الاثنين، 5 مايو 2014

لو الصفرا مستمرة مع الرضيع - اقرؤا هذا الموضوع

انا بنتى عمرها اربعين يوم دلوقتى .. جتلها الصفرا فى اليوم الخامس من الولادة .. و للاسف الصفرا لسة موجودة معاها لغاية دلوقتى ... مع انى عملتلها تحليل الصفرا بعد الولادة بعشرين يوم ؛ فكانت النسبة خمستاشر ... دخلت الحضانة عشان نقدر ننزل الصفرا ... و بعد 24 ساعة خرجت من الحضانة و مافيش اى اثر للصفرا .. و كان التحليل وقت عشرة ... لكن تانى يوم الصفرا عليا تانى ، و على فكرة هى كانت بتآخد لبن صناعى فى الحضانة ... و الصفرا باينة على جلدها و على وشها و على عنيها

الاجابة :



الصفرا الفسيولوجية هى اللى بتظهر من اليوم التانى من الولادة و تنزل مع اليوم الخامس بالرضاعة و بالاعشاب ... لكن الحالة هنا مختلفة .. فظهور الصفرا من اليوم الخامس يعنى ان لبن الأم هو السبب ، فهناك بعض انواع من لبن الأم يتسبب فى عمل تكسير فى خلايا الرضيع

فهذه الطفلة لم تكن بحاجة لتدخل الحضانة ... كل اللى هى محتجاه انها توقف اللبن ، توقفه لمدة 48 ساعة ... و بكدة تنزل الصفرا .. و عشان الأم ما تتعبش من تكوين اللبن فى صدرها يبقى تشفط اللبن و ترميه و تعطى رضيعتها لبن صناعى ، و بكدة تنزل الصفرا ، اول ما تنزل نرضع طبيعى ، صحيح الصفرا ح تعلى  درجة واحدة بس ، لكن مش ح توصل لخمستاشر ابدا


لكن الغلطة اللى عملتها هذه الام انها مستمرة فى الرضاعة الطبيعية دون توقف
... و لازم نعرف ان الصفرا الفسيولوجيةاو الصفرا الناتجة عن لبن الام بتروح خلال من 8 – 12 اسبوع يعنى فى الشهر التانى او التالت ... و اول حاجة الصفرا تروح من الجلد و بعدين تروح من العين

ارجوكى ما تقلقيش من استمرار الصفرا ، لكن لازم نقيسها و نطمن لو لقتيها عالية وقفى الرضاعة الطبيعية 48 ساعة عشان تنزل و طبعا ترضى صناعى لمدة يومين و بعدها نرضع طبيعى

المهم نتابع و نقيس الصفرا عشان نعرف بتنزل ولا لأ
و لكم تحياتى

مامى لأول مرة