top ad

السبت، 29 أكتوبر 2011

احتياجات الطفل من الحنان - حسب العمر و السن



الى كل أم  أو كل أب تقدم لكم "مامى لأول مرة " موضوع له طبيعة خاصة ، و اهميته من نفس أهمية الحليب للأطفال .. و درجة احتياج الطفل له  من نفس درجة أهمية لعب الأطفال للطفل أو الرضيع 


الموضوع هو :
احتياج الطفل للحنان .. و خاصة الدفئ .. الموضوع مش اكل و شرب و لعب و ألعاب ... الطفل زى ما هو محتاج كل الحاجات دى محتاج كمان للحب و الحنان و الاحضان و البوس .. و زى ما كل الاطباء بتأكد على اهمية الرضاعة الطبيعية فى تنشئة طفل سليم نفسيا ، " مدونة مامى لأول مرة " بتأكد كمان على توفير جرعة حنان يومية للطفل ..  فان كان سر الرضاعة يرجع إلى التركيب الربانى  للمواد الغذائية فى حليب الأم ،  لكن كمان الرضاعة الطبيعية تنشئ طفل سليم نفسيا بسبب  ضم الأم لرضيعها اثناء الرضاعة
                         
احتياجات الطفل :
الوزن المثالى للطفل مش لازم يكون الهدف الوحيد لكل أم و كل أب ، لكن كمان لازم يكون من أهدافهم خلق جيل قادر على صنع نهضة  .. و عشان كدة احنا مطلوب مننا عده انماط فى التعامل مع الأطفال مهما كان دورنا أو مكاننا سواء كنتى أم ، أو كنت أب - كنت جد أو  جدة - مدرس أو مدرسة .. إلخ
المهم هدفنا الرئيسى يكون اننا نطلع الطفل رجل عظيم وح تبقى الطفلة نواة لنهضة جديدة و متجددة فى بلدنا 


احتياجات  الطفل من الحنان من سن زيرو و حتى 3 سنين :
يحتاج الرضيع إلى قدر كبير من الحنان لأنه بيفتقد بشدة دفئ الرحم إللى كان عايش فيه و بينزعج بشدة من الضوضاء و الإضاءة و ده بيسبب خوف الرضيع و لا علاج لهذا الخوف غير الحنان و الدفئ و القبلات و الأحضان و البوس .. ففى هذه المرحلة لازم أغمر الطفل بكل اشكال حنان و اديله حب و عطف و رقة على قد ما نقدر 

و لو لقيتوا الحكاية فى بعض الأحيان بتحتاج لمجهود عصبى او نفسى تأكدوا ان جرعة الحنان إللى بتمدوا بيها الطفل ح ترجعلكم فى صور مختلفة ، و قد قال نبى لله عندما علم بخبر الأم التى ضحت بطعامها من أجل طفلاتها : " بان الله قد رحمها برحمتها لصبييها "

شوفى يا كل أم كام مره كان صغيرك جعان وفضلتيه على نفسك ان شاء الله رحمة ربنا هتغمرك .. و انت يا ايها الأب شوف كام مرة كنت محتاج تشترى بدلة او حاجة تخصك و قررت توفر فلوسها لإبنك الصغير ، تأكد ان ربنا ح يعوضك ، فى الدنيا و ف الآخرة

احتياج الأطفال " من سن 3-6 سنوات " :
فى المرحله دى الطفل الولد يختلف عن الطفلة .. فالولد عايز يتعرف على باباه اكتر و يقلد تصرفاته إللى هى مفتاح الرجولة .. وهنا بيجى دور الام اللى لازم تقوى الصلة بين الطفل و الاب خاصة لو الأب كان مشغول و مش واخد باله من طفله ، و مش عارف ان ابنه فى المرحلة دى محتاج ان الأب يقرب منه و يلعب معاه الألعاب المناسبة للذكور ...ف 
يا كل ام اوعى تغضبى وتمنعى وجود ارتباط خاص بين الإبن و ابيه 


أما البنات فى المرحلة دى ، فسلوكها مختلف عن الصبيان .. فالبنت تصور كل تصرفات الأم و تقلدها بالحرف .. ف عزيزتى الأم قبل ما تلومى بنتك على أى تصرف تعمله ارجوكى خلى بالك من تصرفاتك انتى .. و ده من اهم أركان الحنان و المحبة إللى ممكن الأم تقوم بيها تجاه بنتها ... فلا يجب ان تعاقبها على تصرف الأم بتعمله
 .. فمن علامات حنان الأم فى هذه المرحلة انها تعرف صغيرها على ابيه وتربطهما ببعض  .. و العلاقة بين الإب و الأب تفسر  قول سيدنا ابراهيم : " يا بنى انى ارى انى اذبحك " و جاء رد الإبن " يا ابت افعل ما تؤمر " ..  ولما قال لإبنه : " ان الله امرنى ان ابنى له بيتا .. اتعيننى؟؟ " .. فرد عليه " واعينك "
هنا يظهر دورالام التى ساعدت فى ربط الابن بابوه

احتياجات الطفل من سن6 - 10سنوات :
دى مرحله من أهم المراحل .. لأننا بنربى فيها القيم و الآخلاق .. فبعد ان تنتهى مرحلة الرضاعة و حنانها .. و مرحلة اللعب بكل اشكالها .. تبدأ المرحلة دى .. و فيها ازرع  كل القيم إللى عايزة أنشئ عليها طفلى .. ده مش معناه ان المرحلتين إللى قبل كدة مش مهمين فى التربية .. على العكس فكل مرحلة مهمة جدا فى التربية ..  لكن أهمية المراحل السابقة تختصر فى بناء جسر من الثقة بين المربى و الطفل ، و المربى هنا أقصد بيه الأم ، الأب ، الجد ، الجدة ، المدرس أو المدرسة



فى المرحلة دى نحكى قصص عن الصدق والامانه والاخلاق والادب وحب الله والصلاه وفن التعامل مع الناس والرحمه ، و البر بالوالدين و العطف على الحيوان ، و مراعاة الجار ، و حب الوطن و الإنتماء

الأدوات المستخدمة فى هذه المرحلة :
  1.  حدوتة قبل النوم
  2. العرايس
  3. القصص المصورة
  4. مشاهد بنشوفها فى التلفزيون و نعلق عليها - نقول الصح صح ليه ، و الغلط غلط ليه 
  5. اسمع حكاياتى طفلى او طفلتى عن المدرسة و أسأله و اسيبه يجاوب و من خلال اجاباته ح اعرف القيمة الأخلاقية اللى لازم اوصلها للصغير فى تلك المرحلبة
ملاحظة : إللى ح نزرعه فى المرحلة دى ح يعيش مع الطفل مدى الحياة ، حتى لو اعتقدنا  ان الحياة غيرت اولادنا  ، فتأكدوا ان هذا التغيير  ظاهرى فقط او لحظى  ، و سرعان ما سيزول و ح يرجع  الصغير لأصله ، و إللى احنا بنميه دلوقتى هى أصله اللى ح يرجعله ... لكن لو سبناه من غير ما نزرع أى قيم فى المرحلة دى ، ابنى ح يتوه و مش ح يلاقى حاجة يرجعلها و ح يفضل تايه مدى الحياة .

المرحله الرابعه والاخيره " فترة المراهقة ":
رغم ان هذه المرحلة ليست موضوع مدونة " مامى لأول مرة " .. لكن سنتحدث عنه ، لأن النجاح فى المراحل السابقة يجعل من فترة المراهقة مرحلة سلام و آمان .. مرحلة بناء فى شخصية الطفل و ليست مرحلة هدم كما هو الحال فى أسر كثيرة


عشان كدة ح أقولكم  المشاكل إللى بيواجها البعض فى فترة المراهقة و سببها :
  • المراهق يفر من أهله .. بسب فقد الحوار بينه و بين أهله فى سن الطفولة ، و الأم أو الأب ما كانوش بيلعبوا مع الطفل و يحكوله القصص .. و عشان ما نوصلش للمشكلة دى  لازم الأم و الأب يغمروا طفلهم  بالحب و الحنان  ، عشان فى سن المراهقة يجرى عليهم و ما يجريش منهم 
حنان الأهل فى سن المراهقة :

صوت الام و الاب فى الفترة دى يبقى صوت الحكمة ، يعنى  تبقى  ايد بتحضن وايد بتدفع للامام .. يبقى فى عاطفة و حنان و كمان فى حسم يدفع فى طريق النجاح .. باختصار العاطفة تبقى إيجابية فى المرحلة دى  على عكس المراحل السابقة فى الطفوله حيث لا تقترن العاطفة  بالقلق و الخوف فى هذه المرحلة

فحنان الأم فى هذه المرحلة يكاد يشبه حنان الصديق .. يعنى الحوار يبقى بالمنطق و العقل و ليس بالامر و الطاعة  ..ايد بتطبطب وايد بتدفع للامام عين كلها حنيه وعين كلها قوة .. الفاظنا فى هذه الفترة تبقى كلها تشجيع مش تعنيف و لا تقليل .. بالشكل ده طفلك هيحبك ويرتبط بيكى ارتباط غير عادى
لو عملتى كده فى المرحله دى..هتبقى الام المثاليه وهتبقى اعظم ام فى نظر ابنك أوبنتك, احنا مش عايزين حنان ممزوج بخوف وقلق .. لكن عايزين نعمل نهضه للامه... عايزين حنان ممزوج بقوه
احنا مش عايزين حضن فيه قلق وخوف احنا عايزين حضن يدى طاقه ايجابيه وقوة و ارادة ، حضن قادر على صنع الرجال و بناء النهضة .. حضن يجعل الشاب يفتخر بتاريخه و يخطط من أجل مستقبله


و لكم تحياتى
مامى لأول مرة

الأحد، 23 أكتوبر 2011

الولادة القيصرية و الرضاعة الطبيعية



وصلنا سؤال بيقول :

ابنى عنده 3 شهور ومرضعش طبيعى خالص كل اعتماده على اللبن الصناعى , انا ولدة قيصرية ومكانش فيه لبن خالص وظهر اللبن عندى بعد اسبوع بس كان قليل جدا وحاولت ارضعه لكن كان بيرفض ويصرخ قلت يمكن عشان الحلمة صغيرة فجيبت حلمة من الصيدلية لكن مفيش فايدة , المهم انه بدأ الايام دى يشد اى واحدة تشيله طلبا للرضاعة الطبيعية وانا اللبن عندى تقريبا مفيش اعمل ايه .. هل ممكن ارجع اللبن عندى تانى؟ وهل ممكن احل مشكلة الحلمة؟ يعنى هل فيه نوع كويس ممكن اشتريه وميرفضوش .. انا جربت الكريم وتمارين الحلمة ومفيش فايدة وجبت جهاز شيكو لشفط اللبن عشان يشربه لكن كل ساعة من الشفط المتواصل الاقى اقل من 20 ملى لبن بس يعنى اللبن ضعيف جدا

الاجابة :

طبيعى ان اللبن يبقى قليل فى اول اسبوع و خصوصا للأم الوالدة قيصرية ، لأنها ما بتقدرش تآخد ابنها على صدرها من اول ساعة بعد الولادة .. لكن لما بتفوق من البنج و تقدر تقعد بتبدأ ترضع صغيرها و اللبن بيجرى فى القنوات اللبنية .. لكن التأخير لمدة تلت شهور ممكن يتسبب فى جفاف القنوات اللبنية بشكل تام .. لكن انتى بتقولى ان تشفيط اللبن بينزل 20 مللى و ده معناه ان القنوات اللبنية لسة ما نشفتش

عشان كدة  دعينا نجرب ، يمكن ربنا يساعدك و اللبن يزيد فى القنوات اللبنية و تقدرى تشبعى ابنك .. و أنصحك تتبعى الخطوات الآتية :

1.   أول حاجة عشان اللبن يزيد لازم تنامى كويس ؛ على الأقل ست ساعات و ساعة قيلولة ، أو تمن ساعات من غير قيلولة
2.    تشربى تلاتة لتر ماية و عصاير ، و يفضل عصير البرتقال أو اللمون لأنها بتساعد على زيادة اللبن بكثرة
3.    الحلبة هايلة لإدرار اللبن .. اشربيها تلت مرات فى اليوم و لو تقدرى تحليها بالعسل ح يبقى مفيد جدا فى زيادة اللبن
4.    فى أعشاب فى الصيدلاية لإدرار اللبن مفيدة و مافيهاش ضرر على البىبى انصحك تجربيها لأنى ما بأفضلش الأدوية لأن لها أثار جانبية
5.    أنصحك تكلى سمك مشوى على قد ما تقدرى ، لأنه بيزود اللبن كويس
6.    لو ابنك ما بيعانيش من غازات يعنى ما بيعيطش بسبب غازات فى المعدة انصحك تآكلى سلطة زبادى و تحطى فيها توم ، التوم بيزود اللبن جدا جدا ، لكن لو ابنك عنده غازات او ما بيتكرعش كويس بلاش أى أكل فيه توم خالص .




لحل مشكلة الحلمة :

لما تستحمى اغسليها كويس بالصابون و الماية السخنة و تأكدى ان الفتحات مش مسدودة .. و قبل كل رضعة انصحك تبللى قطنة بماية دافية أقرب للسخنة – بشرط ما تلسعكيش – و تمسحى بيها الحلمة عشان نضمن ان الفتحات سالكة و مش مسدودة ، لأن اللبن لما بينشف فى الحلمة بيتسبب فى قفل فتحاتها

و لو الحلمة صغيرة ، كويس اوى انك اشتريتى حلمة من الصيدلية ، عشان البىبى يقدر يمسك منها كويس

و عن سؤالك بخصوص نوع جيد من الحلمات ، أحب أقولك ان ابنك مش بيرفض الحلمة ، هو بيبقى جعان و صدرك مافيهوش لبن فبيرفضه .. فمهما غيرتى الحلمة ح تلاقى ابنك برضه بيرفضها

و بخصوص ان ابنك بيشد أى واحدة تشيله :

ابنك يبحث عن الحنان المرتبط بضم الأم اثناء الرضاعة ، عشان كدة من فضلك ضمى ابنك و قبليه و إلعبي معاه بشكل أكبر من أى أم تانية .. و لا تنتظرى حتى ينزل اللبن و ترضيعه ، اعتبرى موضوع الرضاعة و اللبن أمر ، و أمر ضم طفلك إلى صدرك أمر تانى مستقل بذاته .

و اديله صدرك فى أى وقت يطلبه ، لأنه فى الحالة ده الصدر مش مصدر طعام بس ده كمان مصدر حنان و آمان و دفئ
و لكم تحياتى
مامى لأول مرة



أم لأول مرة تتعلم الطريقة الصحيحة لتغير الحفاض



كلامنا النهاردة للأم الجديدة ... الأم التى تتعامل مع الرضيع لأول مرة ...  أم  لم  تكتسب اى خبرة مع أخوتها الصغار أو  أطفال أقاربها ... و رغم ان تغير الحفاض للطفل الرضيع امر بسيط  لكنه يحتاج إلى إتقان لحماية الرضيع من الإلتهابات و الفطريات المسببة لأى تسلخ .. كما ان فن تغير الحفاض يضمن عدم تعرض الرضيع للبرد بسبب الحفاض

مشاكل عدم اتقان تغيير الحفاض :
·       اولهما مشكلة التسرّب
·       الثانية تدلّي الجوانب مع امتلاء الحفاض.
·       المشكلة الثالثة تظهر لو كنتى ام  الولد ، غالبا ح تخدى "دشّ" طاهر من البىبى من وقت للتانى.

مستلزمات تغير الحفاض :

1.   يراعى ان تكون يد من يغير الحفاض للرضيع نظيفة و جافة
2.   نحمل الرضيع الى مكان دافئ ونظيف وجاف ، و يكون سطحه ناعم ودافئ.
3.   نفرد مشمع مخصص لتغير حفاض الاطفال تحت الرضيع ، عشان لو عمل بى بى  - تبول - ما يسببش أى مشكلة فى مكان التغير سواء كان سرير او كنبة او حتى مائدة تغيير الحفاض
4.   نخصص فوطة نظيفة نستخدمها لتجفيف الطفل من الماء
5.   إذا كنت تستعملين الحفاضات الجاهزة، فإنك تحتاجين إلى حفاض نظيف وكريم مخصص لحماية الرضيع من التسلخات

خطوات تغيير الحفاض :
الطريقة الأولى : إذا كان الحفاض متسخ بالبراز

·       احملى الرضيع الى حوض الحمام
·       الصقى الرضيع إلى جانبك الشمال و انتى شيلاه بإيدك الشمال
·       فكى لسان الحفاض بإيدك اليمين
·       افتحى حنفية الماء السخن و اضبطى حرارة الماء وانتظرى حتى تكون الماية فاترة ، اوعى تكون الماية سخنة لأنها ممكن تلهب الرضيع
·       إبدئى بحمل الماء بكف إيدك من الحنفية إلى جسم الرضيع
·       مررى إيدى بالماء الفاتر على جسم الرضيع حتى ينظف تماما
·       لفى الرضيع بالفوطة و احمليه إلى مكان التغيير
·       نشفيه كويس جدا
·       ادهنى الكريم المخصص للحفاض
·       البسيه الحفاض
·       ثم البسيه باقى ملابسه
·       و ضميه و قبليه حتى يحب عملية تغير الحفاض



الطريقة الثانية : إذا كان الحفاض به بول فقط
1.   نيمى الرضيع على السرير او الكنبو او مكان تغير الحفاض
2.   فكّي  لسان الحفاض و ألصقيهما على اللسانين ذاتهما كي لا يلتصقا بجسم  الرضيع
3.   ارفعي ساقي طفلك الاثنتين ونظّفي مؤخرته
4.   قبل التغيير تكونى مجهزة علبة بلاستيك فيها ماء دافئى و قطعة قطن ، تمسحى للرضيع بالقطن المبلل بالماية الدافية
5.   شيلى الرضيع و ضعيه على فوطة نظيفة
6.   نشفيه كويس جدا
7.   ادهنى الكريم المخصص للحفاض
8.   البسيه الحفاض
9.   ثم البسيه باقى ملابسه
10.                    و ضميه و قبليه حتى يحب عملية تغير الحفاض


إذا كان ابنك - ولد –

دايما تغطي عضو الطفل التناسلي بقطعة قماش نظيفة أو الحفاض النظيف لتجنّب "الدشّ" الدافئ إللى ابنك ح يكون مصر يغرقك بيه كل مرة تغيريله


اتجاه تنظيف الرضيع :

إذا كان الرضيع طفلة – انثى- تكون حركة تنظيف البول او البراز من الأمام إلى الخلف ، لمنع وصول أى اتساخ للمنطقة الأمامية عند البنت ، لأنها ممكن تسبب لها مشاكل كتير ... فالتنظيف من الأمام إلى الخلف يضمن ابتعاد أى ملوثات عن منطقة المهبل و تقلل احتمالات وصول البكتيريا إلى مهبل طفلتك  ، و نبعد كمان عن التهابات.

إذا كان الرضيع ذكر – نظفى برفق اسفل العضو حتى نضمن نظافة تامة و عدم تراكم للبكتيريا - استعملي قطعة من القطن المبلل كي تنظّفي  صغيرك من الأمام بشكل كامل وتام

طريقة تلبيس الحفاض :
1.   بعد تنظيف و تنشيف المؤخرة جيدا
2.   ارفعي مؤخرة طفلك عن طريق رفع قدمى الرضيع لأعلى برفق و رقة و حنان
3.   يجب وضع النصف الأعلى من الحفاض النظيف و تحديدا الطرف الذي يحتوي على اللسانين ت نضعه تحت مؤخرة طفلك بينما يوضع النصف الأسفل من الحفاض بين ساقيه
4.   نفتح ساقى الرضيع برفق و حنان و بدرجة تسمح لنا بفرد الحفاض بشكل كامل لكن دون ان نزعج الرضيع او نؤلمه
5.    اشبكي الحفاض من الجانبين مع اللاصق الموجود فيهما
6.   تأكدي من أن درجة شد الحفاض مريحة ومش مشدودة بشكل يقرص على جسم الطفل و يتسبب فى بكاءه .
7.   ألبسي طفلك ثيابه
8.   اغسلي إيدك كويس جدا بالماية و الصابون بعد كل مرة تغيرى فيها الحفاض عشان ما يتنقلش أى ميكروبات لأكل الصغير او أدواته

ملحوظة : تلقى الحفاض المتسخ بسلة القمامة ثم تغسلى يديك ، مش العكس
تلبيس الحفاض قبل سقوط الحبل السرى :

- لا تغطى الحبل السرّي بالحفاض
-        ضعي العضو التناسلي لدى المولود الذكر إلى أسفل بحيث يقلّ تسرّب البلل 


و  لكم تحياتى
مامى لأول مرة 
http://la3ya3nyno.blogspot.com/

الثلاثاء، 18 أكتوبر 2011

متابعة وزن الطفل أمر ضرورى لأنه مؤشر للنمو الصحيح



طفلى عمره 27 شهر و وزنه 19 كغ اما الطول 91 سم
اريد معرفة هل هو بدي ام لا
كيف اعمل له ريجيم
طريقة اكله حليب في الصباح-ثم علي 10 صباحا فاكهة او ياغورت
في منتصف النهار الفطور مع قطعة جبن +ياغورت
ينام في القيلولة عندما ينهض يشرب الحانتى متأكدليب
في المساء اكله غير منتضم لكن لايحب الحلويات كثيرا
احيانا يطلب الحليب في الليل 
كثير الحركة و الكلام و اللعب
ارجو ارسال الاجابة من فضلكم

الإجابة :
انتى متأكدة من الأرقام إللى انتى كتباها ؟؟؟
لأأنى ملاحظة وزن ابنك مالوش علاقه بسنه مالوش علاقة بطوله 
لأن وزن الطفل إللى عمره 24 شهر وزنه بيتراوح ما بين 10.5 كيلو و 14 كيلو ، و طوله ما بين 82 سنتمى و 93 سنتيمتر

و الطفل إللى عمره 30 شهر يعنى سنتين و نص وزنه يتراوح ما بين 12 إلا ربع و 16 كيلو .. و طوله ما بين 87 و 99 سنتمير

و زى ما هو واضح قدام حضرتك ان وزن الـ 19 كيلو ده وزن طفل أكبر من سنه .. و تحديدا ده وزن طفل عمره اربع سنين لكن وقتها لازم يكون طوله 110 سنتى

اولا انصحك انك تعرضى ابنك على دكتور غدد عشان يأكدلك ان ابنك ينمو بشكل صحيح و الغدد ليس لها دخل بهذا الوزن الزائد ، لأن من شروط النمو الصحيح ان يكون طول الطفل متناسب مع وزنه ... فإذا طمئنك الطبيب على صحة ابنك و غدده ، نتجه لعمل جدول للتغذية الصحية

انصحك انك تعملى جدول أكل لإبنك تأكليه كل أربع ساعات ، ثلاث وجبات أساسية و بينهم 2 خفيفة

فى الصباح يأكل : بسكوت و كوب لبن وة بعد أربع ساعات قطعة جبنة نستو ، ثم الغذاء أرز و خضار و لحم ، و بعد أربع ساعات كوب عصير.. فى المساء علبة زبادى

بلاش لبن طول اليوم لأنه به كمية هائلة من الدهون ، و لو حب يشرب لبن اديله ماية ، عصير ، أعشاب زى اليانسون ، تليو ، لكن بلاش لبن على طول و ياغورت على طول

جربى و بلغينى بالتطورات

و لكم تحياتى
مامى لأول مرة

عمره 8 شهور و يعانى من التنفس اثناء النوم



طفلي في الشهر الثامن اليوم الاول منه ومنذ ولادته يعاني من الشخير اثناء النوم وعند الاستيقاظ ايضا تنفسه بصوت عرضته على اطباء اطفال واختصاص انف واذن وحنجرة البعض قالوا زكام والبعض قالوا تحسس ولم تنفع معه القطرات للانف ولا الفنستيل ويسعل سعال خفيف وكانه يمثل ولكن الطفل لايكذب ولكن منظره وكانه كذلك  وشكله يدل على انه لايعاني شيء فهو ماشاءالله وزنه يجعله كانه اكبر من عمره ولكنه يصحو في الصباح ووجهه اصفر وعينيه منتفختين ارجوكم فسروا لي حالته علما اني الشهر الماضي فقط اطعمته سيريلاك وفواكه  ورضاعته طبيعية لانه رفض الصناعي مع الشك

الإجابة :

كحة الأطفال تختلف حسب نوعها و عشان كدة ح أطول عليكى شوية فى الشرح :
غالبا الطفل إللى بيزرق فى آخر الرضاعة بيكون عنده إلتهاب شعبى فيروسى ، و ده بيكون بدأ ببرد عادى بعدين نزل على الشعب اللى بتوصل الهوا لصدر الطفل ، فلما الشعب قفلت بدأ الطفل ينهج ، و ده ليه ؟!!!
لأن الهوا داخل فى مجرى ضيق ، و عشان كدة بنحس ان الطفل بينهج ، و الحكاية بتزيد لما يرضع عشان كدة بيزرق مع الرضاعة ، و نسمع صوت تزيق بترن فى ضهره .


الإسعافات الأولية للإلتهاب الشعبى الفيروسى:
ارجوكم أى حد يحس بالأعراض السابقة دى فى ابنه و يكون عمره أقل من سنة يجرى بيه على الدكتور . . لأن الطفل بيكون محتاج حاجة اسمها " موسع للشعب" ، و المضادات الحيوية غالبا مالهاش دور كبير فى الموضوع النزلة الشعبية الفيروسية
ــ ضرورى نرضع الطفل حتى لو ما بيكملش رضعته ، لكن لازم نفضل مستمرين معاه لحد ما يخف
ــ ما تقلاقوش الدور ده بيآخد ما بين أربع أو خمس أيام لحد ما الطفل يتحسن
ــ الرضيع لو بيزرق مع الرضاعة ؛أو ما بيقدرش يرضع خالص ؛ ضرورى يقعد فى المستشفى ، لكن لو بيآخد نص رضعته يبقى يكمل علاج فى البيت


انواع الكحة :كحة الأطفال تنتشر بشدة هذه الأيام ، و مافيش حاجة اسمها ابنى بيجله نزلات برد متكررة ده مابيبقاش برد ، دى بتبقى حساسية انف خصوصا لو الرضيع عمره اقل من سنة . . عشان كدة الكحة نوعين :
ــ كحة بسبب البرد
ــ كحة بسبب حساسية الأنف


الفرق بين كحة البرد و حساسية الصدر : 
ــ كحة البرد بتظهر بعد ظهور البرد بعدة ايام ، و بتكون بسبب زيادة البرد على الرضيعــ أما حساسية الصدر ف مظهرها الأساسى " الكحة " . . و عشان نتأكد انها كحة من الحساسية ؛ ح نلاقى الرضيع بيكح و هو نايم ، و هو صاحى ، يضحك يكح ، يعيط يكح ، يلعب يكح
ــ الشتا بالنسبة للرضيع المصاب بحاسسية الأنف اوحش من الصيف و الليل اوحش من النهار
ــ علاج الأطفال المصابة يتلخص فى استخدام موسعات للشعب



ــ و لو كانت الكحة بصورة متكررة و مستمرة و الرضيع خد موسعات للشعب أكتر من تلت أربع مرات فى الأسبوع و ماجبتش نتيجة فى الحالة دى نديله " علاج وقائى ". . و العلاج الوقائى بيكون أقراص او بخاخة . . البخاخة تستخدم بشكل مؤقت حتى يتم علاج الطفل و ستستمر معه كل شتاء حتى يزول الأمر بالوقت . . و العلاج الوقائى يساعد الطفل على الحياة بشكل طبيعى ، و الحساسية دى ح تروح بالوقت


أعراض حساسية الأنف :
ــ اسمها حمى القش لأنها بتسبب درجة حرارة الرضيع ارتفاع طفيف
ــ و يبدأ الطفل الفرك فى انفه و شد أذنه
ــ الكحة تكون مستمرة و تزيد مع أى مجهود
ــ الطفل يتنفس من فمه ، فتسبب الإلتهابات المتكررة فى الحلق
ــ و لو كشف الدكتور بالسماعة ما بيلاقيش حاجة ، و كمان الحساسية ما بتظهرش فى الأشعة


من اسباب الحساسية عند الأطفال :ــ وضع لعب فرو إلى جوار الأطفال فى السرير ، فيتجمع عليها تراب ، الطفل يستنشقه
ــ مسح وش الطفل بمناديل معطرة
ــ تقبيل الأطفال ينقلهم عدو من كبير لا يظهر عليه فيروس البرد
ــ التدخين فى المنزل
ــ عدم تغير ملاءة السرير و المخدات باستمرار
ــ ملوثات الجو و خاصة الكيميائية زى اقراص للنموس ، و المبيدات الحشرية ، و البرفانات


و الحل : بلاش تدخين ، غير كيس المخدة كل يوم عشان نتخلص من كم الأتربة إللى اتجمعت عليه . . لو حاطيت اقراص للنموس بلاش تكون جمب البيبى ، ابعدوا اولادكم عن الدخان و التراب

و لكم تحياتى
مامى لأول مرة


أقدام الرضيع فى عمر السبع شهور



برجاء افادتى حيث ان لدى رضيعة عمرها 7 اشهر لا تستطيع الثبات على رجليها وعندما احاول ان ارفعها لتقف فانها تخاف ان تمد رجليها وتظل رفعاهم لاعلى  مع العلم بان لديها القدرة على النهوض من النوم بمساعدتى  برفها من يديها لتكون فى وضع الجلوس وعند بكائها فانها تشد اعصابها بقوة وتكون ارجلها مفرودة
فهل احتاج لدكتور ام ان هذا طبيعى برجاء افادتى .
وشكرا

الإجابة :
طبيعى جدا ، ما تقلقيش و ما تخافيش عشان الحالة ما تتنقلش للبىبى ، لأنهم حساسين جدا و بيحسوا بأمهاتهم جدا .
انت كل إللى مطلوب منك تقعدى بنتك على الأرض المفروش عليها لحاف او أى حاجة طرية  و تسنديها بالشلت و حواليها اللعب الكاوتش من كل مكان ... و بنتك ح توطى عشان تآخد اللعبة و بكدة عمودها الفقرى يبقى أقوى و تقدر بنتك تزحف بشكل كويس و رجليها تقوى ، و طبعا الشلت او المخدات المحيطة بها ح تحميها من أى خبطة لو راحت شمال او يمين ...

ملاحظة : لازم تحطي طفلتك على الأرض عشان بنتك ح تزحف فجأة فما تلاقيهاش وقعت لو كنتى حطاها على السرير أو على أى حاجة عالية  .. و نصيحة تانية قعدى بنتك كل يوم ساعة فى الشمس بعد آدان العصر يعنى من الساعة اربعة عصرا عشان نضمن ان بنتك بتمتص فيامين دال كويس و الكالسيوم كويس و عضمها يقوى

و لك تحياتى
مامى لأول مرة

تحاليل الطفل كويسة لكن ما بيكبرش



ابنى عمره عام وخمسة أشهر يرفض الاكل من حوالى 3 أشهر بالرغم من انه فى السابق كان ياكل كل شى اعطيه وزنه 9 كيلو وطوله 76 سم والان اعتمد على اللبن pediasure 3 مرات فى اليوم عنده 4 أسنان فوق و2 تحت وطلع ضرسين تحت وهو نشيط وذكى يمشى بالمساعدة ولكنه لا يمشى بمفرده حتى الان . ماذا أفعل معه وعملت له تحاليل دم وبراز وكانت كويسة ووزنه عند الولادة كان 2750

الإجابة :
معاكى حق فى ملحوظتك ان ابنك ما بيآكلش ، لأن فى مشكلة فى  وزن ابنك ،  ف الطفل إللى عمره سنة و نص بيكون طوله  ما بين 77.5 سنتيمتر و إلى 88 سنتى .. و وزنه بيكون ما بين 10 كيلو و حتى 13.5 كيلو

فمن الواضح ان ابنك ما بيكلش فعلا و ممكن السبب يرجع  للتسنين ، و عشان كدة انصحك تستخدمى جيل الأسنان الخاص بالأطفال و موجود فى الصيدليات .. تانى حاجة من فضلك تعملى لإبنك تحليل إسمه "ألكلين فوسفاتيز"  و منه ح تعرفى ان كان ابنه عنده نقص كالسيوم ولا لأ ... لأن من المفروض ان ابنك يكون بيمشى او يكون بيطلع كل سنانه ما عدا الأنياب ، لكن الإتنين متأخرين يبقى احتمال يكون فى مشكلة فى الكالسيوم

انصحك تعملى تحاليل الكالسيوم و لو طلع فى نقص كالسيوم - بعد الشر- تروحى بالتحليل لدكتور أطفال كويس عشان يكتبلك على كمية الكالسيوم إللى ابنك محتاجها .

و أنصحك كمان تقعدى  ابنك فى الشمس من بعد الساعة اربعة عصرا و  لمدة ساعة او نص ساعة يوميا ... فهذه الساعة قادرة على علاج أى نقص فى الكالسيوم عند الأطفال بشرط اننا نكون بدأنها من عمر شهرين ، لكن لما الطفل بيكون أكبر من كدة الدكتور بيكتبله على شراب كالسيوم للمساعدة .. و بالنسبة لإبنك فهو محتاج للشمس و الكالسيوم  

 و لعلاج مشكلة الأكل حاولى تخلى الأكل لعبة ، زى لعبة "هم يا جمل "  أو لعبة " الطيارة عايزة تدخل المطار " و لازم الطفل يفتح بقه عشان الطيارة تدخل المطارة ... خدى ابنك النادى و أكليه و هو على المرجيحة
... شربى ابنك عصير ،  اديله فاكهة فى إيده يآكلها ، مش لازم كل الأكل يكون طبق و معلقة .. و بخصوص وجبات اللبن بتاعة ابنك حطى فيها بليلة أو  بسكويت .. حاولى تخلى اللبن مرتين فى اليوم و المرة التالتة بسكويت أو بليلة

و لك تحياتى
مامى لأول مرة

الخميس، 13 أكتوبر 2011

ألعاب طفل أكبر من سنتين




كلنا عارفين ان الأطفال فى سن السنتين بيبدؤا يكونوا شخصيتهم ، فلو قهرنا هذه الشخصية وكبتناها وحرمناها من التعبير عن نفسها ، ح يطلع ابنكم لا يقدم و لا يأخر زى ناس كتيرة منتشرة دلوقتى فى مجتماعتنا لا فائدة من وجودهم فى الحياة


لكن لو سبنا الطفل يكون شخصيته وينطلق و يعبر عنها ، فتاكدوا ان شخصيتهح تنموفى الاتجاه الصح ...وح نفتخر بيه فى كل مكان ، ومش احنا بس ، لكن البلد كلها 


و عشان نوصل للهدف ده ، ف كل إللى علينا اننا نوجه بالشكل الصحيح .... والتوجيه يكون فى الحاجات الغلط بشكل قاطع ، يعنى مش غلط عابر ، و الكلام ده على الاقل فى السنوات الاولى  ، و تأكدوا ان الطفل  ح يكون شخص له رؤية فى الحياة و صاحب فكر و منطق و ح يكون مبدع و مبتكر فى المجال إللى ح يختاره 


تقويم الطفل مش معناه انى أأقعد طول اليوم أحط علامة  غلط  على كل تصرف غير منضبط يقوم به الطفل و اعاقبه و اوبخه ... لأ ، لو عملنا كدة نبقى بندمر ابننا ... عشان كدة انصحكم انكم ما تعاتبوش الطفل غير مرة واحدة فى اليوم عشان يقدر يستوعب و يتعلم و ما يتحولش لكائن عمال يتعاقب و هو مش فاهم عمل إيه و لا بيتعاقب ليه ؟؟ و يتحول الى سلة لتفريغ احزانكم و غضبكم


و ابسط و اسرع طريقة لتعليم الطفل و تدريبه على منهج حياة صح هو اللعب ... و النهاردة جبتلكم الألعاب المناسبة لأى طفل أو طفلة فوق سن سنتين


اللعبة الأولى :
مطاردة الحيوانات :
يحب الأطفال فى سن سنتين لعبة المطاردة، خاصة إذا كانوا يعرفون أنهم سيحصلون على عناق حار عندما يتمّ الإمساك بهم... كما أن المطاردة وسيلة رائعة لبناء قدرة التحمّل لدى الطفل و كمان لدي الاب و الام أيضاً! 

المهارات التي تنميهاهذه اللعبةالقدرة على التحمّل ، و الجرى و السيطرة على عضلات الجسم ، بناء روح البهجة و القدرة على الإستمتاع بالإشياء ، تعلم اصوات الحيوانات ، و خطواتهم






قبل ما نبدأ اللعب :
قرر مع طفلك ان كل واحد منكم ح يمثل دور  واحد من الحيوانات و ح يقلد صوتها و ح حركاتها. .. من الممتع اختيار حيوانين مختلفين تماماً. .. مثلا يعنى أسد يزأر وفأر بيهرب .. أو أرنب يقفز ودجاجة تنادي فراخها ... أو أخطبوط بيمشى على ايديه و رجليه و بيحركهم فى كل اتجاه أو سمكة جميلة ... وطبعا  ما تنسوش تدوا الطفل حضناً حاراً وقبلة وبعض الدغدغة أول ما نمسكه. 

اللعبة التانية :
العروسة الشراب :
 
ساعدوا الطفل على تحويل لأى شراب قديم إلى عروسة جميلة تكلمهو تضحك معاه و بلعب معها و ممكن كمان توصل انها طبق صديق جديد له ... اللعبة التى مهمة جدا فى هذا السن فهى تحفّز الخيال و الإبداع لدى الطفل إلى جانب التركيز. 

المهارات التي تنميتها هذه اللعبة : المهارات الحركية الصغرى (الدقيقة) والكلام، والمهارات الاجتماعية ، و التمثيل ، و الملاحظة و التعبير عن نفسه

ادوات تحتاجها هذه اللعبة: شربات نظيفة لونها فاتح، كي يصنع منه دمية، وأقلام من الّلباد. 

يبدا الأب اوالأم فى لبس شراب في إحدى اليديين ثم يساعدا الطفل على تقليد حركتهما... علّموه  تحريك إبهامه وأصابعه حتى يجعل من طرف الجورب فماً... اختاروا لكل دمية اسماً وشخصية، قد يكون شخصاً فعلياً أو حيواناً .... استخدموا أقلام الّالوان لرسم العينين والأنف والفم.... افتحوا حواراً بين العروسة فى ايدكم و العروسة فى إيد الطفل ...و خلوا العروسة إللى ف إيدكم فى طرح أسئلة على عروسة الطفل ... و تبدأ العرايس الشراب تتكلم و تغنى و تتعلم الأرقام و الحروف و تحكى حواديت مفيدة يتعلم منها الطفل 


ملاحظة: تذكّروا أن كل طفل  يتطور وينمو بشكل مختلفة عن أقرانه.... ف إذا وجدتم أن طفلكم  غير مستعد لممارسة هذه الألعاب ، فدى مش مشكلة... ممكن نستنى بضعة أسابيع ثم نكرر اللعبة تانى 
و لكم تحياتى

مامى لأول مرة
http://la3ya3nyno.blogspot.com/

midlle ad