top ad

الأربعاء، 30 مارس 2011

الأم تسأل عن طفلها ــ

أم تسأل و تقول : " انا عندى محمد عمره سنة و10 شهور ، وزنه 11 كيلو وطوله مابين 79 و80سم ، علما بان وزنه فى اليوم السابع من ولادته كان2.15 فهل وزنه وطوله مناسب لسنه .. لانى بحس انه ضعيف اوى .. و كمان أحب أعرف "هل فى اكلات معينة تزيد من وزنه " .. بالله عليكم الاجابة الإجابة : بالنسبة للنصف الأول من الإجابة : استنى على ابنك لحد ما يتم سنتين ، لو لقيتى طوله أقل من 83 سنتى يبقى لازم يروح لدكتور غدد .. و ده لأن الطفل إللى عمره سنتين ، المفروض يبقى طوله ما بين 83 و 92 سنتى . . فى الحالة دى ضرورى جدا انك تتابعى مع دكتور غدد عشان يشوف هرمون النمو الخاص بأبنك . . وزن ابنك مافهوش مشكلة لأن وزن الطفل إللى عمره سنتين بيتراوح ما بين 11 كيلو و نص و حتى 14 و نص . . مشكلة ابنك فى الطول . أما عن أهم الأغذية التى تساعد على النمو بشكل جيد فهى الموجودة فى كل البروتينات زى اللحم و البيض و اللبن و البليلة و يمكنكم قراءة الموضوع التالي الخاص بغذاء الأطفال http://mamy1st.blogspot.com/2010/12/blog-post_17.html و يمكنكم كمان قرآءة هذا الموضوع الخاص بالفيتامينات التى تساعد على نمو الطفل http://mamy1st.blogspot.com/2011/02/blog-post_25.html المواد الغذائية الهامة للطفل :

  1. الحليب كامل الدسم : فهو غني بالأحماض الدهنية والكوليسترول الذي يحتاجه الأطفال خاصة الذين لم يتجاوزوا السنتين‏.‏ . ويري الباحثون أن الكوليسترول ضروري للأطفال في هذه المرحلة لدوره المهم في بناء وتنشيط الخلايا العصبية والدماغية‏ ، كما يساعد في عزل خلايا الدماغ وبالتالي يقل من وجود الدورات القصيرة في وظائف الاتصال‏.

  2. تغذية الأطفال بالمواد الغنية بالكوليسترول والبروتينات والعناصر الغذائية الضرورية للنمو مثل مادة الكولين الشبيهة يفيتامين ب والتي أثبت الدراسات قدرتها علي تحسين التعلم والذاكرة‏

  3. اللحوم الحمراء تحتوى على كميات ضخمة من الحديد والبروتينات والألياف والفيتامينات وفيتامين ب‏12‏ على وجه الخصوص

  4. البيض الغنى بالحديد و كذلك بليلة


السؤال الثانى لأم تقول :


" أنا ملاحظة ان ابنى مش مقبل على السوايل زى العصاير والمشروبات زى النعناع والكراويه والبيبى درنك ،ومن كام يوم روحنا للدكتور بتاعه علشان كان تعبان أوى وكتب لنا على أعشاب سيكم للبرد وقال لنا يفضل طول اليوم يشرب منها وما تعرضيش عليه الأكل ألا لو طلب وحس بجوع. وغلبنا فى شرب الأعشاب ده، وأنا خايفه يجيلو جفاف من قلة السوايل إللى بتخش جسمه .


الإجابة : العصير ممكن تدوبى فيه بسكوت او كيك او حتى سيريلاك بشرط ان لا يكون عجينه لكن يكون به قدر من السيولة .. و بلاش النعناع و الكراوية الأطفال مش بيحبوه ، لكن لو حليتى أعشاب سيكم بالعسل الأبيض و حطتيه فى شفاط ممكن أبنك يحبه و يشربه ، جربى كميات صغيرة ، ان شا الله تعمل كوبية أعشاب واحدة و يفضل يشرب فيها طول اليوم .. ما تستعجليش انه يخلصها مرة واحدة .. الأطفال بيحبوا الأكل أو الشرب إللى فيه لعب ، فلو شرب الأعشاب بشفاط أو قطارة ح يتبسط ان شاء الله .


ملاحظة : حلى الأعشاب بكمية عسل صغير و لو تكن ربع معلقة شاى عشان فى اطفال فى سن ابنك ما بتحبش الحاجات المسكرة . و لكم تحياتى مامى لأول مرة

http://la3ya3nyno.blogspot.com/

الثلاثاء، 29 مارس 2011

ابنى عمره سنة و أربع شهور ، عايزة جدول لأكله


ابنى عمره سنة و أربع شهور ، عايزة جدول لأكله :


لو ابنك اتفطم يبقى يفطر و يتغدا و يتعشى من أكل البيت ، و بين الفطار و الغدا يآخد أى وجبة خفيفة ،ثمرة فاكهة ، مثلا : موزة ، تفاحة ، أى فاكهة ، او جبنة نستو حاف ، ده كله لو سنانه ظهرت و بيعرف يآكل عليها كويس .


فى الحالة دى ممكن يآخد بؤسومات ، ح يفرح جدا بالبؤسومات ، بس انتى ح تدوغى من التنضيف وراه ، عشان كدة يفضل انك تقعديه فى مكان مفروش بحاجة سهلة التنضيف .


و لو ابنك لسة كما اتفطمش يبقى يفطر على قدر طاقته فى الطعام :

فى أطفال ما تحبش غير كيك باللبن ، أو بسكوت فى اللبن ، و أطفال تانية تقدر تفطر فول مهروس ؛ ف بعد ما تكونى عملتي لإبنك اختبار حساسية الفول ، يبقى ممكن جدا يفطر فول مع ربع رغيف فينو متقطع حتت صغيرة مع الفول المضروب فى الخلاط و المصفى ، و ممكن كمان يفطر بليلة باللبن مغذية جدا و غنية بالحديد

الوجبة الخفيفة بعد الفطار بساعتين أو تلاتة تكون بيضة مسلوقة ياخد حتة حتة عشان ما يشرقش ، أو فاكهة أو جزر مقطع شرائح أو خيار منزوع القشر او طماطم منزوعة القشر أو سيريلاك لو لسة ما وقفتيش السيرلاك

و أنا أفضل ان الطفل بعد عمر سنة يآكل أكل البيت عادى ، إلا لو كان ما بيعرفش يبلع كويس ، أو لسة ما عندوش سنان يمدغ عليها


الغدا : هو نفس أكل البيت ، لو ابنك عنده سنان يآكل كل حاجة و أى حاجة ، لو ما طلعش سنان بشكل كبير يفضل نديله الأكل سهل البلع ، و غالبا ح يكون رز و خضار ، او مكرونة مع كمية شوربة كبيرة عشان يقدر يبلعها ، و طبعا معها لحمة او فراخ أو سمك مقطعة قطع صغير جدا عشان ما يشرقش لو ما كانش بيعرف يبلع كويس





و برضه وجبة خفيفة : بين الغدا و العشا ، ممكن تكون لبن ، عصير ، فاكهة ؛ ده لو اتفطم .. لو ما اتفطمش يآخد راضعة

العشا : يبقى زبادى ، مهروس فيه موز عشان يشبع و ينام و ما يصحاش من الجوع ده لو اتفطم ، لو لسة ما اتفطمش ، تديله الزبادى و تكملى عشاه رضاعة

ملاحظة : الرضاعة : روتين ليلى ، حاولى انه يرضع بالليل بس ، و الحكاية دى ح تساعدك لما تحبى تفطميه

ما تنسيش اللبن ، الطفل فى مرحلة الفطام لازم يآخد كوباية لبن على الأقل فى اليوم ، و يشرب ماية عشان الكلى بتاعته ما تجهدش .. و فى الصيف يشرب عصير جمب الماية و اللبن
و تفضلى تدى فيتامين دال و الكالسيوم لحد ما كل سنان ابنك تطلع ، و تستمرى على الحديد طول فترة الرضاعة ، توقفيه مع الفطام بشكل تدريجى


و لك تحياتى

مامى لأول مرة
http://la3ya3nyno.blogspot.com/

الأحد، 20 مارس 2011

الرضع فى الإستفتاء

اليوم 1९ مارس 2011:
قررت ان لا أنام حتى نخرج للاستفتاء مبكرا قبل ما حد يروح .. و عشان ما أضيعش وقت الصبح و اخلى بناتى تآخد أكبر قسط من الراحة ، قررت أحميهم بالليل و ألبسهم حلو أوى .. مش عارفة ليه حلو اوى .. كنت حاسة ان ليلة الإستفتاء و كأنها ليلة العيد .. كنت فرحانة أوى و مزقطتة لدرجة انى ما نمتش طول الليل و فضلت صاحية لحد ما خدت بناتى التوأم إللى عمرهم دلوقتى 19شهر بالتمام و الكمال و رحنا لمدرسة عباس العقاد حيث كانت لجنة الإنتخاب .


لكن قبل ما نخرج من البيت استغربت جدا من زوجى عندما قال لى نعمل سندوتشات للبنات و نآخد ماية و نسلق بيض .. بيض ؟!!! ليه كل ده ؟!!! ده ح ندلى بصوتنا فى مدرسة جمب البيت .. ما عقلتش و احتفظت بأسلتى لنفسى .. و كان سبب سكوت انى قلت ربما زوجى يقصد ان البنات لن يكون لها رغبة فى الإفطار فور الإستيقاظ و احنا كمان ح نكون مستعجلين ، لكن لما ينزلوا الشارع و مع الشمس و الهوا و حركة العربية ممكن يجوعوا .. يمكن


و بالفعل قمت بتجهيز المائونة و لبسنا و خرجنا ..و إتأكدت ان بطاقة الرقم القومى معايا و الكاميرا كمان ، مستعدة بكل أسلحة الإستفتاء ، الرقم القومى للتصويت ، و الكاميرا لتسجيل أى مخالفات .

بعد دقيقتين من اقلاع سيارتنا وصلنا إلى أرض لجنة الإستفتاء و هى المدرسة عباس العقاد .. و فجأة بدأت عيون تلمع .. مين كل الناس دى ؟!!! و تملكنى شعور القذافى و بدأت أقول هاتفة " من أنتم .. من أنتم "

فقد وجدت طابورا طوله نص كيلومتر يحيط بالمدرسة من كل جانب ، سواء انت جهات أصلية او فرعية .. و بدلأ زوجى يلومانى و قالى : " مش قلتك عايز أخرج من بدرى "

ــ بدرى إيه أكتر من كدة ، ده احنا الساعة تسعة و اللجنة بدأت تمانية
و رفض عقلى ان تكون كل هذه الجموع قد حضرت مسافة ساعة واحدة ..و عرفت فيما بعد ان التجمهر على هذا الوضع من السابعة صباحا .. لدرجة ان الناس كانت بتلف على كل اللجان بحثا عن لجنة يمكن التعامل معها بشكل انسانى .
و طلب منى زوجى تحديد موقفى ، ح أنزل و آخد البنات معايا ؟؟ يعنى ينزلى عربية التونز ؟؟ و يشحن فيها البنات ؟؟ و فجأة لقيت الإستفتاء الوطنى محتاج قبله استفتاء أسرى
و قبل ما اتكلم ، اتكلم فين انا بين نارين ، ح اقف ببناتى إإللى ما كملوش شهرهم العشرين فى الشارع ، مش مشكلة الشارع مشكلة ان الحكاية فيها ولا خمس ساعات بالشكل ده .. معقول بناتى إلى ما بتعرفش تقعد عشر دقايق على بعض ح يرضوا يفضوا متكتفين فى عربيتهم خمس ساعات ؟!!
و استشعر زوجى الحيرة إللى أنا فيها ، فهى تخصنى وحدى ؛ أما هو فمن الممكن ان يدخل و يستفتى بعد ان يوصلنا للمنزل ليعود للجنة على ان يقف خمس ساعات .. و لهذا قفز فجأة خارج السيارة ، أخرج عربة التوينز ، وضع بها البنات .. وضع يدى على العربة ليسلمها لى ، بدأت أدفع العربية كأننى منومة مغناطيسيا ؛ و ذلك لأن عينيا معلقة على الطابور الذى كان طوله نصف كيلو أصبح كيلو إلا ربع فى الخمس دقائق التى دارت فيها المباحثات العائلية .

و كدت ابكى لحظة وقوفى فى الطابور فمتى و كيف سيتحرك ؟!! و لأين سينتهى .. و سرعان ما تغير هذا الإحساس و فجأة شعرت و كأننى خط بارليف من هول تدفق الناس خلفى .. و هذا التدفق خفف من حالتى النفسية و فزعى على بناتى ، فقد استشعرت ان هناك من هم أصعب منى حالا .. ما هذه الأعداد الغفيرة ؟؟!!! و بدأت أساريرى تنفرج .. فكل هؤلاء جاءوا من أجل مصر .. جاءوا حبا فى مصر

و أفقت من هذه الرومانسية الوطنية على صوت "هوهوز" إللى بدأت تبكى بشدة ، طبعا عايزة تنام و فجأة لقت نفسها فى الشارع بعد ما شربت بق لبن صاقع عشان يلطف من درجة حرارتها و ما تخدش لطشة برد ، و مش عايزة أقولكم انى باغسل وش بناتى بغسول البوريك عشان ما يسقعوش فى الشا .. و ده إللى حصل فياعينى بناتى ما كانش عندهم أى سبب انهم يفوقوا من نومهم .. و عشان القريفة تزيد و تآخد حدها ان الجو بدأ يسخن و يحرر كأننا فى شهر يوليو .. و بدأت البنات تعيط ، أسكت دى ، دى تقولى هم ، أأكل دى التانية الدبان يقف على وشها ، و للحظ ان الناس حوليا لطيفة جدا و متعاونة جدا ، بس واضح انها بتحترم خصوصيات الغير ، فكنت ملخومة مش بس مع بناتى إللى بتعيط لأى من باقى الطابور إللى كل شوية واحدة تقرب منى بكل لطف و أدب و تقولى من فضلك هشى الدبانة إللى على وش البنت ، و لازم أرد على رقتها بكل رقة قائلة " حاضر " .. و لسة بأهش ، لقيت " جى " بدأت تعيط ، اروحلها ألاقى اختها اتنرفزت .. أروحلها فين ؟ لا دى فركة كعب ، ما حدش يقلق ؛ مش مشوار بأمشيها ، لأ كل الحكاية انى باتحرك بين الكرسى الأولانى و الكرسى التانى فى عربية التوينز ..و بدأت وقفتى تبقى مثيرة ما بين العياط و السندوتشات و البوؤسمات إللى بناتى بتوقعه على الأرض و بألأمه أحطه فى ارضية العربية بتاعتهم عشان حرام ما حدش يدوس عليه . . كل ده و الطابو ر اتحرك نص متر ، ൧൬ سنتى ، هههههههههههههههه


و لم يقطع على فرحة تحرك الطابور إلا الدبانة التى تسببت فى هتاف الجمهير من حولى " السنودتش خلاص ، خديه من البنت خديه "

و بعد قرابة النصف ساعة لقيت نقيب معدى يتفقد الطابور إللى بتهيقلى وصل من عند مدرسة عباس العقاد لحداااااااااااا رابعة العدوية شخصيا .. سبكم من الطابور و طوله و خليكم مع الظابط ، كنت ح بصله شذرا و بعدين قلت حرام شكله صغير مالوش ذنب فى أى حاجة حصلت .. و زى ما يكون النقيب سمعنىى ، جه لحد عندى و ارتبك و بص على البنات بطرف عينه و اتلخبط و فجأة عمل للخلف در

هنا لقيت جوزى ناطت فوق راسى كأنه رئيس مباحث عثر على قضيته المفقودة ، قالى هاه ايه الأخبار ؟؟ ضحكتله باندهاش :" انت سبت مكانك إزاى " .. اتاريه عمل باقتراحى إللى رفضه لما قلته تعالى أقف معايا عشان البنات بتعيط .. بس واضح انه قلق علينا لما ما لقنيش بأرد على الموبيل ، أرد إزاى و الطابور كله مشغول بالدبانة إللى وقفة على سندوتش "جى " .
فقد تعرف زوجى على بعض الشباب الواقفين فى الطابور اللانهائى و استأذنهم يجى يشوف مراته اللى ما بتردش على الموبيل ، و جه عشان يكتشف الناس إزاى متابعين لخمتى بالبنات و بالطابور و بالعياط و بالدبان و بالأكل و بالشمس ، أروح شمال بالبنات ، الشمس ورانا ، أروح يمين ورانا .. و الناس ربنا يخليهم شغلوا نفسهم معايا و بموضوع الشمس ، هو صحيح احنا الساعة عشرة الصبح بس الشمي كانت غريبة ؛ و مع قلة نوم البنات كان فعلا ناقصهم الشمس عشان تزود قريفتهم ، و هنا صعبت على الناس و اقترحوا عليا اطلب من المراقبين انى أتخطى الطابور و أدخل عشان خاطر البنات الصغيرين ، الأول اتكسفت خصوصا ان ده كان اقتراح زوجى فى الأول ، بس أنا قلت الديمقراطية تمنها غالى ، و لازم بناتى تعيش الديمقراطية على حق من غير أى وساطة ؛ و بعدين تعبت ، خصوصا ان إلحاح الجماهير كان أقوى منى ، مش بس الجماهير فى الطابور الرفيق لكن كمان صوت بناتى إللى ما بطلتش عياط من أول ما نزلنا من العربية

قررت اتقدم الصفوف ؛ لحد ما وقفت على أوله قبل عبور بوابة المدرسة الحديدية .. و انا فى الطريق لقيت جوزى سايب دوره وواقف يتكلم مع النقيب المسؤل عن حراسة اللجنة ..قربت منهم ، النقيب هزر مع البنات ، و قالنا انه ح يتجوز الأسبوع الجاى ، و كلمنا عن إئتلاف الشرطة إللى عمله مع زمايله لتغير بعض السياسات .. و كأن الشرطة لها روح جديدة و وجه جديد ، و كأن ده مش ظابط ده واحد صاحبنا نعرفه من زمان و كان مسافر .. . جوزى سألنى : " رايحة فين ؟ "، قلته على اقتراح زملاء الكفاح فى الوصول إلى صندوق الإستفتاء .

هنا الظابط قالى انصحك تدخلى بالعربية عشان لما يشوفوا البنات يتعاطفوا معاكى ، مش عارفة ليه حسيت انه بيقولى تقمصى دور واحدة شحاتة ، و قلت فى سرى ما انا ح آخد بناتى معايا امال ح اسبهوملك .. مش ح أتقمص دور شحاتة ، انا جاية استفتى بكرامتى

و عبرت بوابة المدرسة مع ابتسامات الحضور و ترحابهم و تأكيدهم على ان الأطفال يجب حمايتهم من الشمس ، و بالفعل وصلت عند البوابة المؤدية للفصول حيث لجنة التصويت ووجدت عليها لافتة مكتوب عليها " لكبار السن " و تذكرت احدى الشبات التى وقفت إلى جوارنا فى الطابور اللانهائى و هى تقول لنا انها اوصلت والدتها عند البوابة الخاصة بمن هم فوق الستين و مازختها إلا يمكن ان يعتبرونى انا و بناتى فوق الستين .. و الآن انا أمام تلك البوابة ، انها نفس البوابة التى يعبرها الشباب . . فالجميع يدخل من هنا


قربت على استحياء من صف الشباب على أمل انهم يشوفوا العربية و يعدونى ، بس اول أربعه دوروا وشهم و عملوا انهم مش شايفنى ، يا حرام تعبانين ، أكيد واقفين من بدرى .. قربت منهم أكتر على استحياء أشد و قلتلهم ممكن أدخل مكانكم عشان البنات مش مستحملة الشمس .. واحدة ردت بغيظ مؤدب : " طيب لما يرضوا يدخلونا ، ابقى ادخلى " ... هنا خرجت رأس شاب ملتحى عبر بوابة الفصول و اكتشفت انه هو الذى ينسق الدخول .. اندهشت ان ملتحى ينظم الدخول ، و كانت إلى جوارة سيدة منتقبة واقفة بصدرها فى البوابة ، و رأس الملتحى تعبر البوابة و تعبر المنقبة لينادى قائلا : " عايز واحدة بس "

بسرعة فوووو دخلت شابة و كأنها اختفت خلف نقابة المنتقبة ، كأنها امتصتها .. و بعدها عادت السيدة منقبة لتسد الباب بطولها و بعرضها و بطرحتها و جلبابها .. لم ينصرف نظرى عنها إلا بسب مداعبة بعض كبار السن لبناتى :" الله يا قميلة جاية تدلى بصوتك "
ــ طبعا لازم يعرفوا اهمية الواجب الوطنى
ــ عمرهم تسعتاشر شهر لكن ممكن يقولوا لأ
ــ انتى تخشى تصوتى و احنا نآخد العربية الحلوة دى
ـ لاااااااااا كله إلا العربية
ــ ربنا يخليهملكم
ـ مرسى

و ظلت الكلمات و الحوارت تدور على هذا النطاق من المودة من كبار السن سواء كانوا مسيحين أو مسلمين إلا ان خرج الملتحى و نادى عايز تلاتة ، قلتله ممكن أدخل عان البنات .. قالى : " طيب حاضر ، ممكن أخليهم أربعة " و بالفعل سمحلى بالمرور .. إلا ان الحيطة إللى كانت أمام الباب لم تتحرك ، لدرجة انى دفعت العربة بقوة معتقدة انها لن تمسها مدام هى واقفة بهذا الشكل .. و عندما تنبهت المنقبة انى ح أفعصها بعربية البنات أفسحت لى الطريق .. هنا قال لى الملتحى ساخرا : و العربية دى تسبيها فين ان شاء الله "

ــ ح اسيبها هنا
ــ أجابنى رافضا و ساخرا : " ح تسيبيها هنا كل الوقت ده "
ــ وقت ليه ؟!! انا مش كلها دقتين آخد الورقة ، أعلم ، أحطها فى الصندوق
ــ لا ، أصل فى طابور تانى فوق
ــ فوق ؟!! هو احنا ح نستفتى فوق
استشعر انى ح آخد عليه ، بسرعة صرف نظره عنى و بدا يكلم الناس إللى طالعة و قالهم اللجان فى الدور التانى ، هاه لقيتوها
.. ثم التفت لى قائلا : " هاه تحبى نشيل معاكى العربية نطلعها فوق "

و شعرت بعد فهم لحواره هذا الرجل ، لماذ يتحدث معى بهذا الشكل ، و سألته عن الباب المغلق أمام " هو مش فى استفتاء فى الأودة دى "
ــ اه بس دى لكبار السن
ــ ما تعتبرنى كبار سن و تدخلنى
ــ طيب ، نشوف
ثم تركنى و انصرف عنى إلى أن سألته هاه ح تدخلنى امتى قالى : " لا أصل جوة فى لف كتير ، اطلعى فوق أحسن "
اتغظت منه و قررت ان أتصل بزوجى .. جالى ملهوف ؛ اتهيقله ان حد عمل لنا حاجة .. ما استأذنش حد و فجأة لقيته قصادى بيقولى : " فى إيه ؟؟ فى حاجة حصلت " .. و شعرت ان السيدة المنتقبة قد فعصها زوجى عند دخوله .. و قلت له : " لأ تعالى اقف مع البنات لحد ما أطلع استفتى " .. طلعت بسرعة و قلبى بيتقطع لأنى سبت "هوهوز" بتعيط بحرقة . و بعد ما وقفت فى الطابور ، بدأت أتفحصه و اكتشفت ان طوله ثلث الطابور إللى فى الشارع ، اتصلت بزوجى كى أطمئن على بناتى .. فطمئنى انهم مطلعين عينه و الحمد لله

ــ طيب آجى آخد حد منهم ؟
ــ لأ خليكى انا ح أتصرف

و صدمت لأنى وجدت كم الفصول لا لجان بها عدا لجنيتن ، لجنة للنساء و لجنة للرجال .. و كل لجنة فيها موظفة واحدة وحيدة توحد ربها و هى من تقوم بتسجيل بيانات الناخب أو المصوت و إلى جوار الموظفة قاضى .. و الحمد لله مر الوقت بس تعليقات الحضور الظريف " دول بيزهقونا عشان ما نعملهاش تانى "
ــ بيعلمونا الأدب
ــ مش عايزين ديمقراطية ، اشربوا ديقراطية بقى
ــ مافيش غير موظف واحد فى اللجنة ، ده احنا يا مكتر الموظفين عندنا
ــ خلوا بالكم يا جماعة ، ما تستخدموش القلم إللى فى اللجنة ، القلم صينى بيتمسح بعد ساعتين لو علمت على " لا للتعديلات "

و بدأ كل واحد يفتش على قلم فى جيبه و مع جاره و مع اللى قدامه و مع إللى وراه .. و لم تختفى قصة القلم إلا باقتحام مجموعة شاب فى زى موحد لونه أحمر يعلقون شيت على صدورهم : ما عرفتش اقرا كاتبين إيه لضعف نظرى و ليس لعدم محو أميتى .. و عرفت انهم مراقيبن لمجرد انهم اقتحموا الصفوف من غير تردد .. و فتحوا أبواب و أغلقوا أبواب .. و نظموا الدخول بعض الشئ .. حتى وصلنا لداخل اللجنة .
و إذ بسيدة تجمع بطاقات الرقم القومى من اول عشرة فى الطابور و أنا منهم ، ثم بدأت تنادى علينا واحدة واحدة و من تسمع اسمها تقول أيوة ، فنجد السيدة تنظر فى بطاقتها بسرعة ثم فى وجهها و هى تعطيها استمارة الإستفتاء .. كنا عشرة فى نفس اللجنة بنصوت ، كأننا فى لجنة امتحان مش استفتاء ، و لا ستاير ولا خشى ولا حيا .. و ده كله ليه ؟!! عشان ده إللى اسمه الإستفا ع المكشوف .. ده الحال وصل لدرجة ان واحدة كانت بتسألنى أعلم جوة الدايرة ؟؟ قللها طبعا ، بس حطى علامة صح و خلاص ، قامت موريانى الإستمارة إللى بتوقع عليها و هى بتقولى " كدة ؟؟"
رديت عليها بكل تلقائية ، أيوة ، و بعدين شهقت من هول الصدمة .. " إيه إللى احنا بنعمله ده ؟!!!
و الشاهقة كانت زيادة شوية : لأنى لقيتها معلمة على الدايرة الخضرا ، يعنى نعم للتعديلات الدستورية
لأ الأحلى من ده كله ، ان السيدة التى جمعت منا بطاقات الرقم القومى بصت للطابور بتاعنا و قالت : " معلش لو مافيهاش تكليف ، ممكن تروحى الجنة رقم ... و تقوليلهم لجنة 16 /൪ مافيهاش حبر ، الحبر خلص خلاص ، خليهم يبعتولى حبر .. قوليلهم المستشارة فلانة ما عندهاش حبر "
الست ما كانتش بتوجه كلامها لحد ؛ هى كانت عايزة أى واحدة تعتبر الكلام لها .. و فعلا فى واحدة تطوعت انها تتأخر على دورها و تروح تجيب الحبر .. و هنا بس عرفت ان اللى بتسلمنا الإستمارات هى القاضى إللى على كل صندوق و بقيت مش عارفة اتعاطف مع الست و لا أجرمها و لا أجرم المشرف على الإستفتاء من أساسه ، المهم خدت استمارتى و وقفت على جنب مش عارفة أعلم جوة الدايرة ، براها ، فوقها ، تحتها ، اكتب ، أحط علامة صح ولا غلط .. لحد ما واحدة سألت : " أمضى جوة الدايرة ولا تحتها "
قالت المستشارة : " أمضى جواها ، جوة الدايرة ، ثم استدركت الأمر قائلة : " لأ تمضى إيه ، حتى علامة صح "
و بدأنا نحط الإستمارات فى الصندوق كأننا فى مسجد الحسين و كل واحد واقف يزق إللى جمبه عشان يحط فلوس فى صندوق الندور قبل الحارس ما يجى يمشينا من المسجد .. و قدرت بحمد الله وضع طى الإستمارة ووضعها بالصندوق ، ثم رفعت رأسى و أنا بألف ورايا عشان آخد بطاقتى الشخصية لقيت طوفان من البشر جوة اللجنة . ده بقى إللى اسمه الإقتراع الجماعى .. و الظاهر المستشارة خدت بالها ان إللى بيحصل ده مش قانونى ، قامت قايلة بحسم : " شئ من النظام شئ من النظام ، ، يا ريت نقف طابور "
و فعلا الناس استجابت من غير أى لماضة ، و كله و قف طابور ، و بدأت المستشارة تنادى على إللى بطاقتها قدامها عشان تحط صباعها فى الحبر الفوشيا الفوسفوريك ، بعد ما تكون ماضيت فى دفتر التوقيعات و الموظفة خدت بياناتها .. و المستشارة واضح انها ست طيبة و بنت حلال لأنها ما بدققش فى حكاية رقم الصباع المرشح لغمسه فى الحبر ، و لا درجة و عمق الإنغماس فى الحبر ، المهم انك تلمس الحبر و تتلغوص زى بيض شمس النسيم .
و أخبرى زوجى ان اللجنة عنده كانت أقل تعلقا بالحبر ، لدرجة ان ناس كتير خرجت من غير لغوضة .
لكن احنا لجنتنا كانت منضبطة و إللى كان يغمس يآخد بطاقته و يخرج و هو بيتشاهد ، مسيحى مسلم كله يتشاهد .. نزلت بسرعة لزوجى و قلتله و انا أحمل "جى " و أقبل " هوهوز " اطلع فورا للدور التانى .. هو جرى على اللجنة و أنا لقيت بناتى مفرهضين من الحر .. ما احنا وقفين فى مكان مساحتة نص متر فى متر .. فتحتلهم الشباك إللى كان فى المكان وسط دعوات كبار السن إللى تقريبا كانوا بيطلعوا فى الروح زى بناتى بس مش قادرين يصرخوا زيهم .. بدأت أخفف لبناتى هدومهم .. حسوا براحة ، بدؤا يضحكوا و يعبوا ، وقفتهم فى الشباك عشان يبصوا على الناس و يتنفسوا هوا ، معلش كان نصه تراب بسبب الزرع إللى كان داخلنا منه و محمل بالأتربة زى الديمقراطية المصري تمام.
الحمد لله ارتحت انى قمت بمهمتى الوطنية و اطمنت على بناتى ، و استعديت نفسيا ان جوزى قدامه ساعة فوقفت من غير تأفف .. و كانت الناس لطيفة جدا و مالفتش نظرى غير الملتحى كلاكيت تانى مرة و هو ماسك علبة مناديل بيسأل حد عايز مناديل .. خرجت من مدرسة الإستفتاء إلى بيتى و انا مش عارفة آخد قرار عن الشاب ده !!!
لحد ما جوزى قالى ان نموذج الشاب الملتحى ابو علبة مناديل كان منتشر فى كل اللجان بمصر و كان يقرب من المصوتين بعلبة المنديل وهو بيقولهم " نعم " ان شاء الله .. قلت له طيب الحمد لله انه ما سألنيش كنت ح أقوله ح ابعتلك أما نعيمة لأنها صاحبة حزب نعمين .. أما انا فمن أنصار حزب تؤ تؤ و تحديدا لاع
عشان كدة لما طلعت نيجة الإستفتاء نعم قررت أعمل مدونة جديدة اسمه " لاع يعنى نو "
و عنوانها
و لكم تحياتى
مامى لأول مرة

الخميس، 17 مارس 2011

سنة اولى ديموقراطية


نجنى هذه الأيام ثمار ثورتنا المجيدة التى اندلعت يوم 25 يناير ، حيث تقرر ان يكون يوم 19مارس يوما لاستفتاء على التعديلات الدستورية .. و انقسم المصريون ما بين مؤيد و معارض .. و بدأ الأطفال يلاحظ هذا الإنقسام الذى تسلل للبيت الواحد و العائلة الواحدة و الأسرة الواحدة .. و بدأ الأب يصف الأم بأنها خائنة للوطن و الأم تتهم الأب انه فاقد للوعى السياسي .

و لم يخرج اطفالنا من هذه المعركة غير ان الشجار بين ابيهم و امهم انتقل إلى باقى سكان العقار .. فالشجار بين الأبوين لم يقف عند هذا الحد و إنما امتدت لسكان العمارة ثم الشارع يسكنون فيها وعمت البلد بأكملها .

و لذلك أرجو من كل أب و كل أم و كل من يناقش موضوع التعديلات الدستورية ان يشركوا الصغار فى المناقشة بعد ان يبسطوا لهم الأمر و يطرحوا الموضوع للتصويت العائلى و عمل صندوق مصغر داخل البيت و فتح الصنادوق بعد الساعة الخامسة ــ او أى ساعة يقرروها ــ و قبل هذا تجرى مناقشة السيناريوهات المتوقعة سواء فى حالة نعم أو فى حالة لا على ان يكون ذلك بمنتهى الحيادية و العقلانية .


و لتبسيط الأمر ارفق لك كل ما تعنيه كلمة نعم او كلمة لا للتعديلات الدستورية .. و أرجو ان لا تمرروا هذه الفرصة دون ان نعلم أطفالنا من هم فوق العاشرة معنى الديمقراطية بشكلها الحقيقى دون تخوين أو ضغط و لكن علموهم الديمقراطية بمعناها الحقيقى .. علموا أبنائكم ان رأيك صواب يحتمل الخطأ و رأى الآخر خطأ يحتمل ان يكون به الكثير من الصواب .

و مع فتح الصناديق و ظهور النتيجة ـ اقصد الصندوق المنزلى ــ يجب ان نعلم أطفالنا ان رأى الأغلبية يجب ان يحترم و يسود .. و نرضى به ، حتى و ان كانت النتيجة ليست كما كنا نرجو لكن يجب ان ننصاع له .. كما يجب ان نعلم أطفالنا ان الإدلاء بأصواتنا آمانة سيحاسبنا عليها الله أولا و شركاءنا فى الوطن و الأجيال المتعاقبة .. لذلك ضرورى ان ندرس جيدا التعديلات الدستورية و نفهم ما سنصوت عليه حتى لا نخون الآمانة التى بين أيدينا .
و الكلام للكبار اولا ، و ارجو ان تقرأوا الرسومات التوضيحية فى هذا المقال لوصول لأفضل اختيار لبلادنا ــ مصر العظيمة .
و لكم تحياتى
مامى لأول مرة

الجمعة، 4 مارس 2011

ابعاد الطفل عن الإضطرابات السياسية



التطور السياسى بدأ ينعكس علينا و على اطفالنا و على بيوتنا .. و بيوتنا دى مش لازم تكون جوة الوطن العربى و بس ، لكن كمان ممكن تكون فى أى مكان من دول العالم .. و الحكاية سببها نشرات الأخبار و الصور إللى طول اليوم التلفزيون بينقلها .. و عشان كدة كتير مننا بيصرخ و هو بيقول "طفلي منزعج من التقارير الإخبارية. "
يا ترى الحل انى ما أشوفش التليفزيون ؟ و لا أخلى طفلى ما يشوفش التقارير ؟ و لا ما حدش يتناقش قدام الأطفال فى الأوضاع السياسية ؟
و يجى السؤال الجامع الشامل إللى بيقول : " كيف أطمئن الطفل ؟ و اشعره بأنه سيكون بأمان؟ خاصة اثناء الإضطرابات السياسية
و الإجابة تتوقف على عمر الطفل ، فان كان الطفل يفهم الحوار و يمكنه المناقشة فوضحوا له ان ترتيب المنزل قد يتسبب فى بعض الدربكة و الكركبة قبل فرض الترتيب الجيد و النظام .
و ان كان الطفل عمره ما بين تسعة أشهر و حتى ثلاث سنوات ، فأرجو ان لا تخدعوا أنفسكم بفكرة انه لا يشعر بما يحيط بالأسرة و يؤثر عليها .. فالطفل فى هذه المرحلة يشعر بنبض اويه كأنه نبضه هو شخصيا .. أما الأطفال الأكبر يجب ان نعرف انهم ينزعجون من الأشياء التي يسمعوها أو يشاهدوها. . لذلك يجب ان نتفاعل مع مشاعرهم وأحاسيسهم وأسئلتهم ؛ فهذا هو المفتاح الأساسي لمساعدتهم وإعادة الطمأنينة إلى نفوسهم .





الحلول المقترحة :
  1. أقفلوا جهاز التلفزيون: لا تتركوا رغبتكم الملحة في متابعة الأحداث تقف في طريق صالح اطفالكم وصحتهم النفسية .. حتى لو كان هؤلاء الأطفال ما زالوا صغاراً و في سنّ مبكرة ، فإن التعليقات المستمرة والآراء المخيفة وتكرار مشاهد الكوارث أو الأحداث على شاشة التلفزيون ستزيد مخاوفهم وعدم شعورهم بالأمان، ناهيك عن انتقال مشاعركم انتم شخصيا لهم .
  2. حاولوا التحكّم فى أجابتكم على الصغير : إذا استحوذت عليكم مشاعر القلق خصوصا فى اجابتكم على أى سؤال من الطفل ، تأكدوا ان هذه الحالة ستنتقل بشكل تلقائى للطفل و سيلتقطها مهما كان عمره ، بالعكس فكلما صغر الطفل ستتضاعف مشاعر الخوف لديه. ..هو صحيح لا بأس فى ان نشاركهم بعض أحاسيسهم. . لكن كمان لازم نعرفهم في الوقت نفسه أنكم تتعاملون مع هذه الأحاسيس.
  3. طمئنوا أطفالكم ، بالقول و بالفعل: بعد إللى شافوه على التلفزيون، أطفالكم تحتاج إلى المعرفة و الى جانب هذه المعرفة يجب ان تاكدوا لهم أن المشكلة محدودة وأنهم لن يتأذوا أو يتضرروا.. لكن إذا واجهوكم بأى سؤال يجب ان تكون الإجابة ببساطة و دون انفعال ، وتذكروا أن أهم ما يمكنك القيام به حيال اطفالكم هى طمئنتهم بأنكم ستفعلون أي شيء لإبقائهم وإبقاء العائلة فى أمان. أخبروهم أن مهمة البالغين هي حمايتهم. وطمئنوهم أنكم ومعلماتهم والأشخاص المسؤولين عن رعايتهم والبالغين من حولهم سيهتمون بهم ويقومون بكل المستطاع لإبقائهم بأمان. . قولوا للطفل بأن الكثير من الناس يفكرون في الأمان ويعملون جاهدين لتجنب مزيد من المشاكل.
  4. دعوا اطفالكم يطرحون أسئلة: فمن المغري القول لهم : "كل شيء بخير. نحن بعيدون عن المشاكل ولن يحدث شيء لنا". .. فقد يبدو الأمر لطفلك أنه استهتار أو لا مبالاة إذا لم تتعاملوا مع مخاوفه المحدودة ــ فهى محدودة إلى الآن ، لكن فى حالة اهماله ستتزايد أكيد ــ .. ف أفضل ما تقومون به هو الإصغاء لأسئلة الصغير وتطمينه باستمرار. .. عشان كدة لازم تسألوا اطفالكم عن اسباب خوفهم و يجب ان نشجعهم على التحدث عنه. . ف إذا وجدوا صعوبة في التعبير عنه، فكروهم في المخاوف اللى عاشها حد من أصحابهم و انتم تعرفوها أو اعرضوا عليهم قصة تتحدث عن وقوع موقف صعب للبطل او للعروسة اللعبة بتاعتهم و اشرحلهم كيف لها ان تتغلب على هذه الواقعة مؤلمة، وجربوا الكلام معاهم عن هذه المخاوف حتى لو لم يحددها اطفالكم .. و إذا لما يتفاعل طفلك معاك بعد كل هذه المحاولات تأكد ان فى مشكلة فى طبيعة علاقكم بأبنك .. لكن فى حاجة لازم نعرفها قبل ما نحكم على علاقتنا بأولادنا و قبل ما نيأس من فشلنا فى جعل الصغير يخبرنا بمخاوفه .. ضرورى جدا نعرف انه من الطبيعي للاطفال أن يخبروا أشخاصاً لا يعرفونهم بمخاوفهم.. فلو قدرنا يكون فى وسيط فى الحالات دى ، ممكن نتعامل من خلاله مع اطفالانا .. لا ضرر فى الحالة دى فقط .. لكن انا أشجع عدم وجود وسيط بين الطفل و والديه فى الحالات العادية و ليست الإستثنائية
  5. ساندوا الطفل في هذه المخاوف :
  • إلعبوا مع الاطفال الذين لا يستطيعون الكلام بعد ، فوجود طفل صغير لا يستطيع طرح السؤال بالتفصيل أو التعبير عن مشاعره ده مش معناه أنه مش خايف أو متخوف من الأجواء المحيطة به. . ف من أجل مساعدة هذا الطفل الصغير على التعبير عن مشاعره يجب ان نجلسي على الأرض إلى جواره و نلعب معه .. عن طريق عرض العرائس و رسم اللوحات و قراءة الكتب التي ستساهم في إخراج مشاعره. .. و كويس جدا لو الطفل قدر لوحة تشرح فيها مشاعره ، و ما تزعلوش لو حب يقطعها و قام بفعلا بتمزيقها. .. ده أمر طبيعي تماماً، وهو طريقة جسدية للتعامل مع الإحباط والقلق.
  • كما يمكنكم تجهيز لعبة يستطيع فيها الطفل إخافتكم . .. الطب النفسى بيقول عن اللعبة دى انها مراية صادقة للى فى نفس الصغير .. "إذا مثّلتم أنكم خايفيين لكن بطريقة لطيفة، سيتمكن طفلك من الضحك لرؤية شخص كبير في وضعية ضعيفة. وهذا سيساعده على استعادة الإحساس بالقوة ويسمح له بإيجاد حلّ لمخاوفه".
  • حافظوا على روتين العائلة حتى ينمو الاطفال من جميع الأعمار بقوة بسبب الروتين.. ف لا معنى للإدعاء بأن الحياة عادية إذا تأثرت عائلتكم و نمط حياتكم اليومية بسبب الأحداث السياسية – و من أهم اللأشياء الواجب الحفاظ عليها كروتين يومى هى : مواعيد الطعام ، الاستحمام، وقت القراءة ، النوم ، اللعب ، الخروج – قد تكون كلها مصدر طمأنة كبيرة للاطفال
  • و لكم تحياتى مامى لأول مرة http://la3ya3nyno.blogspot.com/
Creative Commons License
مدونة مامى لأول مرة by mamy1st.blogspot.com is licensed under a Creative Commons Attribution 3.0 Unported License.
Based on a work at mamy1st.blogspot.com.
Permissions beyond the scope of this license may be available at http://mamy1st.blogspot.com/.

لوقاية الطفل الرضيع من الزكام

لو سألت أى أم أو أى أب عن أحساسهم لما أصيب رضيعهما بالزكام أو نزلات البرد لأول مرة .. أكيد ح تسمع اجابت تشعرك بالفزع و الإنزعاج لإعتقاد الأهل ان رضيعهما يختنق و لا يتمكن من التنفس .. ف غالباً ما تتسبّب رؤية طفل رضيع يعاني من الزكام للمرة الأولى في حياته فى حزن شديد خاصة لدى الأم لأول مرة و الأب لأول مرة .. فكل من لا يمتلك الخبرة فى هذا الخصوص يشعر و كأنه يدور فى حلقة مفرغة تصيبه بالرعب .. و السبب مش بسيط و هين و لكن في مثل هذه الحالة يكون الطفل مصابا هو نفسه بالرعب و يكون منزعجاً لعدم قدرته على التنفس بشكل طبيعى و جيد ؛ كما انه يمتنع عن الرضاعة لنفس السبب.
و فى الحقيقة الأمر ليس بهذه الصعوبة، لأن التخلص من الحالة دى سهل و بسيط و الحلول التي يمكن أن تخفف عن الطفل هذا الوضع فى متناول إيدينا .
ف لا بد أن نعلم أن الزكام مرض من السهل التغلب عليه لكن اهماله يؤدى لمشاكل صحية خطيرة ، و الحاجة التانية إللى لازم نعرفها أن الطفل في أول سنتين من عمره غالبا ما يصاب بالبرد او الزكام من ثماني إلى عشر مرات. . لذلك يجب أن نستعد لاستعمال الإسعافات الأولية وسهر الليالي!




















ما الذي يسبّب الزكام؟عادة ما ينتقل الزكام من شخص مصاب إلى الطفل الرضيع السليم عن طريق العطس أوالسعال .. و لأن الزكام عبارة عن التهاب في المجاري التنفسية العليا بسبب فيروس واحد أو أكثر لذلك يتسبب فى صعوبة تنفس الرضيع و يفقده الرغبة فى الرضاعة .. و انتقال الفيروس للطفل الرضيع لا يأتى عبر استنشاق الرزاز المحمل بالفيروس من الجو المحيط فقط ، إنما ينتقل الفيروس للرضيع السليم عن طريق الملامسة والمصافحة و التقبيل .
فتقبيل الرضيع تكون بمثابة النيران الصديقة التى تهدد صحة كائن رقيق لم يتم ايامه الأولى .. لذلك لا بد ان نكف عن عادة تقبيل الرضيع سواء من الكبار او من الصغار التى لا يحلو لها العطس إلا فى وجه الصغير الضعيف .. كما يجب غسل اليدين بعد لمس الأنف قبل حمل الرضيع او اعداد ملابسه او طعامه او الامساك بأى ادوات يمسها بيديه او فمه
.
يصاب الرضّع عادة بالعدوى بسرعة لأن جهازهم المناعي يعمل بنسبة 60 % فقط .

كيف يصاب الأطفال الرضّع بالزكام؟مش دايما تكون اصابة الرضيع بالبرد او الزكام أو الأنفلونزا مصحوبا بحرارة .. لكن ده ما يمنعش انه فى اوقات قليلة يصاب الطفل بالزكام مع ظهور بعض الأعراض المربكة مثل :
  • ارتفاع درجة الحرارة ، و المقصود انها تكون أعلى من 38 درجة مئوية
  • السعال
  • احمرار العينين
  • التهاب الحلق
  • سيلان الأنف.
  • وقد يصبح الطفل سريع الهياج والتأثر
  • من الممكن أن يفقد شهيته ولا يأكل طعامه.
لا يستطيع الأطفال الذين تقل أعمارهم عن ستة أشهر التنفس عبر الأنف عند الإصابة بالزكام، فلا يتمكنون من الرضاعة التي تصبح عملية مزعجة لهم .. عشان كدة لازم يكون محلول الملح الخاص بالرضع موجود فى البيت بشكل مستمر .. و نراعى اننا نتخلص من العبوة بعد شهر من فتحها لأنها بتكون فقدت مفعولها .. و هنا يسأل بعض الأهالى " هل محلول الملح كفيل بتنظيف الأنف ؟؟"
الإجابة : محلول الملح يسلك مجرى التنفس ، لكن لا يقضى على المخاط الموجود فى الأنف و قد يسبب هذا البلغم فى بعض الأحيان ظهور البلغم فى التواليت ، أو على الصدر و احيانا يسبب السعال ، لأن الجسم بيحاول يطرد البلغم الموجود على صدر البي بى .. و لأن الطفل ما بيعرفش يتمخّط أو ينظف أنفه قبل سنّ الرابعة و بالتالى ما بيقدرش ينظف أنفه ، عشان كدة لازم من مساعدته على التخلص من المخاط الذي يسدّ أنفه ، و ده بيحصل باستخدام شفاط الأنف الموجود فى الصيداليات و التى نستخدمه لشفط المخاط من أنف الرضيع .
إذا كان طفلك قد بدأ يعتاد النوم ليلا فسوف يستيقظ عدة مرات لعدم تمكنه من التنفس جيداً و هذا سيسبب له الشعور بعدم الراحة. .. و الحل هنا هو استخدام محلول الملح للرضع و شفاط الأنف لتنظيف الأنف .
كم يوم يستمر الزكام ؟تبدأ أعراض الزكام عادة من ثلاثة إلى عشرة أيام، لكنها قد تستمر عند الأطفال المولودين حديثاً لأكثر من أسبوعين. .. فقد يصاب معظم الرضّع و خاصة الذين يحتكّون يومياً بأطفال أكبر سناً، بالزكام ما بين ست وعشر مرات في السنة الأولى من عمرهم، لذا يبدو عليهم وكأن أنوفهم تسيل بشكل متواصل.





طرق وقاية الطفل من الزكام؟
  1. الرضاعة الطبيعية : هي إحدى أفضل الوسائل لحماية الطفل من الأمراض، ف كلما طالت مدة الرضاعة الطبيعية كلما حصل الطفل على أجسام مضادة واكتسب من مناعة امه ما يساعده على مقازمة المرض.
  2. الوقاية المباشرة :
  • تعتمد على إبعاد الطفل عن أي شخص مريض مهما كان عمره أو ضرورة وجوده بالقرب من الرضيع .
  • الطلب من جميع أفراد العائلة غسل أيديهم جيداً قبل حمل الرضيع أو لمس أغراضه.
  • إذا كان الأب أو الأم من فئة المدخنين ضرورى جدا أبعاد الرضيع عن مكان التدخين، ولا نسمح لأي شخص بالتدخين بالقرب منه. . ف إن الطفل الذي يعيش مع المدخنين، يصاب بالزكام أكثر من الأطفال غير المعرضين لدخان السجائر، كما أنه لا يشفى بسرعة مثلهم.



متى أذهب للطبيب؟إذا كان عمر الطفل أقل من ثلاثة أشهر، يجب الإسراع إلى الطبيب بمجرد ظهور أعراض للزكام . . أما إذا كان الطفل أكبر سناً، فمن الممكن علاج الرضيع فى البيت بواسطة استخدام محلول الملح و الفيتامين " سى " الخاص بالرضع و المعروف بأسم " سفلين " او " سى فيت " ، لكن يجب زياردة الطبيب لو استمرت أعراض الزكام لأكثر من خمسة أيام. . و فى هذه الحالة يجب قياس حرارة الرضيع بشكل مستمر ، فان ارتفعت حرارته يجب اعطاءه مخفض للحرارة ثم اسراع إلى الطبيب .. فمثلا إذا وصلت حرارة طفلك إلى 39 درجة مئوية اول شئ من الضرورى فعله هو اعطاءه مخفض للحرارة حتى يمكن لجهاز مناعة الطفل ان يعمل
لكن نعمل إيه لو الطفل شعر بألم في أذنيه، أو حدثت له مشكلات في التنفس كالصفير، أو السعال الدائم، أو عندما يسيل من أنفه مخاط لزج أخضر اللون. .. كل دى حالات لا علاج لها إلا عند الطبيب .



إزاى ممكن أعالج الطفل من الزكام قبل العرض على الطبيب ؟
  1. أمنح الطفل قسطاً وافياً من الراحة .
  2. نعطي الطفل الكثير من السوائل و يفضل ان تكون غنية بالفيتامين C .. كما يمكن اعطاء الطفل عصير الفواكه. .. إذا كان عمره يسمح بذلك ، فالرضع قبل سن الأكل يجب ان يستشار الطبيب فى حالتهم
  3. إذا كان الطفل يعاني من الحمّى، يمكن إعطاؤه جرعات من الباراسيتامول بعد استشارة الطبيب.
  4. لا تعطوا الطفل أي دواء لمعالجة الزكام دون مراجعة الطبيب أو الصيدلي، فهناك أدوية لعلاج نزلات البرد تباع بلا وصفة طبية تضرّ أكثر مما تنفع، خصوصاً لدى الرضّع الذين لم يتجاوزوا عامهم الأول
  5. ان كان الطفل عمره أكبر من عام من الممكن اعطاه الأعشاب التى تقضى على البرد و السعال و المتوفرة بالصيدلية .
  6. إذا كان عمر طفلك أكبر من عشرة أشهر و أنفه محتقناً، يمكنك رفع رأسه عن مستوى الفراش بوضع منشفة قديمة واحدة أو اثنتين تحته، كما أن من شأن وضع الطفل في سريره على جنبه التخفيف من تصريف السائل المخاطي إلى الخلف. (لا تحاولوا إسناد رأس الطفل بوسائد لرفعه فإن ذلك قد يسبّب اختناقاً مباغتاً، كذلك لا تضعوا وسائد رأس رضيع). •
  7. لا يعرف الأطفال الرضّع كيفية إزالة المخاط من أنوفهم، لذا علينا مساعدتهم في تنظيف أنفوهم كي يتمكّنوا من التنفس بسهولة و ذلك بوضع نقطة او نقطتين من قطرة محلول ملحي في كل منخار قبل موعد الرضاعة
و مرور أطفالكم بنزلة برد مرة واحدة كفيلة بتدريبكم على علاجه فى المرات اللى جاية ــ بعد الشر .. أدام الله الصحة على كل أطفالنا و متعهم بالعافية
و لكم تحياتى
مامى لأول مرة
http://la3ya3nyno.blogspot.com/

midlle ad