زى الدوران للخلف

اذا كان عمر رضيعك ما بين 15-18 شهراً:

- النظر إلى الصور في الكتب وتقليب صفحاتها.
- تناول الأكل بالملعقة  - رغم عدم التحكم فيها بشكل كامل
- العبث بالأشياء و التقاطها من أماكنها ثم تركها بعد اللعب بها.
- المشي بدون مساعدة.
- محاولة التكلم وتكرار الكلمات.
- إظهار المشاعر مثل الحزن أو السعادة.
- التعبير عن احتياجاته بالإشارة.

اذا كان عمر رضيعك ما بين 18- 24 شهراً:

- القدرة على التعبير بالكلام في صورة جمل مكونه من 2-3 كلمات.
- القدرة على حمل الأشياء عند المشي. - إظهار العواطف متمثلة في العناق والقبلات.
- استخدام كلمة "لا" في الغالب.
- مضغ قطمات صغيرة من الطعام.
- اللعب بنشاط.
- فهم بعض التوجيهات البسيطة مثل "أعطيني الكرة".
- الإشارة إلى الأنف، والعين والشعر والفم.
- قذف كرة كبيرة.
- تكوين حصيلة من الكلمات والإشارات تصل إلى 20 إشارة وكلمة.

اذا كان عمر رضيعك ما بين 24-30 شهراً:

- تناول الطعام بمفرده.
- القدرة على الجري.



- النطق باسمه عندما يطلب منه ذلك.
- الاستمتاع "بالشخبطة" والرسم.
- الاستمتاع باللعب مع أطفال آخرين. –
 استخدام كلمات أخرى مثل "مع السلامة" أو "باي - باي" أو "عصير تاني".
- التحكم في فتح الأبواب من مقابضها.
- الاستمتاع بالقراءة من الآخرين له. قذف الكرة إلى الأمام.

اذا كان عمر رضيعك ما بين 30-36 شهراً:
- تكرار الكلام وراء الآخرين.
- القفز في نفس المكان.
- غسل الأيدي وتجفيفها.
- النطق باسمه عندما يطلب منه ذلك.
- التعبير عن النفس في جملة من ثلاث كلمات.


 ومن خلال هذه الملامح البسيطة يمكن لأي أب أو أم  التعامل مع طفلهم والاستمتاع بمراحل نموه المختلفة.... و من يجد ان طفله تأخر فى اى مرحلة يجب سرعة عرضه على الطبيب لآنه قد يكون عرضه لنقص عذائى او نمو ذهنى

و لكم تحياتى
مامى لأول مرة



الخميس، 25 ديسمبر 2014

قصة الأم الذكية


"كريستين بارنيت" .. أم عبقرية اختارت دخول التاريخ من أوسع أبوابه!!
حيث تجاهلت تمامًا ما قاله الخبراء عن ابنها جيكوب، وانصاعت لغرائزها الخاصة كأم، ومع مرور السنوات توصلت إلى نتائج مذهلة لتثبت أن "الجنة أحيانا توجد في عقول وقلوب الأمهات

فالأطباء أعلنوها صراحة أن "جيكوب" مصاب بمرض التوحد عندما كان في الثانية من عمره، وقالوا إنه لن يتمكن من الحديث طوال حياته.
إلا أن "بارنيت" قامت بتجربة برامج تربية خاصة، وطرق علاجية تهدف لمعالجة حدود قدراته.
وعندما قال لها المدرسون إنه لا يوجد أمل، تمردت واتخذت مسارها الخاص.

فبدلًا من التركيز على حدود قدرات جيكوب، قامت الأم الذكية بارنيت برعاية هواياته.... والآن جيكوب يبلغ من العمر 15 عامًا، وفي طريقه للحصول على جائزة نوبل لعمله في مجال الفيزياء النظرية.

تقول بارنيت: "كان ابنى يحب السلوكيات المتكررة، كان يلعب بالكوب وينظر إلى الضوء، ويقوم بعكس الضوء على الحائط لساعات متواصلة، وبدلًا من أخذه بعيدًا كنت أعطيه 50 كوبًا ممتلئة بالمياه على مستويات مختلفة وأجعله يستكشف.. كنت أحيطه بكل ما يحبه.“

وتضيف: "كلما مارست هذا الأمر كلما ازداد نجاح الموضوع.. وفي إحدى الليالي تحدث جيكوب.. كان كالموسيقى لأن الجميع قالوا إن هذا أمر مستحيل الحدوث.“

والآن يدرس جيكوب الفيزياء النظرية ومعدل ذكائه أعلى من آينشتاين. وتحكي بارنيت قصتها التي لا تصدق في كتابها
"The Spark: A Mother's Story of Nurturing, Genius, and Autism”

القصة دي كانت من أكتر القصص تأثيرا في حياة كل واحد فينا في 2014 



الاثنين، 22 ديسمبر 2014

examen de francais pour douzieme امتحان اللغة الفرنسية لكى جى2

الصور التالية لتحديد ماهو فوق و ما هو تحت و ما هو امام و ما هو خلف
و الصور التالية  فى الاختبار  كى يحد الطفل منها اسم كل حاسة و  ما الفائدة من تلك الحواس

coloree ce qui est en haut - en bas - devant - derriere









اما عن باقى الامتحان من حيث اكمال الكلمات بالحروف الناقصة ،
او البحث عن كلمة تبدأ بالحروف التالية
S
a
b
c

للحصول على الامتحان كامل  اضغط على هذا الليينك
https://www.mediafire.com/?pqxa8herst7uhwb



و لكم تحياتى
مامى لأول مرة

السبت، 20 ديسمبر 2014

الشعور بالذنب لدى الأطفال

تصاعد خلافات الزوجين أمام الطفل ينزعح احساس الأمان من الأطفال ، لكن ان يصل الأمر بمشاجرة الأب و الأم حول الطفل امام الطفل فهذا يخلق نوع من الشعور بالذنب عند الطفل نفسه تجاه أبويه و هذا يسبب التبول اللارادى أو السرقة أو الكذب

الشعور بالذنب لدى الأطفال - مامى لأول مرة


من علامات توتر علاقنا بأطفالنا ؟ و متى أخبر ابنى اننى سأتزوج بعد طلاقى من ابيه ؟



يمكنكم سماع هذا اللينك



اعراض تبدو غير طبيعية لدى الأطفال و لكنها طبيعية جدا منها : مص الأكل ، تقليد الطفل الأصغر فى عمل التواليت ، كيف نتخلص من سلوك ابناءنا السيئة ؟ الإهمال هو الحل ، و لعلاج اخطاء ابناك اضغط على هذا الرابط
http://youtu.be/7kzMsNcxbrA


و لكم تحياتى
مامى لأول مرة

الأربعاء، 10 ديسمبر 2014

متى يتكلم الرضيع النمو اللغوى للطفل

النمو اللغوى للطفل  - مامى لآول مرة - mamy1st

يتعجل الأهل فى سماع كلمات و مفردات طفلهم و بعضهم يذهب لطبيب تخاطب لأن الطفل تأخر فى الكلام ... و ان كان الطبيب صاحب ضمير فسيخبرهم بحقيقة وضع طفله اما ان كان كل همه جمع المال فحسب فيتظاهر بان الطفل مريض حقا

و حتى لا تقع هذه الأسرة احضرنا لكم خريطة نطق الطفل و النمو اللغوى عند الرضيع

فى عمر ست شهور :
- يتنوع بكاء الرضيع لا يكون على نفس الشكل و لا بنفس النغمة ، فالجوع له صوت ، و الألم له نبرة و البلل ده  صوت و الضيق و الملل صوت آخر
- يلتفت الى مصدر الصوت
- يبدأ يناغى اى يصر صوتا كله غغغغغغغغغ
- يبدا بنطق كلمة بابا ... و البنات قد تقول بابا و ماما

لغة الطفل فى عمر سنة :

- يقول كلمة من حرفين مثل نانا - إيى يىيى - دادا - بيبى -- تاتا - بابا - ماما
- يفهم معنى بعض الكلمات و بعض الأوامر
- يعرف اسماء بعض الأشياء التى يستخدمها
- يقلد الكلام او على الأقل مخرجها الصوتى
- ينفذ الأوامر


 مفردات الطفل فى عمر سنة و النص :

- يقول جملة مكونة من كلمتين مثل - عايز أكل - بطنى بتوجعنى - عايز حمام
- يعرف اسماء كعظم كل الأشياء



 الطفل فى عمر سنتين  :
- يستمع الى القصص و يحبها
- ينطق جمل مكونة من ثلاث جمل
- من مفرداته المكررة " أنا " و أين
- يعشق مشاهدة الصور و تصفح القصص الملونة


الطفل فى عمر ثلاث سنوات :
- يستوعب الأوامر و من الممكن ان ينفذ أمرين معا
- ينفذ الجملة المركبة من أمرين
- يمكنه اقامة حوار مع الأشخاص المعتاد عليهم
- ينطق جمل من أربع او ست كلمات


الطفل فى سن أربع سنوات :
- ينطق معظم الكلمات
- ينطق كل الحروف
- يستطيع العد

و لكم تحياتى
مامى لأول مرة

الأحد، 7 ديسمبر 2014

التعامل مع المراهق فيما يخص الحب و العشق

التعامل مع المراهق فيما يخص الحب و العشق  -  مامى لأول مرة - 

يمر المراهق بالكثير من التغيرات الفسيولوجية و النفسية التى تجعله مرهف الحس و المشاعر لذلك يحتاج إلى معاملة خاصة فى هذه المرحلة العمرية :

- يحتاج لكثير من الرفق و اللين طوال الوقت
- كما يحتاج للحسم الشددي فى حالة الخطأ
- لا يجب معاقبته و لكن شرح له ابعاد الخطأ الذى وقع فيه


فيما يخص الحب و العشق :
لابد ان نعرف ان المراهق فى هذا السن يستكشف جسمه بشكل مختلف ... كما ان جسمه يورد علفيه متغيرات كثيرة تكون سبب فى تقلب مزاجه .. ففى هذه الحالة تولد لديه الحاجة لقدر كبير من الحنان و المحبة ... فان لم يجد هذا الحب من والديه خرج ليطلبه 
فى الخارج و قد يتنوع هذا الخارج عن الأسرة 

و قد يجد هذا  ضالته عند : 
- صديق 
- صديقة 
- رجل كبير
- سيدة مسنة

و  أن تركنا ابننا ليعوضه غيرنا عن احتاجه من الحب فربما يكون هذا الغير  ليس امين و يستخل ابننا فى أمور عدة تتلف أخلاقهو تسفد شخصية 

الواجب على الأهل فى هذا السن الخطر :
- احتواء الطفل 
- مساعدته فى التعرف على أسباب و ابعاد التغيرات الفيسيولوجية التى تحدث له 
- كما يجب مراقبة الطفل فى هذا السن بشكل لا يزعجه و لا يشعره بالتضيق على تصرفاته

ما يجب متابعته فى حياة الصغير :

- موبيله
- حسابه على الانترنت
- اصدقاءه  و سلةكهم و علاقتهم باهاليهم
- المستوى الاجتماعى لأصدقاءه
- ما يشاهد و ما يقرأ
- المفردات التى تتكرر على لسانه ما طبيعتها


و لكم تحياتى 
مامى لأول مرة


midlle ad