top ad

الخميس، 11 نوفمبر 2010

تغذية الأطفال ــ وخاصة الرضع

الكثير من الأمهات تجهل الطريقة الصحيحة فى اطعام اطفالهم ليصبح قوى البنيان و لا يعانى من مشاكل صحية بسبب سوء التغذية
طعام الرضيع : يجب ان نبدأ فى اطعام الرضيع أول ما يصبح عمره ستة أشهر . . وبلاش حكاية ماية الرز و ماية البليلة مع بداية الشهر الثالث للرضيع ؛ ف اطعامه قبل ان يكون عمره ستة اشهر يزيد من قابلية اصابته بحساسية الصدر و حساسية الأنف و حساسية جلد ، و لهذا لابد ان نمتنع عن الاطعام قبل ستة أشهر و خاصة النشيوات مثل ماء الأرز و ماء البليلة التى تعمل على سمنة الرضيع و ليس نموه فالطعام الجيد يعطى رضيعا قويا ، و يجعل طوله متناسبا مع وزنه و عمره . . كما يجعل عملية التسنين متماشية مع قدرة الرضيع على المشى . . ف الطفل السمين يتأخر فى المشى . . و الطفل ذو الصحة الجيدة يمشى فى معاده ، يزحف فى معاده ، يسنن فى معاده و يقعد فى معاده و يكون نموه العقل فى افضل حالات الإرتقاء و التطور لذلك يجب ان يتناول الرضيع طعاما متوازن ، يحتوى على كافة العناصر الغذائية من بروتين و نشويات و فيتامينات و فواكة و خضروات . . بلاش حكاية ماية رز ، و مسحوق قمح و بسكويت فى شاى . . كل دى نشويات تعمل على تأخير نمو الطفل رغم ان وزنه بيزيد . . فلكى نضمن تغذية سليمة يجب التنوع فى تغذية أطفالنا

ملاحظات هامة : الرضيع ما يكولش قبل ست شهور ، لكن لو كان وزنه سبعة كيلو و عمره أربع شهور يبقى ضرورى أبدا أدخله أكل . . الأكل يبدأ بأنى بأدوقه الأول ، ما أكلوش على طول ، عشان أتأكد ان ابنى ماعندوش حساسية من الأكل الجديد
ــ يراعى عدم إعطاء الطعام الجديد بكميات كبيرة مرة واحدة . . لازم نتدرج
ــ ما نديش أكثر من صنف جديد في المرة الواحدة.
ــ مانجبرش الرضيع على الطعام ، فإذا رفض هذا الصنف أتدرج معه فى صنف طعام جديد ــ يفضل استخدام الببرونا المعلقة ، لحد ما النونو يتعود على الأكل و يوصل للشهر العاشر نبدأ نستخدم المعلقة و الطبق . . لكن أبدا ابدا و مرفوض استخدم الببرونا العاديةاللى هى ببرونة اللبن فى اطعام الرضيع
ــ و بالنسبة للماية إللى محيرة كل الناس ، يجب غلي الماء الذي يعطى للطفل في السنة الأولى من عمره ، او اعطاء مياه معدنية . . و نبدأ نقطرله بعد الأكل ، و نزود جرعة الماية فى الصيف . . يفضل ان نشرب الرضيع يشرب ماية لما يبدأ يآكل ؛ قبل كدة هو ما بيشعرش بعطش لأن لبن الأم يرويه . . يفضل استخدام قطارة لكى يشرب بها الرضيع ، و لما يبقى عمره سنة نشربه من كوباية مناسبة لعمره ، يشرب بيها تحت اشرافنا عشان ما يدلقش الماية على نفسه و يبرد .
ــ نحدد ساعات معينة للأكل ، و لا تعطى وجبات بين الرضعات . . فالهدف من اطعام الرضيع هو ان تحل الوجبة محل الرضعة.

ــ ممنوع منعا باتا ً اطعام الرضيع صنف جديد أثناء مرضه أو عند تطعيمه.
ــ رغبات الطفل لها إحترامها حتى لا يكره الوجبات ويتعود على عناد الأم.
ــ فى الشتاء : يجب تدفئة الطعام قبل إعطاؤه للطفل .
ــ يجب الامتناع عن الطعام الجاهز المنتشر فى الصيداليات و فى السوبر ماركت و يفضل عمل الطعام فى البيت عشان نضمن انه فرش و ظازجة و مافيهوش مواد حافظة ــ ممنوع وضع التوابل و الملح و السكر فى طعام الرضيع ، و طبعا ما نأكلهوش مخللات أو طعام دسم.
ــ بعد ان يتم الرضيع عمره الأول يجب الإقلال من الشيكولاته ، البونبون ، اللبان ، المياه الغازية خلال فترة الطفولة. ــ زيادة وزن الطفل عن الوزن الطبيعي مضرة تماماً مثل نقص وزنه. ــ يستطيع الطفل أن يتعلم إستعمال الملعقة بنفسه في العام الثاني وإستعمال الشوكة في العام الثالث.
 ــ يجب العناية بأسنان الطفل بشراء فرشة اسنان مخصصة لأطفال التى تمت عامها الأول من العم على ان تستخدم دون معجون و برفق . . أو ممكن نشربه ماية بعد تناول أي طعام عشان تقوم بدور المضمضة حتى و ان كان مابيعرفش يتمضمض.

ــ يفضل ان يأكل رضيع الشهر السادس وجبة طعام واحدة فقط على ان يكون باقى تغذيته رضاعة جدول التغذية :
• يفضل البدئ بالخضار المسلوق مثل الكوسة ، البطاطس ، شربة الخضار المكونة من الكوسة و البطاطس فقط . . و فى الشهر السابع ندخل الجزر إلى شربة الخضار ــ ثم ندخل الفاكهة المسلوقة مثل التفاح ، البطاطا ، كمثرى ، الموز . . يفضب تأخير الموز الى الشهر الثامن حتى يتمكن الرضيع من بلعه ــ مسحوق الحبوب من الأرز . .نبدأ في أول يوم إعطاء الرضيع مقدار ملعقة صغيرة من مسحوق الحبوب وتزداد تدريجياً حتى تصبح وجبة كاملة.



هام : يجب عند البدء بإعطاء مسحوق الحبوب للأطفال تجنب الأغذية المحتوية على الجلوتين ، التى تكون تحتوي على القمح في مكوناته. • عصير التفاح أو التفاح المبشور:يحتوي على فيتامين (ج) و (أ) والحديد، وله دور مباشر في تنظيم عملية الإخراج.
ــ مع بداية الشهر الثامن يتم وضع صدور الفراخ مع شربة الخضار ضربها بالخلاط قبل اعطاءها للرضيع
ــ مع نهاية الشهر الثامن نعطى مسحوق القمح ، شربة فراخ بها شعرية او لسان عصفور، و قطع من البسكويت نضعها فى يد الرضيع
• مع بداية الشهر التاسع نقدم له صفار البيض ، بحيث يعطى الصفار فقط خلال العام الأول.و يكون مسلوقاً سلقا جيدا للتخلص من اى بكتيريا به ، نبدأ بملعقة صغيرة من البيض ثم تزداد تدريجياً حتى يعطى الصفار بأكمله ويمكن إعطاؤه مخلوطاً بمسحوق القمح او وضعه مع شربة الخضار بشرط ان لا يكون بها فراخ مع نهاية الشهر التاسع نعطى الرضيع اللبن الرايب (الزبادي):نبدأ بإعطاء ملعقة متوسطة تزداد تدريجياً يوم بعد يوم حتى يتناول الطفل وجبة كاملة مقدراها 150 جرام ، ويفضل أن تنزع قشدة الزبادي في المرات الأولى ثم يعطى كاملاً.
ــ مع نهاية الشهر التاسع : نعطى البليلة ، و الفول منزوع القشرة و ندخله بالتدريج و نحن نلاحظ حفاض الطفل ان ظهر به نقط دم نمتنع عن اطعام الفول فورا . . يفضل اطعام الفول بعد ان يتم الرضيع عامه الأول و ذلك للذكور ام البنات

الفول و طريقة اعطاءه للرضيع :
الفــول (للبنات فقط ولا يعطى للذكور إلا حسب إرشادات الطبيب) . . نبدأ بإعطاء حبة فول واحدة ، ثم تزداد تدريجياً ثم يتم التوقف لثلاث أيام متتالية ، مع ملاحظة لون البول فإذا زاد إحمرار للبول أو شحوب للطفل يستشار الطبيب.

مع الشهر الحادى عشر : يمكن أن يضاف للخضار أثناء طهوه أنواع جديدة من الخضروات ويتم معاملتها بالخلاط مثل الطماطم بعد نزع القشرة ، البازلاء الخضراء ، الأرز
ــ مع نهاية العام الأول من عمر الرضيع نقدم له اللبن البقرى و عسل النحل و ويتم إعطاؤه تدريجياً.
الكبــده : تعطى مسلوقة مدهوكة وذلك مرة أو مرتين في الإسبوع ويجب أن تكون طازجة ــ بعد ان يتم الرضيع عامه الأول يأكل كل شئ ؛ فقد تعود على طعام الأسرة ويمكن أن يأكل مع أفراد الأسرة و يمكن اطعامه سبانخ او جبنة نستو او جبنة بيضاء ، بيضة كاملة (بياضاً وصفاراً) إما مسلوقاً أو مقلياً أو أومليت. . برتقال
الغذاء : مكرونة في الفرن وكوسة بالبشملة أو لحم مع مكرونة.. من أرز و خضار مطبوخ + قطعة فرخة او لحمة ، مكرونة في الفرن أو بالبشملة أو مكرونة مع اللحم + لحم أو طيور أو كبدة أو سمك ، سبانج شوربة الخضار + كبدة الدجاج مهروسة + أرز مسلوق + دجاج أو سمك . . اى شئ مما ستغذا عليه الأسرة العشاء : لبن أو جبنة بيضاء.. كوكتيل الفاكهة أو زبادي أو بودنج برتقال أو زبادي بالفاكهة ، مهلبية الفطور : فول مع بيض مسلوق أو جبن مع خبز أو بليلة . . كيك باللبن

من مظاهر سوء التغذية :
1ــ وجه الطفل يكون شاحبا ، و هذا دليل الأنيميا ، فالطفل يولد و معه مخزون حديد ينفذ عند عمر ست شهور ، عشان كدة بنبدأ ناكله و نديله فيتامين الحديد عشان يقدر يعوض
2ــ اصابة الأطفال بلين العظام ــ مش بس بسبب سوء التغذية لكن كمان بسبب عدم تعرض الرضيع للشمس فى الأوقات الغير ضارة 3ــ او اعطاءه فيتامين دال الذى يقوم بامتصاص الكالسيوم من اللبن ]
 ــ يمكنكم مراجعة حلقة لين العظام على هذا الرابط
ــ http://mamy1st.blogspot.com/2010/10/blog-post_26.html 3ــ

عدم تركيز الطفل بالمدرسة .. فهو ينام بالفصل ، سببه نقص الحديد و الأنيميا و سوء التغذية
 4ــ الطفل مهما ذاكر بينسى كل إللى ذاكره لذلك ينصح الأطباء بعمل تحليل دم لكل اطفال المدارس لمعرفة نسبة الهيموجلوبين بالدم ، ف ان كان ناقصا نعطى حديد لفترات منتظمة
و هذا يمكنكم سماعه من الدكتور رفعت الجابرى استشارى طب الأطفال على الرابط التالى
 http://www.mediafire.com/?vgesxkfroo14ius

اسئلة خاصة بالتغذية يجيب عليها دكتور رفعت الجابرى
استشارى طب الأطفال و حديثى الولادة:
ــ ابنى وزنه 9 كيلو و عمره خمس شهور مع انه اتولد 3 كيلو . . لما بيقعد ما بيمسكش نفسه و بيتقلب على وشه
جزء من الاجابة : ابنك عنده وزن زيادة المفروص يبقى وزنه ستة كيلو و نص بالكتير سبعة كيلو . . لازم تقللى عدد الرضعات اللى ابنك بيآخدها ، و لو جاع اديله اعشاب زى التيليو و الكراوية . . ابنك متأخر فى القعاد
ــ عندى توأم عمرهم سبع شهور بيرضعوا صناعى ، و بأكلهم خضار مسلوق و فاكهة مسلوقة . . امتى ادخل لهم الحليب بتاعنا جزء من الاجابة : اللبن البقرى او الجموسى مش قبل سنة ، و السبب ان في مواد جسم الرضيع ما يقدرش على هضمها و ده بيسبب لهم هشاشة عظام على عكس الناس ما فاكرة . . ده غير اننا لما بندى الرضيع اللبن البقرى قبل عمر سنةبنزول قابليته للحساسية و الخنفرة. . استمرى على اللبن الصتاعى و معاه كالسيوم فيتامين و فيتامين دال

ــ بنتى عندها عشر شهور و كل ما بتيجى تآكل تعيط و ده بيحصل كمان مع الرضاعة اتصرف معاها إزاى ؟؟؟
جزء من الاجابة : بنتك ممكن يكون عندها حساسية من السكر الموجود فى اللبن ، هو ده السبب إللى بيخلى الرضيع يعيط و هو بيرضع و يسيب له ألم . . لأن الطفل جعان جدا بس كل ما يرضع يتألم بشدة ، و العلاج انك تتأكدى من الطبيب و يعملك التحاليل اللازمة و يكتبلك على لبن نباتى او حليب صويا خالى من الس

ــ بنتى عمره سنين و نص و وزنها 13 كيلو ، عندها انيميا رغم انى باديها فيتامينات ، و الدكتورة عرفت ان عندها انيميا من شكلها و من تحليل البراز
من الاجابة : الأنيميا بتتعرف من تحليل الدم ، و مالهاش علاقة ان الطفل رفيع او طخين . . اعملى تحليل اسمه "صورة دم كاملة " . . و لو طلع عند بنتك انيميا تديها حديد لمدة شهرين تلاتة ، و لو ما اتحسنتش تعملى تحليل كهرو كيميائى عشان نحدد هى عندها ايه بالظبط

ــ انا خدت مضاد حيوى لمدة خمس ايام ، ح يأثر على بنتى اللى بارضعها
جزء من الاجابة : ابدا و لا تشغلى بالك

ــ بنت ابنى مغلبانى فى الأكل ، اتولدت 3 كيلو , الدكتور كتبلها على حديد رغم ان عمرها سنة و عشر شهور و وزنها عشرة كيلو و ما بتكلش غير بطاطس
جزء من الاجابة : حاولى تديها الأكل بكميات صغيرة ، و حولى الأكل للعبة مش خناقة

ــ بنتى عمرها عشر شهور ، كل ما بتآكل بتتبرز ، هو ده طبيعى ؟
جزء من الاجابة : بنتك طبيعية ، بس هى عندها معدة نشطة ، و دى حالة مش مرضية و ح تختفى بالوقت . . اعمليلها تحليل براز للاطمئنان الزائد ــ كأنى بانفخ فى الزبادى

أسئلة عامة : ــ ابنى عنده خمس شهور ، و خد مضادات حيوية كتير بسبب البرد المستمر عنده ، و رغم انه خف من البرد إلا انه عنده حكة ناشفة ، ده غير ان رجليه مش صالبة نفسها ، كل ما أقعده يميل لأدام . . هوو كدة حالته خطيرة ؟؟
جزء من الاجابة : لو ابنك بيتابعك و بيلاغيكى يبقى نموه الذهنى كويس . . هو صحيح متأخر شوية ، و لازم يتفحص عند الطبيب عشان يشوف بيقعد إزاى و يوزنه و يكشف على اعصابه ، عشان نعمله تقيم للنمو الذهنى . . و اوعى حد يقولك ان ابنك عنده حساسية صدر ولا يوصفله بخاخة ، هو صدره ح يفضل يزيأ لمدة سنة فمتقلقيش

ــ بنتى بتنزل افرازات صفرا من عنيها أعمل إيه ؟
جزء من الاجابة : ده بسبب ضيق القناة الدمعية ، و الالتهابات فى العين . . . و الحكاية دى بتستمر ما بين ست شهور و سنة من عمر الرضيع . . الحل انك تنضفى العين بقطرة و ماية دافية ، كل عين قطنة مختلفة عشان ما ننقلش الميكروب من العين دى للعين دى ، و نسنعمل قطرة مضاد حيوى تلت مرات فى اليوم لمدة خمس أيام . . و ندلك القناة الدمعية بالضغط الخفيف عند زاوية العين عند كل راضعة ؛ فده يوسع القناة الدمعية و يقلل الالتهابات

ــ ابنى اتولد بالصفرا و بقاله شهر بيتعالج منها و مع ذلك هى لسة عالية ، و و صلت لعشرة و الدكتور كتبلى على دوا بس قالى انه بينيم ، و انا خفت أدهوله ، فمش عارفه اديهوله ولا لأ ؟ جزء من افجابة : اعملي لإبنك تحليل الغدة الدرقية ، فلو طلع طبيعى مع ابنك إللى عمره شهر و الصفرا عنده عشرة ، يبقى ابنك طبيعى ، و ما تديش الدوا و رضعيه كويس

ــ بنتى اتولدت و عندها حول فى عنيها . . يا ترى ده ممكن يروح بعد كدة ؟
جزء من الإجابة : فى فحص روتينى بيتعمل للأطفال بعد الولادة و منها فحص قاع العين . . و لازم كل أم تروح للدكتور تطلب منه يفحص قاع العين ، لن الفحص ده يؤكد لنا ان مافيش عتامة على قاع العين أو على القرنية ، فلو قاع العين سليم ما نقلقش من الحول ؛ ح يروح فى اول 9 شهور

ـ بنتى عمرها سنتين و نص بتحب تبربش بعنيها . . ده خطر ؟؟
جزء من الإجابة : بنتك بتحاول تكتشف بيحصل ايه لما بتبربش ، ما تقلقيش هى بتلعب و ده نوع من الاكتشاف عند الأطفال و عشان نتأكد نفحص قاع العين
و لكم تحياتى
 مامى لأول مرة
 http://la3ya3nyno.blogspot.com/

midlle ad