top ad

الثلاثاء، 31 مايو 2011

الأم تآكل إيه أثناء الرضاعة

امر طبيعى ان يزيد وزن الحامل اثناء فترة الحمل ؛  لكن الغريب ان الأم التى ترضع ابنها رضاعة طبيعية  لا تفقد الزيادة الطارئة على وزنها بسبب الحمل .. لأن الرضاعة الطبيعية فرصة عبقرية عشان كل أم تخس ؛ خصوصا ان جسمها بيكون على استعداد لتحويل السعرات الحرارية المطلوبة للرضاعة الطبيعية من خلال الدهون التي اختزنتها أثناء رحلة الحمل.


سيتطلب جسم الأم التى ترضع ابنها رضاعة طبيعية حوالي 500 سعر حراري إضافي في اليوم طول المدة اللي تقوم فيها بالرضاعة الطبيعية.



 الأطعمة التي يجب ان تناولها الأم اثناء الرضاعة : 
  1. تناول الحبوب الكاملة وحبوب الإفطار 
  2. الفاكهة الطازجة والخضراوات
  3.  الأطعمة الغنية بالبروتين والكالسيوم والحديد (وكالعادة، يمكنك مكافأة نفسك بطعام تحبينه بين الحين والآخر). 
  4. الأطعمة الصحية مثل اللبن الرائب أو الزبادي، والسندوتشات المصنوعة من خبز القمح الكامل مع الخضراوات ذات الأوراق الخضراء، والسلمون المعلّب، والتونة، والجبن أو الحمص، والبطاطا مع اللوبياء (الفاصوليا) المطبوخة، أو الفواكه.

أطعمة تزيد من  لبن الأم لكفى الرضيع :

  •  شرب الكثير من السوائل زى الماية و العصاير بشرط تكون تلاتة لتر يوميا  أو 12 كوباية ماية  .. و يفضل ان يكون  بين العصاير عصير البرتقال او الليمون لأنه بيزود اللبن بشكل متميز .. الخطوة دى ح تساعد كل أم على إنتاج كمية الحليب التي يحتاجها الرضيع .. تشعر غالبية الأمهات بالعطش عندما يقمن بالرضاعة الطبيعية .. و للأمهات إللى ما بتعطش  يستحسن انها تحط كوباية ماية جانبها تشرب منها  من  كل مرة تطعمين  رضيعك.

  • تكلى كل الأكل السابق ذكره

  • لو ابنك ما بيعانيش من انتفاخ او غازات انصحك بسلطة الزبادى لأن التوم بيساعد على زيادة اللبن

  • شرب الحلبة بيساعد على زيادة اللبن بشكل عبقرى

 


ما يجب ان تمتنع عنه الأم المرضع :

لازم تمتنع الأم عن تناول كل المواد الضارة لأنها  تتسرّب إلى حليبها عن طريق الدم .. و من الحاجات الضارة :

  1.    السجائر

  2. الدواء لا يؤخد إلا بعد استشارة الطبيب

  3. راقبى أكلك و شوفى ابنك امتى بيتألم أو عياطه بيزيد و شوفى كلتى إيه النهاردة و امنعيه ، لأن بعض الرضع بيجيلهم مغص من الفول إللى بتأكله الأم .. و رضع تانية بتتألم لو الأم كلت أحد منتجات الألبان ، و معظم الرضع تتألم من أكل الأم للبصل أو الثوم 

  4.  و مش بس تراقبى أكلك عشان الغازات إللى ممكن تصيب ابنك لكن عشان كمان تحميه من الحساسية ، أو الطفح الجلدي ، أو الإحتقان او التصفير عند التنفس

  5. ويستحسن ان كل أم تمنع أكل الحراق او الحرّيفة (الحرّة) لأنها تزعج بعض الرضع .. و عشان تعرفى ان كان ابنك بيتعب من أكلك للحراق و لا لأ .. فمافيش قدام غير طريق التجريب والخطأ، لأن التحسّس من الأطعمة ومكوناتها يختلف من طفل إلى آخر.

  6. إذا وجدت أن الدجاج مع الثوم أو الخضراوات بالكاري لا تزعج طفلك، فلا تبتعدي عنها و كليها بالهنا و بالشفا .. لكن هناك ملاحظة عامة تحذّر من تناول البروكولي، والكرنب، والبصل، و القرنبيط وغيرها لأنها تسبّب المغص الشديد للرضع بسب الانتفاخ.

  7. يجب ان تمتنع الأم عن أى أكل يسبب لها هى انتفاخ لأنه بيسب غازات للرضيع


 

تناول الفيتامينات :

أولا ً :  الحديد

إذا كنت قد تناولت أقراص الحديد خلال فترة حملك، فقد لا تحتاجين إليها ابعد الولادة  . . لكن الأفضل انك تستشيرى  طبيبتك لمعرفة اقتراحاتها ونصائحها في هذا الخصوص. .. لكن ده ما يمنعش انك تحرصي على أخذ وجبات متنوعة ومتوازنة.

ثانيا : الكالسيوم
لن تحتاجيه غير أول ست شهور من الوضع ، لأن رضيع سيسحب من جسمك مخزون الكالسيوم لك ، و ان كنتى بعد سن الأربعين ، فقد يعرضك هذا الأمر لهشاشة العظام ، لإانصحك ان تستمرى على فيتامينات الكالسيوم حتى ست شهور من عمررضيعك

ينفع الرجيم  في فترة الرضاعة الطبيعية؟

أهم حاجة نعرفها ان الأم التى ترضع طفلها لديها استعداد كامل على فقد كمية كبيرة من الدهون ، عشان كدة مش لازم تمنع نفسها عن الأكل عشان تخس ، خصوصا الأكل الصحى ، لكن ضرورى تمتنع عن الأكل الدهنى و السكريات ، و تحديدا تمتنع عن أكل الحلاوة الطحينية إللى كل الستات بتآكلها على أمل انها بتزود اللبن   ؛ و ده مش حقيقى ــ الحلاوة الطحينية بتزود الوزن فقط لا غير ، لكنها ساعات بتحسس اللأمهات بالعطش فتدفعها على شرب كميات كبيرة من الماية ، و الماية هى العامل الرئيسى فى زيادة اللبن ، لكن مش الحلاوة ، يعنى لو شربتى ماية من غير حلاوة ، اللبن ح يزيد ان شاء الله ـ،،،

ف الطعام الصحي وقليل الدسم بالإضافة إلى ممارسة التمارين الرياضية أسرع حاجة لإنقاص الوزن من غير ما نضرر بالبي بى .

لكن ممنوع أى أدوية أو أعشاب لإنقاص الوزن اثناء الرضاعة
و اوعى تنسوا ان الرضاعة الطبيعية بتحرق الدهون اللي تراكمت أثناء الحمل والتي تستخدم في إنتاج الحليب... تحرق الأم المرضعة سعرات حرارية أكثر بكثير من الأم غير المرضعة، مما يعني أن معظم الأمهات المرضعات يخسرن حوالي نصف كيلوجرام في الشهر، فقط نتيجة الطاقة التي يتطلبها إنتاج الحليب.

مع ذلك، علي كل أم الانتظار ما بين 10 أشهر وعام كامل لاستعادة وزنها الذي كانت عليه قبل الحمل. .. و يا كل أم  : " اوعى تقللى أكلك عشان تخسى لأن ده ح يأثر عليكى و على ابنك  و على مخزون الحليب عندك"

و لك تحياتى
مامى لأول مرة

الجمعة، 27 مايو 2011

لاعبوا اطفالكم حتى لو كانوا رضع


كل أم بتصرخ و كل أب بيشتكى من عدم طاعة الأولاد و لا من حركتهم المستمرة فى كل مكان و فى أى مكان ، أو من اللعب بكل شئ و أى شئ ، تحبوا أقولكم على الحل السحرى


انكم تلاعبوهم ــ " و لاعبوهم سبع " كما قال رسول الله صلى الله عليه و سلم  ــ

فاللعب مع طفلك أو طفلتك ح يوجد رابط عاطفى بينك و بين ابنك أو بنتك ، و بالتالى لما تحب تطلب منه حاجة ح يسمع كلامك من باب الحب مش  من باب الخوف .. و الحكاية دى ح تمتد معاه لمرحلة المراهقة .. و ولادك ح تصاحبكم و ح تحكيلك على كل حاجة فى حايتها و تسألك عن اجباة أى سؤال يمر ببالها و السبب انكم كنتم بتلاعبوهم و هما رضع

ح تسألونى و انا ممكن ألعب إيه مع الرضيع ؟؟ و هو الرضيع بيحس ؟؟
الرضيع بيحس بكل حاجة ، الفرق بينه و بينك هى القدرة على التعبير .. و لو بتسأل عن أشكل اللعب مع الرضيع تقدر تشوف الفديو الجاى ممكن يوحيلك بحاجات كتير  ؟؟

فى انتظار أسئلتكم و استفسارتكم

و لكم تحياتى
مامى لأول مرة

الأربعاء، 25 مايو 2011

الجدات و تربية الأطفال



الكتير من الأمهات و البعض من الآباء بيكون عندهم مشكلة فى نصايح الجدات و بمعنى أدق فى النصائح التى توجهها لهم الحموات و خاصة ان كانت متعلقة بتربية الأطفال .. و ده مش عشان الحموات من جيل مختلف عن جيلنا ؛ و لا عشان الحماة أقل ثقافة او من طبقة دون المستوى و لكن لأن العلاقة الإجتماعية بالحماة غير جيدة .. يعنى ح نكون مش طيقنها و نسمع كلامها ؟؟ ده معقول .

 احنا النهاردة عايزين نتفق اتفاق مع بعض ، خلونا نتأكد من صحة أى معلومة أى حد يقولهالنا و لو تأكدنا من اهميتها يبقى ننفذها حتى لو إللى قيلاها حماتى ، فان كانت حماتك فى كثير من الأحيان قنبلة ذرية فمافيش مانع انها تكون لبعض دقائق ملاك .. و كله لصالح أولادنا .

تعالوا بقى نشوف اسئلة الأمهات و  الآباء الخاصة بالجدات او الحموات : 

انا بنوتى عندها 6 شهور وحماتى من يوم ما اتولدت وهى بتقولى اقعدها على البوتى هل انا كده فعلا اتأخرت فى تعويدها .. على فكرة " انا الى الان لم اجرب معها الموضوع ده خالص " .

الاجابة :
لا يا عزيزتى انتى مش متأخرة خالص ، و قبل الرد على سؤالك أحب أفكرك ان أيام حماتك كانوا بيستخدموا الكوافيل ، و مع الكافولة بيبقى فى  لفة و فى الشتا يبقى معاها بنطالون ؛ و كل الهدوم دى كانت محتاجة تغير مستمر عشان ما تعرضش الطفل للأذى و بعد التغير كانت محتاجة غسيل باستمرار و نقع و غلى و شطف كويس ، و كانت الأمهات عشان تتفادى كل المراحل دى كانت بتقعد البى بى على القصرية أو البوتى من أول عمر شهرين  .. و دى خبرة خدتها الحموات عن الجدات ، لكنها اتغيرت بعض الشئ بالنسبة للمرأة العاملة  فى ايامهم مش ايامنا .

لكن احنا فى وقتنا ده غالبا بنستخدم الحفاضات و البامبرز و مش محتاجين نعمل عمل غير ُ مجدى و هى اننا نعود الطفل على استخدام البوتى قبل الآوان

أما عن السن المناسب لتدريب الطفل على الجلوس على البوتى فيكون من عمر 18 شهر
و ارشحلك الموضوع ده لقراءته   http://mamy1st.blogspot.com/2010/12/blog-post_25.html


و معاه الموضوع ده كمان
http://mamy1st.blogspot.com/2011/01/blog-post_14.html



السؤال الثانى :
 
عندى استفسار ينفع افطم بنتى دلوقتي ؟ مع ان عمرها سنة .. حماتى بتقولى اكمل لحد ما يبقى عمرها سنتين .. بس  انأ حاسه ان الرضاعه بالنسبة لبنتى مجرد  تسليه مش اكل
 الاجابة :
حماتك مش غلطانة .. و أنا ما أفضلش انك تفطمى بنتك فى عمر سنة ، إلا لو لبنك قليل ، لكن لو مستعجلة أو تعبتى افطميها فى سن سنة و نص لو مش عايزة تستنى لحد ما تم سنتين ، اللبن مش مفيد لبنتك الصبح لأن اللبن إللى جسمك بيفرزه بالليل غنى بالبروتين اللى بنتك محتجاه .
و نصيحة منى : اوعى بنتك تستخدمك كتتينة ، ارفضى بشدة و و لما تعيط اشغليها بأى حاجة تانية زى اللعب معاها او اديها قطعة بسكوت او فرجيها على قصة ؛ المهم انها ما ترضعش غير بالليل بس و استغلى الست شهور الجايين لحد ما تفطميها فى انك تدربيها على كل انواع الأكل و كمان بدأى فى تقليل عدد مرات الرضاعة بالتدريج عشان الفطام ما يسببش فجوة فى علاقتك بنتك

سؤال 3 :
بنتى عمرها سنة و ما بتنمش مدة طويلة على بعضها و حماتى بتقولى عشان مش بأشبعها كويس ، مش عارفة أعمل إيه مع انى بأكلها زبادى مهروسة فى الزبادى

الإجابة :
ــ حماتك معاها حق .. تعالى الأول نعرف أسباب استيقاظ الطفل من نومه و خصوصا باليل ، هى كتير لكن من  كتير أهمها ان الطفل  يكون جعان ، عشان كدة لازم نتأكد ان الطفل شبعان .. لكن الموضوع فى حالة بنتك مختلفة لأنها ممكن تكون بتقلق و بتصحي لإنكم فى البيت بتكونوا صحيين ، فلو كنتوا فى البيت مش مرتبطين بمواعيد نوم و صحيان حاولى تعملى لبنتك روتين يساعدها على الدخول فى النوم بشكل هادئ .

تحددى معاد ثابت للعشاء و ليكن الساعة ثمانية ، و قبل العشا تحمي بنتك حمام دافئ ، و بعدين تعشيها ، و تدخلوا اودتها إللى تكون منورة بانارة خافتة و تبدأى تهدهديها و تطبطى عليها .. و لو لقتيها لسة صاحية ، ابدئ رضعيها .. تكرار الروتين ح يساعدها انها تنام كويس و ما تقلقيش لو خدت أسبوع عشان تتعود .. و على فكرة بنتك لو بتصحى الفجر او الساعة 3 فجرا ، ده طبيعى جدا لحد ما توصل لمرحلة الفطام . . و حاولى تظبطى المنبة و تصحى بنتك فى معاد ثابت ، و ما تسمحلهاش بالقيلولة غير مرتين بس فى اليوم ، على ان تكون كل مرة ساعة و ليس أكثر .. لو نامت أقل ماتقلقيش لأنها ح تعوضه بالليل

و راجعى الموضوع ده ممكن يوضحلك حاجات كتير http://mamy1st.blogspot.com/2010/12/blog-post_21.html

و الموضوع ده كمان
http://mamy1st.blogspot.com/2010/07/blog-post_17.html

و لكم تحياتى
مامى لأول مرة
http://la3ya3nyno.blogspot.com/
 

الثلاثاء، 24 مايو 2011

أهمية دور الأب فى حياة الأطفال


أهمية دور الأب فى حياة الأطفال :

كتير من الأهل بيتهيقلهم ان للأب دور ثانوى فى حياة الأطفال ، و ان كان دور الأب مهم على مستوى العائلة لأنه المصدر الرئيسى لتويل الأسرة ، لكن ده موضوع ما يحسش بيه أى طفل .. لكن فى الحقيقة الفكرة دى غلط غلط غلط جدا مش بس عشان ما بعض الإمهات المثقفات ما هىى فاكرة أن مهمة الأب تبدأ عندما يطلب الطفل لعب الكرة أو لما تحتاج الطفلة لمن يوصلها بالسيارة. . الإحتياج أكبر من كدة بحسب و تعالوا نتأملها مع بعض

ما هى العشر أسباب التى تؤكد أهمية الأب:
1. أول علاقة بين الطفل و الأب تبدأ من اللحظة الأولى لخلق هذا الطفل ..  ف هذا الطفل يحمل الجينات الوراثية الأب .. و ده معناه ان هذا الأب هو جزء من تاريخ الطفل ، وحاضره .. كما أن الأب جزء من شكل ومظهر هذا الطفل بما فيها أذنيه الكبيرتين ومشيته الغريبة التي أخذها عنه.. فهذه الأشياء لها تأثير على شخصية الطفل و خبرات الأب فى خصوصها ستكون اهم ما يمكن فى حياة الإبن .

2.  للأب دور هام فى حياة الأم و التى هى زوجته .. حتى و ان كان الأب يتعثر في بادئ الأمر لإن الأبوة أمر  جديد عليه ،  و رغم ان الأم تنجح أكثر في  مباشرة امور الأمومة و التى بدأ بممارسة الرضاعة الطبيعية .. لكنها محتاجة للاب  لتصبح أقل عرضة للإصابة باكتئاب ما بعد الولادة. . و هذا سينعكس بشكل غير مباشر و أيحانا بشكل مباشر  على الطفل

3. من غير الأب ـ  بعد الأم ـ سيساعد الطفل في الخلود إلى النوم ليلاً، ويعلمه كيفية ركوب الدراجة، ويدفع مصاريف أول عطلة له مع أصدقائه .. و يمارس باقى طقوس الأبوة التى نعرفها جميعا .

4. الأطفال الذين يشاركهم آباؤهم في الحياة، تتكون لديهم مهارات اجتماعية أفضل عندما يصلون إلى مرحلة الحضانة .. فالأطفال التى تنشأ فى حضن أب يعرف مسؤلياته يكونوا أطفالاً أذكياء، كما يصبحون أكثر قدرة على التحصيل العلمي في سنّ السادسة عشر.

5. عندما تكون أباً صالحاً، ف أنت بذلك تحافظ على سلامة عقل طفلك وتوازنه. فالعلاقة الوثيقة بين الأب وطفله تضمن تكوين شخصية سوية للطفل في المستقبل.

6. غالبا ما يكون الأب الجيد هو زوج جيد ــ نقول جيد و ليس ممتاز ـ و هذه الخاصية مهمة جدا للسيدات العاملات و خاصة الناجحات و لو عملنا بحث عن حياتهم الشخصية ح نلاقى العامل المشترك بينهم كلهم و هو : وجود آباء و أزواج  في حياتهن يعملون على تشجيعهن واحترامهن.

7. يا ايها الأب : كن أباً صالحاً حتى تصبح ابنتك أماً صالحة عندما يحين الوقت لذلك.

8. يا ايها الأب : أبقي طفلك بعيداً عن المشاكل. فالأبوة الصالحة تعني أن ابنك سيكون شخصاً متوافقاً مع مجتمعه وبيئته.

9. يا ايها الأب : شارك ابنتك اللعب معها فهذا سينعكس على حياتها فى المستقبل و ستكون سعيدة بحياتها فيما بعد، لأن مشاركة الأب ابنته في سنّ السابعة يجعلها سعيدة في الحب في سنّ الثالثة والثلاثين.

10. هل تود أن يتمتع طفلك بثقة أكبر بنفسه ويكون ودوداً ويثق بالآخرين؟ هذا من نتائج تأثير وجود الأب فى حياته .. فان اختفى سواء بالجسد أو بالروح هذا قد يتسبب فى هزه فى حياة الطفل .. و راقبوا ابناء المطلقات إلا من قررت ان تمارس دور الأب و الأم و تتعلم ما هى ابجدية حنان الأب .


لذلك يا ايها الأب لا تتنازل عن دورك فى حياة أبناءك .. و يا ايتها الأم قربى بين أبناءك و أباهم .. و ان كان لا يعرف طبيعة دوره ساعديه فى الوصول إليه دون اى تجريح لأن الأبناء فى حاجة الى هذا الدور .

و لكم تحياتى
مامى لأول مرة

الاثنين، 16 مايو 2011

الطفل الرضيع يمص الإبهام - فى حل للمشكلة دى



لاحظت بعد شهر من ميلاد بنتى "جى" و هوهوز" ـ بنتى التوأم ــ زى ما انتوا عارفين أساميهم و العارف طبعا لا يعرف ــ
لاحظت ان " هوهوز " بتحاول تحط صباعها فى بقها ، فكنت بابعده عنها باستمرا ، و الغريب انها كانت تبصلى نظرات معناها " خلاص فهمت ". و لولا ان قدرتها على الكلام لسة مش موجودة كانت اقتبصت كلمات " بن على رئيس تونس السابق " و قالتلى " فهمتكم ، فهمتكم " ، و بعدين هربت من البيت عشان تحط صباعها فى بقها على راحتها فى جدة أأقصد بعيد عنى  ... أما عن حال  بنتى البكرية "جى" و التى تكبر أختها بثلاثة دقائق ؛ كانت لا تضع اصبعها فى فمها إلا عندما تبكى و أكون مشغولة عنها ، خدو بالكو معايا : " جى " عمرها شهر ، شهر واحد ، شهر واحد فقط لا غير زى شيكات البنك ، كنت لما أتشغل عنها تبكى بصوت عالى ثم تقرر الانتقام منى بو ضع اصبعها فى فمها قائلة " ها ، ها ، ها " و كأنها تسمعنى انها وضعته . . و حاولت ان أخلصها من هذه العادة قبل بلوغهم الشهر السادس لعلمى ان ذاكرة الطفل الرضيع تنشط فى هذا التاريخ ، فان اعتادت على وضع اصبعها فى فمها فستدخل الجامعة و لن تجد ما تحمل به كشكول المحاضرات لأن يدها مشغولة فهى مرفوعة إلى فمها متظاهرة بتدخين بايب يشبه ابهامها . . لكن الحقيقة كلها تتلخص فى انها مقدرتش تتخلص من هذه العادة السيئة و هى وضع صباعها فى بقها
و المشكلة كلها اساسها اهمال ام لطفلها الرضيع و عدم متابعته و العمل على حل مشاكله


و لخوفى على شكل ابنتى فى الكوشة و حرصى على ان لا تظهر فى صورة الزفاف فى شكل الآنسة ذات الأصبع الممصوص قررت توجيه كافة الأسلحة لمناهضة وجود الأصبع الغاشم المصر على استعمار فم ابنتى الرقيقة . . و كان اللكلوك هو الحل


نعم فقد ألبست لاكلوك لليد التى اعتادت "جى " على مص ابهامها ، فانتقلت بشكل تلقائى لليد الأخر . . و هنا قررت القيام بحركة تغير شامل ، فقد جمعت أكبر قدر من اللكاليك بالبيت لدفن أى ابهام بها ، نعم لاكلوك ، فقد كنا فى الصيف و لا يوجد بالأسواق جونتيات ، و مع ذلك كانت " جى " تحاول وضع أصباعها فى فمها مرورا باللكلوك العازل . . و ما كان منى غير تجنيد كل البافيتات بالمنزل للفها بحنان  و نعومة  على يد "جى " حتى يختفى ابهامها بين اصابعها و تنساه ، إلا انها كانت تتمكن من فك البافيتة لتلتقى بابهامها و تبدأ فى تقبيله


و بقينا على هذا الحال حتى ذهبنا إلى الطبيبة فى الزيارة الدورية التى قررنا ان تكون كل ثلاثة أشهر ، و كان الموعد مع الطبيبة التى كتبت لنا على gel" جل للأسنان" و هو نوع من أنواع المخدر الموضعى الذى يخفف من ألام التسنين


و قد أكتشفت ان الطفل الرضيع يضع اصبعه فى فمه لسببين اولهما : افتقاده لثدى أمه نتيجة ارضاعه من البيبرونا (زجاجة الحليب) ، و السبب الثانى هو التسنين . . فرغم ظهور الأسنان ما بين الشهر الخامس و حتى نهاية الشهر الحادى عشر ؛ إلا ان آلامها يؤثر بشدة على الطفل الرضيع مما تدفعه فى كثير من الأحيان إلى وضع ابهامه فى فمه لتخفيف الألم

 
و باستخدام جل الأسنان ، و بالحب و الحنان تمكنت من ابعاد ابهام " جى" عن فمها . . و رغم انها كانت تكره العضاضات ، و التيتينات ، إلا انها مع بداية الشهر السادس أصبحت تميل لهما لتفرغ فيهما آلام التسنين ، فالعضعضة تخفف من شدة الألم فى الفم و فى اللسة


و ظل الحال على هذا المنوال حتى بداية الشهر الثامن و ظهور أول ملى فى أسنان " جى" و نصف أول سنة من أسنان " هوهوز" . . و كانت المفاجأة


فقد اعتدت فى كل ليلة على جمع اللعب التى تنشرتها بناتى بالليفينج (living) بشكل يفوق نشر قوات السلام فى منطقة الشرق الأوسط . . و فجأة و انا امسك بالعضاضات ، و جدت احداهما بدون سائل


ــ انتى متأكد انه كان فى العضاضة دى سائل ؟؟
ــ ايوة ، لأنى كنت بأحطها كل يوم فى التلاجة عشان السائل اللى فيها بيحتفظ بالحرارة ، و لما تيجى" جى" و لا " هوهوز" تحطها على سنانها تهدى احساسهم بالألم بسبب برودتها

ــ كدة يبقى كان فيها سائل . . يبقى راح فين ؟!!!!!
ــ انتى بتسألينى أنا
هذا كان حديثى لنفسى الذى قطعه فكرة صدمت عقلى " يا نهار أبيض البنات شربوا سائل العضاضة . . و هما بيعضعضوا نزل فى بقهم ، لأ أكيد ادلق . . بس مافيش أثر لأى حاجة ادلقت ، يبقى برضه أكيد أدلق ، لكن فى بقهم . . و أخذت أهدى نفسى قائلة " و بعدين ح تقلقى نفسك ليه " . . و بحدة صرخت فى نفسى قائلة بفزع " طيب و العمل ؟!!!
لازم تطمنى من الدكتورة . . و فعلا رحت للدكتورة إللى طمنتى ان سائل العضاضة مصنوعة من ماء مخصوص للأطفال ، و مافيش منه ضرر  .. و الحمد لله اطمنت لكن بعد ما بناتى طلعت معظم سنانهم اكتشفت غلطة كبيرة وقعت فيها ح أقولهالكم عشان ما حدش يقع فيها .. أكتشفت انى رغم انى كنت حريصة انى ما أخليش بناتى تحط صباعها فى بقها و قاومت الحكاية دى بجيل التسنين ــ  Gel ــ و العضاضات لكن كنت كمان باسمح لبناتى تعضعض فى أى حاجة تيجى تحت إيديهم ، و ده كان غلط لأن " هوهوز" من شدة احساسها بالألم كانت ساعات كتير بتعضعض  فى حاجات معدنية و نتج عن الحكاية تكسير سنتينها الأودميين ، صحيح هو كسر مش كبير و لازم نقرب أوى عشان نشوفه ، لكن فى الآخر دول بنات و الحفاظ على أسنانهم من أهم أدوات الحفاظ على مقومات جمالهم .. ف أرجوكم اسمحوا لأطفالكم بعضعضة أى شئ كاوتش أو مطاطى بشرط ما يكونش مصنوع من حاجة ضارة  بالصحة ، عشان كدة بأنصحكم بشرا اللعب الكاوتش  من الصيدلية عشان نضمن سلامة و صحة أطفالنا و خاصة فى سن الرضاعة لأن مقاومتهم بتكون أضعف ما يمكن
و لكم تحياتى
مامى لأول مرة
http://la3ya3nyno.blogspot.com/

الأربعاء، 11 مايو 2011

مشكلة بنتى عند النوم




أنا أم لأول مرة و مش عارفة كتير عن التعامل مع الاطفال
و كنت عايزه افهم يعني ايه : "الرضاعة : روتين ليلى " .. و قرأت على مدونتكم هذه الجملة : " حاولى ان يرضع الطفل بالليل بس ، و الحكاية دى ح تساعدك لما تحبى تفطميه "
أصل انا بنتي عندها سنه بالظبط و مغلباني اوي بالليل بتصحي كتييييييييييير و مفيش حاجه بتسكتها غير الرضاعه و لا بترضي تاخد ميه و لا لبن ولا عصير ( كانت بتاخد لبن صناعي مع الرضاعه الطبيعيه لكن مش كتير و بدءت دلوقتي اديها لبن بقري )
مش عرفه اعمل معاها ايه ؟

الإجابة : موضوع " الرضاعة روتين ليلى " يعنى ان الطفل إللى بدأ يآكل فمن المفضل انه يآكل الصبح و يرضع بالليل ، لأن اللبن الأم بيفرز مواد بتكون معذية بشكل أكبر بالليل و ده بالنسبة للأطفال إللى بدأت تآكل و اعتمادهم على اللبن الرضاعة بيكون بشكل مش كبير ، فأفيد نوع للبن الرضاعة هو ما يفرز ليلا .

بالنسبة لبنتك إللى عمرها سنة : اتمنى انك تديها تلت وجبات يتوسطهما عصير او بسكويت او جبنة نستو .. يعنى يكون عدد الوجبات خمسة ، و يفضل ان تكون الرضاعة الطبيعية بعد الساعة سبعة بالليل عشان تكون مفيدة و مغذية

أما عن موضوع صحيان بنتك عشان الرضاعة : افضل انك تعطيها وجبة مشبعها قبل الرضاعة زى وجبة موز مهروسة فى الزبادى ، او بسكويت دايب فى اللبن أو العصير  ، لأن بنتك بتصحى بسبب الجوع و لأنها نعسانة جدا فبتستسهل الرضاعة .. لكن لو شبعت قبل ما تنام و رضعتها مرة او اتنين تاكدى انها ح تنام بعمق ان شاء الله
و لكم تحياتى
مامى لأول مرة

http://la3ya3nyno.blogspot.com/

midlle ad