top ad

الأربعاء، 15 ديسمبر 2010

رضاعة التوأم


دائما ما تحتار ام التوأم فى طريقة الرضاعة التى يجب ان تتبعها حتى تمد توأمها بالغذاء الكافى لهما . . و تبدأ الأم فى البحث عن كافة السبل للاجابة على اسئلتها التى لا تنتهى
فهى لا تعرف كيف و لا متى و لا من أين لها بهذا اللبن الطبيعى إللى بيتكلموا عنه و عن فوائده التى لا تحصى عشان ترضع توأمها

و الاجابة بمنتهى السهولة : اولا احرصى ايتها الأم الطيبة على شرب كمية كبيرة من الماء و السوائل بشكل يتراوح ما بين 3 و اربعة لتر ، يدخل من بينها كوب يومى لعصير البرتقال و كوبين من الحلبة و لمن لا تحب رائحة الحلبة هناك اعشاب بالصيدلية اسمها " اعشاب لادرار اللبن " يمكنك ان تشربى منها كوبين ، و طعامك يجب ان لا يحتوى على اى شئ يسبب لك الغازات حتى لا تنتقل تلك الغازات لتوأمك ، و يفضل ان تأكلى السمك المشوى او التونة فهى تساعد على ادرار اللبن . . و ما تنسيش تخدى الفيتامينات اللى كنتى بتآخديها ايام الحمل و خصوصا مجموعة الفيتامينات إللى اسمها " ماتيرنا "

و بما اننا كلنا و شربنا ، نبدأ رحلة الرضاعة المجيدة . . نحدد لكل طفل ثدى خاص به و الآخر لأخيه او اخته ، تبدأ الرضاعة فى اول شهر عشر دقائق ثم نكرع البيبى ثم عشر دقائق تانية من نفس الثدى ، حتى لا يجور احدهما على اللبن الخاص بأخيه . . و بكدة اللبن ح يزيد فى ثديك بشكل لا تتصوريه

و بعد انتهاء الشهر الأول نزود مدة الرضاعة الى ربع ساعة ثم تكريع ثك ربع ساعة ثانية . . و لو لسة البيبى جعان ما تدهوش صدرك تانى عشان يتعلم يرضع بسرعة

نفضل نرضع اول اسبوعين كل ساعتين للبيبى الواحد و بعد اول اسبوعين نزود المدة الى تلت ساعات ، و نفضل بالشكل ده على مدار اليوم فى حالة رضاعة مستمرة لحد ما اللبن يخلص . . نعرف ازاى انه خلص ؟؟؟ حاجة سهلة جدا ، اضغطى على صدرك ، لو طلع نقطة لبن واحدة يبقى مليان . . و على فكرة كل ما ترضعى أكتر كل ما اللبن فى صدرك ح يزيد . . و ما تسمعيش كلام حد يقولك ان التوأم لازم يرضع صناعى ، لأ ، لأ ، لأ .. ممكن جدا ما تحتاجيش صناعى خالص ، اللبن ده رزق التوأم و ماحدش يعرف و لا يفتى فيه .

لكن لو احتاجتى تنامى و فى حد ممكن يرضع التوأم مكانك فى الحالة دى ممكن يدى راضعة صناعى او اعشاب لو البيبى راضع كويس ، و إللى ما بيحبش يدى البيبى أعشاب ممكن يبدلها بماية قراصية ، و هى سهلة التحضير جدا . . بعد مانغلى القراصية مع التمر ، نستنى لما تبرد و نحطها فى الببرونا للبيبى ، ح تغذيه و تكبره

و ارجوكم لا تقارنوا بين أولادكم التوأم فى طريقة الأكل و كميته ، فكل واحد منهما له شخصيته المستقلة

و تعالوا معايا نشوف الحالة دى :
انا عندى توأم بنات ، عمرهم اربع شهور ، مولودين فى اول الشهر التاسع من الحمل ، بأرضعهم طبيعى و صناعى ، لكن عندى واحدة منهم بتبكى بكاء متواصل . . و عرضتها على الدكتور فمرة يقولى عندها مغص و مرة يقولى ودانها بتوجعها ، و رغم انها بتعيط من اول يوم فى الولادة لكن العياط دلوقتى بقى مرتبط بالرضاعة ، ترضع شوية و تسيب الرضاعة و ، تعيطي شوية و هى بترضع . . مش عارفة اعمل معاها إيه ؟ و سؤال كمان اللبن الصناعى اسيبه فى الببرونا قد إيه ؟؟ و بعد كدة بيكون باظ ؟!!!

الإجابة : بما ان البكاء مرتبط بالرضاعة فهذا يعنى ان اللبن الصناعى إللى انتى بتديهولها عامل لها مشكلة ، فبعض الأطفال عندهم عدم قابلية لهضم السكر الموجود فى اللبن . . و المطلوب منك فى الحالة دى هو انك تجربى تديها لبن صناعى خالى السكر . . و السوق مليان بأنواع مختلفة من لبن الرضع الصناعى خالى السكر و عالى القيمة الغذائية و لا يسبب آلأم للأطفال بسبب الهضم و ما بيعملش مغص اثناء الرضاعة

إذا استجابت ابنتك لهذا اللبن خير و بركة ، لكن ان لم تستجب فعليكى بتغير اللبن إلى لبن نباتى ، لبن صويا يعنى و هو له نفس القيمة الغذائية لكن ما بيسببش ألم لإبنتك عند الرضاعة او الهضم


اما عن المدة الواجب ان يبقى اللبن الصناعى فيها داخل الببرونا ، و طبعا احنا هنا بنتكلم على الببرونا إللى الرضيع شرب منها ، مش الببرونا إللى مقفولة و محفوظة و الأم مجهزاها معاها عشان خارجة و رايحة مكان . . تبقى ببرونة اللبن اللى شرب منها الرضيع يجب ان يبقى اللبن فيها ساعة واحدة فقط لا غير و بعدها نرميه ، لأن البيبى لما بيرضع من الببرونا بيرجع فيها و الترجيع ده فيه انزيمات بتبوظ اللبن . . عشان كدة بلاش حكاية اننا نعمل كمية كبيرة فى اللبن و نسيبه فى الببرونا البيبى يشرب منه على قد ما يشرب ، لأ ، لأ . . المفروض نعمل بس كمية اللبن اللى البيبى متعود يآخدها مش يبقى بيأخد 60 سنتى اعمل ان 120 سنتى و اقول ما هو ح يشربها كمان شوية

و بلاش حكاية الأخ يشرب مكان اخوه التوأم ، و الأخت تشرب اللى فضل من اختها التوأم . . ماحدش يشرب الباقى من ببرونة حد عشان برضه الأنزيمات إللى بتنزل فى الببرونا
و يمكنكم سماع الموضع من الدكتور رفعت الجابرى على هذه الرابط

http://www.mediafire.com/?rj7a9gaupsdje6n

و لكم تحياتى
مامى لأول مرة



http://www.onislam.net/arabic/?utm_source=adwords&utm_medium=cpc&utm_campaign=Launch%2BCampaign%2BArabic&gclid=CNLXnMnc7qUCFYULfAodtgsCrQ

midlle ad