top ad

الجمعة، 29 أبريل 2011

معاملة طفل على ابواب السنة الثانية من عمره


السلامو عليكم الله يجزيكم خير على هيدى المعلومات القيمة بس انا عندى شوية اسئلة ارجو الاجابة عليها
انا ابنى عمره سنة و11شهر كان وزنه فى اليوم السادس من ولدته 2.15 كيلو هالحين وزنه تقريبا 11ونصف كيلو وطوله ما بين 81_82 سم بس كتير شكله ضعيف بينة جسمه كتير ضعيفة علما بان طولى 161وطول والد176.
كثير الحركة من اول ما يصحى الصبح لغاية ما ينام باليل ما بيقعد ابدا وعنيد جدا وعصبى جدا.
اولا بسال عن الوزن والطول علما انى زرت اكتر من دكتور والكل قال انه طبيعى بس انا مو شيفة هيك.
ثانيا شعره كتير ناعم وطويل بس قصيت مرة عند الحلاق الاطراف وبدا هالحين خصلات من شعره تقع هل هذا يدل على الضعف ولا فى مشكلة فى راسه.
ثالثا بدى اكلات ترفع من مناعته وتزيد من وزنه وتهدى اعصابه.
انا باكله كل شىء بس بيعذبنى فى اكله وبعطيه لبن جمسى وعسل ابيض علما بانه لم يرضع طبيعى سوى ثلاثة شهور ةبعد ذلك صناعى ولما تم السنة ونصف اعطيته لبن جمسى.
ارجو الاجابة على الاسئلة والله يجزكم الف خير

الإجابة : ارجوك تتأكدى من وزن أبنك ، لأن لو وزنه 10 كيلو و نص و طوله ما بين 81 و 82 سنتى فابنك مثالى .. لكن لو ابنك وزنه زى ما انتى كاتبه يبقى عنده مشكلة .. هو صحيح انتى حسنتى وزن الولادة لأنه كان مولود ضعيف ، لكن وزنه دلوقتى مش مناسب لطوله .. لأن مع الوزن 11 و نص كيلو لازم يبقى طوله 85 سنتى ، هو صحيح باباه قصير شوية و ممكن يكون العامل الوراثى له دخل لكن أنصحك تستنى لحد ما ابنك يتم سنتين و لو وزنه زاد و طوله لأ ، يبقى فورا وديه عند دكتور غدد يتابع معاكى .

ثانيا : موضوع الشعر : لو خصل شعر طفلك إللى بتقع فى المنطقة الجبهة فقط لا غير  يعنى فى المنطقة الأمامية من الراس من فضلك تابعى ابنك و تأكدى انه ما عندوش عادة شد الشعر ، لكن لو الشعر بيقع لواحده ده ممكن يبقى عشان سبابين الأول سوء تغذية ، و السبب التانى ممكن يكون ابنك بيغير شعر البطن .. فى بعض الأطفال إللى بتتولد بشعر العشر ده بيبقى اسمه شهر البطن او شعر الولادة ، ف شعر الولادة ده بدأ يقع عند ابنك عشان يطلع شعر جديد .. انصحك بتغذية ابنك بطعام تتوفر فيه كل العناصر الغذائية و ممكن تدهنى شعر ابنك بزيت خروع قبل ما يستحمى بأربع ساعات و تغسليه كويس وقت الحمام

ثالثا : التغذية : من فضلك بلاش اللبن الجاموسى بدليه بلبن بقرى كامل الدسم ، العسل الأبيض كويس بس بلاش يآخد منه كتير .. ابنك  مغلبك فى الأكل عشان العسل الأبيض و اللبن الجاموسى بيسدوا نفسه
ــ لرفع مناعة طفلك ، لابد من الخضار و الفاكهة بشكل يومى .. و كل الأغذية ذات اللون البرتقالى ، زى الجزر ، البطاطا ، البرتقال ، المشمش ، كلها تقوى جهاز المناعة بقوة

رابعا : الحركة و اللعب طول اليوم دى بشرة خير ، و دليل صحة و الحمد لله .. خلي طفلك يلعب و لو حاسة انه بيسبب مشاكل بلعبه العنيف ، حاولى تخرجيه ، و توديه مكان فيه مراجيح ، و فى البيت ممكن تجبيله بعض الألعاب التى تمتص الطاقة زى الحصان الهزاز او المركب الهزاز ، الأطفال بيحبوها جدا و بتمتص طاقتهم و هما قاعدين فى مكانهم

خامسا بخصوص العصبية ارشحلك تقرى الموضوع ده ح تستفيدى منه جدا  ان شاء الله
http://mamy1st.blogspot.com/2011/04/blog-post_26.html


سادسا : لتهدئة أعصاب ابنك ، اتركيه ينام على أيات للقرآن الكريم أو قطعة موسيقية ناعمة و هادئة جدا.. و عندما يستيقظ ضميه بحنان و داعبيه ،  ثم ضعيه فى مرجيحته او سريره الهزاز او كرسيه الهزاز مع صوت القرآن ، فهذا يمتص الكثير من الطاقة السلبية لدى الأطفال

و لك تحياتى
مامى لأول مرة
http://la3ya3nyno.blogspot.com/

الثلاثاء، 26 أبريل 2011

التعامل مع الطفل العصبى

 











من المشاكل الأكثر انتشارا فى تلك الأيام بين العائلات و الأمهات و الآباء هو موضوع عصبية الأطفال .. كتير من الأسر تواجه عصبية الأطفال بعصبية مقابلة ، و فاكرين ان ده هو الحل .. لكنهم يفاجئوا بأن عصبية الطفل بتزيد و بتتضخم .. فيقرروا تعنيف الطفل ، يلاقوه ما بيرتجعش ، يدخلوا معاه فى مرحلة العنف ، فيلاقوا العصبية تحولت لعناد .. و فى كل هذه الأحوال لا الأب و لا الأم حد فيهم سأل نفسه ليه ابنى عصبى ؟؟


و يا ترى عصبية الطفل دى ليها أسباب عضوية ؟؟ ليها أسباب تربوية ؟؟ ليه أسباب مجتمعية ؟؟ أى أسباب أسرية ؟؟ طيب ليها أسباب نفسية ؟؟ و الأهم من ده كله اننا نعرف أعراض هذه الأسباب عند الأطفال و اختلافها من سبب لآخر عشان نقدر نسيطر على عصبية الطفل و نعالجه بأقل مجهود



أول حاجة لازم نعرفها عن المشكلات السلوكية للأطفال ان كلها مكتسبة ، يعنى مش مخلوقة مع الطفل ، ليست فطرية و لا موروثة ، لأ ، دى اقتبسها من الواقع الخارجى .. يعنى ممكن يكون بيقلد حد فى البيت أو فى العيلة .. إلا القليل جدا من المشكلات السلوكية عند الأطفال إللى بتبقى موروثة ، لكن أغلب مشكلات الطفل مكتسبة من الجو و المحيط الذى يعيش فيه .


العصبية و العنف و العناد و ماشابه كلها رسائل يرسلها الطفل لأهله عشان يوجهم لموضوع بعينه ، و غالبا تكون اللغة لا تسعفه ، فيلجأ الطفل للعصبية للتعبير عن مشاعره و أفكاره و وجدانه ....  ف الطفل عن طريق العصبية بيعبر عن آلامه ، عن آماله ، عن اعتراضه .

الواجب على كل أب و كل أم :
ان نتسلم الرسالة المرسلة من الطفل إلينا ، و نقرأها جيدا بهدوء ، نشعر بيها ، نتفهمها قبل ما نرد عليها .. و على كل اب ان يآخد القرار و هو  دارسه و من غير تسرع .. و ينفذ قراره تجاه ابنه  بما يناسب و رسالة الطفل لأبيه .

لك ايها الأب و ايتها الأم مش لازم نحمل الموضوع فوق طاقته ، خاصة بعد ما عرفنا ان  السلوك المكتسب عند الأطفال زى العصبية و الكذب و السرقة من الممكن تغيره .. فالطفل عنده قابلية للتعديل و التغير و دى حاجة هايلة و لازم نآخد بالنا منها و نكون واعين لها


الطفل صناعة أهله :
الطفل هو مرآة أهله ، فهو صناعتنا  .. احنا إللى بنعمل الطفل المبدع و احنا إللى بنصنع الطفل العصبى .. فهى بضاعتنا ردت إلينا .. ارجوكم ساعدوا اولادكم و افتكروا اننا نصنع نجاح أطفالنا ..
بنصنعه بطباعنا بشخصيتنا بسلوكنا .. أى حد عايز يعرفك كويس يشوف سلوك و شخصية ابنك

و ضرورى نعرف ان داخل كل طفل مبدع ، و هذا المبدع يتمنى ان ينجح ، يتمنى أن يكون محبوبا ، يتمنى أن يكون سعيدا .. لكن ما بيكونش لسة عارف السكة و محتاج حد يساعده انه يحقق أحلامه و يتطور و ينجح و يكون محبوب

لو قلتلى ايه سلوكك ح اقولك شخصية ابنك ح يكون شكلها إيه

للتخلص من عصبية الأطفال :
لازم نتخلص من العصبية عندنا احنا الأهل ــ أب و أم ـ اولا عشان نزيل العصبية عن أطفالنا .. ما هوو عشان نصلح الصورة لازم نصلح الأصل .. و عشان نظبط الظل يبقى علينا بالعود
و خلوا بالكم علاجنا لعصبية اطفالنا و هو فى سن صغيرة ح تختصر معانا مشاكل كتير فيما بعد لأنه لو طلع طفل عصبى ، ح يبقى مراهق عصبى ، ح يبقى شاب عصبى ، زوج عصبى ، و يبدأ يخلق جيل من العصبيين بعد ما ينقل العادة دى لولاده .. و نتحمل احنا السلسلة دى كلها من العصبيين .

سمات العصبية و اعراضها :  
ــ غير التوتر و الصوت العالى المصحوب بنرفزة
ــ رمش العين يكون به رعشة
ــ هز الكتف و خاصة اليمين
ــ مص الأصابع إللى هى مشكلة عند معظم الأطفال و ما بنعرفش نعالجها إزاى عند الأطفال
ــ قرقضة الأظافر

و كلها مالهاش علاج غير  تخلص الأب و الأم من العصبية ، و توضيح للصغير الخطأ الذى وقع فيه بهدوء ، و محاولات إيجاد لغة حوار مشتركة بينكم زى اللعب ، التلوين ، الأكل ، القراءة .... ده ح يساعد إلى حد كبير على فهم بعضكم البعض و ماحدش فيكم ح يحتاج للعصبية لا الطفل عشان يوصل رسالته و لا الأهل عشان يردوا على الرسالة دى

و لكم تحياتى
مامى لأول مرة


الأحد، 24 أبريل 2011

أهمية شم النسيم للطفل



شم النسيم من الأعياد الفرعونية القديمة إللى  شكلت و رسمت أهم ملامح المصرى القديم بالشعور بالجمال و حب الطبيعة و التأمل فى الخلق و المخلوقات عشان نخرج منها بأفضل ما خلق الله ..
عشان كدة شم النسيم مهم للأطفال
1. شم النسيم يعلم الأطفال حب الطبيعة :
اخرجوا باولادهم فى الحدائق و المتنزهات و علموهم حب الزهور و الخضرا .. و ممكن لما نرجع البيت نبدأ معاهم دروس مبسطة فى الزراعة .. مثلا يزرع حلبة فى قطنة ، يزرع ريحان فى البللاكونة ، يزرع بصلة فى إزازة ماية و يراعيها .. المهم يتعلم حب الطبيعة و الخضرا و يتعلم يستمتع بيهم ، و ده مش ح يحصل غير فى شم النسيم إللى هو من أهم ملامح المصريين و إللى يحبوا ينقلوها لباقى أخوتنا إللى حرموا من جمال الطبيعة لأن حياتهم فى البادية فرضت عليهم لون واحد و هو اللون الأصفر .





تانى حاجو ممكن شم النسيم يعلمها للأطفال
2. حب الحياة و البهجة و النشاط : 
و الحكاية دى ح تنفع مع الأطفال فى سن المراهقة ، و خاصة من يعانى من التجهم فى ذلك السن ،  و مافيش مانع نتبع معاهم الطقس الفرعونى بشكل كامل ، يمكن ده يشعرهم ببعض البهجة .. يا سلام لما نصحى الصبح بدرى .. ناخد البصلة اللى باتت تحت مخدتنا و نرميها فى المية و نرمى معاها وَخَم السنه كله و ننط وراها نسنحمى .. و بعدين ننطلق فى الغيطان و الجناين و كل واحد يجيب شوية خُضرة  و زهوز يعملهم بوكيه و يعلقهم على باب بيته شو ف انت بقى جمال البيوت و هى منورة كده .. و بعدين نلون البيض .. و بعدين نتغدى فسيخ ... و نهنى بعضنا ....... الطقس ده قبل كل الأديان .. و عدى عليه كل الأديان ماحدش حرمه .. لأن مافيش دين يحرموا الجمال و البهجة و الإحتفاء بالحياة و الربيع إللى هما من صنع الرحمن  .

3. تعليم الأطفال الذين يرفضون الطعام حب الأكل  :
شم النسيم فرصة كويسة اننا نحب ولادنا فى الأكل بداية من الطفل إللى عمره سنتين ، ممكن شكل البيضة الملونة و شكلها المبهر يحب الطفل فى أكلها ، و كعكة شم النسيم تغير للأطفال طعم الأكل اللى اتعودوا عليه و خصوصا الأطفال اللى متعلقة بالعيش و ما بتحبش تآكل غيره .
و للأطفال اللى فوق خمس سنين ممكن نأكلهم معانا من الرنجة و الفسيخ و الترمس و الخضرا لأن جهازهم ح يكون قادر على الهضم و بقى زى معدة كل المصريين قادر يهضم الزلط .






4. تعليم الأطفال الرسم و الألوان :
زى ما كلنا عارفين اننا اول حاجة بنعملها الصبح اننها بلون بيض شمس النسيم بالوان طبيعية يعنى بتكون من الشاى او الكركم او الكركدية او قشر البدنجان .. غغللى ما بيحبش الألوان دى ممكن يستخدم ورق الأعمال و يرسم عليها و بعدين يقصقص الرسك و يلزقه على البيضة ، و بكدة نضمن صحة و صلامة البيضة و انه ما وصلهاش أى ألوان ضارة على صحة الطفل
و انا حطيت لكم مجموعة صورة ح تساعدكم فى ايجاد أشكال للرسم على البيضة باستخدام ألوان الخشب او ورق الكويشة او شرايط الزينة او الكرتون الملون و المقصوص بشكل معين يساعد على تغير شكل البيضة ، كما يمكنكم الإستفادة من كرتونة البيضة فى كمل أشغال يدوية بديهة تبهج الأطفال و تعلمهم الرسم و الإبتكار و الإبداع و كل سنة و انتوا طيبين
و لكم تحياتى
مامى لأول مرة
http://la3ya3nyno.blogspot.com/

السبت، 23 أبريل 2011

مشكلات و أسئلة خاصة بالأطفال



أم تقول : طفلي عمره 11 شهر وعضوه بيختفي للخلف وعندما سألنا الطبيب قال ده لان الطفل مليان شوية (12كيلو)ولكن طفلي بعد عملية الختان(بعد شهره الأول) كان طبيعي جداً فما سبب ذلك وما الحل لهذه المشك
الإجابة : طفلك  عنده زيادة طفيفة فى الوزن ، و للحكم على موضوع وزنه لازم نعرف طوله .. فلو طوله 82 سنتى او اكتر يبقى وزنه مثالى ، لكن او ااقصر يبقى هو بيعانى من زيادة فى الوزن ممكن تكون متسببة فى تراكم كم من الدهون حول العضو الذكرى .. لكن لو وزن ابنك كويس و ده تعرفيه بعد ما تقيسى طوله يبقى انصحك تعرضى ابنك على دكتور تانى

أب يقول : ابنى عند سنه وشهرين عند امساك واخذجميع الملينات وينسون منذ شهرين وما جبش نتيجه ايه العمل
الإجابة : اعتقد انك بتأكلى ابنك كمية نشويات كبيرة ، يعنى عيش ، رز ، مكرونة ، كيك  ، بسكويت ، بطاطس ... و الحل يبدأ بانك تغيرى عادات ابنك الغذائية ، تشربيه ماية كويس و عصير ، و تأكليه فاكهة و خضار ، و ممكن تديله طماطم  منزوعة القشر لأنها من أهم الحاجات على منع الإسهال

و عشان الإمساك يروح فورا اغليله شيح او أعشاب البابونيج و استنى لما تبقى فاترة و اديهاله محلاة بشوية سكر .. و فى الشتاء ممكن تأكلى ابنك بطاطا ، بتضيع الإمساك تماما

و لكم تحياتى
مامى لأول مرة

جدة تقول : احتاج الى مشورتكم: ابنى صار عمره 6 اشهر الحمدلله نومه قليل وخفيف جدا (اقل حركة امامه تنتهي نومته) واخطأت في تعويده (على النوم وهو يرضع مني ثم اضعه في سريره) طوال تلك الفترة فكيف استطيع التخلص من هذه العادة وهل ابدا بوضعه لينام في غرفة مستلقة عن غرفتي  جزاكم الله خيرا

الإجابة : نوم الطفل فى هذا السن يكون خفيفا جدا  لأنه يشعر انك ابتعدتى عنه بعض الشئ بسبب تحويل رضعة منك إلى وجبة طعام ، لذلك أنصحك ان تستغلى الجو الدافئ الذى نعيشه فى تلك الأيام ، و تعطي أبنك حمام دافئ قبل الموعد الذى تفضلين ان ينام به ، بعد الحمام ارضعيه ، ثم ادخليه إلى السرير سواء كان سريره او سريرك لا يفرق فى هذا العمر .. مع اضاءة خافتة و صوت خافت للقرآن أو الموسيقى كما تحبين .. ان لم ينم الطفل هدهديه حتى النعاس ... أول يومين ممكن يتعبك لغاية ما يتعود و  لو عايزة تبطلى ترضعيه حتى ينام ممكن استبدال صدرك بتتينه حتى ينساكى تماما .. على ان تمنعى التتينة صباحا .. بس طبعا تكونى مشبعاه كويس أوى قبل ما ينام ، لأن فى أطفال بتصحى من الجوع .

و اول ما ابنك ينسى حكاية الرضاعة حتى النوم ، ابدئى فى سحب التيتينة منه لحد ما ينساها لأنها بتسبب تشوهات فى الفم خاصة فى ايام التسنين .. و لو ابنك كان بيسنن فعلا يبقى بلاش موضوع التتينة نهائيا .

لا يفضل ان تتركى الطفل فى غرفة مستقلة الآن .. لكن يفضل ان يكون فى سرير مستقل و الأحسن سرير الرضع .. الغرفة المستقلة ينقل إليها الطفل مع نهاية العام الأول و أبدا لا ينام فى سرير والديه لأى سبب كان .

الجمعة، 22 أبريل 2011

لا تبرد الشراب بالنفخ

 
لماذا نهانا نبى الله ( عليه الصلاة و  السلام ) عن النفخ  فى الطعام والشراب الساخن لتبريده؟؟؟
 و هنا ستتنوع الإجابات ما بين :
ــ حركه تلقائية عند الكثير
ــ بحكم التعود و  التكرار يومياً عند الكثير خاصه اطفالنا كل صباح...وهي النفخ على الطعام والشراب الساخن لتبريده

و الإجابة هى :
ان الحقائق العلمية تقول..انه توجد في اجسامنا بكتيريا صديقة تساعد الجسم على مقاومة بعض الامراض..و توجد هذه البكتريا و تتركز في الحلق..لكن حين يقوم الانسان بالنفخ..تخرج هذه البكتيريا مع الهواء الخارج من جوف الانسان و بمجرد ملامستها لسطح ساخن تتحول الى بكتيريا ضارة مؤدية الى الاصابة بالسرطان اجارنا الله واياكم ....
                                                              please click
و  عشان كدة ننصحكم بعدم النفخ فى الطعام أو الشراب الساخن بقصد التبريد.... فقد نهى النبي صلى الله عليه وسلم  أن يتنفس في الإناء أو ينفخ فيه وقد روى أحمد عن ابن عباس رضي الله عنهما "أن رسول الله صلى الله عليه وسلم نهى عن النفخ في الطعام والشراب". والله ورســـــــــوله أعلم.
 
و لكم تحياتى
مامى لأول مرة

الخميس، 21 أبريل 2011

اسباب أخذ الطفل الرضيع للطبيب


فى امهات كتير ما بتوديش أولادها للدكتور إلا لما يكون عيان أو فى حالة مستعصية . . و مهما كانت الحالة خطيرة بعض الأمهات لا تعيرها اهتمام سواء بسبب عدم المعرفة او الكسل ، و قد تكتفى بخبرة الجيران و المعارف و الأقارب ، و لما تدهور الحالة جدا تقول : " طيب ، واضح انى لازم أروح لدكتور الأطفال " .

و يمكن ده سبب انتشار حالة الكهربا الزيادة على المخ إللى انتشرت بشدة فى ايامنا . . و سببها الرئيسى ان الأم اولا ما بتلاحظش ان ابنها سخن ، و حرارته زادت عن الحد الطبيعى و هو 37 درجة مئوية .

و الحرارة الزيادة لو وصلت للدماغ ح تعبر للمخ ، و المخ ده الموتور إللى بيمشى بنى آدم ، فلو سخن بتبقى مشكلة اولها الصرع او الكهربا الزيادة ، و اسألوا أى حد موتور تلاجته سخن و فضل مشغلها .
و فى حالات تانية كتير تستدعى العرض على الطبيب و خصوصا لما الرضيع يكون ما بيكبرش و نموه مش تمام ، و الأم ولا هى هنا و فاكرة انها عاملة إللى عليها و زيادة .. و بتسشألأ باندهاش : " ليه ما حدش خبط عليا عشان يدينى نيشان الأم المثالية "

و عشان كدة بأنصح كل أم و خصوصا الأم لأول مرة انها تزور الدكتور بشكل دورى حتى لو ابنها ما بيعانيش من حاجة ، و اول زيارة ممكن تكون من اول اسبوع للولادة عشان تحدد مع الدكتورة او دكتور الأطفال الروتين اليومى للرضيع و هو عبارة عن : ساعات و مواعيد الرضاعة ، الفيتامينات ، الطريقة تغذية ، ساعات النوم . . هذا غير الكشف على دوران رأس و قاع العين و الوزن و الطول و عملية النمو . . إلخ
و تفاصيل زيارة طبيب الأطفال ممكن تعرفوها من الرابط ده



لكن من أهم الأسباب التى تستدعى زيارة الطبيب هى :
1. ارتفاع حرارة الرضيع : عندما ترتفع حرارة الرضيع إلى 38 ْم أعمليله كمادات باردة على جبينه أو مخدات جلدية، أو أبق رجليه دافئتين . . عند استخدامك المخدات الجلدية غطيها، بمنشفة ناشفة لمنعها من الملامسة المباشرة مع جلد البيبى .. و إذا استمرت الحرارة لساعات عليكى باستخدام اللبوس الخافض للحرارة و هو مرتبط بعمر الرضيع ، بيتباع حسب سن الرضيع . . و بعد ما يآخد اللبوس ، لازم فورا نروح للدكتور عشان يعرف سبب ارتفاع الحرارة و نعالجها ــ و ما تنشوش أن أفضل طريقة لفحص درجة حرارة البيبى و بدقة هي قياس درجة حرارة جسمه من فتحة الشرج .. ضعي الطفل على حضنك بحيث يكون مستلقيا على بطنه، رجي ميزان الحرارة حتى تنزل النقطة الحمراء تحت درجة 37ْم . ضعي الميزان برقة في شرج الرضيع واتركيه لمدة دقيقة إلى ثلاثة دقائق، ولا تتركي ابنك
أبدا والترمومتر في شرجه .. و إللى بتلاقى الطريقة دى صعبة او بتخاف ان الترمومتر ينكسر فى شرج البيبى تتستخدم ترمومتر ديجيتال و تحطه تحت باط ــ إبط ـ الرضيع .

2. الترجيع : سرعان ما يستفرغ حديث الولادة
ما يأكله . . وهذا بسبب أن معدته يكون شكلها كالزجاجة وليس بشكل كيس كما هي الحال عند البالغين الكبار . . و عشان كدة لازم نراعى ان النونو بيرجع بسهولة و خاصة عندما بميل ظهره قليلا للأمام . . و ده أمر طبيعى و ليس مرضياً ـ و من الأمور الطبيعية برضه ان النونو يكشط ، يعنى يخرج قليل من اللبن السائل أو المجبن بعد الرضاعة او عند التكريع و بيكون شكله سائل إلى جوار الفم و هو ده إللى اسمه قشط ، لكن الترجيع بيكون بإلقاء اللبن لبعيد و مابيكونش على يمين او شمال الفم . . فلو الترجيع كان مرة واحدة فى اليوم مافيش مشكلة . . لكن الأمر اللى يستدعي أخذ الرضيع إلى الطبيب عندما يستفرغ باستمرار ولمدة طويلة أو أنه استفرغ كمية كبيرة من اللبن او الطعام . . و زيارة الدكتور ح تحدد ان كان الترجيع ده نتيجة ميكروب أو بسبب ضيق في مجرى الإثنى عشر أو الربو أو التهاب السحايا .

3. الطفح الجلدي : يازم علاجه بسرعة عشان ما يسببش إلتهابات و ميكروبات ، و للطفح الجلدى أسباب عديدة ،و من اولها الطفح الجلدى بسبب الحفاضة ، مما يتسبب فى إحمرار المنطقة الحساسة عند الرضيع ، و لمنع هذه المشكلة الجلدية عليك بتغيير الحفاضة
باستمرار واستعمال الكريم الملطف للأطفال ، و لكن فى حالة الإحمرار أو الإلتهاب يجب سرعة الذهاب إللى الطبيب الذى سيصف لك مرهم خاص للرضع و لحالته . . . و قد يكون الطفح الجلدى بسبب ملابس الرضيع او المادة المستخدمة فى غسيلها ، و قد يكون بسبب طعام و أكل الرضيع و هو ما يسمى بحساسية الطعام .

4.الإمساك : إذا واجه ابنك صعوبة في الإخراج، أو إذا كان برازه قاسيا ومكتلا، هذا لا يعني أن عنده إمساك لكن عنده نقص فى السوايل . . و ده بيحصل نتيجة نقص فى الكميات الغذائية أو التقيؤ المستمر . . و عشان نشخص ان ابنك عنده امساك لازم لا يخرج أو يتبرز لمدة 3 ايام و فى الحالة دى استخدمى لبوس الجلسرين للرضع و الأفضل و المستحب انى اعطيه قليل من أعشاب البابونيج أو الشيح ، المهم نزود كمية السوائل و خاصة عصير البرتقال بشرط ان ابنك يكون عمره اكبر من ثمان شهور لأن حموضة البرتقال فيها خطورة على معدة الرضيع . . و ان كان الإمساك مستمر أو ان منطقة الشرج تنزف قليلا بسبب الاضطرابات عند محاولة الإخراج ؛ هنا لابد من زيارة الطبيب للبدء فى العلاج و معرفة الأسباب المحدثة له .
إذا ظهر دم على براز الرضيع
من الفتحة الشرجية خذيه إلى المستشفى فورا دون أن تغيري حفاضته لكي تريها للطبيب

5.اليرقـــــان أو الصفرا : معظم الرضع يصابون بها فى اول ايام ولادتهم و سببها هو عدم اكتمال وظيفة الكبد، فلا يستطيع الكبد مراعاة الصبغة الصفراء القادمة من خلايا الدم الحمراء المحطمة، ويختفي اليرقان الوظيفي عادة خلال أسبوعين من ميلاد الرضيع ، عشان كدة الصفرا هى أول حاجة بنقيسها بعد الولادة ، ف إذا استمرت أكثر من أسبوعين أو اصفر رأس الرضيع وأصابع أقدامه، فيكون ذلك يرقان مرضي، وهذا يعني أن الطفل بحاجة لرعاية خاصة . و يجب ادخاله المستشفى . . ف إذا ارتفعت نسبة الصبغة الصفراء 20 % ملجم، فقد تؤدي إلى حالات حرجة، وهو تأثر الخلايا الدماغية في الوسط الدماغي ، وتصبح صفراء وذات نسبة عالية من الصبغة الصفراء وبالتالي تدمرها، أو قد يصاب بالشلل . لهذا لا تنتظري كثيرا حتى يصفر لون ابنك كثيرا، بل خذيه للطبيب فورا

6.مغص القولون: ده مش مرض لكنه عرض يظهر خلال عملية النمو . . غالباً بيخلى البيبى يعيط ، و انتى مش عارفة السبب لأنه لا بيكون فى أعراض حرارة ولا قئ أو إسهال . . يبدأ هذا العرض بعد 3 أسابيع من الولادة، ويستمر حتى يصل الرضيع إلى 3 أشهر من عمره . . في هذه الحالة لا ينام ليلا ويبكي بذعر ، و يستيقظ الأهل ولا يحتملون الوضع . . و من أهم العوامل المسببة هلمغص القولون هي الضغوط النفسية، أو التشنجات المعوية الشديدة أو بسبب توسيع الأمعاء من الجو، أو بسبب عسر الهضم نتيجة الإفراط في الطعام .. ف إذا أصبح هذا المغص القولوني أسوأ في المساء، يكون سببه الضغوطات الناتجة عن عدة مؤثرات مثل : صوت التلفاز، الأصوات المرتفعة، أو اختلاف جو البيت . فالطفل الحساس يصاب بأصعب حالات المغص القولوني، إذا واجهت مثل هذه الحالة ستشعرين أنه من الصعب جدا إسكات الطفل، ولكن عليك أن تريحيه وتجعليه يستريح بمساعدة أفراد الأسرة . .. و ساعات كتير بيكون هذا المغص سببه الهواء المستنشق و هنا يفضل تكريع البيبى ، يعنى يسندى الرضيع على كتفك ثم تضربيه برفق على ظهره ضربة خفيفة حتى يتجشأ .
في بعض الأحيان تظهر مثل هذه الأعراض نتيجة الأسباب الأخرى مثل : الحساسية، الاضطرابات المعوية أو التهاب الصفاق و ده كله ح يساعدك الطبيب فى معرفته فلا تتلكعى فى زيارته

7.فى حالة الاسهال : لا تشخص حالة الرضيع انها اسهال إلا اذا تبرز فى اليوم الواحد أكثر من خمس مرات و يكون البراز سائل ــ ليس متكتل أو جامداً ــ و فى الحالة دى اول حاجة نعملها قبل الذهاب إلأى الطبيب هو تخفف الأم من شرب الحلبة او الملينات لأنها تكثر من سيولة براز الرضيع ، و ان كان الرضيع عمره فوق ست شهور فيجب ان نطمعه مواد نشوية و ان كان اقل من ست شهور فمن الممكن اعطاه القليل من ماء الأرز المخصص للرضع و ليس الأرز الموجود فى البيوت . . لكن يجب ان نسارع إلى الطبيب فى حالة عدم توقف الإسهال حتى لا يصاب الرضيع بالجفاف .
و لكم تحياتى
مامى لأول  مرة

الأربعاء، 20 أبريل 2011

تعليم الصلاة للأطفال

إلى كل من يهمه الأمر و يرغب فى تعليم الأطفال الصلاة ..
اجعلوا الطفل يشاهد هذا الفديو بشكل مستمر و اتركوا الطفل يقف إلى جواركم و أنتم تصلون
حتى يتعلم الركوع و السجود و ما يقال فيهما
ثم يتعلم الطفل قراءة الفاتحة بمساعدتكم ثم يقرأها لوحده
و بكدة يبقى مستعد لدخول الصلاة

و يبقى مش فاضل غير اننا ندرب الطفل على الإستمرار فيها
و الصبر عليها
و التوجه للوضوء اول ما يسمع صوت
المؤذن




و لكم تحياتى
مامى لأول مرة

الاثنين، 18 أبريل 2011

تعرفوا إيه عن الطفل فى الشهر العشرين

على الأهل ان يعرفوا كل امكانيات ابناهم و تطورها عند كل مرحلة عمرية ، وده ليه ؟؟؟؟؟
عشان يقدروا يختاروا الأسلوب المناسب للتعامل مع الطفل فى هذه المرحلة

و النهاردة ح نكلمكم عن مهارات الجسدية لطفل عمره 20 شهر :

ــ اولا بيكون الطفل عنده قدرة على الجرى

ــ من الممكن انه يصعد السلالم (الدرج) بمفرده بشرط يكون فى حاجة يمسك فيها زى سور او درابزين زى ما بنقول فى مصر

ــ يحتاج  الطفل بعض المساعدة في نزول السلم لأنه بيتملك احساس بالخوف من السقوط

ــ يتمكن الطفل فى عمر 20 شهر ركل الكرة (الطابة) أيضاً.

ــ لا يستطيع غالبية الأطفال  في سنّ 20 شهراً القفز أو رمي الكرة (الطابة) من فوق الكتف بمهارة.

 

مشاكل الطفل فى هذه المرحلة :

أولا : خروج الأب أو الأم :
قد يشعر الطفل بعدم الاستقرار لو غادرت الأم أو الأب او أى شخص يتعلق به الطفل  أو أي شخص  هام بالنسبة له، ذلك أنه يشعر بالآمان فى حضوره .. و الحاية تتطلب شرح بسيط للطفل لا يتجوزا أكثر من جمل او جملتين ؛ مثلا نقوله : "  أنا ح أخرج دلوقتى و أرجع بعد ساعة أو "بعد الغداء" أو "قبل المغرب" أو أي وقت آخر" 
 و الموقف مش  محتاج أكتر من كدة ، فلا تماطل في الخروج والمغادرة. . لكن أعطوا الطفل  قبلة سريعة و انصرفوا .

ثانيا : السلوك العدواني

غالباً ما يتحول الأطفال  إلى الضرب والدفع والعضّ والشدّ بقوة وغيرها من الأفعال التى تبدوا عدوانية و هى فى الحقيقة على غير ذلك تمام ، فالطفل يظهر هذه التصرفات ليبدوا و كأنه شخص مهم .. لكن ده ما يمنعش ان فى أطفال تانية بتعمل نفس التصرفات لكن بمنطق الاستكشاف ؛ متسائلة : "  ماذا يحصل لو ضربت أختى؟ هل يحدث الأمر نفسه لو ضربت أخويا ؟ طيب لو ضربت نفسى أحس بنفس الألم ؟ يعنى ممكن أعيط لو ضربت نفسى ؟؟
لذلك ينصحكم الأطباء و المتخصصون فى علم التربية بعدم المبالغة  فى رد الفعل  تجاه سلوك طفلكم ابن هذه المرحلة العمرية . . ولو قابلتم السلوك العدواني للطفل بعدوانية : ف سيتعلم أن الضرب مسألة مقبولة.
عشان كدة لازم نتعامل مع الموقف بهدوء، و نشرح للطفل بشكل سهل و مبسط  أن مثل هذه الأفعال غير مقبولة – و ما تتأثروش  من رد فعله لأن مشاعره فى اللحظة دى ممكن تكون حادة.

ثالثا : استكشاف الجسم

 أطفال هذه المرحلة  فضوليين بطبيعتهم – و أكتر حاجة ممكن تثير فضولهم هى  أعضاءهم التناسلية. .. فاكرين لما كنا بنلاقيهم كتير بيلعبوا بأصابع أيديهم وأقدامهم لما كانوا أصغر سنّاً، لكن فى المرحلة دى ح يبدؤون باللعب بأعضائهم التناسلية. .. و الموضوع ده لا يشترط ان يمر به كل الأطفال ، لكن من يقوم بهذه الأفعال يجب ان لا نعنفه قدر ما نشرح له بهدوء .. ف عندما يفعل طفلك ذلك أمام الملأ، لا تقومي بردة فعل قوية..  عليك فقط أن تشرحي له أن مثل هذه الأشياء خاصة نقوم بها في المنزل. . و عندما يكررها فى المنزل نشرح له اننا لا يجب ان نقترب من هذه الأمان إلا فى الحمام ، و إذا لمسها فى الحمام نشرح له انها آماكن خروج القذورات و بذبك ستلوث يده و إذا أكل بيده الملوثة سيتألم من بطنه .. و طبعا نستخدم مفردات الطفل من كخ ، أى ،  واوة click please

أهم ملامح الطفل فى الشهر العشرين
انه سيحث عن دور ، لذلك من الممكن أن نطلق عليه اسمه المساعد الصغير ..و  لازم كلنا نعرف ان  أكثر الأعمال روتينية وإثارة للملل ستثير إعجاب طفلك بشدة..  سيراقبك باهتمام ولعله يتشوّق جداً لـ"مساعدتك". عليك تنمية رغبته في لعب دور المساعد في أعمال المنزل عبر إتاحة الفرصة أمامه لمدّ يد العون.

المهارات التي يتمّ تنميتها: الخيال، والمشاركة بدور في هذا العالم
اولا : لتنمية الخيال :
نختار دور و نبدأ نمثله دون استخدام ادواته .. يعنى مثلا نعمل اننا بنطبخ من غير بوتجاز او نار او خضار ، لكن ممكن نجيب حلل و مكعبات نعملها الأكل أو الهم زى الأطفال ما بيسموا الأكل ، و نقلب و ندوق و نطبخ طبيخ كامل

ثانثا : لإيجاد دور :
ــ نخلى الطفل يحط معانا علب الزبادى فى التلاجة ، زجاجة اللبن البلاستيك ، علب الجبن
ــ نحمله ليغلق النور من الحجرة التى سنخرج منها
ــ ينظف مكان نظيف ، و عشان نعمل الحكاية دى محتاجين فوطة تنضيف ، ومكنسة صغيرة خفيفة الوزن.
ابحثي لطفلك عن مكان آمن لكي "ينظّفه من الغبار"، أوأعطيه فوطة تنضيف ثم أريه كيفية تنظيف الطاولة من الغبار.. و طبعا  لا تستخدموا أي مواد تنظيف و خاصة التى تحتوي على مهيجات وغيرها من التراكيب الكيميائية الضارة .. لو أنجز  الطفل مهمة تنظيف الطاولة، يمكنه أن ينظف شيئاً آخر، مثل أحد المقاعد (الكراسي) أو أحد الأبواب أو بعض ألعابه. عندما يكتفي من ذلك، يمكنك أن تنتقلي به إلى عملية الكنس. لعل طفلك سيكون سعيداً جداً بكنس أرضية المطبخ فيسمح لك بأداء ما تريدين من مهام أخرى.


Number two

لعبة الفزورة :

لقد كبر طفلك الآن بما يكفي ليتذكّر شيئا ًلم يعد في مكانه الأصلي. اختبري هذا التطور من خلال لعبة التخمين التالية. . يعنى قبل ما تغيريله اطبلى منه يجيب بنطالونه ، فوطته ، شبشبه ، عشان يتعلم يحط كل حاجة فى مكانها و يتعلم لما ندور عليها نلاقيها


و لتنمية هذه المهارة سوف تحتاجون إلى:  لعبة صغيرة من البلاستيك على شكل حيوان ضعها في راحة يدك.
 ثم ضعي يديك خلف ظهرك (مع تبديل مكان الغرض من يد إلى أخرى إذا لزم الأمر). ضعي يديك أمامك واطلبي من طفلك أن يخمّن في أي يد أخفيت الشيء. لو اختار إحدى اليدين، افتحيها ببطء لمزيد التشويق. من فترة لأخرى، يمكنك أن تقومي بخدعة عبر وضع هذا الغرض بهدوء وراء ظهرك وإظهار يديك الفارغتين مما سيدهش صغيرك في المرات القليلة الأولى، ولكنه سرعان ما سيستنتج أين مكان اللعبة ويسرع للعثور عليها. .
امنحوا الطفل الفرصة ليقوم بدوره بلعبة الإخفاء هذه، ولكن لا تتوقعوا أن تكفي يداه الصغيرتان لإخفاء اللعبة. لا تنسي أن تعبروا عن فرحكم في كل مرة ينجح فيها، وعن خيبة أملكم فى كل مرة يخفق فيها .
و لكم تحياتى
مامى لأول مرة
http://la3ya3nyno.blogspot.com/

الخميس، 14 أبريل 2011

لكل أم عندها توأم - خطوات حمام الرضيع



حالة من الفزع تتملك كل أم تتخيل انها ستقوم بتحميم رضيعها ، و خاصة ان كانت أم جديدة او رضيعها رفيع جدا و حجمه اصغر من الفرخة اللى محتاجين نغسلها قبل ما نطبخها ... و مش عايزة اخبى عليكم ان موضوع الفرخة و تدريبى على غسلها كان بمثابة تدريب جيد لى لكى أتشجع على تحميم بنتى  هوهوز" و التى كانت رفيعة جدا لدرجة انى كنت مسميها " المخلى " .. لكن مع اول نقطة ماية فى بانيو الطفل الرضيع و خصوصا اللى لسة مولود اكتشفت ان موضوع غسل الفرخة ده بيشجع الواحد طول ما هو بعيد عن البىبى .. و زى ما بيقولوا اللى ع البر عوام ..  لأنى أول ما مسكت بنتى وقررت أحميها ما تملكنيش غير احساس انها ح تتزحلق من إيدى سواء لأنها بتفرك ، سواء لأنى مش مسكاها كويس ، سواء بسبب الصابون و ممكن تتزفلت منى .. و يمكن ده اللى خلانى   اركز مع الممرضات و هى بتحمى بناتى بعد تانى يوم من ولادتهم .. لأنى عندى قناعة انى باحمى بنى آدم مش قرخة .
كانت كبيرة الممرضات تمسك بقبض يدها ظهر " هوهوز" ، الإيد كلها ماسكة الضهر بالرقبة بالراس ، شوفوا التحكم . . و الإيد التانية بتحط بيها الشامبو على شعرها . . تدعك الشعر ، تنزل بالشامبو على الوش ثم الرقبة ف البطن و الظهر و باقى اجزاء الجسم ، و اخيرا تبدأ فى انزال الشامبو بالماية الموجودة فى البانيو ، و جمبها ممرضة تانية تصب عليها الماء النظيف ليتأكدوا ان لا أثر للصابون ، و فى اقل من ثانية تقوم الممرضة التالتة بالتنشيف ، و ممرضة رابعة تحط الكريم و تلبس الحفاض ، و ترجع كبيرة الممرضات تلبس الهدوم و تحط فى اللفة . . كنسلتوا بيحمى رضيع وزنه اتنين و نص كيلو . . و الحمام ما خدش فى إيدهم من أول خلع الملابس لحد لبس الملابس الجديدة أكتر من خمس دقايق . . يا مامىىىىىى ، و مطلوب منى أعمل انا كل ده لواحدى . . ربنا يستر ، على العموم لسة بدرى ، لسة قدامى يومين فى المستشفى ، اعتبرهم بعثة للتدريب على حمام الرضع . . و طبعا مر اليوم الأول بسرعة رهيبة و صبرت نفسى بان لسة اليوم التالت عقبال ما يجى تكون الحكومة اتغيرت . . لكن يا خسارة ، لأ مش عشان الحكومة ما اتغيرتش ، انا إللى دمى اتغير لما عدى اليوم التالت زى لمح البصر و رجعت البيت . . قلت مش مهم ، بناتى لسة مستحمين فى المستشفى ، و فضلت على كلمة مستحمين فى المستشفى مستحمين فى المستشفى لمدة تلت تيام و فجأة ضميرى صحى . . لازم أحملى البنات . . . و هنا ظهرت سيدة توم ، توم مين ؟ توم صاحب جيرى . . قريبتنا السمراء و اتبرعت مشكورة و قالت بحماس انا أحمى البنات ، و وافقت على طول ، دى تعتبر خبير أجنبى ، ست عندها اربعة من الأبناء ح تغلب فى حمام بنتين عمر كل واحدة منهم ستة تيام
click please


و تحمست سيدة توم [قريبتنا السمراء] و همت لتنظيف حوض الحمام ، و بدا الفزع على وجهى و رفضت بشدة موضوع الحوض ده  .. لأ تحميهم فى الحوض إزاى ، واحدة تحرك راسها تتخبط فى الحنفية ، ولا تتزفلت ف تخبط فى رخام الحوض  .. و بدأت أشك فى قدرة هذه السيدة على حمام البنات .. و لأن القريبة السمراء متأكدة من جهلها و ضعف معلوماتها ، فقررت ان تثبت لنا قدرتها الفائقة ... و طلبت بقوة ان نحضر لها وعاء لتحميم البنات  .. ف قدمناه  لها .. فظهرت علامات الفزع على وجهها و تحول فزعها إلى رعب عندما اقتربنا منها ببانيو البنات ، و تمكن الانهيارمن سيدة توم [قريبتنا السمراء] ، و رفضت بشدة ان تحمى بنتى فى البانيو الخاص بهما ، و أخيرا وجدنا حل وسط يرضى جميع الأطراف ، و هو ان يكون استحمام بناتى بالوعاء البلاستيكى و اسمه الحركى " كروانة " .


أخذت السيدة بالقاء نفسها على الأرض و احتضنت الكروانة كمن ينوى تزغيط بطة ، و طلبت منى أن اخلع ملابس ابنتى ثم وضعتها بالوعاء ، و بدأت فى غسل الجسم أولا ثم لفت ابنتى بالفوطة و انتهت بغسل الرأس، ثم سلمتنى " هوهوز" لأقوم بوضع الملابس عليها . . و هنا تعاطفت مع ابناء هذه السيدة الأربعة ، فقد عملتهما طوال هذه السنين على أنهم اربع بطات ، و هذا و ضح لى سبب سمنة بعضهم


و رغم تألمى من مشهد استحمام بنتى على يد سيدة توم إلا انى لم أتجرأ على القيام بالموضوع بنفسى خاصة و انها كانت تحميهم يوم فى و يوم مافيش . . إلى ان ذهبنا لإحدى صديقتنا و عند رحيلنا وجدت نملة تسير على لفة "جى" هنا قرر العودة سريعا ً للمنزل ، و تملكتنى شجاعة غريبة و قررت ان احمى بناتى حالا ، حتى لا تتسرب نملة لجسمهم او انفهم أو فمهم

ملأت البانيو ــ الخاص بالرضيع ــ   بالماء الفاتر لأننا كنا فى الصيف مساءا ، و جهزت إلى جوارى صابون الرضع و الفوطة الناعمة التى استخدمها كليفة ، و ادوات اصب بها على رأس الرضع و جسمهم وو عاء بلاستيكى .و بشكير الرضيع
و فى حجرة النوم كنت قد جهزت فوطة على السرير ، و غلى جوارها كريمات البيبى سواء الخاصة بالحفاض او كريم الجسم او الزيت و قطن الأذن ــ الخاص بالرضع ــ و ملابسهم


ملآءت الماال بالماء الفاتر و لأى أم جديدة يمكنها وضع كوعها فى الماء لمعرفة درجة حرارته قبل وضع الرضيع بها ، و إللى عايزة دقة أكتر فى معرفة حرارة البانيو ممكن تستخدم ترمومتر لازم تكون حرارة الماية 37 درجة .. و نجلى بالنا من الحرارة عشان ما تلسعش البىبي و تسببله التهابات


فى اول ستة أشهر من عمر الرضيع لازم يكون معاكى حد يساعدك فى حمام البىبى خاصة لو كنتى أم لأول مرة ، لكن لو عندك خبرة كافية و قدرة على التحكم فى حمل الرضيع  و تليفه و تشطيفه ، ربنا معاكى .

للأم الجديدة تضع الرضيع فى البانيو بحيث يكون الماء مغطى تلت الرضيع فقط ، تسنديه بيدك و اليد الأخرة بها الليفة الناعمة او القماشة او فوطة الاستحمام او الإسفنجة .. لازم يكون معاك شخص للمساعدة ، هذا المساعد   يضع لك على الليفة  الصابون ، ولا تنسى ان يدك الآخر تسند البىبى فى البانيو اوعى تسبيه لأى حال من الأحوال ليتزحلق و يشرب ماية و يشرق  
تبدأى فى غسل جسم الرضيع كله  بداية من الرأس فالرقبة فالظهر فالرجلين و المقعدة و لا تنسى الصرة .. تتركى الليفة جانبا ، و بيدك المغرقة بالصابون امسحى خلف الأذن .. و أخذرى دخول الماء فى أذن الرضيع او فمه .. تبدأى فى صب الماء على جسم الرضيع  و يفضل ان من يعاونك يبدأ فى صب الماء على جسم الرضيع و انتى تحركى يدكى بشكل يسمح بنزول كل الصابون من فوق الطفل .. و ممكن تغسلى الشعر بالشامبو قبل الجسم أو بعده زى ما انتى عايزة .
يد تسند الطفل الرضيع الشبه جالس فى البانيو و يد يضع لك من يساعدك فيها الشامبو ، تدلكى برفق فروة رأس الطفل الرضيع بالشامبو ، ثم يبدأ من يساعدك فى صب الماء على رأس الطفل و انتى كل دورك صد الماء و منعه من الوصول لجبين البىبى حتى لا تنزل إلى أنفه أو فمه ، إيدك تآخد الماية إللى وصلت للجبيبن و ترجعها تانى على راس الرضيع .

بعد ما إتأكدتى من تشطيف الطفل تماما ، لفيه فى البشكير جيدا ، نشفيه كويس أوى ، ضعى اللوشن على جسمه او الزيت زى ما تحبى ، لبسيه الجزء العلوى من ملابسه كلها .. إبدائى فى تلبيسه الحفاض بعد وضع كريم الحفاض .. فى اول ثلاثة أشهر مشطى شعره بالفوطة ، فيما بعد يمكنك شراء فرشاة صغيرة تباع خصيصا للرضع.. و ما تنسيش تمسحى الصرة بالسبرتو لحد ما تقع ، و بعد كدة تنضفيها بقطن الودان امبلل بنقط سبرتو ، ثم تضعى عليها قطعة كريم او نقطة زيت عشان ما تنشفشف .. و طبعا نحافظ على نظافة أذن الطفل الرضيع باستخدام قطن الودان المخصص للرضع و إللى ما يعرضهمش لأى ضرر ، و استخدمه برفق شديد عشان ما أضرش أذن الطفل  

و بعد ما انتهى الحمام بسلام ممكن تحطى الطفل فى سريره و تبدأى فى حمام توأمه بنفس الخطوات السابقة
و لكم تحياتى
مامى لأول مرة
http://la3ya3nyno.blogspot.com/

الأحد، 10 أبريل 2011

الجنين يتأثر بصوت القرآن



ــ لقد تأخرت عن موعدها
ــ متخافيش زمنها جاية
ــ لأ أنا مش عيزاها تيجى
ــ أمال مستعجلة عليها ليه ؟!!!!
ــ مش مستعجلة ، انا عايزة أعرف هى متأخرة قد إيه عشان اختبار الحمل

هذا كان حديثى لنفسى قبل اجراء اختبار الحمل . . مبروككككك ، أخيرا تحقق الحلم الذى لم أنتبه إليه إلا مؤخرا .. لقد عرفت انى حامل بعد تأخر حملى لمدة سبع سنين..

و كان خبر حملى مش على طريقة الأفلام : " مبروك المدام حامل "
لكن عن طريق " الحقنى يا كوكو ــ كوكو ده الإسم الحركى لزوجى داخل المنزل ــ الحلوة اتكلمت و طلعت نونوهات ، قصدى اختبار الحمل قال أنى حامل . . و لأن زوجى رجل حويط قرر اصطحابى إلى الطبيب فهو لن يبدد فرحته هباء ً ، يعنى يفرح و يزقطت و بعدين تطلع كذبة ابريل . . و تأكد زوجى من الطبيب ان هناك كيس حمل فعلا ، لا ليس كيس واحد بل اثنين . . و الحمد لله

" يبقى الحلوة اتكلمت و طلعت ببيهات "
و بدل ما كنا بنقول مافيهاش بيبى ، مافيهاش بيبى ، طلع فيها اتنين و الحمد لله .. فعلا إللى يصبر ينول .. و رغم انى قررت فى آخرة مرة من فحص التبويض عند الدكتور و لم تنجح ، قررت عدم الذهاب للطبيب ، و جبت جهاز كشف التبويض فى البيت ، و عملت لنفسى نظام تلقيح بعيد عن الأطباء و تعليماتهم و طوابير الإنتظار فى عياداتهم  .

و عندما عرفت اننى حامل أخذت بالبحث عن ما يجب ان تراعيه الحامل تجاهه رضيعها .. و من أهم ما وجت : انه يجب ان أتحدث إلى جنينى من آن لآخر لأوجد نوع من الإتصال بيننا . . و امتد الأمر ليس فقد عند الكلام المعتاد و إنما عندما يؤذن الآذان يفضل أن  أربطت على بطنى و انا أردد الآذان  بهدوء و سكينة لتنتقل  الحالة لجنينى  .. و عندما أقوم للصلاة ، أقيم الصلاة بصوت مرتفع و أنا أتحسس جنينى بحنان ليربط بين صوت الآذان و حنانى ؛ فيتعلق به و بى . . و كنت حريصة على الأمر بقوة حتى و انا فى أكثر ساعات حياتى آلما بسبب الحمل .

 و بعد وضع جنينى ــ توأم زى ما انتوا عارفين و العارف لا يعرف ــ مش ح أقولكم ان الحال اتغير ، لأ الحال بقى فى سكة تانية خالص ، بقى مجهد ، مجهد جدا ، مجهد جدا خالص مالص . . تصوروا معايا ولادة قيصرة ، و توأم ، و مافيش أم و لا أخت تساعدنى ، و لا حد اثق فيه . . حاجة أقوى من دراما حسن الإمام

و كأنى نسيت كل إللى قريته و كنت حريصة على تنفيذه إلا حاجة واحدة و هى انى أسمع بناتى القرآن . . فهو أول شئ كنت حريصة على ان يتسلل لمسامعهما بعد عودتى من المستشفى و دخولنا المنزل . . ووجدت انهما تبدوان فى حالة استرخاء شديدة و تنامان بعمق عند سماع الآيات الكريمة. . عشان كدة كنت بأشغل إذاعة القرآن الكريم ، الوكيل الوحيد المعتمد حكوميا ، و بكدة كنت ضامنة ان القرآن ح يفضل فى البيت طول اليوم ، لكن كانت البرامج الاذاعية تزعج بنتى بشدة ؛ مرة لحدة صوت المذيع ، و مرة اخرى لارتفاع الصوت فجأة ، ف مستوى الصوت كان متذبذب بقوة زى قرارات الحكومة حبة فوق و كتير تحت ، و كنت لازم أشتغل مهندس صوت عشان أقدر أظبط اللفل level حفاظا على آذان بناتى .


و لأنى كنت محتاجة كل دقيقة و حريصة على عدم اهدار ثانية واحدة خصوصا اول ثلاثة شهور فكان لازم اعتذر عن وظيفة مهندس الصوت إللى باشتغلها فى بيتنا ، لأنى محتاجة آكل كويس و أشرب كتير ، عشان أقدر أرضع البنات . . طيب أعمل إيه عشان بناتى اتعودت تنام فى هدوء و على صوت القرآن . .
يمكن المشكلة دى كانت محلولة أول الولادة ؛ لأنهم اتولدوا فى شهر شعبان فبعد كام يوم دخل رمضان و الروحانيات فى هذا الشهر و الطقوس المصرية تبعث على السكينة . . فالجوامع تعلو بصوت الآذان و الصلاة و القرآن ، و التلاوة لا تنقطع فى البيت . . و "جى" و هوهوز" كانتا صغيرتان جدا و تحتاجان للنوم بشدة كل ثلاثة ساعات و هى فترات ما بين الرضاعة . . لكن عندما كبروا اكثر و مضى شهر رمضان أصبحت أبحث عن شئ يساعدهم على النوم فى الهدوء ، و لم أجد غير الحمام الدافئ ، و لكنهما تحتاجان للنوم مرتين فى اليوم ، فكيف أساعدهما . . لا يمكن أن أحميهما كل ثلاثة ساعات ، فانا لست بكينج كونج و هما ليستا السندباد البحرى ليعيش فى الماء طوال اليوم


لذلك قررت ان أبحث على النت على موسيقى تساعدهما على استرجاع هدوءهما . . و وجدت مقطوعة موسيقية ساحرة تساعد فعلا ً على تهدئة الأعصاب ، و كانت بناتى تنام عليها .. فى أى وقت و فى كل مكان


و استمريت على هذا المنوال خاصة بعد ان عرفت تأثير الموسيقى على الرضيع فهى :
1.    تهدئ الرضع
2.    تساعد على تخفيف آلام الرضيع
3.    كما ان الاستماع إلى موسيقى جميلة تبعث على الابتهاج و السعادة ، و هذا الأمر يساعد على تدفق الدم فى الجسم بشكل أفضل و بذلك تكون مفيدة للقلب
4.    إلا ان بعض الأبحاث أكدت عدم ثبوت تحسين الموسيقى" على الصحة بشكل عام" رغم تأثيرها المحتمل على الجسم والعقل معاً.
5.    بينما أثبتت دراسات أخرى ان " للموسيقى" تأثير على الجسم والعقل و لكن بشكل محدود . . فان كانت الموسيقى تبعث على السعادة فهذا نتيجة لتدفق مركبات إندورفين أو تلك التي تشبه من الدماغ عند الشعور بالسعادة". . و هذا الأندورفين يحمي الجسم . . أما " الأوعية الدموية" فتتمدد وتخفض خطر الإصابة بالالتهابات وتمنع الصفائح الدموية من الالتصاق .

ووقفت لحظة عند آخر نقطتين ، و أخذت أفكر فيهما بعمق ؛ لكنى لم اطل الوقوف . . خاصة و قد عرفت أن الإستماع للموسيقى لمدة 30 دقيقة فقط في اليوم يمكن أن تساعد الأطفال الخدّج على الراحة وعدم استعمال الكثير من الطاقة، الامر الذي يساعدهم في النمو بشكل أسرع. . ف 10 دقائق من الإستماع إلى الموسيقى ، تتسبب فى تراجع مستويات الطاقة لدى الأطفال [الخداج] بنسبة 10 إلى 13 بالمائة. . .. و هذا التأثير على مستويات الطاقة يساعدهم جزئياً، على الاسترخاء وزيادة الوزن، وبالتالي نمو الطفل بشكل أسرع."

و قلت ان كان ده حال الموسيقى ، فما هو تأثير القرآن على الرضع ؟؟
و بدأت رحلة البحث عن هذا الموضوع ... ووجدت الآتى :  
استماع الرضيع الى القرآن الكريم لا يفقده شئ من الطاقة على العكس قد يمده بطاقة روحانية لها تأثير بليغ المدى .
 و مع ذلك لم تؤثر على هذه الدراسة و لم تجعلنى أغير اتجاهى فى جعل بنتى تنام على صوت المقطوعة الكلاسيك التى أخترتها لهما إلا ان جاء يوم غريب و كأن زعبيب أمشير قد قررت ان تلتقى بخماسين الربيع فى بيتنا
و فى هذا اليوم نشبت مشاجرة حادة بينى و بين زوجى ، لا مبرر لها و لا حتى اتذكر سببها ، و تذكرت ان على جهاز الكمبيوتر يوجد سورة البقرة ، و قد علمت ان قراءة البقرة بالمنزل تمنع الشيطان من دخوله ، و إذا قرأت كل ثلاث أيام كان بيتا هادئا ً مريحا ، و قررت ان اشغل الكمبيوتر لأستمع لسورة البقرة ، و هنا لاحظت ان بناتى تنام بعمق شديد و تتمتع بسكينة و هدوء . . فتذكرت اننى كنت أسمعهم القرآن من أول يوم دخلوا فيه للبيت و لا اعرف لما نسيت هذا الأمر و لماذا قررت استبداله بالموسيقى . . و قررت ان أسمعهم القرآن بشكل يوم و عرفت أمور هامة يجب أن أذكرها لكم حتى لا تحرموا رضيعكم نعمة الإستماع إلى القرآن الكريم أثناء الرضاعة و أثناء النوم و هى :

ــ ان استماع الرضيع للقرآن من أول يوم الولادة يساعده فى عمر السنة ونصف على النطق و الكلام ، ليكون من بين مفرداته بعض الأدعية البسيطة مثل الله اكبر ..الحمد لله

ــ و للبنات استجابة أسرع للكلام ، لذلك ستحفظن أجزاء من القرآن في عمر سنتين أوسنتين ونصف . . رغم ان الطفل فى هذا العمر لا يتكلم جيدا ولكن مع الترديد المستمر للقرآن أثناء الرضاعة و النوم و حتى أثناء المداعبة فسيتكون لديه حصيلة لغوية ، يتعلم من خلالها كل سلوك طيب ..وهو موقف ينمي الانتماء والارتباط والطمأنينة

ــ كما أن الإستماع إلى القرآن سيقوى لدي الرضيع حدث السمع والبصر والفؤاد واللسان .


لذلك لم يقتصر الأمر على تشغيل الشرائط الصوتية أو  الملفات الصوتية على الكمبيوتر ، لكن كنت أقرأ القرأن و أنا أرضع بناتى ، فعندما كانتا فى اولى أيامها كانتا تصمتا و تنصتا انصاتا متأملا يسودها السكينة و الهدوء ثم تنام نوما عميقا . .


و بالفعل أصبحت أحتفظ بمكتبة صوتية للشيخ عبد الباسط عبد الصمت يتلو بها القرآن كاملا ً ، اسمع بنتى يوميا قرابة الساعة و أكثر . . و  حافظت على هذا الروتين بعد ان عرفت  و تأكد ان سماع الرضيع للقرأن من أول يوم لولادته حتى سن ثلاثة سنوات تساعده على حفظ القرآن ، و نطق المفردات بشكل سليم و تكون مخارج ألفاظه صحيحة .

 و ده إللى ح أعمله و ح أقولكم عن آخر تطوراته و إللى بيحصل أول بأول بكامل التفصيل . . موعدنا بعد سنتين و أربعة أشهر إلا 13 يوم . . مع اتباع النظام إللى ح تلاقوه فى رسالة نظام الرضيع لسماع القرآن
ــ النهاردة بناتى عندهم 20 شهر ، يعنى داخلين على السنين و بالفعل لاحظت انهم نطقون  عدد من الكلمات أكثر من هم فى سنهم فمن الشهر الثالث كانوا يقولوا " إيه ده ؟؟" و ظلت معهم حتى سن السنة و بدأت "جى" تقول مامى ـ قطة ـ جيا يعنى جيار ــ ججه يعنى جبنه ـ بلا يعنى لبن .
و أختها "هوهوز" عندما مشكلة فى حروب المد ، عشان كدة ما بتعرفش تقول مامى ؛ لكن بتقول ماما .. و باقى الكلمات زى " جى " ماعدا بيضة بتقول عليها " ديدة " .. أما " جى " بتقول عليها " بى يعنى بيض .. و كلمة " بى " عند "جى " تعنى باب او رف أو بيضة زى ما قلنا من شوية .

و كلمة " بابا " تعنى بابى ، أو بوبى ، أو بمبرز .. و البليلة يعنى بلالا ، و الطماطم يعنى طاطا .. و شلينى يعنى هوبا .. و اقلع بتبقى الع مع اضغام حرف العين نصه مختفى .. و لو افتكرت حاجة تانية ح اقولكم عليه
و لكم تحياتى
مامى لأول مرة


الأربعاء، 6 أبريل 2011

سؤال متكرر على لسان كل أم

سؤال متكرر على لسان كل أم :
السلام عليكم انا ابنى عمره سنة و10 شهور ووزنه 11كيلو ونصف وطوله 81سم علما بان وزن ولادته كان 2 كيلو فهل هذا مناسب لسنه واريد اكلات تزيد من وزنه لانه ضعيف جدا ورافض الاكل باستمرار علما انه لم يرضع طبيعى سوى ثلاثة شهور فقط ثم بدا يرضع صناعى والان يرضع لبن جامسى بالبرونة واريد ياخذ بالكوب ومتى يبدا الطفل فى الجلوس وحده على التوالت

الطفل الذكر فى عمر سنتين بيكون وزنه ما بين 10 كيلو و نصف و 14 كيلو و نصف .. و ده معناه ان ابنك وزنه الحمد لله كويس و انتى قدرتى تحسنى وزن الولادة ..بالنسبة للطول ابنك بتهيقلى هو قصير شوية .. استنى لحد ما يتم سن سنتين : لو وزنه زاد و طوله لأ من فضلك تعرضيه على دكتور غدد ،  لأن فى عمر نستين المفروض وزن الطفل الولد يكون 12 كيلو و طوله 85و نص


.. بالنسبة للأكلات انصح بمراجعة الموضوعات التالية :
http://mamy1st.blogspot.com/2010/12/blog-post_17.html

و الموضوع ده كمان
أما عن الأغذية من أهم الأغذية التى تساعد على النمو بشكل جيد كل البروتينات زى اللحم و البيض و اللبن و البليلة
و يمكنكم قراءة الموضوعات التالية
http://mamy1st.blogspot.com/2010/12/blog-post_17.html

و كذلك هذا الموضوع و هو بيتكلم عن الفيتامينات إللى بتساعد على النمو عنوانه

و راجعى موضوع الأخطاء الشائعة فى التغذية على الرابط التالى
http://mamy1st.blogspot.com/2011/04/blog-post.html

و اقرائ فى الموضوع ده نقطة تتحدث عن مظاهر سوء التغذية عن الأطفال


بالنسبة للبن الجاموسى و قفيه فورا و بدليه بلبن بقرى لأنه اخف على معدة الطفل ، و ده سبب رفض أبنك للأكل .

من فضلك تفطمى ابنك من البررونة و تحطيله اللبن فى كوباية مخصصة للأطفال لها بوز أو تحطيله اللبن فى أى كوباية عادية و شربيه عن طريق الشاليمو او الشفاط .. هو ح يتبسط من حكاية الشفاط و ح يتعامل معاها على انه لعبة و ح ينسى الببرونة.. لو ابنك لسة مش عارف يتعامل مع الشفاط شربيه اللبن بقطارة .. فى قطارات  بتتباع فى الصيدالية ، اشترى واحدة و قطرى لإبنك اللبن فى بقه لحد ما يتعود على  ترك الببرونة هنا ممكن تشربيه من الكوب المخصص للأطفال .. و إغسلى القطارة بعد ما ينتهى ابنك من شرب اللبن ، و ده عن طريق غليها جيدا عشان الميكروبات لا تتراكم بها و تسبب له مغص معوى

أما عن الموعد المناسب لدخول الطفل الذكر للحمام و جلوسه على التواليت : فده من عمر ثلاث سنوات ،  لكن ده ح يحتاج منك تدريب لبعض  الأيام و شراء قاعدة تواليت خاصة ابلأطفال حتى لا يسقط ابنك بالقاعدة
و يمكنك مراجعة الموضوع التالي لمعرفة خطوات فطم ابنك من الحفاض
http://mamy1st.blogspot.com/2011/01/blog-post_14.html

و لكم تحياتى
مامى لأول مرة




الأحد، 3 أبريل 2011

أخطاء شائعة فى تغذية الطفل الرضيع

طبعا " شيخ العريف" لن تجده غير فى مصر ، فاحنا أكتر ناس و أسرع ناس فى عملية الفتوة و الفتى و المفتين .. و لأن تعدادنا خمسة و تمانيين مليون ، فطبعا عندنا 80 مليون مفتى و شيخ عريف و عالم ببواطن الأمور ، صنفهم زى ما تحب . . و الكلام ده عن تجربة مررت بيها : فعندما بدأت أأكل بناتى "جى" و هوهوز" شربة الخضار المخلوطة بصفار البيض ، تذكرت مع أول يوم لتقديم صفار البيضة المهروسة النصيحة الغالية التى اقترحتها على زميلة ابى فى المكتب .. و قبل أى كلمة ، لازم نركب آلة الزمن و نرجع لبعييييييييييييد جدااااااااااااا ، لحد كدة سنة 2009 و تحديدا يوم 10 أكتوبر ، و المكان فندق المحروسة بالأسكندرية . . أما المناسبة فهو فرح أخى ؛ و هناك اقتربت منى زميلة أخى لتسدل لى كم هائل من النصائح الخاصة بتغذية الرضيع .. و بعد سؤال طبيبة بناتى و بعد متابعة شاملة لبرامج تغذية الأطفال ، تأكد ان معظم نصائحها خطأ .. و عشان ماحدش يقع ضحية للفتى و فريسة له زى ما انا حصلى ، جبتلكم الموضوع ده


و هى القائمة الخطأ المشتملة على أنواع المواد الغذائية التى لا يمكن أن يتناولها الطفل الرضيع بداية من ثلاثة أشهر حتى الشهر الثانى عشر




الخطأ الأول : يمكن اضافة السمك المسلوق و الجبن القريش منذ الشهر السادس




التصحيح السمك و اللحم مع نهاية الشهر الثامن


الخطأ الثانى : تغذية الشهر الثالث: الزبادى بدون وجه (دسم).


التصحيح : الزبادى تدخل مع نهاية الشهر السابع و بداية الشهر الثمن ، اللبن لما بيدخل بدرى بيسبب هشاشة عظام


الخطأ الثالث : - الشهر الرابع: 1- عصائر: برتقال – طماطم


التصحيح : لا يقدم البرتقال قبل مرور سنة على عمر الطفل حتى لا يلهب له المعدة .. و الطماطم لازم تكون منزوعة القشر و البذر و يتقدم عصيرها فى نهثية الشهر السابع عشان تكون معدة الطفل مهيئة ليها .. كما يجب ان لا يقدم أى طعام للطفل قبل نهاية الشهر الرابع و بشرط ان وزنه يكون وصل سبعة كيلو ، لكن لو وزن الطفل أقل من سبعة كيلو نستنى لحد ما يتم شهره الخامس .. لكن الأكل مع أى وزن يبدأ مع نهاية الشهر السادس من عمر الرضيع


و فى هذا الوقت من الممكن تقديم عصير التفاح (1/2 كوب فقط) للطفل الرضيع ، او نزع قشرته و و مسلقه و ضربه فى الخلاط و تصفيته و تقيدمه للرضيع لأكله


الخطأ الرابع : تقديم الأرز المسلوق للطفل الرضيع – مهلبيه


التصحيح : الأرز المقدم للرضيع هو أرز يباع بالمحلات و خاص بالرضع ، الأرز اللى بنآكله فى بيتنا ضار بالرضيع ، من فضلكم ماحدش يسلقه و يأكله للبى بى .. و المهلبية مشكلتها ان فيها لبن ، و اللبن لما بيدخل بدرى للطفل بيسبببله هشاشة عظام ، عشان كدة من فضلكم أجلوا الكهلبية لبعد ما الطفل يدوق الزبادى




لكن لما نوصل للعمر المناسب لإطعام الطفل زى ما قلتلكم قبل كدة : مع نهاية الشهر الرابع لو وزنه وصل سبعة كيلو أو مع نهاية الشهر السادس حتى لو وزنه أقل من سبعة كيلو ممكن نأكل البىبى


: اى حاجة من السابق ذكرها


2بسكويت – سيريلاك.


3- فاكهة: تفاح – كمثرى (مسلوق ومهروس ولا تضيف سكر).


4- خضار ملسوق ــ بطاطس كوسة ـ جزر ، شربة خضراوات (جزر – بطاطس – كوسة/علي ماء).


فى نهاية الشهر الثامن : أرز مسلوق – عدس أصفر مسلوق. - - موز مهروس. - جبن نستو (مطبوخ).


- الشهر التاسع : - صفار البيض المسلوق. - حساء خضار علي مرقة - صدر دجاجة (تضرب في الخلاط مع حساء الخضار أو هرسه جيدآ معها). - سمك (قطعة حجم البيضة فقط). -
الشهر العاشر: - لحم أحمر مسلوق ثم يفرى أو مقطع إلى قطع صغيرة بالسكين. -أرز مطبوخ عادى







فى عمر سنة الطفل يأكل :
  1. كبد الدجاج.
  2. الفول المدمس مهروس.
  3. قمح ( بليلة) باللبن مضروبة في الخلاط. و مصفاه - و فى حالة ظهور الأسنان ناديهاله عادى لأنه بيكون قادر على مضغها ، من أسنان لازم تضرب فى الخلاط و تتصفى
  4. ممكن يآكل بيضة كاملة .. فبياض البيض لا يقدم للطفل قبل ان يصل عمرة سنة
  5.  موز مهروس باللبن. 
  6.  لبن بقرى صافى كامل الدسم ما بين  (1/2 – 2/3).كوب  - 
  7.  خبز أبيض (فينو). - جبن أبيض ملح خفيف.
  8. - اللحم المفروم يشكل أصابع يحمر مثل الكفته في زيت ذرة.- الشهر الثانى عشر: - أكل الأسرة (أرز، خضراوات مطبوخة).
  9. و يفضل بعد وصل الطفل لعمر سنة اطعامه من كل أطعمة المنزل بكميات قليلة حتى يعتاد عليها
  10. لا تقدوم السمك النى للأطفال و يمكنكم مراجعة هذا الموضوع


http://mamy1st.blogspot.com/2010/12/blog-post_17.html


و الموضوع ده كمان


http://mamy1st.blogspot.com/2010/11/blog-post_11.html




و الموضوع ده كمان
http://mamy1st.blogspot.com/2011/01/blog-post_16.html
و لكم تحياتى
مامى لأول مرة
http://la3ya3nyno.blogspot.com/

midlle ad