top ad

الأحد، 27 يونيو 2010

لعنة الشهر العاشر






و كأن الشهر العاشر رفض ان ينتهى دون ان يترك بصماته علينا . . فلو اعتبرنا ان النهاردة 2 مايو 2010 ح أقدر أرجع بيكم فلاش باك للخلف .
النهاردة قررنا نلغى فكرة البيبرونا المعلقة و ندى البنات الأكل بالمعلقة و بس ، كبروا بقى ، ماهىى كلها 72 ساعة و نودع الشهر العاشر . . و على هذا الاساس قمت لتحضير القمح فى الأطباق التى خصصتها من قبل لبناتى إلا اننى وجدته سائلا ؛ أقرب للماء مع ان المفروض أنه يبقى مهلبية .. و بدأت أضيف معلقة قمح ورا معلقة قمح طمعا فى ان يتجمد السيد قمح ، لكن و لا حياة لمن تنادى . . هو القمح ده من الحكومة و لا إيه ؟!!! مهما أعمل سايق الطناش . . و لأنى شخصية عنيدة قررت الإستمرار فى اضافة معالق القمح إلى ان دخل على زوجى و قالى : " بااااااااااااااس ، وقف يا عم الحاج ، الحكاية لها معيار مش جههجونى كدة "


أجبته بثقة شديدة : " طب ما انا عارفة "
ــ عارفة إيه
ـ ان القمح لازم يكون متماسك مش سائل
ــ اقرى على العلبة كام معلقة قمح على قد إيه ماية
ــ ما العلبة حضرتك رمتها
أصلنا بنحط القمح فى علب اللبن الصناعى إللى فضيت ، لأ خلوا بالكو بناتى بترضع طبيعى ، اللبن الصناعى كان لقمح المرحلة الأولى ابو من غير لبن ، اه ، أحسن حد يشاور عقله و يحسبها عليا مخالفة . .


و بما اننا بعد 72 ساعة ان شاء الله ح نكون كبرنا و ح نبدأ عهد جديد و شهر جديد و هو الشهر الـ 11 ــ ، عشان كدة بنعلنها بكل فخر اننا بنآكل قمح المرحلة الأولى بس أبو لبن ، و خلوا بالوا : القمح ده بلبن المتابعة ، مش لبن بقرى عشان إيه ؟! اكيد حفظتوا ان اللبن البقرى مش قبل ما البيبى يكمل سنة .
المهم دلقت القمح فى الببرونا المعلقة عشان أأكل "هوهوز" و "جى " . . و الحمد لله بعد رحلة كفاح عظيمة قدرت أخلص لهوهوز القمح بتاعها ، و قررت توجيه كافة الأسلحة لـ "جى " لإجبارها على أكل القمح طوعية و رغما عنها : ايوة الإتنين فى واحد ، و استعديت بأول سلاح و هو عربية الأطفال السينجل single و أجلست بها "جى " و إلتفت خلفى للأمساك بالببرونا لأدسها فى فمها . . ياللهول لقد اختفت "جى " !!!!!!!! اين ذهبت ؟!!!!!! و كيف اختفت ؟!!! ما هذا ؟! ماذا أسمع ؟!! اننى أسمع صوتها ، نعم ، هذا صوتها ، انها صرخة مدوية ، ماذا تفعل على الأرض . . و لماذا تصرخ ؟!!



يا ربى ، لقد سقطت من فوق السيارة ، لقد حاولت الفرار من القمح ؟!!! معتقدة ان اسلحتى هذه المرة لا مجال للفرار منها غير القفز من أعلى ؟!!!!!! لا يمكن ، فانها تأكله كل يوم ، و لها طرق مختلفة فى الفرار و لكن ليس بهذا الشكل . . ربما حاولت تطوير أدواتها الدفاعية .. أو ربما رأت شيئا على الأرض شجعها على القفز من السيارة .. ربما تكون قد سمعت عن رضيع زميل فر من احدى وجبات الطعام بهذه الطريقة ؟!!!
. . . و لم أعرف الرد ، و لم أدرى ماذا تخيلت لتقوم تجرى من فوق السيارة . . و لم اعرف حتى كيف وقعت ، فمن المفترض ان تسقط "جى " على وجهها ان كان الخطأ منى و لم احكم جلوسها ، لكنها سقطت على ظهرها و خبطت رأسها بالأرض ، انها وقعة قوية ، يجب ان أذهب بها إلى الطبيبة .


و رويت على الطيبية ما جرى ، ف فزعت بشدة و قالت لى انها أخطر انواع الوقعات ، و بدأت تدث الرعب فى نفسى قبل ان تكشف علي "جى " و أخذت تشرح لى ان عضم الرضع قبل ان تغلق رأسهم يكون ضعيفا و من الممكن ان يتحرك من مكانه بشكل قد يضغط على مخ الطفل و يسبب له العديد من المشاكل . . و بعد رحلة من التعذيب النفسى الذى مارسته مع الطبيبة قامت و بدأت تتفحص راس "جى" و هى تقص علينا ان احد الآباء قد جاءها باشعة رضيعه التى انبعجت رأسه فور حادثة سيارة تعرض لها و بعد عام وجدت ان رأسه ــ راس الرضيع طبعا مش الأب ، احسن تكون راسكم انبعجت هى كمان من كلامى ــ و بعد عام وجدت ان رأس الرضيع قد تم اعادة تشكيلها عندما بدأت تغلق و بدت فى أحسن حالاتها كأنه لم يدخل الحادثة و لم يسمع بها .


فى تلك الأثناء كانت الطبيب تتحسس رأس "جى" . . ثم أخبرتنى ان الحمد لله " جى " ليس بها اى مشاكل ، و أكدت لى ان اخطر مراحل السقوط هى السقوط على حافة مدببة حيث انها قد تدفع عضم جمجمة الصغير للداخل مما يضغط على المخ . . و شرحت لى انها مررت يدها على رأس "جى" بحثا عن وجود نتوء بها قد حدث نتيجة الواقعة . . و سألتنى هل اغمى عليها أو أرجعت ما فى بطنها من طعام ؟



فأجبتها انها بكت من اثر الواقعة و بدأنا نحاول ان نضحكها فضحكت و غرغرت غغغغغغغغغ ، و انهت الأمر بأن زغردت كمان ، لولولولولى


و الحمد لله بعد ما ان اطمأنت على "جى " جه الدور على "هوهوز" اللى بدأت تعيط ، فقررت أحطها فى عربية التوين twin و اتمشى بيها لحد ما تنام بفعل هزهزة العربية . . و قبل ان أصل إلى عربيتها علا صوت " هوهوز" بالبكاء ، فسرعان ما حملها زوجى بعربية التوين ، و بدأ يغلق عليها حزام العربية و فجأة صرخت ، و لم نعرف سبب الصراخ ، ماذا حدث لها هى الأخرى ، لماذا تصرخ بهذا العنفوان . . و تنبهنا إلا ان اصباعها الصغير قد حشر فى حزام العربة ، و قد أغلق زوجى عليه سوكت الحزام ، اسرعنا بوضع اصبعها تحت ماء الحنفية ، حتى هدأت " هوهوز" . . و بعرض الإصبع على الطبيبة قالت انه يجب وضع مرهم الـ " فيسودين " عليه لأن الجلد قد جلط .
و بعد عدة ايام شفى الإصبع بسلامة الله ، و انتهى الشهر العاشر بكل صعابه و كوارثه .
أدام الله علينا و عليكم الأيام ام من غير صعاب
و لكم تحياتى

الخميس، 17 يونيو 2010

أهم مشكلة للأم يحلها د.مدحت الزيات




ــ أشهر مشكلة تواجه الأم عندما تصرخ قائلة : " ابنى ما بيكولش "




و تتعدد الأسباب و الإضراب عن الطعام واحد و منها :
اولا :
ــ إذا كان وزن ابنك فى حدود الوزن الموجود فى جدول الأوزان أى أكثر بـ 2 كيلو مش مشكلة ، أقل 2 كيلو برضه آمان . . لأن ده بيكون بسبب الشقاوة و اللعب ، لكن أقل من كدة يبقى فى مشكلة عضوية : مثل الأنيميا ، ميكروب فى الأمعاء ، التهاب فى البول
ثانيا :
ــ هناك علاقة بين وزن الطفل و شهيته : فعندما يكون عمر الرضيع يوم واحد و حتى يتم سنته الأولى تكون شهيته جيدة ، لكن بعد سنة الأولى الشهية تكون ضعيفة حتى سبع سنوات .

و لحل مشكلة فقد الطفل للشهية يجب على الأهل ان يعودوا اولادهم من عمر عشرة أشهر ان يأكلوا بمفردهم بعض الأشياء البسيطة مثل البسكويت أو الجزر المقطع شرائح رفيعة

وجبة الإفطار لطفل عمره سنة تتكون من :
ــ الكورن فلكس باللبن
ــ أو فول مدمس مقشر و مهروس مع صفار بيضة مهروسة جيدا مع جبنة نستو مع قلب العيش الفينو المقطع صغير جدا
ــ أما عن طريقة الأكل ما بين سنة و خمس سنوات يمكنكم سماعها على الرابط التالى

 http://youtu.be/mJAQ5r55AOE

و معها اجبابات على الأسئلة التالية من الدكتور مدحت الزيات :
ــ هل هناك فرق بين أطفال الأنابيب و الأطفال الطبيعين فى الأكل ؟
ــ ابنى عنده اربعين يوم ، الصفرا عنده عمالة تعلا ، اوقف الرضاعة الطبيعية ؟
ــ الخنفرة عند الرضع شئ طبيعى ؟
ــ ابنى لوزه كبيرة أشلهمله ؟
و لكم تحياتى
مامى لأول مرة
https://www.youtube.com/user/dahshan2007/

الثلاثاء، 15 يونيو 2010

النمو العقلى للرضع

ــ ابنى بيتعامل معايا على انى تيتينة ، اعمل إيه ؟!!!
ــ ابنى عنده سنتين و ما بيقولش غير ماما و بابا

ــ ابنتى ترفض الحضانة ، و ترفض ابنى الجديد

ــ إزاى أخلى ابنى لا يغير من أخيه الصغير
ــ ابنى لا ينتبه للغرباء و تأخر فى الكلام ، و حاسة عن عنده
عادات غريبة فى مشاهدة الأشياء اعمل معاه إيه

لسماع اجابات تلك الأسئلة من الدكتور إيهاب عيد استشارى

الطب سلوكى اضغط على الرابط التالى

http://youtu.be/bJzclKXPyko



أما عن أنواع للتوحد و علاجه يشرحها الدكتور ايهاب عيد استشارى السلوك و الصحة العامة و الذى يجيب كذلك على الأسئلة التالية
ــ ابنى عنيف فى كل تصرفاته . . ماذا أفعل معه خاصة عندما يضرب رأسه فى الأرض ؟
ــ ابنة أخويا عنده سنتين و نصف ، و أى شئ نقول عليها لأ هى تقول آه . . نعمل إيه معاها ؟
لسماع الشرح و الاجابات اضغط على هذا الرابط
http://youtu.be/Idj82BP08jQ
و لكم تحياتى
مامى لأول مرة
http://el7adsa-incident.blogspot.com/

الأحد، 13 يونيو 2010

إزاى تشترى لعبة لإبنك

إرشادات هامة يجب اتباعهاعند شراء اللعب حتى يستفيد طفلك منها أكبر فائدة ممكنة إلا ان كنت شاريها لنفسك و عامل انها لإبنك ــ الإسم لطوبة و الفعل لأمشير ـ :

ــ اللعب من يوم إلي 6 شهور:

1.اللون الأحمر وهو عادة أول لون يستطيع الرضيع رؤيته لذلك يفضل شراء ألعاب تحتوى على اللون الأحمر و تنسى خالص مصارعة التيران إللى عقدتك فى اللون .
2. الرضع يستطيعون تفسير الأصوات بشكل سليم فمن المفيد منذ اليوم الأول وضع فوق فراشهم لعب موسيقية أو أى لعبة تخرج صوتا بشرط ان تكون زاهية الألوان . . فكلما كان محيط الطفل غنياً منذ أيامه الأولي كلما زادت فرصة نموه العقلي
3.وبحلول الشهر الثالث يستطيع الرضيع تمييز لعبته المفضلة وسيحاول الوصول إليها أو الإمساك بها ومن المهم أن تكون تلك الألعاب بألوان مختلفة وملمس مختلف وأشكال مختلفة لتنمية حواسه في التمييز بين الأشياء المختلفة عن طريق البصر.

اللعب من "7" إلي 12 شهرا:
1.يتعرف الطفل علي بعض الأشياء والأشخاص المألوفين لديه وبالأكثر يتعرف على اللعب ، لأنه بيكتشف بعد شوية ان اللعبة هى إللى بقياله
2. يفضل الأطفال اللعب التي تجر أو ترص أو تسير إلي الخلف والأمام أو أنواع اللعب التي تساعد علي التوفيق بين الألوان والأشكال
3. كما يفضل كذلك الكتب المصنوعة من القماش أو البلاستيك والتي تتميز بالصور الكبيرة البسيطة.

هذا في السنة الأولى من عمر طفلك أما إبتداءًا من السنة الثانية فالأمر مختلف تماما

لعب العام الثانى من عمر ابنكم المبجل و حتى العام الخامس فهى :
1. القصص القصيرة واللوح والطباشير وتركيب المكعبات وأقلام التلوين غير السامة وصندوق الرمل والزحليقة والدراجات ثلاثية العجلات‏ ؛ كلها تناسب الطفل في المرحلة العمرية من 2‏ إلي‏5‏ سنوات‏

من سن 5 لـ 9 سنوات :
يفضل الأطفال اللعب التي تنمي الذكاء والإبداع الحمد لله مش طالع لحد فى العيلة . . و من تلك الألعاب أدوات الطبيب أوالممرضة أو أدوات الطهى أو الميكانو أوالدراجات والقطار الكهربي‏ ونط الحبل وكرة القدم‏ وتركيب الألعاب ؛ فكلها تناسب الطفل من سن‏5‏ إلي‏9‏ سنوات‏ .

وعندما يبلغ الطفل عامه العاشر وحتى الرابع عشر :
تناسبه الألعاب العلمية الإبداعية مثل ألعاب الكمبيوتر وممارسة الرياضة وجمع الصور والنقود والطوابع‏‏ .

ليكون طفلك عبقرياً :
إن علوم الحياة والتعمق فيها وإزاحة القشور عنها هدف للطفل من اللعب ، ف الألعاب هي التي تساعده علي بناء منزل والخوف من هدمه و هذا يحفز بداخله معنى الإنجاز،‏ فقد يكون مهندسا أو عبقريا وعلي الأهل ألا يعتبروا ذلك لهوا‏، فمن أسس الصحة النفسية ترك الصغار للهو وتدمير اللعب أحيانا ليتعلموا أن الابتكار والاحتفاظ بممتلكاتهم من الأهداف السامية في الحياة.
ــ كما أن جذب الطفل خمس دقائق للنظر إلى السماء يمنحه فرصة طرح الأسئلة للوصول إلى مكنون الوجود . . و ما يصحش ان الأب أو الأم يتهربوا من الإجابة عليه مهما كان الأسئلة ساذجة ــ هو يعنى ح يجيبه من برة
ــ للكتاب دور مؤثر في حياة الابن ويجب أن تحرص الأم علي قراءة كتاب أمامه لتكون قدوة له‏.
ــ وينصح أطباء علم النفس بعدم تحديد هدف الطفل بأن نقول له ‏" لتصبح كذا مثل أبيك أو عمك" بل علينا ترك الطفل يحلم بأن يكون كما يريد ليسعى لتحقيق هدفه‏ . . و احمدوا ربنا انه مش ح يطلع زى حد تعرفوه، لأن ده ح يضمن لبلدنا مستقبل أفضل
و لكم تحياتى
مامى لأول مرة

http://el7adsa-incident.blogspot.com/

الجمعة، 11 يونيو 2010

ابنتى لا تنام






كنت أتعجب بشدة من عدم نوم "جى " بشكل مستمر ، بينما أختها و توأمتها "هوهوز" فقد كانت مواعيد نومها منتظمة كأنها موظف حكومى يخشى خصم خمسة صاغ من راتبه ، و انتوا بقى عارفين الخمسة صاغ تعمل إيه ، تجيب رغيف عيش بحاله ، رغيف عيش مشلتت من أبو مسامير و دببيس
. . و حرصا من "هوهوز" على الخمسة صاع فقد كانت ساعات نومها شبه ثابتة ، ده كان و ياما كان و إللى فات بقى ذكريات . . ذكريات لحد يوم التلات الماضى . . حيث أعلنت "هوهوز" عن حالة اضراب عامة عن النوم . . ليه يا ترى ؟!!! ممكن يكون اتسرب لها علم بأنهم لغوا دايرة مصطفى بكرى الإنتخابية ؛ و تضامنا معاه قررت الإضراب عن النوم . . ما يتهيقليش لأن اضرابها بدأ قبل اضراب بكرى . . امال حصل إيه عشان تستيقظ الساعة الرابعة فجرا و ترفض أى محاولات لتنويمها ، رغم انى بدأت اهددهها فى سيارتها بالطريقة التى تحبها و تساعدها على النوم . . و مع ذلك رفضت النوم و بدأت تبكى . . ارضعتها إلا انها أعلنت رفضها ، وضعت التيتينة فى فمها فهى تخفف عنها آلام التسنين . . حملتها و ضمتها و بدأت أهدهدها حتى تنام إلا انها أبت بإصرار و عنف . ظل بنا الحال على هذا المنوال حتى الساعة الثامنة صباحا ، كنت اسطحب فيها العربة التى تحمل "هوهوز" معى إلى المطبخ لأعد شوربة الخضار التى ترفض بناتى أكلها ، و بعد ان كنت اعطيها لهما فى الغذاء حولت الجدول و أصبحت أقدمها لهما فى الأفطار لأنى لاحظت انهما تستيقظان فى حالة جوع شديد. . . انتهيت من اعداد الشوربة و مازالت "هوهوز " تبكى . . خطر ببالى ان البيجاما التى ترتديها ربما تكون من النوع الرخيص المخلوط بخيوط صناعية . . لماذا خطر ببالى هذا الأمر ؟؟!! لأنها هدية من قريبتنا السمراء ــ سيدة توم ، توم من ؟ توم صديق جيرى . . سمعاكو بتقول : " آآآآآآآآآآآه ، فهمنا المؤامرة "
-->





بس لا و الله مش زى ما انتوا فاهمين ، صحيح انا لا أثق كثيرا بهدايا قريبتنا السمراء، لا ، ليس لسوء نية فيها و انما لضعف معلوماتها العامة ، فهى لا تعرف ان الرضيع يجب ان يرتدى الأقطان فقط و لا مجال للبوليست او السنسيزر ، و على الفور قمت بتغير البيبجاما لـ " هوهوز " فهدأت بعض الشئ و صمتت ، لتعود بعد نصف ساعة تبكى . . تذكرت آلام التسنين ، ما احنا دلوقتى بنسنن عقبال عند إللى سنانهم وقعت ، ده حتى الدكتورة كتبتلنا على كاتفلام ، و ده أقوى انواع المسكنات . . و بالفعل ، لأ ما حطتش كتافلام عشان ده مختص بالأنياب و وجعها . . احنا لسة فى مرحلة بدرى شوية ، حطيت جل الأسنان إللى بيخفف الألم . . الغريب ان "هوهوز" فضلت تعيط ، و هنا تأكد ظنى ، أن أن آآآآآآآآآآآآآآن ــ دى موسيقى تصويرية ــ تأكد ظنى ان البيجامة الهدية هى السبب ، هى إللى طيرت النوم من عين "هوهوز" و البنت مش عارفة تنام مع انها من الفجر بتفرك فى عينيها و ده معناه انها عايزة تنام . . لكن المسكينة كل ما تيجى تغمض تلاقى حاجة تشكها ، فتسألها انتى مين ؟؟؟؟؟؟؟؟ انا البيجامة الملعونة ، قريبيتكم السمراء صديقة توم موصيانى ان اللى يلبسنى ما ينمش .


لكن هذا الحوار تغير بعودة "هوهوز" للبكاء مرة ثانية ، فقررت أن أطعمها ، و الفطار النهاردة مش ح اقولكم بقى حاجة ربنا الأعلم بيها ، لأ انتوا فكرينه زى ما انا قلتلكم شربة خضار ، no ، شربة الخضار دى فى الايام التقليدية الاوريجينال ، لكن النهاردة يوم سوبر ن النهاردة يوم البيضة . . و يوم البيضة بيقى غامق على البنات ، بأسلق لهم كوسة و أهرس فيها صفار البيضة المسلوقة . . أول ما قربت المعلقة من فم "هوهوز " تفتكروا حصل إيه ؟ ؟ لأ ، مش زى ما قولتوا ، الحمد لله كلت ، كلت كلت و بعد رابع معلقة الظاهر استوعبت الطعم و رفضت تآكل ، فكملتلها أكلها رضاعة ، و هنا وجدتها تسترخى بشدة ، حتى نامت ، و وضعتها فى سريرها . إلى ان جاء يوم السبت ، لأ طبعا ما فضلتش نايمة لحد يوم السبت ، انا باكتب الأيام إللى فيها معاناة ورا بعض ن عشان تخدوا الجرعة كاملة . . بعد يوم التلات جاه السبت ، و كأن "هوهوز" على موعد مع يوم البيضة ، أصل انا بدى صفار البيضة مرتين فى الأسبوع ـ فاستيقظت كذلك فى نفس الميعاد و هو الرابعة فجرا ، و بعد الرضاعة اعتقدت انها ستنام إلا انها هبت و أعلنت حالة العصيان على النوم رغم انها كانت تفرك عينيها بقوة رغبة فى النوم ، و اعتقدت ان السبب هو الحر ، فأجلستها الى جوار البلاكونة و انا اهدهدها بسيارتها ، لكنها لم تنام . . قررت ان اخرج بها الى البلاكونة و أخذت اقرأ بصوت مسموع بعض آيات من القرآن الكريم ، استرخت إلا انها لم تنم . . و بعدين بقى ؟؟؟ أنا ورايا حاجات كتير عايزة تتعمل . . بصى يا "هوهوز" على العصافير ، و لم تبالى بالعصافير ، أجلستها على الأرض لتلعب بلعبها ، لعبت لمدة سبع دقائق ثم أعلنت عن الضيق . . هنا أرهق اباها الذى لم يشاركنا أى شئ و الحمد لله ، لكن هو تعب ، من إيه ؟!!! كان يقوم بأشياء خاصة على جهاز الكبمبيوتر ، و قرر ان ينام . . اوجه كل الشكر لزوجى العزيز الذى قرر ان يحافظ على مكان "هوهوز" فى النوم ، و خاف ان دورها يروح عليها فدخل ينام مكانها و سابنا مع بعض نتفلق . .
بقيت أهدده "هوهوز" حتى غفت ، قولت هيهههههههههههههه ، لأ ما صحيتش من صوتى ، اصل انا قلتها فى سرى ، و كتمت فرحتى فى قلبى ، و شلتها بالراحة و حطيتها فى سريرها ، بعد نص ساعة صحيت ، إجرى اجرى اجرى ، هدهديها بسرعة قبل ما تصحى اختها . . و هوب انقضيت عليها ، حملتها ، و فى ثانية وضعتها فى الشبكة قصدى فى العربية عشان أهددها تانى مرة عشان البيه لو ما نمش الحق عليه ، ينما على مهله امااااااااااااااال ايه . . و بدأت اعيد الكرة .
نمت بعد معاناة ، ساعة كمان ، الحمد لله هو حد لاقى . . صحيت بعد ساعة و بدأنا المعاناة العادية فى الأيام اللوزعية ، لكن المعناة زادت شوية لأن "هوهوز" مانمتش طول الليل. . و فضل الموضوع يتكرر لحد امبارح و اكتشفنا ان جل الأسنان هو الحل . . لا لا لا ، ده مش شعارات سياسة ، أصل الحكومة عندها مشكلة مع كلمة الحل . . سيبوكوا من الحكومة و خلوكوا معايا فى سنان "هوهوز" إللى ما بتخليهاش تعرف تنام ، اول ما حطينا الجل و كانه سحر مشى و توغل و تدفق و ريحها و ريحنا و دى كانت الراوية اللى بطلها جل السنان بقلم هوهوز العجيب


كل الاحداث دى كان بتاريخ 19 مايو 2010
معلش اتاخرت شوية . . ما انتوا عارفين الموصلات صعبة ازاى
هذه القصة كتبتها : السيناريست / سمر العزب
و لكم تحياتى
مامى لأول مرة
http://la3ya3nyno.blogspot.com/

الأربعاء، 9 يونيو 2010

S.M.S لدكتور مدحت الزيات

ــ ابنى عنده عيب خلقى فى مجرى البول امتى أعمله العملية مع ان عنده سبع شهور؟
ــ بنتى عندها 13 شهر و لسانها ملتصق ، لازم اعملها عملية ؟
ــ اطعام ابنى بزيد كبد الحوت خطر ؟
ــ ابنى عنده خمس شهور بقاله يومين بيرجع و عنده اسهال أعمله إيه ؟
ــ بنتى بياض عنيها لونه أزرق و رجليها اتكسرت مرتين و عمره سنتين و شهرين و الدكتور قالى ان عضمها زجاجى
يمكنكم سماع إجابات الدكتور مدحت الزيات على هذا الرابط
http://www.mediafire.com/?wmjy4wjmxue

ــ ابنى عنده كيس دهنى جمب عينه أعمله العملية دلوقتى مع انه عنده سنتين
ــ ابنى من يوم ما أتولد و حرارته عالية تتراوح ما بين 37و نص و تصل لـ 38 و نص . . اتصرف إزاى
ــ ابنى عمره سنة و ثلاثة شهور لا يعمل تواليت إلا بالملين و مع ذلك بيكون عنده التهاب شديد
ــ بنتى عندها سنة و شهرين بيجيلها اسهال خمس مرات فى اليوم ، و رافضة الأكل تماما و عايزة ترضع و بس أعمال معاها إيه ؟
ــ ابنى بيجيله اسهال لو كل أى حاجة من منتجات الألبان و زبادى او أى أكل معمول بالسمنة ؟ ده إيه سببه ؟
و برضه الإجابات دى ممكن تسمعوها على الرابط ده
http://www.mediafire.com/?iky11zmnyhn

و لكم تحياتى
مامى لأول مرة
http://la3ya3nyno.blogspot.com/

الجمعة، 4 يونيو 2010

الرضيع بيلعب

تتنوع و تختلف أشكال و أنواع اللعب التى يمكن أن ألعبها مع الرضيع . . فهى تتغير من شهر لشهر و ده طبعا لنمو حواس الرضيع ، و اختلاف مستوى ذكاءه إللى غالبا بتكون أفضل من المحيطين به ، لأ طبعا ما أقصدش الأم أو الأب أقصد أبوين آخرين . . لكن من المؤكد ان هناك ألعاب تعليمية تكسب الرضيع مهارة حل المشكلات و فك الألغاز ، و تنمي لديه السمع والإدراك كما تقوى مهاراته الاجتماعية والتفاعلية ــ للتفاعل مع الناس ــ . . فلعب الأبوان مع طفلهما وهما قريبان منه و مدحهم إياه أمر يساعد في إشعار الطفل بأنه محبوب و هذا الشعور يزيد من إحساس الطفل بالمبادرة والتفاعل مع الآخرين .


و من تلك الألعاب :


ــ استخدام الألعاب التى تخرج صوتا فى الشهرين الأولين ، مما يقوى لدي الرضيع حاسة السمع و الإدراك ، يعنى زى الشخشيخة ، و الساقية إللى بتلف و تطلع صوت ، او حتى هاتوا إزازة ماية معدنية و حطوا فيها شوية رز و شخشخوا بيها ، مناداة الرضيع من خلف شئ حتى يتعرف على أصواتكم ، و طبعا بلاش حكاية " بخ " . . الرضيع بيبقى رقق جدا ً و مش حمل هزار فايخ ممكن يخضه بسهولة .


ــ فى شهره الثالث يفضل استخدام الألعاب ذات اللون الأحمر ، فهى أول شئ تلفت نظر الرضيع
ــ و فى الشهور ارابع و الخامس و السادس تستخدام الألعاب بها كل الألوان و خاصة ألوان الطيف ، و ياريت لو بتدور و بتلف عشان نقوى عنده حاسة البصر و الملاحظة


و عن الألعاب التى تنمى الذكاء و المهارات العقلية :


ــ توضع قطعة من الكورن فلكس أو الخبز المحمص في فوهة زجاجة ذات فتحة صغيرة ونسيبها للبىبي و هو يحاول يخرجها . . و طبعا لو هو مش طالع لبابا و ماما ح يعرف لوحده ان كل إللى عليه قلب الزجاجة لتخرج قطعة الخبز . . وعندما يجد الحل سيبدأ في إدخال الكرن فلكس وإخراجها مرات ومرات.. لكان لو واخد بابا و ماما ذكائهم ح يآكل الركرن فلكس و م ح يلاقى حاجة يدخلها فى الازازة .


ــ الأكل بالملعقة من المهارات الاجتماعية المهمة للصغار و من الممكن ان يتعلمها عن طريق اللعب . . ادى ابنك مجموعة ملاعق ليلعب بها ، مرة ح يحطها بالمقلوب و مرة بالمعدول و عشرين مرة ح تقع منه علي الأرض ، لكن الأكيد ان فى مرة ح يقدر يحط معلقة فى بقه بشكل صح ، و هنا أن أن أنننننننننننننن تبدأ الخطة ، لأ ما تخضوهوش ، لكن أول ما يحط المعلقة مضبوطة فى بقه ضعوا له قطعة صغيرة من الموز المهروس علي الملعقة ، و أدخلوا الملعقة في فمه برفق ثم استمروا في هذه اللعبة بأنواع مختلفة من الأطعمة وستجدونه سرعان ما يتعلم أن يضع الملعقة في طبق بلا أطعمة ويطعم بها نفسه.


ــ ألعاب المشي مش ح تبدا إلا لما ابنك يمشى ، و وقتها بس ؛ تقدر فى بدأ المخطط الرهيب مع طفلك بأساليب عديدة بمجرد إتقانه المشي بمفرده و كلها ح تساعد علي مرونة وتنسيق عضلاته . . تبدأ الفكرة اننا نساعدوه أن يمشي باتجاهات مختلفة يعنى للجنب ، للخلف أوللأمام ، كأنه بيسوق عربية فى شوارعنا المزدحمة ، باختصار فوضى المرور تبدأ من الصغر .. ممكن تمدوا ذراعيكم إلي الإمام أثناء المشي أو المشي بسرعة ثم ببطء و طبعا ح يضطر الطفل لتقليدكم لحد ما يلاقى حد تانى يقلده .






أهم من تدريب الطفل المستمر على هذه المهارت هو أن نحتضنه و نظهر له الحب عند نجاحه في أداء أي هذه الألعاب


ان الرضيع يعطيكم فرصة ذهبية للتقرب منه ، فأنت من يحتاج للعب معه ، اما هو فبامكانه ان يوجد لنفسه ألعابه الخاصة . . أن جميع الحركات التي يقوم بها الرضيع في عامه الأول تكون ألعاب استكشافية تثيره وتمتعه . فمحاولة وضعه إصبع قدمه في فمه ان كانت تبدو محاولة بلهاء بالنسبة للكبار إلا أنها تكون بمثابة تمرين علي التنسيق بين اليد والعين ورغم أنه قد لا ينجح عدة مرات إلا أنه يحاول تعديل الخطأ الذي يقع فيه لكي يكمل ليثبت قوة إرادته، فينجح في تلك المهمة الشيّقة.


كما يستطيع الرضيع ابتكار ألعاب فردية ليقوم بها عندما يكون بمفرده لاكتشاف العالم من حوله ويجب علي الأبوين إعطاء طفلهما وقتاً خاصاً به دون تدخل منهما حيث يعتمد فيه الطفل علي عقله لكي يفهم الأشياء وهو ما ينمي بشكل كبير حواسه ومنظوره للأشياء وفائدتها. بشرط ان يكون تحت مراقبتهما الغير مرئية منه ــ الطفل طبعا ــ


و لكم تحياتى
مامى لأول مرة
http://la3ya3nyno.blogspot.com/

الثلاثاء، 1 يونيو 2010

الشعور بالذنب عند الأطفال

تتصاعد خلافات الزوجين أمام الطفل مما ينزع الإحساس بالأمان من الأطفال ، لكن ان يصل الأمر بمشاجرة الأب و الأم حول الطفل و امام الطفل فهذا يخلق نوع من الشعور بالذنب عند الطفل نفسه تجاه أبويه و هذا يسبب التبول اللارادى أو السرقة أو الكذب . . . إلخ
الشعور بالذنب ــ عند طفلك - مامى لأول مرة

من علامات توتر علاقنا بأطفالنا ؟ و متى أخبر ابنى اننى سأتزوج بعد طلاقى من ابيه ؟
يمكنكم سماع هذه الموضوعات على الرابط التالى
http://youtu.be/5Zd3J7Bw9s4
وتنمية خلايا المخ تبدأ بنوعية الطعام الذى أقدمه لأبنى و منه الكوسة و القرع و المنتجات البحرية . . فهى تنمى خلايا المخ
اما عن الأعراض التى تبدو لنا غير طبيعية لدى الأطفال و لكنها طبيعية جدا منها : مص الأكل ، تقليد الطفل الأصغر فى عمل التواليت ، النظر إلى المروحة و متابعتها . . . إلخ
لمعرفة المزيد عن هذا الموضوع و غيره مما يساعدك على التخلص من سلوك ابنك و علاج اخطاءه اضغط على هذا الرابط
موضوعات لها  صلة 
http://mamy1st.blogspot.com/2010/05/blog-post_8290.html
و لكم تحياتى
مامى لأول مرة

midlle ad